رقائق

اول مقابلة

شباب كتير لما بيكون رايح رؤية شرعية _ أو مقابلة صالونات_ لأول مرة بيكون مش عارف المفترض يعمل إيه علشان المقابلة تتم بشكل جيد , بدون حرج ليه أو ليها
فخلينا في البوست الصغير ده أقولك تعمل إيه , بحيث تظهر بشكل كويس
أ- بالنسبة للمظهر :
1- خد معاك وانت رايح علبة شيكولاتة أو جاتو من محل شيك , مش لازم أغلى حاجة بس يكون محل كويس علبته شكلها محترم , مش محل تحت بير السلم يعني إللي علبته عاملة زي علب حلويات المولد الموجودة في الشوارع دي !
.
2- قبل ما تروح , ياريت لو شعرك أو دقنك مش متظبطين , ياريت معلش تحلق وتخلي شكلك كويس , لأنه زي ما من حقك تشوف البنت إللي رايحلها بشكل كويس , فمن حقها برضه تشوفك بمظهر جيد , بالإضافة كمان إن الإنطباعات الأولى بتفرق جدا
.
3- ماتروحش بلبس فورمال أوي ولا كاجوال أوي
ماتروحش وانت لابس بدلة , ولا تروح بتيشرت أكيد , والأفضل بنطلون مع قميص بس يكون شكلهم شيك
.
4- لو عندك كرش زي معظم المصريين , ياريت تخلي القميص بره البنطلون
5- حط برفيوم هادي وكويس , وبلاش الأنواع الفاقعة المنفرة
....
ب - العشر دقائق الأولى :
طبيعي جدا إن البنت مش هاتخرج تقعد معاك بمجرد دخولك للبيت , وهايبقى فيه وقت كمقدمة هاتقعد فيها مع والد البنت ووالدتها , تتكلموا فيها الأول
اعتبر العشر دقائق دول وقت استرخاء وتمهيد لو انت قلقان , وركز في كام نقطة سريعة 1- إيك تنتقد حاجة في شكل الشقة ,,, مش قصتك ومش لطيفة لو عملتها
2- بلاش تقعد مرحرح أوي ولا تقعد كمشان ,,, خليك طبيعي جدا كأنك قاعد مع أقارب ليك
.
3- خلي الوقت ده في الكلام مع والد البنت في أمور عامة , ولو كلمته في شغله وسيبته يتكلم هو , هايحبك جدا
4- لو والد البنت كلمك في قدراتك وإمكانياتك , إياك تقول كلام مش حقيقي , اتكلم ببساطة ووضوح عن إمكانياتك الفعلية والمستقبل الممكن حسب أشياء ملموسة , لأن أحلامك وخيالاتك في أرض الواقع مش هاتفرق , فخليك صريح لأن الكلام إللي هاتقوله هايتبني عليه اتفاقيات مستقبلية , إن شاء الله وتم القبول من الطرفين
....
جـ - دخول البنت
أهم نقطة في الموضوع وهى سبب البوست نفسه ,,, تعمل إيه لما البنت تدخل علشان تقعد معاك تتكلموا ؟
1- أولا بلاش لما تدخل تعمل نفسك فيها جنتل مان من بتوع المدبح وتقول " بسم الله ماشاء الله " " اللهم صلى على النبي " ومثيلاتها من جمل , لأنك هاتحسسها إنك بتعاين بضاعة , ده غير إنها هاتُظهرك بمظهر إللي مش بيعرف يتعامل
.
2- لازم تفهم إن الرؤية الشرعية مش انترفيو , مش سؤال وجواب أو تحقيق
الهدف منها هو إنك _ وهى كمان _ تشوفوا طريقة تفكير بعض ومدى نضج كل طرف وهل هيتوافق ولا لأ , فخليها تتكلم
إديها الموضوع وهى تبدأ تحكي وخليك هادي
