رقائق

المعرفة اهم من الموهبة

بتسمع إن فلان ده مبدع.. وابداعه ده وصلّه للقمة.. فتقول أنا عمري ما هبقى زيه لأنه مبدع وأنا لأ..
والكلام ده العلم أثبت أنه هري وكدب.. أي شخص مهما كانت درجة إتقانه للحاجة إللي بيعملها ومهما فكرت إنك بعيد عنه ومش هتوصله.. لو أخدت نفس مساره التعليمي.. واجتهد وبذلت وقت وتركيز هيتخلق عندك مساحة إبداع تقدر تنافسه فيها.. لو اتعلمت هتقدر تنافسه في الإبداع.. بدون ما تتعلم هتحتاج معجزة عشان تقلده بس..

مفيش شخص مبدع بدون علم ومعرفة كافية.. ده إللي اتعلمته في الشغل.. واتعلمته في الحياة.. واتعلمته من دراسة الهندسة.. محدش مبدع بالفطرة.. انت بتعرف وتتعلم ولمّا بتتوفر مقوّمات الإبداع بتبدع..

اعرف.. اعرف كتير.. اعرف كتير أوي.. اهتم بأنك تعرف على قد ما تقدر.. عشان تبدع.. عشان تفرق عن غيرك..
موضوع انك مبدع وكفى .. وشغل التنمية البشرية الخايبة ده.. كلام فاضي..

أنا جايلك من المستقبل بقولك إن الإبداع مبيحصلش بدون معرفة وعلم حقيقي..
والشخص المبدع إللي إنت واخده قدوة.. بذل مجهود جبار عشان يعرف قبل ما يوصل لمرحلة الإبداع إللي إنت منبهر بيها دي.. ولو عايز توصل لأي درجة من الإتقان في أي حاجة محتاج تعرف فيها الحد الأدنى من العلم والمعرفة عشان يتخلق عندك مساحة للإبداع..