إحنا إللي بنحدد قيمة الحاجات والناس جوانا بإرادتنا الحرة.. وعلى حسب القيمة إللي بنحددها لكل حاجة ولكل حد بنعمل قيمة لحياتنا و لأفكارنا ولوجودنا.. لو بتحدد قيمة للفلوس مثلا أكتر من إللي تستحقه بتستحوذ على قيمة حاجات تانية من جواك.. ولو أديت لحد قيمة أكتر من إللي يستاهلها بتاخد من قيمة نفسك ومن قيمة ناس تستاهل بجد جواك..
ربنا ﷻ إسمه الغني.. ومن معاني الغِنا إنه بيمنح قيمة لكل شيء بشكل مطلق يعني مفيش حاجة ليها قيمة بشكل مستقل عنه.. الله الغني عنها يعني ليس لها أي قيمة في حضرة الله.. وغِنا الله يجعله مُنزّه عن الصغائر ومُنزّه عن الخطأ ومُنزّه عن اللّمم.
ولله المثل الأعلى.. لما حد بيغلط في تقدير القيمة إللي بيديها لحاجات في حياته أو لناس ده بيخليه عُرضة للمذلّات.. عُرضة للخُذلان.. ده غير إن ثقته في نفسه ونظرته لذاته بتتقزّم قصاد الحاجة اللي مستحوذة على كل تقديره أو تقييمه ليها..
مفيش انسان عليه القيمة لذاته.. ومفيش قيمة بتتحدد مسبقا كده وعلى كل الناس التسليم والرضى والاتفاق على القيمة دي.. والشاهد بقى..
- كل حاجة وكل حد بيستمد قيمته من قُربه من الله عز وجل.. ومش معنى أن الناس بتدي قيمة لحاجات ولناس بُعاد عن الله يبقى قيمته اتفرضت علينا بالعافية.
- القيمة بتتغير.. و تغيرها ده ليه عوامل كتيرة.. منها نظرتك لحقيقة الأمور.. ومعرفتك لأولوياتك.. ومنها قربك انت شخصيا أو بعدك عن الله عز وجل.
- كل ما زاد استغناء الناس كل ما عظمت قيمتهم.. الشخص إللي محتاج لكل حاجة ولكل حد شخص "عديم القيمة" وعلى قدر استغناءك تُحسب قيمتك.. تستغني عن الفلوس تبقى عزيز الناس .. تستغني عن الناس تبقى أغنى الناس.. تستغني عن الشهوات تبقى أزكى الناس..
- حدد قيمة كل حاجة بنفسك ومتخليش حد يحددلك قيمة الحاجات والناس في حياتك.. متمشيش ورا اصنام الناس ومتجريش ورا أفكارهم إللي هما عملولها قيمة.. زي ما قولتلك اجتهد انك تعظّم قيمة الله ومن قيمة الله تمنح كل حاجة حواليك قيمتها الحقيقية..
الموضوع بالنسبالي جميل وممكن أفضل أكتب فيه لشهر قدام.. بس الكلام سهل والفعل دايما أصعب.. فلو كنت بتسأل.. اقدّر الحاجات والناس إزاي بطريقة صح؟
حابب اكتفي وأبدأ وانتهي عند قيمة الله المطلقة مدليل ومرجعية لكل قيمة تانية في حياتنا..
ده التقدير الصحيح للقيمة..
كل حاجة تُنسب إلى الله لها قيمة.. وكل حاجة يترفّع الله عنها ملهاش.. وكذلك الأشخاص
أنا بشوف ناس عايشة حياتها بالكامل في سبيل إنها "تحقق ذاتها" .. وفي سبيل "تحقيق الذات" بيكون عندهم إستعداد يضحوا بأي حاجة وكل حاجة.. مش مشكلة يبقى على حساب شريك حياتها أو أولادها أو أهلها .. ممكن يبقى على حساب راحتهم وصحتهم عادي جدا.. تنازل عن الحياة الإجتماعية والصحية من أجل ما يُسمى بتحقيق الذات .. بيعيشوا حياتهم عايزين يعملوا "حاجة".. هما لسه مش عارفين هيا إيه بالظبط بس المهم إنها حاجة تخصهم ويتقال دايماً فيها اسمهم .. تكون تراث ليهم أو مجد شخصي يتعرفوا بيه وسط الناس..
أنت تقرأ
رقائق
Non-Fictionمقولات، حكم، خواطر، نصائح، عادات، عبادات، علوم .. الخ كل شيئ اعجبني لم تكتبه يدي بل رأيته أضعه هنا فالشكر لقائلها/لقائلتها 💜
