رقائق

ازاي نقلل المشاكل مع الزوج

قطوف من الAsk الدينية:
إزاي تقدري تعيشي مع جوزك من غير ما يحصل أي نوع من الخلاف وتعيشوا في سعادة تامة ؟
من خلال التجارب الكتير إللي شوفتها بحكم احتكاكي بالعمل في حل المشاكل الأسرية , لاقيت إن الطريقة إللي تخلي الحياة خالية من المشاكل نهائيا
هى إن مافيش أي طريقة تخلي الحياة بدون مشاكل , وإن عدم وجود خلافات شيء مستحيل
سيدك النبي _صلى الله عليه وسلم_ نفسه كان يحدث مشاكل في بيته , لدرجة أن الله عز وجل أنزل لنساء النبي ايات في الأمر , بعد ما النبي اعتزل نساءه شهر كامل
.
بس انتي كأنثى ربنا رزقك بعقل وحكمة علشان تستخدميهم وتخلي المشاكل دي تفضل في نطاق محدود وتتحل قبل ما تكبر
ودي تقريبا خلاصة المشاكل إللي بتحصل فترة الزواج
...
1- فترة الفطام والتعارف
من أكتر الحاجات العجيبة إللي باقبلها هى إن اتنين لسة متزوجين من أشهر قليلة , يبدأوا يفكروا فورا في الطلاق بمجرد حدوث مشاكل بينهما , والحجة إنه اتغير بعد الجواز
بصي يا بنتي
فترة الزواج الأولى دي , انتي _أو هو _ بتمري فيها بمرحلتين
أولا : مرحلة الفطام
يعني الفطام من حياتك في بيت أهلك وأسرتك , فبعد ما كنتي عايشة مع أهلك ومتعودة على تقاسم المسئوليات مع والدتك واخوتك البنات _لو موجودين_ , فجأة بقيتي متحملة لوحدك مسئولية بيت كامل
فأحيانا بتعملي ازاحة للخوف والتعب ده على زوجك نفسه والزواج , وبتفكري تتخلصي منه علشان ترجعي لأهلك
ودي فترة مؤقتة جدا بتمر بسرعة
ثانيا : فترة التعارف
صحيح إنك اتكلمتي مع خطيبك كتير وحصلت بينكم مشاكل ولحظات حلوة , بس مهما طالت فترة الخطبة هايفضل في جوانب في شخصيتك وشخصية زوجك , مش هتبان غير بعد الزواج
ففترة الزواج الأولى تعتبر زي فترة الخطوبة _مع مباحات أكتر_ تسمحلكم تتأقلموا مع بعض , ومهما كان الإختلاف بينكم والغرابة , فهاتروح بسرعة بأمر الله
فإياكي تفكري في الطلاق أبدا في الفترة دي , لأنك بتاخدي قرار بناءا على معطيات غلط
...
2- ماتحكيش أسرار بيتك لأي حد
خصوصا أمك الله يخليكي , خلي دايما إللي بيحصل جوا البيت مايخرجش أبدا بره لأي حد , لأن خروج الأسرار دي معناه إنك غير أمينة وعقلك صغير
بالإضافة إن خروجها مالوش أي معنى أو حكمة إلا مجرد الرغي
ولو جوزك عرف ده هايعمل شرخ كبير بينكم ويفقده ثقته فيكي
...
3- ما تتكلميش بشكل سيء عن زوجك أبدا
دايما بننصح الرجال إنه يحفظ كرامة زوجته ومايتكلمش عنها بسوء أبدا قدام أي حد , لأن كرامة الزوج من كرامة زوجته
نفس الأمر بالنسبة ليكي
عادي ممكن يحصل مشاكل بين وبينه , ممكن يكون مقصر في جوانب معينة , بس في النهاية ده برضه جوزك
لو اتكلمتي عنه بشكل سيء فده هايقلل منك انتي قبل ما يقلل منه , غير إنه هايفتح باب لمرضى القلوب من الرجال الأخرين , لو حد منهم عرف بالمشاكل دي وهايبدأ يحاول يدخل ليكي منها
طبعا انتي محترمة وعلي العين والراس , بس بلاش نفتح للشيطان باب أبدا
...
4- اوعي تمنعي الواجب عليكي
طبعا هايحصل خلاف بينك وبينه , بس خلي دايما الخلاف ده في نطاق الإحترام
خلي دايما الخلاف لو احتد يوصل لمجرد خصام كلامي بينكما , بس في نفس الوقت اوعي تقصري في واجباتك الزوجية بحجة إنك مش بتكلميه
لأنك لو قدمتي الواجب عليكي بغير نقصان في فترة الخصام , وهو قدم ليكي الواجب عليه بغير نقصان ,,, فجأة المشكلة هاتختفي تدريجيا لأن احترامه ليكي هايزيد , وهايقدر جدا معاملتك الطيبة معاه , حتى في الخلاف
...
5- اوعي تسيبي بيتك وتغضبي
معظم المشاكل إللي بتكبر بيكون سبها الأصلي هو ابتعدا الزوجين عن بعض بعد الخلاف
هى تزعل فتلم هدومها وتروح عند أهلها , وتشتكي بعد كدة إن زوجها ماسألش عليها
صحيح إننا بننصح الرجال إنهم مايسيبوش زوجاتهم زعلانين كتير خصوصا لو عند أهلها , بس نفسيا يا بنتي " البعيد عن العين بعيد عن القلب "
وطول ما إنتي متعودة تروحي عند أهلك كل مشكلة , جوزك هايجي يوم ويزهدك انتي شخصيا وممكن توصل لمشكلة صعب تتحل
من حقك تزعلي من زوجك ,,, أه طبعا
من حقك تاخدي موقف لو هو غلطان ,,, أكيد
بس خلي ردود فعلك وزعلك دي دايما جوا البيت , وافهمي إن ده بيتك وبيته ,,, وفي النهاية _مهما كان الخلاف_ مالكوش غير بعض
...
6- لا يُفسد بيوت النساء إلا النساء
اقسم بالله في خلال الفترات إللي قابلت فيها المشاكل الزوجية لاقيت إن أحد أكبر أسباب تضخم المشاكل الزوجية وأحيانا وصولها للطلاق , هى إن الزوجة بتلجأ لنساء اخريات علشان تاخد رأيهن في المشكلة وتسمع منهم
سهل أوي على أي واحد تقولك " ده جوزك عرة الرجالة ولازم تطلقي منه " , أو تنصحك بنصائح توسع الفجوة بينك وبين جوزك , زي إنك تهجريه أو تعامليه بشكل سيء أو تمنعي بعض واجباتك كزوجة
سهلة عليهم ,,, بس في النهاية مافيش واحدة منهن هاتيجي تشيل معاكي الهم وتبعات النصائح _السيئة_ دي غيرك انتي وبس
انتي انسانة عاقلة , تقدري تقدري حجم المشكلة إللي بينك وبين جوزك , وتعرفي تتعاملي معاها إزاي
...
7- معاملة الند بالند
في حكمة بتقول " الملك يحكم

