ديماً كنت بتحيز لرأيي اللي شايفه هو الصح الوحيد ، انتوا ليه مش شايفين اللي انا شايفه !! هتجنن !!
انا شايف كده يبقى انت لازم تشوف كده زيي !! كان عندي 18 سنة و لما احب اقول رأيي في حاجة اقول 90٪ من الناس كذا او 95٪ من الناس بيعملوا كده
بسم الله ما شاء الله عليا جهاز تعبئة و احصاء انا!!!! ...كل استطلاعات الرأي عندي كل احداث مصر المحروسة عندي لو فيه فنان و لا مذيع بطلت اتابعه يبقى هو راحت عليه ...و لو حد عاجبني يبقى هو متميز و ناجح و هينجح زيادة
انا بس اللي بحدد ايه الصح و ايه الغلط .....حتى !!!
قرأت ...هو انت مكنتش بتقرأ؟
لا المصيبة اني كنت بقرأ بس بقرأ بدون وعي بقرأ و بعتبر اللي قريته حق و واقع ...او بقرأ و بنتقد من غير ما يكون عندي اصلاً خلفية يعني ايه انقد ....الكلام معقد ؟
ابسطهولكم
تخيل واحد بيسمع من ساعة ما اتولد مطرب من بتوع دلوقتي عمره ما سمع انشاد النقشبندي مثلاً .....هيكون معاييره ايه في الاختيار؟ و في الجمال ؟ و في الامكانيات؟
طيب تخيل واحد لا يفقه شئ عن الفيزياء و حد جه قاله الارض مسطحة و الارض ثابتة و بيثبتله ده بانه يقوله تخيل لو الارض بتلف حوالين نفسها ليه الطيارة محتاجة تمشي لقدام ما تطلع و تقف مكانها !!!!
حد بالوعي ده فكرك ممكن يفهم ؟ عمره ما هيفهم غير لو حد مثلاً اداله مثل زي ليه الدبانة لما بتكون جوه عربية سرعتها 100 كم و تيجي تطير من على ايدك ما بتلبسش في الازاز و تعمل فسشششوك !!!
لما بدأت اقرأ كنت مغرور بقراءتي ناسي خالص ان اللي كاتب بشر زيي و معظم البشر بينقلوا وجهة نظرهم مش بينقلوا الواقع
اقرا التاريخ في اي دولة هتلاقيه مجرد وجهة نظر للي كتب التاريخ ده ديما اهل البلد هيكونوا ابطال ما بيغلطوش ابطال في الانتصار و حتى في النكسة و الهزيمة !!
الناس اللي بتقول #الفلسطنيين باعوا ارضهم هم اصلاً مقراوش و لا يعرفوا حاجة عن القضية و لو قراوا مكانوش قالوا كلامهم ده
بدأت اسكت شوية اقرأ و اتفرج ...و ما انظرش ...اسمع من ده و ده و ده و ده ... اضحك على ثقة الناس في كلامهم و هو غلط بس اضحك في سري
لقيت ان التعليم اللي اتعلمته كان مهم بغض النظر عن فشل المنظومة ...لكن معرفتي بالبايولوجي خلتني ماخدش على قفايه و اصدق جهاز الكفتة
معرفتي بالفيزيا خلتيني ما اصدقش بتوع الطاقة
معرفتي باللغة خلتني افهم دين و مش اي حد يفتي و يقول انا مفكر اسلامي و لا حتى مستشرق ياكل نفوخي بكلمتين
عشان يكون عندك فهم لازم ما تبطلش اطلاع
لكن لما يكون مصدرك واحد او تخيل مصدرك يكون التليفيزيون و لا المسلسل الفلاني و تطلع مصدق نفسك ان هي دي الدنيا اللي انت عايش فيها
فما تلومش الا نفسك و متزعلش لما تبقى عامل زي بتاع الارض المسطحة ...مش فاهم و عايز يعمل نفسه فاهم
انا خدت اكتر من 20 سنة عقبال ما فهمت يعني ايه اقول رأي مبني على فهم مش حفظ
خليك فاهم متبقاش حلنفسي
#Ghazaunderattack
اللهم انصر اهلنا في فلسطين قولوا آمين
#كلام_لنفسي
أنت تقرأ
رقائق
Non-Fictionمقولات، حكم، خواطر، نصائح، عادات، عبادات، علوم .. الخ كل شيئ اعجبني لم تكتبه يدي بل رأيته أضعه هنا فالشكر لقائلها/لقائلتها 💜
