- واحنا راجعين من السفر امبارح وقفنا في كمين وأمين الشرطة طلع أخد بطاقتي أنا و ٢ شباب وبنت عشان مش لابسين كمامات.. أنا والشباب نزلنا عادي ودفعنا الغرامة.. والبنت فضلت ترتعش وتصوت وتكلم مامتها في التليفون وكانت هتـ Panic خلاص.. قام أمين الشرطة مرجع لها البطاقة فوراً ومانزلهاش من الاتوبيس ولا الظابط دفعها غرامة.. بل والظابط قال لأمين الشرطة ازاي تاخد بطاقة بنت!
- أنا معنديش مشكلة إطلاقاً مع الموقف دا، بالعكس انا احترمت أمين الشرطة والظابط جداً، عشان لو نفس الموقف حصل مع أختي أو مع أي واحده من أهلي، ماتمناش إنها تنزل في البرد تدفع غرامة! مع إن دا مخالف للقانون، ومع إن دي تفرقة بين الرجالة والبنات.. بس برضو ماتمناش إنه يحصل..
- ومعنديش مشكلة برضو إنك تاخدي مكاني في الطابور عشان انتي بنت، أو تاخدي مكاني في المواصلات عشان انتي بنت، أو إنك تعدي من كمين وانتي رخصتك منتهية عشان انتي بنت، أو يبقالك تسهيلات في شغلك عشان انتي بنت، أو إني آخد نيابتي في السلوم وانتي تاخدي نيابتك تحت البيت عشان انتي بنت ولازم تبقي جمب بابا وماما أو جمب زوجك قرة عينك.. معنديش مشكلة مع أي حاجه من دول..
- وعلى فكرة مش مطلوب منك تقدري دا.. أي نعم انتي أخدتي فوق حقوقك بشوية، واتغاضينا عن شوية قوانين ولوايح عشان انتي بنت.. بس برضو مهما كان انتي رقيقة وماينفعش تتعاملي نفس المعاملة اللي احنا كشباب بنتعاملها..
- المطلوب منك بس إنك لما ترجعي من الشغل آخر النهار بعد ما اترصفتلك الطرق واتفرشتلك ورود عشان انتي بنت، ماتجيش ع السوشيال ميديا تصيحي وتقولي دا مجتمع ذكو.ري مفيش فيه مساواة، وتحكيلنا عن بطولاتك في ردع الرجالة، وأد ايه انتي قادرة ع التحدي وعلى المواجهة..
أنت تقرأ
رقائق
Non-Fictionمقولات، حكم، خواطر، نصائح، عادات، عبادات، علوم .. الخ كل شيئ اعجبني لم تكتبه يدي بل رأيته أضعه هنا فالشكر لقائلها/لقائلتها 💜
