- #ربنا_بس_اللي_بيحاسب => طيب ما هو ربنا برضو إللي نزللنا الأحكام علشان نحاسب بعض بيها. يعني زي ما انت شاطر اوي في انك تطالب بحقك و تحاسب غيرك لما تقع تحت ظلم، المجتمع و الناس و الأفراد كمان من حقهم يحاسبوك و ياخدوا حقهم منك. القصة مش اننا مانحاسبش بعض ... القصة هي اننا نعمل كدا إزاي و بأي طريقة و بأي وسيلة و بأي منهج. فطالما بنحاسبك زي ما قال المنهج اللي اتفقنا على إتباعه، يبأى انت مالاكش انك تعترض.
- #ربنا_بس_اللي_يحكم_عليا => لا يا فندم احنا كمان بنحكم عليك و على افعالك عادي زي ما انت بتحكم على غيرك و على افعالهم عادي و زي ما كل الناس بتحكم على بعض و على افعال بعض عادي جداً. المهم اننا لما نحكم، نحكم بالعدل. الحكم دا اللي هو زي لما سعادتك بتشوف حد اتصرف تصرف كويس و تقول عليه انه شخص محترم ولو اتصرف تصرف سيئ بتقول عليه انه شخص مش محترم او قليل الذوق أو حتى صايع و مش متربي. الحكم دا اللي هو لما بنشوف منك حركة او سلوك او افكار بتدل على انك شخص منحرف، بنقول عليك منحرف عادي جداً و ممكن كمان نقول اكثر من كدا حسب اللي بيطلع منك من قول او فعل. اه عادي اننا بنحكم على اللي بنشوفه منك و ربنا أعلم باللي مش بنشوفه و بتعمله في السر. مش عايز حد يحكم عليك و على تصرفاتك ؟ الحل الوحيد انك تختار لنفسك مكان لا يشاركك فيه أي بني آدم أو حتى يشوفك أو يعيش و يتعايش معاك .
-#انت_حر_ما_لم_تضر => ماشي بس الأول قللي يعني اية "حر" ؟! و اية هي حدود الحرية بالنسبالك ؟! و اية هي مصادر تعريف الحرية و المصادر اللي على أساسها عرفت حدود حريتك. لما نتفق على كل دا ممكن نتفق على المقولة.
- #المساواة_هي_الأصل => لا على فكرة مفيش اي مساواة بين اي حاجتين غير متماثلتين في العالم كله. الولد مش زي البنت و الراجل مش زي الست و العجوز مش زي الشاب و الطويل مش زي القصير و الابيض مش زي الاسود و التخين مش زي الرفيع و الأعمى مش زي البصير و القوي مش زي الضعيف و مفيش حد مساوي للتاني. المساواة مش مبدأ في أي دين ولا أي منهج عقلاني، لكن المبدأ فعلاً هو العدل. العدل يعني كل واحد ياخد حقه حسب احتياجاته مش ياخد زي غيره حتى لو مش محتاجه. العدل هو يعني تاخد حقك بس. مش من حقك انك تتساوى بغيرك لمجرد انك عايز تحقق مبدأ غبي ظالم مابيحققش العدالة.
- #الحاجة_دي_بيني_وبين_ربي_بس. => هي لو كانت كدا طيب احنا عرفنا ازاي ؟ كل عمل انت قمت بيه في المجال العام و عينينا وقعت عليه او وداننا سمعته او كان له آثار مباشرة على غيرك او غير مباشرة ماباقاش بينك و بين ربك بس. الاعمال اللي بينك و بين ربك هي اللي مانعرفش عنها أي حاجة ولا حضرناها ولا شفناها ولا سمعنا عنها ولا اكتشفناها بالصدفة حتى. عايز تعمل حاجة ماحدش يحاسبك عليها، اقفل باب مساحتك الشخصية على نفسك و ماتقولش لحد على اللي بتعمله. غير كدا بلح.
دا جزء من الافكار اللي مابنشوفهاش ولا بنسمع عنها غير من ناس إما انها مش فاهمة هي بتقول اية او فاهمين و بيستعبطوا.
و شكراً على كدا
أنت تقرأ
رقائق
Non-Fictionمقولات، حكم، خواطر، نصائح، عادات، عبادات، علوم .. الخ كل شيئ اعجبني لم تكتبه يدي بل رأيته أضعه هنا فالشكر لقائلها/لقائلتها 💜
