رقائق

نسويات

لما تفتح القاموس وتكتب كلمة "feminism" هتلاقي إن معنى الكلمة..
( هو الدفاع عن حقوق المرأة من مبدأ المساواة بين الأجناس)..
يعني feminism معناها إن الراجل = الست.. وحقوق الست هي هي حقوق الراجل وواجبات الست هي هي واجبات الراجل..
-------
الكلام ده بالنسبالنا كمسلمين ملوش معنى.. لأن الإسلام مبيعترفش بالمساواة.. الإسلام بيأمر بالعدل.. وده هو الخير المطلق للطرفين الراجل والست.. وحقوق الراجل وحقوق الست مفصلة في التشريع الديني وكل واحد المفروض عارف إللي ليه وإللي عليه..

بس فيه مشكلة!

=المجتمع حقيقي ظالم الست وواكل حقوقها.. و بالنسباله الدين نزل عشان يحرم المرأة من كل حقوقها بس وهو بيفصل الدين على مزاجه ..

+ هقول إن فعلا المجتمع ظالم بلا شك.. بس هو ظالم الراجل والست والطفل وكل الناس.. ومقدرش أنكر إن ظلم الست بيّن وظاهر وإن ظلم المجتمع للستات هو أكتر ظلم مدمّر المجتمع ومفككه.. لأن ست ضعيفة يعني مجتمع ضعيف.. وست ضعيفة يعني ذرية ضعيفة.. ست ضعيفة يعني مستقبل سواد
كل راجل سوي معندوش أي مشكلة في إن الست تعرف حقوقها وواجباتها.. كل راجل سوي نفسه أم عياله تبقى أحسن منه كمان.. كل راجل سوي نفسه إن مراته تكون مسؤولة وواعية ومستحيل تكون مسؤولة وواعية بدون ما تعرف حقوقها فين!

وبما إن مش كل الرجالة أسوياء زي ما مش كل البنات فاضلات.. فأحنا محتاجين بكل بساطة نحط "بُصلة" ونمشي عليها..

