رقائق

قاعدة العشرين ساعة

في أبحاث ودراسات بتقول إن الإنسان عشان يبقى خبير في مجال معين أو مُلم بموضوع بشكل كامل لحد الاحتراف .. فهو محتاج 20.000 ساعة..
ودي الحاجة اللي معظمنا بيقوم بيها فعليا في مجال شغله أو تخصصه..
إنما هل لو انا محتاج أتعلم حاجة جانبية أو أبقى كويس في حاجة محتاج 20 ألف ساعة؟ وهل كل حاجة في حياتنا محتاجة اننا نبقوا كلنا خبراء ومتمرسين ومحترفين فيها؟

الإجابة لأ..
في دراسات كتيرة بتقول إن الإنسان ممكن في 20 ساعة بس يتعلم حاجة جديدة ويكون كويس فيها.. وبقول كويس مش علامة!
في ناس عايزة تتعلم السواقة.. تتعلم أساسيات الخط العربي.. تتعلم العزف على الجيتار أو العود أو البيانو.. ناس عايزة تتعلم فن الخطابة والتحدث أمام الجمهور.. في ناس ممكن تتعلم الخياطة أو التريكو أو الطبخ.. وكل ده في 20 ساعة بس.

الدراسة بتقول إنك محتاج ممارسة فعالة لمدة 20 ساعة بس عشان يكون عندك كل الأساسيات إللي إنت محتاجها في حالة عايز تكمل فيها او تكتفي بإللي اتعلمته وتروح لحاجة تانية.. بس ده بشروط:

- لازم تقيّم نفسك الأول من الحاجة اللي بتتعلمها عشان ده هيفرق معاك جدا.. إنت ميح خالص؟ ولا عندك ولو معرفة بسيطة تقدر تبني عليها؟
- - 20 ساعة يعني ساعة إلا ربع تقريبا يوميا لمدة شهر.. ده وقت الممارسة الفعالة مش وقت المذاكرة والتحضير للحاجة إللي بتتعلمها.
- اعمل خريطة للحاجة إللي بتتعلمها متقسمة خطوات صغيرة بحيث إنها تكون تدريجية من الأسهل للأصعب
- - تشوف أحسن طريقة تصحح بيها لنفسك في حالة انك غلطت أو شاكك إن عندك مشكلة.. وده محتاج كتاب أو مصدر انت بتثق فيه.
- متضيعش وقتك في أي فرعيات.. إنت عارف من الأول انك بتتعلم أساسيات بس.. متفتحش على نفسك أبواب مش هتعرف تقفلها عشان هيجيلك إحباط.
- - انت محتاج تركز وتاخد الموضوع بجدية وتصر انك تقدر تنجز في 20 ساعة بس.
- الـ 30 يوم لازم يكونوا متصلين.. ورا بعض.. 30 يوم من الممارسة اليومية.. لو قطعت يوم بتعوضه ب 3.. لأنك ضيعت يوم قبله ويوم بعده.
- - اتحمل فكرة انك بتتعلم.. عشان هيجيلك إحساس اوك عبيط ومش عارف أو هتفشل أو عمرك ما هتبقى زي اللي اتعلموا.. اللي اتعلموا قبل ما يتعلموا كانوا أسوأ منك كمان.

أنا اتعلمت السواقة في يوم واحد.. 8 ساعات متصلين..
واتعلمت القراية السريعة في 6 أيام.. على 12 ساعة ممارسة
اتعلمت الفوتوشوب في 18 ساعة
اتعلمت التصوير في 20 ساعة بالظبط
وهكذا..
لو عايز تتعلم الحاجة.. جمع الماتريال بتاعها.. وأبدأ شغل ايدك فيها ومتضيعش وقت..
كل حاجة قابلة للتعلم.