د/ امير منير
بتاريخ ٧/١٢/٢٠٢٠
من أشهر الحاجات اللي الشيطان بيمنعنا بيها من الطاعة فكرة إنك ممكن ترجع تاني.
يعني أوعى تصلي دلوقتي ابدأ صلاة لما تبقى متأكد إنك مش هتبطلها تاني .. فاكر لما كنت بتصلي وبطلت .. الصلاة مش لعبة ولو عملت كده تاني تبقى منافق .. فبلاش صلاة دلوقتي.
حجاب إيه اللي هتلبسيه .. أنتم معندكوش مراية في البيت تشوفي شكلك ولبسك .. وش هتقلعيه تاني وتبقي منافقة .. فاكرة صاحبتك اللي لبسته سنة ومقدرتش عليه ورجعت قلعته تاني .. اتحجبي لما تبقي قد الحجاب .. الحجاب مش لعبة.
بس على كده والزبون يصدق ويطيع ويستنى الوقت المناسب اللي أحب أقوله من دلوقتي إنه عمره ما هييجي وهتفضل مبتصليش وهتفضلي من غير حجاب.
وتعالوا نبص للموضوع بالمنطق .. إيه أسوأ احتمال الشيطان بيخوفكم منه .. إنكم ترجعوا زي ما كنتم من غير صلاة ولا حجاب مثلا .. طب ما هو ده اللي أنت عليه دلوقتي!!
يعني أسوأ احتمال ممكن إنك تبقى زي ما أنت دلوقتي بالفعل! .. يبفى هتخسر إيه لو توكلت على الله وابتديت تعمل الطاعة اللي نفسك تعملها ده حتى كده يبقى فيه احتمال ٥٠% إنك تنجح وتكمل في حين لو فضلت زي ما أنت هتبقى ١٠٠% فاشل وبعيد عن ربنا.
ولو عايز ال ٥٠% دول تبقى ١٠٠% نجاح بإذن الله خد النصيحة ديه:
١- اوعى تعتمد على نفسك وثباتك وشطارتك .. اعتمد على ربنا بكثرة الدعاء والعبادة
٢- اقطع حالا مع صحاب السوء اللي بيوقعوك كل ما تحاول تقوم ودور على الصالحين اللي عايزين نفس طريقك.
٣- زود إيمانك بالإلتزام بالعبادة والسنن وتابع نفسك كويس أوي واعرف إن كل عبادة بتقل معناها إيمان بيقل معناها عزيمة بتضعف وشيطان ونفس يستقووا عليك.
٤- في لحظات ضعفك اجري علطول على النقطتين ١و٢ الدعاء والتقوي بالصحبة الصالحة.
٥- لو وقعت افهم إن ديه مجرد خطوة لورا مش هنبدأ المشوار من الأول تاني وإن ده ضعف مش نفاق وقوم وحاول مرة تانية وبإذن الله هتثبت.
ومتنساش تدعيلي معاك .. بحبكم في الله ❤
أنت تقرأ
رقائق
Non-Fictionمقولات، حكم، خواطر، نصائح، عادات، عبادات، علوم .. الخ كل شيئ اعجبني لم تكتبه يدي بل رأيته أضعه هنا فالشكر لقائلها/لقائلتها 💜
