رقائق

نصائح في الشغل

أنا داخل في 10 سنين شغل.. وعديت على شركات كتيرة وطفشت منها لأسباب مختلفة.. والمكان اللي برتاح فيه نفسياً ويكون فيه مناخ صحي وانساني للعمل بستقر فيه.. في حاجة اسمها job description يعني هتشتغل إيه تحديداً وايه دورك ومن خلاله بتعرف الـ work flow يعني هتسلم لمين وتستلم من مين.. وفيه الـ protocol إللي بيوضحلك قوانين العمل ولايحة واضحة ومرونة عالية في أي بُعد إنساني في الشغل وإدارة الشركة لشؤون العاملين والمكافآت والجزاءات والاجازات وغيره..

بس في شركات كتيرة ملهاش دعوة بكل ده.. وعندها كام نموذج كده بتقوم عليهم الشركة..

نموذج "الموظف النحلة".. الشركة بتبقى عايزة موظف مبيتعبش ومبيعياش ومبيحصلوش ظروف.. بيشتغل وبس وقلبه على الشغل كأنه عيل من عياله.. ولو بيشتغل 8 ساعات يخلوهم 9.. ولو الشغل كتير يسهر يخلصه جوه الشركة أو ياخده معاه البيت.. وميتحسبش طبعا إنه أوفر تايم.. لأنه موظف نحلة.

نموذج "الرقّاصة".. عارف اللي بتحط اللمبة على كتفها تنوّر؟ وعلى صدرها تنوّر؟ أهي الشركة عايزة موظف يكون بيعرف لغات.. وبيعرف يعمل شغله وشغل غيره.. وبيعرف يشتغل تحت ضغط.. وتحت المكتب وتحت خط الفقر.. وبيعرف يغزل برجل حمار.. ويعمل من الفسيخ شربات.. ومن اللاشيء يصنع المجد.. حتى لو الشركة معندهاش اللاشيء ده..

نموذج الموظف "الأخطبوط".. بيعرف يسد مكان 4 غيره.. وياخد مرتب 2 بس.. لو مشينا المحاسب يحاسب ولو مشينا الاتش آر يمحّر ولو مشينا ال customer service يفحّر.. ونفضل نقوله انت عمود من أعمدة الشركة وهو أصلا قاعد على العمود..

نموذج الموظف "العبد الحبشي".. تجيبه الشركة فريش جرادويت.. تقوله هديك خبرة.. فتخليه يشتغل تقريباً ببلاش.. ويشيل غيره ويعمل عجين الفلاحة ونوم العازب.. ويعمل شاي للضيوف ويزعف السقف ويكنس تحت السجاد..

وفي نموذج "الفرخة الدايخة".. وده غالبا بيكون سيلز أو مندوب يعني.. بيقولوا هنديك مرتب جنيه أساسي و10 جنيه عمولات بشرط انك تحقق التارجت .. فمزيكا المهمة المستحيلة تشتغل في الخلفية.. لأن مدير الشركة نفسه لو حاول يحققه مش هيعرف لكن الفرخة الدايخة إللي هتلف البيوت والمصانع والمزارع والجناين والصحاري السبعة عشان تحقق التارجت هتعرف..

في نموذج قذر ولكنه مطلوب الأيام دي للأسف.. نموذج "المصلحة".. ودي غالبا بنت شكلها حلو.. بتشتغل عشان تحضر ميتنج وتلاغي الزباين عشان يمضوا عقود.. كل قدراتها جسدية مش عقلية.. وأحيانا بيشترطوا إنها تكون مش محجبة عشان حرية المرأة والمرأة ثورة.. وتروح ياعيني البنت تشتغل وهي مصدقة إنها بتشتغل فعلا.. ويا إما تفهم كل حاجة وتعمل نفسها مش واخدة بالها.. يا إما تفضل حمارة وهي مفكرة نفسها امرأة نسوية عاملة كادة.

غير نموذج الـ "الملاك".. عايزين الموظف اللي عنده استعداد يشتغل لله وللوطن.. وياريت لو يتبرع للشركة.. بيخدم قضية سامية مش مسألة فلوس.. بيعيش ياكل قيم ويشرب احترام ويدفع مواصلات شهامة وجدعنة.. لأنه لو طلب حقه يبقى مادي حقير ومش بيفكر غير في الفلوس..

وممكن اكون شوفت نموذج الـ"سفنجة".. بس للأمانة مش كتير.. وده الموظف اللي بيمتص الإهانة والتريقة على شغله والنرفزة والزعيق والصوت العالي وبيعدي التجريح والتشكيك في قدراته ويشرب كل القرف ده وهو بيضحك وسعيد عشان يتعصر برة الشغل يعصر نفسه وييجي تاني يوم على نضافة يكرر نفس القرف ده..

++ صدقوني.. مفيش حاجة تستاهل انك تحط نفسك في نموذج من دول.. لأنك لو سيبت نفسك لشركة من الشركات المقرفة دي هتكره نفسك وحياتك والناس.. متقولش اعمل إيه.. متكلمش شهرين على بعض.. امشي.. الرزق ده مش بتاع حد ده بتاع ربنا.. الرزق إللي ييجي بذُل يغور.. الله يرزق من يشاء والله خير الرازقين.