بمناسبة بيت الشعر ده..
فأنا مفهمتش معناه غير وأنا بعلّي صوتي على أهلي عشان أقنعهم إني صح.. أو إنّي اتعصّب على صاحب ليا جمايله مغرّقاني بسبب غلطة واحدة بس عملها .. أو وأنا بفاصل مع حد بيبيع حاجة بـ 12 جنيه وأنا عايزها منه بـ 10.. في حاجات الشطارة فيها خسارة.. والموقف إللي بتصرّ عليه بيتحفر في نفوس الناس إللي بتحبّك شروخ..
معاملتك الجافة لمراتك إللي شايلة همّك عشان توصّلها إنك جاي تعبان في الشغل هتيجي عليك بخسارة..
وصاحبك إللي مكنش بيكلمك من مدّة وكلّمك يطلب منك طلب فسقّعتله عشان توصلّه إنه بتاع مصلحته، هتخسر من طريقتك أكتر ما هتكسب..
والشغل إللي بتحطّه أولوية على حساب صحّتك ووقتك وصلاتك وعيلتك عشان بتبني كارير.. الكارير مش هينفعك..
..
هتقابل ناس في الحياة مش عايزة تخسر أي حاجة.. معندهاش إستعداد حتى إنها تساوم على خسارة قريبة قصاد مكسب بعيد لأنهم فاهمين إن الحياة كلها معارك ولازم نكسبها كلها..
أنا لو اتعلمت حاجة من الحياة والشغل والناس.. فهتكون إن الواحد مش لازم يكسب كل المعارك قصاد نفسه وقصاد الناس.. لازم تفوّت وتتنازل عن معارك بعينها عشان تعرف تكسب معارك أكبر وأشرف..
أنت تقرأ
رقائق
Non-Fictionمقولات، حكم، خواطر، نصائح، عادات، عبادات، علوم .. الخ كل شيئ اعجبني لم تكتبه يدي بل رأيته أضعه هنا فالشكر لقائلها/لقائلتها 💜
