رقائق

ازاي نحافظ علي علاقة زوجية سليمة

ازاي نحافظ على علاقة زوجية سليمة

لما أترجم اللى كنت بعمله وقت الخطوبة لفعل حقيقي بعد الزواج  ، والشاطر اللى يعرف يخرج من الروتين ويجدد دورة الحياة والحب جواه باستمرار مهما كانت الأحمال بتخليه ينخ !!

بأعترافى  كرجل إن المرأة كائن جذاب جدًا ومٌلفت للإنتباه عشان كده بحط لنفسى قواعد بيها مبديش لشيطان نفسى مساحة يفكر أنه يخون ، بداية من إنى اقطع اى علاقة شخصية باى إمرأة مهما كانت إلا فى حدود العمل المتاح ، مش بصاحب ولا ليا انتيم بنت تطبطب عليا وقت زعلى من زوجتى فالاقى نفسى بتشد ليها لا أراديًا !!
مبسمحش لنفسى أدى رأى فى مشكلة شخصية ، أو أقول المفروض يكون كذا ، عشان أبان بمنظر الفاهم  ، فاللى قدامى يكره شريكه ويتحول ليا برضو لا أراديًا   !!

طول ما أنا موجود فى محيط نسائى هتعمد ذكر زوجتى وإن حُبها مُتغلغل جوه قلبى وده بيدى إشارة للى قدامى إنى مش مُتاح فانسى !!

مبديش رأيى فى مظهر واحدة ولا بقولها  " ايه ده انت خسيتِ " ولا بمدح فيها قوامها الرشيق وإنها لو كانت عارضة أزياء هتنجح جدًا ، المرأة بتحب الإطراء والاهتمام واللى يأخد باله منها  ، وبكده لو هى متزوجة فأنا بأسس لهدم بيتها من غير ما احس !

الإحتفاظ بالشغف فى العلاقة أمر مرهق جدًا ، وبيحتاج تقدم قصاده  " غض بصر - ولو مرة حصل وحسيت بإنجذاب تجاه حد قاعد فى مكان بنسحب منه فورًا وبعمل اتصال بزوجتى واعبر ليها عن حبى وامتناني ، واجمع البوم ذكرياتنا ولحظاتنا المهمة واسترجعها ، ومفيش مانع اعملها مفاجئة وأقولها قابليني فى مكان كنا بنحب نروحه زمان !!

الست لازم تعرف إن قعدة القهوة والبلايستيشين وماتشات الكورة حياة بالنسبة للراجل ، والشاطرة اللى تدى مساحة لعقلها بالدخول فى واقع الرجل والإهتمام بالحاجات اللى بيحبها ، تناقشه فى خطة ريال مدريد ، تكلمه عن الواقع الإقتصادى الصعب وتدور معاه على خطط بديلة ، تتعلم تلعب وتحاول تغلبه فى ماتش بلايستيشين ، تديله مساحة من حياته القديمة يرجع بيها لملامحه اللى الزمن ابتدى يمحيها !

الزواج هو مرحلة بدء حياة بأولويات مختلفة ، هو انتِقال من حالٍ مؤقَّت لحياة كاملة، ننتقِل فيها - من خانة عدم التقيُّد بشيءٍ - مهما كانت الحياة في بيت الأهل أو بغير زواج - إلى خانة المسؤوليَّة الكاملة عن كلِّ شيء ،  المسؤولية  أمرُ سهل بشرط أن يتقاسمها  الأثنين جنبًا إلى جنب !!

#يتبع