قررت تربي لحيتك هيجيلك انترفيو مهم في شركة كنت بتحلم بيها وهيقولولك احلق يابني عشان تبان مهندم في المقابلة !
قررتي تطولي الطرحة من امام ومن خلف وبقت شبه الخمار او قررتي تلبسي الخمار نفسه ، هتجيلك بدل الواحدة عشرة يقولولك ايه ده انتي كبرتي نفسك ليه كده؟عيشي سنك يابنتي!
قررت تبطل تقف مع بنات تهزر وبطلت تسلم ب ايدك عليهم
هتلاقي بنات كتير بقالك فترة مشوفتهمش هيطلعولك من تحت الارض
وهتتحط ف مواقف معاهم غصب عنك وهيمدوا ايدهم ليك!
قررتي تبطلي مكياج لانه من الزينة اللي مينفعش تطلعي بيها هيجيلك بعدها ع طول عشرين فرح ل عشرين واحدة من صحباتك !
قررت تبر ابوك وامك رغم عصبيتهم عليك ع الفاضية والمليانة
هيطلبوا منك مشاوير تبانلك تافهه وانت وراك هم مايتلم !
قررتي تبطلي تمشي مع صاحبتك اللي مش بتغض بصرها وكل شوية تجيبلك سيرة ولد شكل وبسببها بتقعي ، هيحصل لغبطة ف مواعيدكم وكل صحباتك هيمشوا بدري الا هي هتفضل معاكي !
قررت تبطل ذنب معين ، في نفس الوقت كل الظروف حواليك هتتهيأ ليك انك تعمله!
قررت تبطل سجاير ، مع اول وقفة ليك مع صحابك هيعزموا عليك بسجارة
قررت تبطل اغاني ، هتركب ميكروباص هتلاقي السواق مشغل الاغنية اياها ! هتلاقي صحابك مشيرين ليك تراك الفيلم الاجنبي اللي لسا ف السينما ! هتلاقي صاحبك عازمك على خطوبته !
قررت متسيبش فجر ، هيجيلك مشوار ترجع منه 2 بليل ميت والفجر 5 الا تلت !
قررت تصوم الاتنين والخميس ، هتصحى يومها الساعة 7 الصبح قلقان وميت م العطش لسبب متعرفوش مع ان الطبيعي بتاعك بتصحي 11 ومش عطشان
قررت تغض بصرك ؟ هتقعد جنبك ف الميكروباص واحدة متبرجة ومتعطرة وهيعدوا من قدامك طول اليوم !
قررتوا تسيبوا بعض لله ؟ هيحصل الف موقف يجبر حد منكم يبعت للتاني
دي من عندي ، قررت تعمل ريجيم وتنظم اكلك عشان صحتك تبقت احسن ومتكنش عبد لشهوة الاكل هتلاقي امك بتعمل وصفات واصحابك هيظبطوا الف خروجة للاكل
كل قرار صح هتاخده ويبانلك سهل ف ذاته ..ليه اختبار بعده عشان يكشف هل كنت صادق ولا لسا موصلتش للمرحلة دي ؟
كل قرار بالتوبة هتاخده هيجيلك بعده موقف عشان قلبك يتشاف ساعتها مقبل ولا معرض ولا بيجاهد ولا ايه؟
مرة د.الغليظ قال ..لو جالك الاختبار بعد التوبة افرح لانه علامة على قبولها ..بس اثبت بالله عليك : )
أَحَسِبَ النَّاسُ أَن يُتْرَكُوا أَن يَقُولُوا آمَنَّا وَهُمْ لَا يُفْتَنُونَ (2) وَلَقَدْ فَتَنَّا الَّذِينَ مِن قَبْلِهِمْ ۖ فَلَيَعْلَمَنَّ اللَّهُ الَّذِينَ صَدَقُوا وَلَيَعْلَمَنَّ الْكَاذِبِينَ (3)
سورة العنكبوت
اللهم اجعلنا من الصادقين واغفرلنا ما مضى وتب علينا وثبتنا عند الاختبار يارب العالمين
#وذكر
١٥/٩/٢٠٢٠
أنت تقرأ
رقائق
Non-Fictionمقولات، حكم، خواطر، نصائح، عادات، عبادات، علوم .. الخ كل شيئ اعجبني لم تكتبه يدي بل رأيته أضعه هنا فالشكر لقائلها/لقائلتها 💜
