رقائق

نصبر علي افكار المجتمع

هيقولولك ملكش دعوة.. تنصح الناس بس لما يطلبوا منك النصيحة.. متبادرش بتقديم المساعدة أو تعرض خدماتك على حد مطلبهاش.. متتطوّعش في اصلاح المايل.. وكل ده على أساس إننا في مجتمع حداثي معاصر بيحترم الحريات وبيقدّس المساحات الشخصية وبيفرض على الأخيار حصار إجباري.. وكل واحد هنا في حاله ملوش دعوة بالتاني.. غُرباء..

بغض النظر عن إن الإصلاح بالأمر بالمعروف والنهي عن المنكر ليه شروط وضوابط وسمات شخصية ولا يصلح لكل الناس..بس الشاهد إن أبسط الأمور اللي ممكن تحتاج تدخّل منك المجتمع خلاها مش من حقك وهيسميك متطفّل وحشري لو بادرت بحسن نية إنك تُصلح..

والفكر الحالي المسيطر على الناس هو الخلط بين التطفل وبين النصح والأمر بالمعروف والنهي عن المنكر.. حد شاف حد بيدخن في أماكن انتظار عامة مغلقة.. الأماكن دي فيها أطفال.. هنا بقى واجب إن حد يتطوع عشان يلفت نظر المدخن إنه يطفي السجارة.. ده نصح وأمر بالمعروف.. إنما حد شاف حد بيشرب سيجارة جوة عربيته ولوحده محدش هيقتحم عليه العربية يقوله التدخين يدمر الصحة...

طبعاً التدخين مجرد مثال.. في حاجات كتيرة بتدخل في بند الأمر بالمعروف والنهي عن المنكر.. لكن للأسف بتلاقيها بتخضع عند الناس لسيطرة الهوى.. لو فيه طابور طويل عريض واقف مستني دور قدام موظف حكومي مش شايف شغله.. الطابور هيفرح أوي لو حد منهم خرج بصنعة لطافة يقول للموظف اتقي الله في مصالح الناس ويسر عليهم عشان ربنا ييسر عليك..

نفس الطابور ده لو كان واقف قدام درينكيز يوم الوقفة.. وجالهم حد يقولهم حرام عليكم صحتكم وقعد ينصحهم ويكلمهم عن كراهة العادة وحرمانية الشرب.. هياكلوه أو هيتريقوا عليه..

خلاصة كلامي.. عايز أقول إن مش المجتمع ولا اعرافه هي إللي بتحدد قواعد النصح والأمر بالمعروف والنهي عن المنكر زي ما في ناس بتحاول تقنعنا بكده .. القواعد دي محددة مسبقاً بشكل تشريعي.. ما علينا بس غير اننا نلتزم بيها عشان ينصلح حالنا.. مش إننا ناخد بيها وقت ما توافق هوانا ونرفضها وقت ما تخالف هوانا..

بضم صوتي لصوت الشيخ عمرو وبقول.. نصبر على أفكار المجتمع لغاية ما نغيرها .. لكن منستسلمش ليها أبدا ✋