رقائق

احنا ك نساء

" احنا كنساء مبنقصدش اللي بنقوله و صعب نقول اللي نقصده "

صعب اقولك اهتم بيا و خرجني و قولي بحبك و دلعني ، صعب اقولك انا زعلانة منك عشان كذا و كذا من اول مرة لازم اشوف اهتمامك و رغبتك في انك تعرف و بشدة .

انا عارفة أنه مش سهل عليكم و ضد شخصيتكم كرجال لأنكم لو قولتم حاجه فأنتم تقصدوها و المشاعر بالنسبالكم أفعال اكتر من كلام و مش بتاخدوا بالكم غير من الصورة الكبيرة " الفواتير تمام و الاكل و الشرب تمام و صحتنا تمام وبس " علي قدر أهمية الأمور دي و اساسسيتها ولكن في امور تانية فرعية مش مهمة بالنسبالك لكن مهمة بالنسبة لينا.

انا عارفة انك بتبقي راجع من الشغل مش عايز تتكلم و لا تسمع صوت او تخرج والله مقدرة تعبك ولكن أنا بدون طول اليوم لوحدي في البيت ببقي نفسي اتكلم معاك واحس بالمشاركة مع زوجي استحمل كلامي شوية لأن فعلا سعتها بيكون كلامي مع أهلي أو صحبتي أو جارتي مش المتنفس ليا اليوم ده او عايزة اخد رايك في نقطة معينة و صدقني لو طلبت منك نخرج فده هيكون لأن فعلا جبت اخري ولازم أخرج أو مناسبة اجتماعية مينفعش تتاجل  ، هحاول أرعي تعبك علي قد ما اقدر و انت أرعي ضعفي ارجوك.

انا عارفة انك قولت انك بتحبني الاسبوع اللي فات لكن صدقني احنا محتاجين نسمعها كل يوم احنا غيركم محتاجين نطمن دائما أن مكانتنا زي ما هي و أن مزادتش كمان ، انت مش سخيف و لا بتكرر نفسك ولا هي معلومة قديمة و لكن بالنسبالنا الكلمة دي و يشابهها الوقود لايامنا و علاقتنا.

انا عارفة أن معظم اهتماماتي ملهاش معني أو قيمة بالنسبالك و مش هجبرك تشاركني نفس الاهتمامات ولكن هطلب منك تحترمها و متسخرش منها زي ما انت بحترم اهتمامك بمشاهدة كرة القدم و سائبة ليك مساحتك تشوفها براحتك في البيت و بره البيت علي القدر المعقول.

انا عارفة انك غالبا مهتم باللي بقوله ومركز فيه والله بس ممكن لما اكلمك تشيل عينك من تليفونك و تبصلي ، صدقني نفسيتي و انا بكلمك و فيه تواصل بصري بيننا غير وانت باصص علي التليفون أو التليفزيون

انا عارفة أن الحياة بعد الزواج صعبة و مسؤولية كبيرة عليك في انك تحافظ علي البيت ومتطلباته  زي ما هي مسؤولية كبيرة عليا اني اكون ربة منزل جيدة جدا و زوجة متفانية و ام مربية بس في وسط الزحمة دي لازم يبقي في وقت لنفسنا مع العمر المسؤولية بتزيد مش بتقل تبعا للمرحلة واحنا أن شاء الله قدها لأن ربنا لا يكلف نفسا إلا وسعها فوقت الزواج انا وانت نقدر نشيل المسؤولية و وقت طفلنا نقدر نشيل المسؤولية و وقت المدرسة و وقت الجامعة الخ المسؤولية موجودة دائما لكن شكلها بيختلف تبعا لكل مرحلة و بالتالي الزواج مش سجن هو كيان عظيم قائم علي مودة و محبة و تفاهم و تغافل ، فبلاش فكرة أن الجواز سجن و أن ياريت فضلت عازب لأن الزواج قيم وعظيم زي ما كانت حياتك قبله قيمه وعظيمة ، هي بس اخدت شكل مختلف من ابن لزوج و لاب ثم جد أن شاء الله 💙

استكمالا للنقطة الفائتة ، كنت بستغرب ليه الخطاب مستميتين يخرجوا قبل الجواز و يجيبوا لبعض هدايا انا عارفة أن الزواج مش بيبقي في فرصة كبيرة لده ولكن ممش للدرجة في ناس مش بيهادوا زوجاتهم ابدا بعد الزواج و زوجات نفس الموضوع ، الفكرة مش في قيمة الهدية الفكرة في بذل المجهود دائما لكسب شريكك وإنجاح العلاقة  ، ممكن تكون الهدية بسكوت شريكك بيحبه أو وردة جميلة الخ

مش معني أن زوجتك او خطيبتك قنوعة و مش بتطلب أنك تبطل تعرض أو تسترخص لما تجيب ، خلي كرمك علي قدر امكانياتك مش علي قدر قناعتها ، لو قالتلك الخاتم ابو ٥٠ عجبها و تقدر تجيب ابو ٥٠٠ هاته بدون تردد.

زواجك مش تكرار لتجربة فلان فبطل تسأل الجواز عامل ايه ولو اتسالت بطل تحبط الناس فيه و افتكر أن ممكن اللي بيسال متخوف وعايز يطمئن ، رد بهدوء بدون مدح شديد يبان غير واقعي أو ذم ملوش معني

احتسب اللي بتعمله عند ربنا و صدقني هترتاح ، ادخل الجواز كانك بتعبي سجلك بالحسنات عشان تدخل الفردوس الاعلى من الجنه، من الاخر خلي الجواز بالنسبالك تذكرة اسرع للجنة ، هتلاقي عقليتك تغيرت في كثير من الأمور مش بس الزوج كمان الزوجة

اتعلم انت و زوجتك في التربية و الدين و ديما علموا بعض و علموا أولادكم و علموا غيركم ، انشروا العلم لأن الناس سواء مش عارفة تتعلم او مش مستوعبة أو مكسلة تبحث فاعتبر نفسك ربنا بعتك ليهم عشان تعلمهم مع الإشارة لضرورة البحث. زي

ختاما دائما اسعي لجعل وضعك افضل و لأسرتك خلي دائما طموحك كبير بدون تقصير في حق ربك ثم نفسك ثم اهلك ، مترضاش بالقليل كسل ، خلي همتك عالية عشان وضع اسرتك يكون دائمة احسن و تكون قدوة حسنة لاولادك