رقائق

مع ربنا احسن

تحذير: الكلام لنفسي، ولكل مؤمن بالله، بس بعيد زي حالاتي.. الباقيين يمتنعون 😊

قد إيه دماغك أو الدنيا بتقولك حاجات شبه دي:
- لو اجتهدت حاحقق النجاح.. النجاح بيتحقق بالمجهود
- - لو اشتغلت حاكسب.. الرزق بييجي من الشغل
- لو اخدت بالي من صحتي حافضل سليم.. السلامة بتيجي من الحذر
- - لو فكرت كويس حاعمل الصح.. السداد بيجي من الذكاء
- لو أخدت الدوا حاخف.. الشفاء بييجي من الدواء
- - لو بقيت لذيذ الناس حتحبني.. الحب بيحصل للحلوين اللذاذ
- لو حققت اللي نفسي فيه حابقى سعيد.. السعادة بتيجي لما أحقق حلمي
- .. وعد بقى على كده براحتك (سبب ونتيجة )
وطبعا مش محتاج اقولك إن دماغك والدنيا مستهيفاك وبتشتغلك 😁 كنت عارف اني حاقول كده.. صح؟ 😁

القوانين اللي فوق دي كلها واللي شبهها، برغم الاتفاق على صحتها، لكنها صور ناقصة، وبتختزل الحياة لأصغر بكتير من حجمها..بتخلق لنا حياة 2D ثنائية الأبعاد. وبتستعمل طاقتنا كلها في تنظيم العلاقات بيننا وبين الناس والأشياء، فنعيش حياة مهربدة ومهلهلة، لا نكاد نذكر فيها علاقتنا الأهم (اللي هي علاقتنا بالله) إلا وقت الصلاة..

لما بنسجن دماغنا جوه قوانين السببية الظاهرة، عادةً بنتعب ونشقى ونشك في كل حاجة... ربنا برحمته بقى أوقات بيرسل لنا اللي يعدل دماغنا في صورة تعطيل للأسباب دي؛ 
بص حواليك حتلاقي ناس كتير اخدت بالأسباب المذكورة دي بس، والنتيجة ماحصلتش.. و ناس أكتر منهم أخدوا بيها، والنتيجة حصلت زي ما كانوا عايزين .. ولكن ده ما أسعدهمش ولا سببلهم الرضا! .. الحاجات دي بتحصل كل يوم لينا وحوالينا عشان نفتكر ونعرف لما نكون مسنودين على حيطة مايلة.. وعشان نتعلم إن الأسباب
الظاهرة مش بتشتغل من نفسها..
طبعا لازم ناخد بالأسباب ونجتهد ونعمل وننجح.. بس لازم كمان نقفش نفسنا لو لقينا نفسنا متوكلين على الأسباب دي بالكلية ونفتكر إن الكون مبني على قوانين تانية أشمل وأبعاد أعمق وأكبر وأعقل بكتير من الهبل الأزلي ده.. السنن الكونية ليها أسباب أقوى وأولى بالاتباع..

- لما ترضي ربنا حيرضيك
- - لما تتصدق وتسبح وتصل الرحم رزقك يزيد وعمرك يطول
- لما تترك شيئ عشان حرام ربنا حيعوضك أفضل منه
- - لما تستغفر.. حياتك تزيد بركة وراحة وفتح
- لما تشكر نعمة تكبر ولما تصبر على بلاء.. حتحصل الأجر
- - ولو أجرك جه في الدنيا، احمد ربنا ولو ماجاش أبشر واحمد ربنا اكتر، عشان (الآخرة خيرٌ و أبقى)

لو عايز تتعلم عن القوانين دي، ماتهجرش القرآن، قراءة وتدبر.. القرآن كتاب الحكمة لكل من عقل.. ولو عايز تبدأ دلوقتي اقرأ ان شئت:

- وَإِذْ تَأَذَّنَ رَبُّكُمْ لَئِن شَكَرْتُمْ لَأَزِيدَنَّكُمْ
- مَنْ عَمِلَ صَالِحًا مِّن ذَكَرٍ أَوْ أُنثَىٰ وَهُوَ مُؤْمِنٌ فَلَنُحْيِيَنَّهُ حَيَاةً طَيِّبَةً ۖ وَلَنَجْزِيَنَّهُمْ أَجْرَهُم بِأَحْسَنِ مَا كَانُوا يَعْمَلُونَ
- فَمَنِ اتَّبَعَ هُدَايَ فَلا يَضِلُّ وَلا يَشْقَى ۝ وَمَنْ أَعْرَضَ عَنْ ذِكْرِي فَإِنَّ لَهُ مَعِيشَةً ضَنكًا
- وَلَوْ أَنَّهُمْ أَقَامُوا التَّوْرَاةَ وَالْإِنجِيلَ وَمَا أُنزِلَ إِلَيْهِم مِّن رَّبِّهِمْ لَأَكَلُوا مِن فَوْقِهِمْ وَمِن تَحْتِ أَرْجُلِهِم
- وَلَوْ أَنَّ أَهْلَ الْقُرَىٰ آمَنُوا وَاتَّقَوْا لَفَتَحْنَا عَلَيْهِم بَرَكَاتٍ مِّنَ السَّمَاءِ وَالْأَرْضِ وَلَٰكِن كَذَّبُوا فَأَخَذْنَاهُم بِمَا كَانُوا يَكْسِبُونَ
- فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا (10) يُرْسِلِ السَّمَاءَ عَلَيْكُمْ مِدْرَارًا (11) وَيُمْدِدْكُمْ بِأَمْوَالٍ وَبَنِينَ وَيَجْعَلْ لَكُمْ جَنَّاتٍ وَيَجْعَلْ لَكُمْ أَنْهَارًا

#لعلي_أعمل_به
#كلام_لنفسي
#اللهم_فاشهد