رقائق

اسال عن مصدر المعلومة

- ليه الناس بياخدوا معلوماتهم من أي مصدر من غير ما يسألوا عن أصلها أو صحتها، ولما ييجوا على الشرع يتفلسفوا ويقولوا لأ مش هنعمل حاجه من غير ما نفهم الفايدة منها!
- أفتكر إننا في أول بروتوكول لكوفيد كنا بنكتب كلوروكين من ضمن العلاج، ودا أصلاً دوا ملاريا.. ومع ذلك أي واحد كان بيتكتب له كان بياخده، والموضوع وصل إن الناس كانوا بيروحوا يجيبوه من نفسهم لما تظهر عليهم أعراض، لحد ما جت فترة وخلص من الصيدليات.. وطول الفترة دي محدش سأل خالص ايه علاقة الملاريا بالكوفيد!
- وبعدين البروتوكول اتعدل وقالوا إن الكلوروكين مالوش لازمة، فالناس بطلت تاخده.. وبعدين الأيفرميكتن اتحط في البروتوكول، ودا أصلاً دوا جَرَب.. برضو الناس راحت تاخده سواء بروشتة أو من غير روشتة من غير ما يسألوا ايه علاقة الجَرَب بالكوفيد..!
- لكن تيجي انت تنقل كلام ربنا وتقول مثلاً إن العسل فيه شفاء للناس! لأ معلش بقى اقنعني.. حطهولي كدا تحت الميكروسكوب وحللهولي كيميائياً وفيزيائياً وطلعلي خواصه الفارماكولوجية، وهاتلي المصدر العلمي للكلام دا..
- فـ نفسي أعرف ليه لما نقولك دا بروتوكول منظمة الصحة، ولا أي منظمة أجنبية مابتعترضش، ولما نقولك ربنا والرسول قالوا تبدأ تطلع العالِم اللي جواك وتسأل ميلون "ليه"!
- هو عموماً ماينفعش تدور على تفسير لكل حاجه في الشرع.. عشان صدقني لو دخلت في دوامة الـ "ليه؟" مش هتخلص.. فـ انت من الأول تبقى عارف إن الإجابة لكل سؤال في الشرع هي :"عشان ربنا أمرنا بكدا"..
- لو واحد سألك ليه بنصوم وقعدت تقوله عشان نحس بالفقرا والغلابة والمساكين، هيقولك ببساطة : طاب ليه الفقرا بيصوموا؟.. لو قولتله أصل الصيام مفيد للجسم ودلوقتي غير المسلمين بيطبقوا نظام الصيام المتقطع وبلا بلا بلا.. هيقولك طاب ليه من الفجر للمغرب؟ ليه مش من المغرب للفجر؟ ليه مش بنشرب ماية؟ ليه كفارة الإفطار في رمضان إطعام 60 مسكين؟ ليه مش 59؟ ليه مش 61؟ ليه نصاب الزكاة 85 جرام دهب؟ ليه مش 84 ولا 86؟
- حرفياً هتتسأل مليون ليه ومش هتلاقي ولا إجابة.. ولو لقيت إجابة لسؤال مش هتلاقي إجابة للي بعده.. فـ من الأول تبقى إجابتك "عشان ربنا قال كدا".. بنصلي الفجر ركعتين قبل طلوع الشمس عشان ربنا قال كدا.. الصلاة فيها ركوع واحد وسجدتين عشان ربنا قال كدا.. بنطلع في الزكاة ربع العشر مش نُص العشر ولا خُمس العشر عشان ربنا قال كدا.. العسل فيه شفاء للناس عشان ربنا قال كدا.. بناكل عدد وتر من التمر عشان الرسول قال كدا..
- والله لو العلم وافق معلومة في الشرع قشطه يعني.. مفيش مشكلة.. مش هيزود الشرع حاجه.. الشرع مش مُعتمد على العلم.. عملوا بقى دراسات على الحجامة ولقوا إنها بتنقي الدم وبتحمي من الأمراض، حطوا العسل تحت الميكروسكوب وحللوه ولقوا إنه بيشفي.. جربوا الصيام المتقطع ولقوا إنه مفيد.. مفيش مشكلة.. بس برضو احنا بنعملهم اتباع لأوامر ربنا وأوامر الرسول..
- كل دا بعيداً عن الناس اللي بيخترعوا حقايق عملية من خيالهم عشان يثبتوا صحة حديث للنبي - مع إن كلام النبي غني عنهم وعن كذبهم -.. زي اللي يقولك أثبتت دراسات مش عارف ايه إن أكل عدد وتر من التمر بيعمل هالة حوالين البني أدم تحميه من الطاقة السلبية.. وإن في أبحاث أوروبية أثبتت إن رفع الصباع في التشهد بيحسن الدورة الدموية.. وإن بتوع ناسا طلعوا القمر لقوا إنه مشقوق من النص فـ كدا يبقى "اقتربت الساعة وانشق القمر" آية صحيحة فعلاً وحديث إنشقاق القمر صحيح.. على اعتبار إن القرآن مستني ناسا تثبت صحته! وعلى اعتبار إن ربنا اللي شق القمر نصين مش قادر إنه يرجعه زي الأول من غير شقوق!
- تخيل إنك راجل مؤمن اهو وشايف الكلام دا عبيط! ما بالك بقى لو واحد مش مسلم أو واحد شاكك في دينه أو واحد علماني شاف الكلام دا! طبعاً هيشك في الدين أكتر.. فـ الجماعة دول حرفياً بيضلوا الناس وهم يحسبون أنهم يحسنون صنعا..
- وفي جماعة تانيين اللي بيقعدوا يستميتوا عشان يطلعوا إعجاز عددي في القرآن وسايبين محتوى القرآن المُعجر نفسه.. تلاقيه بيقولك مش عارف لو جمعت حروف سورة ايه وسورة ايه وقسمتهم على 1.3 وجمعت عليهم 86 هيطلعلك 365 اللي هو عدد أيام السنة.. هل دي صدفة؟ لأ طبعاً.. دي رسالة ربنا باعتهالنا إننا نقرأ القرآن كل يوم من أيام السنة.. سبحان الله!
- في ناس سابوا الغاية من العبادات وراحوا يتلحسوا في العلم.. سابوا عظمة السجود وكونه الصلة بين العبد وربه زي ما الرسول صلى الله عليه وسلم قال، وانبهروا بالدكتور الأمريكي اللي قال إن دي أفضل وضعية توصل الأكسجين للقلب والرئة.. مع إن دا عبط برضو ومش دي أفضل وضعية ولا حاجه ومعرفش دكتور مين دا اللي بيشيروا كلامه.. بس اهو أي حاجه جمبها أمريكي بنروح نتمحلس فيها وخلاص..
- هتقعد تحزق وتتشال وتتهبد وتدلس حقايق علمية وتتلحس في الغرب عشان تثبت صحة كلام الرسول وكلام ربنا علمياً وفي الآخر هيطلع شكلك عبيط.. والحقيقة إن الإسلام غني عن كدبك وتدليسك.. المؤمن هيؤمن بكلام ربنا عشان دا كلام ربنا مش عشان موافق للعلم.. وعموماً اللي بيدور على تفسير علمي لكل حاجه في الشرع يبقى محتاج يعيد نظر في إيمانه..