" أخبار دراستك أو شغلك إيه "
" بتحبي السوشيال ميديا ولا لأ , وبتحبي تتابعي إيه "
" أنا بحب القراءة , انتي بتحبي تقرأي إيه "
طبعا مش قصدي جمل وبدايات ثابتة , القصد إنك تخليها تتكلم , لأنها بشكل طبيعي بيكون عندها شيء من الحرج , فخلي الأمر سهل عليها وعليك , وبعد دقايق هتلاقي الكلام اتفتح بشكل تلقائي وسلس منك ومنها
.
3- ياريت لو انت دمك مش خفيف بالفطرة فبلاش تخالف إرادة ربنا , لأنك هاتكون سخيف جدا , فتعامل بأسلوبك الطبيعي بدون افتعال طبيعة مش طبيعتك , لأن طبيعتك أكيد حلوة فبلاش تحاول تغيرها في اللقاء ده بالذات
.
4- بلاش تسيبها وتقعد تحكي مع والدها في مواضيع جانبية _ لو فضل موجود معاكم_ , لأنك وقتها هاتحسسها بارتباك وهى مش فاهمة موقفها إيه من الحديث الجانبي إللي هى مالهاش علاقة بيه أصلا
5- بلاش أرجوك تكلمها في الطبيخ وبتعرفي تطبخي ولا لأ _ إلا لو على سبيل الدعابة إللي تكون متأكد قبل ما تقولها إنها هاتقبلها وتفهمها_ , وما تقلقش يا سيدنا من موضوع الطبيخ , قنوات اليوتيوب موجودة ووصفاتها سهلة ,,, فبلاش تخلي ده محور تركيز
.
5- ياريت وانت بتكلمها تبص ليها كويس جدا وخلي عينك في عينيها , إنت راجل وده مش موضوع كسوف وإحراج أو إنك تفضل تبص في الأرض !
بصلها كويس جدا _ بغير وقاحة _ وانت بتتكلم وخلي على وشك ابتسامة لطيفة , علشان ماتجيش بعد كدة تقول
" أصلي ماكنتش مركز وماشوفتهاش كويس " !
.
6- لما كلامك معاها يخلص وتحس إنها خلصت كل حاجة ممكن تتقال , انقل الكلام بلطافة جدا لوالدها واتكلم معاه شوية قبل ما تنهي الزيارة نفسها , علشان الزيارة في مجملها تكون لطيفة على الجميع
.
7- لو ليها أخ , خده في إيدك ونزله معاك تتمشوا وتتكلموا شوية كصديق اتعرفت عليه جديد
وبكدة الانطباع العام عنك هايكون ممتاز جدا
...
ت - ما بعد الزيارة
1- لو حسيت بقبول تام , بلغ أهلها _ أو الوسيط _ إنك عايز تنتقل للخطوة القادمة
2- لو حسيت إنك محتاج تقعد معاها تاني , بلغ أهلها إنك عايز تيجي تاني , ده حقك _وحقها_ علشان لما تاخدوا القرار يكون عن قناعة تامة منك ومنها
.
3- لو انت قبلت وهى رفضت , فخد الأمور ببساطة لأنه زي ما انت من حقك توافق أو ترفض , فهى برض

ه من حقها توافق أو ترفض
.
4- أخير وأهم نقطة
لو حسيت بعدم قبول , إياك تنتظر ردهم , بلغ بعد الزيارة على طول والدها _ أو الوسيط _ إن مافيش نصيب , وإياك تخليهم يوافقوا وبعدها تقول انت لأ !
وبرضه إياك تعمل الحركة السخيفة إللي البعض بيعملها , إنه لما بيحس بعدم قبول , مش بيرد على التليفون أو يقفله
خليك صريح وواضح جدا , وثق تماما إنهم هايتفهموا ده ويتقبلوه
وطبعا طبعا , الاستخارة قبل ما تروح وبعد الزيارة
#تنمية_زوجية
علي عبدالله.