- ظلم المجتمع ليكي ملوش علاقة بالتشريع الديني إللي إنتي عايزة تغيريه.. المجتمع ظلمك لكن الإسلام مظلمكيش .. عايزة تتساوي في المواريث وعايزة تلغي التعدد وعايزة تشاركي في القوامة.. كل ده تبديل لشرع الله وكأن مشكلتك مع الإسلام رغم إن مشكلتك مع المجتمع.. فالأولى إنك تاخدي حقوقك من المجتمع بدل ما تطالبي بالمساواة.. متحوليش معركتك مع المجتمع لمعركة ضد التشريع وانتي بتاخدي حقوقك.
- انتي بتعبدي ربنا مش بتعبدي المجتمع
- اسألي نفسك سؤال صريح.. مشكلتك مع الشريع الديني ولا مشكلتك مع الفهم الغلط للتشريع الديني ؟ لو المشكلة في التشريع مش هقدر أساعدك.. ولو مشكلتك مع الفهم.. افهمي انتي واعرفي الصح وواجهي الناس بيه
- شكوى البنات إن مبقاش في رجالة بقى مبرر إنهم يتبنّو الفكر النسوي الغربي.. هنفترض فعلا إن مبقاش فيه رجالة بس في نفس الوقت الفكر النسوي مش هيفيدك بحاجة غير إنه هيحولك ببطء لواحدة في صراع مع نفسها ومع المجتمع طول الوقت.. وعمرك ما هتحسي بالرضا أبدا عن نفسك ..
- الفكر النسوي مش هينفعك بحاجة طالما انتي جاهلة وسطحية.. يعني بيه هتاخدي على قفاكي ومن غيره هتاخدي على قفاكي.. إنما معرفتك بحقوقك وواجباتك هيخليكي من الأول مش صيد سهل لأنصاف وأشباه الرجال.. الراجل غير السوي هيقلق ويخاف من واحدة عارفة إللي ليها وإللي عليها من الأول وهتوجعله دماغه بقال الله وقال الرسول كل ما يحاول يظلمها.
- الفكر النسوي كان رد فعل غربي للظلم إللي واقع على المرأة الغربية.. فكان لازم الستات هناك تتبنى فكر ينقذها من ظلم الرأسمالية الغربية.. فتقومي انتي كامرأة شرقية تتبنّي الفكر الغربي عشان تتخلصي من الظلم الواقع على المرأة الشرقية؟ ؟ انتي حولة ؟ هل انتي حولة ؟
-متجيش تقولي إني feminist بس مش ضد الدين.. يا ماما بمجرد ما آمنتي بمبدأ المساواة بقيتي بتعادي التشريع الديني.. ده أ ب.. المساواة مش من مبادئ الإسلام لأن الإسلام بيأمر بالعدل مش بالمساواة
- خليكي فاكرة دايما إن الإسلام مش طالب منك تبقي سوبر وومان.. الدين يحب يشوفك سوبر وومان بس مش فارض عليكي ده .. بالعكس.. حقوقك فالاسلام وإنتي خارج سباق البحث عن الذات مكفولة بالكامل.. بس لو فرضنا إن انتي عايزة تبقي سوبر وومان وقررتي تثبتي لنفسك إنك ليكي دور وتأثير.. مفيش ما يمنع .. اشطة جدا أقسم بالله.. يا بخت الإسلام بيكي كقدوة وزوجة وأم وامرأة عاملة ومؤثرة.. ووقت ما تقولي لا خلاص مش لاعبة.. كل الناس هتصقفلك وتحترم مجهودك وسعيك..
- العدل هو إن الراجل يشيل هم الدنيا عنك.. بشرط إنك تكوني متعته إللي خرج بيها من الدنيا وهو متعتك اللي كتبهالك ربنا .. العدل إنه يتشقلب عشان يعجب حضرتك وإنتي الوحيدة إللي ليكي حق اختيار مين يبقى جوزك وأبو عيالك.. العدل إنه يطلع ميتينه ليل نهار عشانك بالمعروف ولو صعب عليكي تساعديه عشان بتحبيه بس لو مش هتقدري تساعديه متكسريش ضهره.. إحنا كرجالة راضيين بالعدل إللي كتبه ربنا.. إنتي شايفة إن قدراتك كأنثى عظيمة وملهاش حدود ولازم تستغليها لصالح دينك ومجتمعك ..  جو اهيد.. ورينا همّتك معانا .. ايدينا في ايدك .. طبّقي العدل إللي إنتي شايفاه بس بدون ما تبدلي شرع ولا تعترضي على واجب اتفرض عليكي وافتكري كويس انك مسؤولة قدام ربنا زي ما الراجل مسؤول..
- لما بتقبلوا بعض كأزواج.. بتقبلوا بعض بالشروط إللي ربنا فرضها عليكوا.. اللي يخالفها راجل أو ست بيحط نفسه في مظلمة قدام التاني امام الله يوم الدين.. ومظالم الناس يوم الدين عظيمة.. لو هتغيروا شروط الجواز وهتخلوها حسب ما تتفقوا مبقاش جواز بقى شركة.. سمحت لأهل مراتك يجهزولك بيتك متلجأش للشرع وقت الخناق.. اشترطتي على جوزك يعملك فرح ويجيب ميكب ارتست وتعملوا مولد اشطة بس مترجعيش تطلبي منه يتقي ربنا فيكي لأنك محطتيش تقوى الله معيار من الأساس في الجواز..
- كل المشاكل اللي هي مشاكل مجتمع بالدرجة الأولى مش مشاكل في الدين ولا الشريعة .. الاسلام كان واضح وصريح فيها .. مثلا في قضية العنف ضد المرأة .. لم يثبت عن النبي أن ضرب شيئا قط ..  والمساواة بين الأولاد في التربية والحقوق والواجبات من نهجه ومن سنته ..  وواضح في قضية الختان انها طبية والدكتور بس اللي يحدد تتعمل من عدمه وفي الاغلب مبتتعملش .. وزواج القاصرات قضية مجتمعية العرف هو اللي بيحددها والحرمان من التعليم ده جهل .. والتحرش والاغتصاب وغيره وغيره جهل مجتمعي بحت وغياب للوعي .. كلها قضايا محتاجة شباب وبنات وحراك مجتمعي عام .. مش مجرد حركة نسوية معروف ان اصلها غير سوي وأهدافها مزيفة
- شارلوت بانش, ريتا ماي براون, أدريان ريتش, أودري لورد, مارلين فري, ماري دالي, شيلا جيفريز, باربرا سميث, بات باركر, مارجريت سلون هانتر, شيريل كلارك, غلوريا أنزالدوا .. دوروا على أي اسم من الأسماء دي عل جوجل لأني لو اتكلمت عنهم غالبا الفيسبوك هيحظرني
- خلينا كلنا شباب وبنات نحارب في معركة الجهل ونقف قدام المجتمع .. المجتمع مش هيسمع لحركات غريبة عليه وهيفضل طول عمره حاططها في خانة قلة الأدب والتحرر والخلاعة .. إنما لو بقت قضية مجتمع فيها الشباب والبنات بيسعوا سوا وبيقوّموا المجتمع ويخلقوا حياة سوية .. مش هيبقى فيه أي مشكلة ولا هنحتاج لا نسوية ولا ذكورية  ..
- نصيحة من راجل.. اعرفي دينك كويس.. اعرفي إللي ليكي وإللي عليكي.. اشتغلي.. احتكي بالمجتمع بشكل يزوّد وعيك بدون ما الحياة تشوّهك.. افهمي العالم ماشي إزاي.. طالبي بحقوقك بس تعترفي بواجباتك.. متهتميش بشكلك على حساب جوهرك.. إعملي ميزان بين الاتنين.. وبما إن القرار في أيدك فإنتي بس إللي بأيدك تختاري تتجوزي راجل ولا تتجوزي عيل.. النسوية مش هتفيدك غير بأنها هتساويكي بعيل
- ولو اتجوزتي راجل مش هتحتاجيها
- بلا نسوية بلا قرف..