رقائق

يوم المرأة العالمي

هو أنا الحقيقة مش عارف ليه بعض البنات مصرّة تقلب يوم "المرأة" العالمي ليوم الشرشحة والتنظير والتقزيم والسب للراجل.. هو أنا مش فاهم إيه العلاقة.. هي المرأة بتاعتكم متعرفش تحتفل غير لمّا تحقّر من قدر الرجل؟
أنا عن نفسي بشوف يوم المرأة العالمي ده في أمي وفي أختي وفي مراتي لما ربنا يعينها وتيجي بالسلامة - إن جت يعني- .. فإحنا كرجالة والله فرحانين ومبسوطين بالنماذج إللي بتشرفنا وبتحسّسنا إن لسه في أمل في مجتمع صالح فيه قطبين ناضجين ومؤثرين دينيا وأخلاقيا ومُجتمعيا..

امّا إن بعض البنات بتاخد يوم المرأة العالمي ده ناحية المساواة بين الراجل والمرأة ومعرفش الحرية الكاملة للست ومعرفش عدم الوصايا عليه وانكار القوامة وبالمرة إنكار الحجاب وانكار كل ما يمكن إنكاره لمجرد إنه مش على هوى بعض الكلبولات والفيمنيستات العرب..

فإحنا قولنا 100 مرة إن إللي عنده مشكلة فيكم مع التشريع الديني فربنا يتولاه.. ميصدّعناش.. وإللي عنده فيكم مشكلة مع الذكور تنتقي الراجل اللي تحب تكمل حياتها معاه بعناية.. أو بلاش تنتقي خالص لو مش شايفة رجالة يعني.. والله يبقى اريح للجميع.. وإللي عنده مشكلة فيكم مع المجتمع فإحنا كمان عندنا مشاكل مع المجتمع.. فخلونا نحلّوا مشاكلنا بدون حالة الاستقطاب المبنية على النوع الاجتماعي دي.. معرفش هتودينا لفين..

لو عندكم مشاكل زي الت7ـرش وختان الإناث وزي قوانين الأحوال الشخصية وزي قانون العمل وزي قوانين الا8ـتصاب والكلام ده فالمشاكل دي سببها الأول هو غياب القانون والعدالة القانونية وسيادة القانون.. بدليل إن أعلى معدلات التحرش والاغتصاب وزواج الأطفال وغيره كلها بتحصل في بلاد بيغيب فيها القانون وبتغيب فيها سيادة الدولة.. فبما إن عندكم دلوقتي ممثلات نيابيات عنكم.. تقدروا - بمساعدتنا - تلاقوا حلول جذرية ليها..

أمّا بقى لو زعلانين من سخرية بعض الرجالة من يومكم العالمي زي يوم الولية العالمي ويوم "مالك - مفيش" العالمي ويوم الاهتمام مبيتطلبش العالمي.. وغيره من الأيام.. فيعنى نرجوا من سيادتكم تتحملونا بصدر رحب وتاخدوا الموضوع بهزار لأن الرجالة مش لاقيين أيام ولا أعياد تخصّهم غير عيد العُمّــال.. يعني يوم بيفكره وبينكد عليه أكتر ما بيفرح بيه وغالباً بينام فيه طول اليوم عشان ينسى أحزانه.. فده نوع من أنواع الحقد الحميد مش أكتر

كُل عام وأنتم بخير بمناسبة يوم المرأة العالمي المبارك.. أعاده الله عليكن بالخير والدايت واليمن والبركات.