المملكة , والملكة تحكم الملك "
عايزة جوزك يمشي على هواكي ويبقى حابب ينفذلك أمنياتك , يبقى عامليه صح
اسمعي منه , بلاش الكلمة قصاد الكلمة
حسسيه إنه كبير في نظرك ,,, وقتها هو نفسه هايتمنى يعمل أي حاجة علشانك
بإختصار تعاملي كأنثى , علشان لو اتعاملتي مع جوزك معاملة الرجال , فماتستنيش منه يتعامل معاكي على إنك ست
...
8- تعالى معايا عند أهلي ,,, خناقة كل إسبوع
من الملاحظ إن كتير من الرجال مش بتفضل فكرة إنه يروح عند أهل زوجته , أو بتكون الزيارة دي تقيلة عليه ,,, في نموذجين شوفتهم لستات بتتعامل في الحالة دي
أ- إنها تتنرفز وتقول لجوزها " انت دايما كاسفني ومحسسني إني أقل من اخواتي " " انت عمرك ما نصفتني ولا حسستني قدام أهلي إني متجوزة "
وغالبا بتكون النتيجة هى زيادة نفور الزوج من الفكرة , وبيحصل صدام كبير حسب طبيعة الزوج
ب- زوجة لطيفة قبل كدة لما لقت إن جوزها مش بيحب يروح عند أهلها قالتله
" نفسي تيجي تقعد معايا قدام أهلي , تعرف أنا أصلا بافتخر بيك وبابقى مبسوطة جدا وانت قاعد وبيبقى نفسي كدة تيجي معايا وتقعد وتتكلم , علشان وقتها هاحس إني أسعد واحدة في الدنيا "
الراجل فرح جدا بكلامها وفي الزيارة إللي بعدها راح معاها عند أهلها
الفرق بين الأولى والتانية بس طريقة التعبير عن رغبتها , بس الفرق في النتيجة كانت كبيرة
.
وزمان قالولنا " الكلمة الزين بتسد الدين "
فلو اتكلمتي مع جوزك حلو هاتوصلي للي انتي عايزاه

#تنمية_زوجية
علي عبدالله.