رقائق

نظرية التطور و الصدفة !

- بص يا ابني.. مفيش حاجه اسمها احنا بنتكلم كلام علمي بعيداً عن الدين.. لو العلم قال رأي والدين قال رأي، ماينفعش تؤمن بالرأيين.. يا تؤمن بالدين وتكذب العلم.. يا تكذب الدين وتؤمن بالعلم..

- وعموماً كل العلم المُثبَت مش هتلاقي معاه أي تعارض مع الدين إطلاقاً.. بالعكس هتلاقي الدين بيكمل العلم.. يعني انا على مدى سنين دراستي ماشوفتش حقيقة علمية واحدة اتعارضت مع الدين.. بالعكس والله الواحد كان بيشوف عظمة ربنا في كل كلمة بيقرأها..

- عشان كدا هما مش بيلعبوا إلا على العلم الغيبي، اللي مش هتوصل له بدليل ملموس.. من الآخر انا معايا نظرية مش هعرف أثبت صحتها.. بس حاول انت تثبت إنها غلط.. أو تثبت نظرية أصح منها..

- وطبعاً انت مش هترجع بالزمن عشان تشوف سيدنا أدم وهو بيتخلق، ولا عشان تشوف البكتيريا وهي بتتحول لإنسان.. انت هتوصل للإجابة بطريقة من اتنين.. ممكن حد يحكيلك اللي حصل.. أو ممكن توصل للإجابة بمخك..

- ممكن يحكيلك حد كان حاضر الخلق، بل هو الخالق ذاته.. قال -سبحانه- : "ولقد خلقنا الإنسان من سلالة من طين ثم جعلناه نطفة في قرار مكين".. وممكن واحد زي داروين ولا لين مارجوليس ولا أي حد من اللي قالوا إن الإنسان أصله قرد ولا سمكة ولا خلية وحيدة يحكولك اللي حصل!

- ساعتها من غير تفكير هتصدق ربنا وهتؤمن إن هو الخالق.. طاب لو قولت لأ انا مقتنع بنظرية التطور؟ خلاص يبقى انت مش مؤمن بخلق سيدنا آدم.. يعني ربنا بيقولك "ولقد خلقنا الإنسان..." وانت بتقول لأ معلش انا مش مصدق الكلام دا.. انا مصدق كلام داروين..
مفيش مجال إنك تؤمن بالاتنين.. مستحيل.. هو حدث واحد حصل بطريقة واحده..

- طاب لو آمنت إن ربنا اللي خلق بس لسه عندك شوية شك؟ هنا هتحكم عقلك.. هتطلع تبص من البلكونة على الشمس والقمر والسما والسحاب.. وتبص على الناس وهي ماشيه في الشارع.. وبعدين تتفرجلك على فيديو تشريح لأي عضو في جسم الإنسان، وليكن العين مثلاً.. وتشوف عظمة الكون وعظمة تركيب جسم الإنسان..

- والله لو مخك بعد كل دا وصلك إن الكون دا كله اتوجد بالصدفة، وإن الإنسان غُبار كوني.. تبقى متخلف، وخسارة فيك النصحية، وتستاهل اللي هيجرالك لما تقابل اللي خلقك ويسألك ازاي آمنت إن بكتيريا هي اللي خلقتك وما آمنتش بيا!

- بالنسبة للإسبتالية.. فـ البنت عماله تحزق طول الحلقة عشان تثبت إن أصلنا خلية وحيدة والخلية دي انقسمت وكوّنت باقي الجسم..
والحقيقة انا مش فاكر الهستولوجي أوي.. لكن فاكر إن جسم الإنسان فيه أكتر من ٢٠٠ نوع من الخلايا مختلفين في الشكل والحجم والتركيب والوظيفة..

- فـ السؤال البديهي اللي هييجي في دماغ أي حد هو : باقي الخلايا دي اتوجدت ازاي؟ الخلايا العصبية مثلاً؟ خلايا الكبد؟ الكلى؟ العظام؟ خلايا الدم بأنواعها؟