رقائق

ما اخذ بسيف الحياء فهو باطل

قناة مارلبورو 🥲

آخر حاجة ممكن احب اعملها إني اوصف مجموعة ناس بعيب معين أو اعمم في طرح مشكلة. بس المشكلة ديه بالتحديد تعباني من زمان ونفسي الاقي فرصة اتكلم فيها.

امبارح في سفينة اتحشرت بالعرض في قناة السويس وعطلت مرور السفن لغاية دلوقتي، والحدث كبير المرة ديه ومواقع الأخبار العالمية كلها اتكلمت في الموضوع، المهم وانا بتابع الحدث لاحظت حاجة غريبة، إن كذا حد من اللي ناقلين الخبر كاتبين كلمة "قناة مارلبورو" بدل "قناة السويس" ولقيت قباطين من العالم كله داخلين فرحانين في الحدث وكاتبين "قناة مارلبورو"، الكلمة شدتني فأخدتها عملت عليها سيرش في جوجل وفي تويتر واكتشفت الصدمة. إن قناة السويس بين مجتمع القباطين في العالم معروفة بالإسم ده. وده عشان السفن لما بتعدي من القناة بيستلمها قبطان مصري هو اللي بيكون مسؤول عن قيادتها، ولازم عشان يوصلها بأمان ويكرمهم في التوصيلة ياخد هدية. فالسفن قبل ما تدخل مصر بتكون مجهزة علب سجاير مارلبورو كتير عشان يوزعوا على الطقم المصري من عمال وقباطين، ولو معملوش كدة بيتعرضوا لمشاكل وممكن تقع عليهم غرامات من غير أي سبب، ومن هنا بقوا بيسموا القناة "قناة مارلبورو" 🥲

الموضوع ده تعبني نفسياً وجه على الجرح جداً، انت لو سافرت بره مصر سواء رحت دولة غنية أو فقيرة هتلاقي نفسك طول الرحلة ما بتدفعش فلوس غير وانت عارف سببها، ما بتدفعش فلوس غير بوجه حق، والمعاملات المادية واضحة، سعر الخدمة واضح، بتدفع الفلوس تاخد الخدمة، وهتفضل مستمتع بمعاملات مادية واضحة وشفافة لغاية ما توصل مطار القاهرة ومن هنا هتبدأ المواقف المريبة، هتلاقي كمية ناس جاية تساعدك غصب عنك في حاجات بسيطة مش محتاجة مساعدة ويتوددوا ليك غصب عنك وانت فعلاً مرتبك ومتوتر ومش فاهم ليه بيعملوا كدة، هتلاقي مية واحد بمختلف المناصب بيغمزولك ويقولولك كل سنة وانت طيب من غير أي داعي، لو فكرت تدخل الحمام هتلاقي واحد داخل معاك لغاية قلب الحمام من جوه وبيشد بكرة المناديل بكل حنية ويناولهالك في إيدك مع تسبيلة كدة بعينه كأنك كنت هتقف عاجز ومش عارف تتصرف من غيره. لو فكرت تعدي من باب معمول أصلا عشان الناس تعدي منه، هتلاقي واحد باصصلك بحنية برده وبيقولك "أنا هسيبك تخرج من هنا بس عشان خاطر الأطفال الكتاكيت الجمال اللي معاك دول" مع إنه مش معديني عشان خاطرهم ولا حاجة، هو معديني عشان ده باب الخروج وما يقدرش ما يعدينيش 😁 بس لازم يقولك كدة ويغمزلك غمزة مريبة عشان يفكرك إنه عمل المستحيل عشان انت تعدي وانت المفروض تخلي عندك ذوق وتقدره.

هتفضل ماشي بتواجه الدلال والدلع والحنية والنظرات المريبة ديه في كل المواقف لغاية ما توصل لحد بيتك وتقرر تطلب حاجة تاكلها عشان مش قادر تعمل أكل، هتلاقي الراجل بتاع الديلفري اللي انت دافعله تمن التوصيل جايبلك الأكل وانت ليك عشرة جنيه باقي، هيطلع الفلوس اللي معاه ويقعد يععععددد يعدددد ويدور على الباقي في الخازنة اللي في جيبه ومش قادر يوصل لعشرة جنيه يا عيني، لغاية ما انت تتكسف أو تزهق وتقوله خلاص خليها يا باشا. وعلى كدة كل مرة ترجع من بره مصر بتقضي أول يوم وانت حاسس إن انت محور العالم وان كل اللي بيقابلوك ملفوفين حواليك عشان ياخدوا منك أي حاجة مهما كانت تافهة بس المهم انها تكون بغير وجه حق، عشان الفلوس اللي بياخدوها مهما كانت كويسة ما بتحسسهمش بالانتصار طالمها آخدينها بوجه حق. وبعد أول يوم ما يعدي بتبدأ تندمج مع الموضوع ده وتتأقلم وتنسى حكاية انك محور العالم ديه وبتتصالح مع الفكرة لدرجة إنك بتدي السايس وانت مبسوط جداً حتى لو خلاك تخبط العربية وهو بيقولك "ارجع يا باشا واسعة واسعة" مع إنك ما طلبتش منه يساعدك.

المشكلة بقى ان الموضوع ده لو فكرت تتكلم فيه مع حد، هتلاقي نفسك متهم إنك مش مراعي ظروف الناس، وهتسمع الردود بتاعة "ظروف البلد صعبة اعذرهم، الناس مش آخده حقها، مرتباتهم على قدهم ومحدش لاقي ياكل" فالواحد لما بيسمع النوع ده من الردود ما بيعرفش يتناقش في المشكلة حتى لو على سبيل الفضفضة كدة، لغاية بقى ما اتصدمت انهاردة بالموضوع بتاع "قناة مارلبورو". واكتشفت ان الموضوع لا ليه علاقة بظروف ولا ليه علاقة بالناس اللي مش آخده حقها. الطبقة اللي بتعمل كدة في القناة ديه من  أكتر الناس اللي مرتباتهم محترمة وآخدين حقوقهم في مصر، من أكتر الناس اللي مش ناقصهم حاجة. الناس اللي على القناة دول فعلاً مش ناقصهم حاجة عشان يكونوا سبب ان السمعة ديه تطلع علينا والقناة تتسمى بالإسم ده. الموضوع ملوش علاقة بالظروف إطلاقا، الموضوع ده بقى متأصل في المجتمع بقى جزء من ثقافتنا في كل المستويات وكل الطبقات وبقى روتين يومي إنك لازم تدفع حاجات كتير بتتاخد منك بدون وجه حق أو بسيف الحياء عشان تعدي أو عشان يومك يعدي.