من أهم احتياجات الإنسان الفطرية
هو الإحتياج للتقدير
أى إنسان طبيعي بيحب يحس إنه متقدر ووجوده ليه قيمة
وبيكره جدًا ويخاف وينفر من المكان اللي يحسسه إنه وجوده زي عدمه
عشان كدة من المهم جدًا في التربية زي ما بصحح لابني الغلط وبعاقبه وبوجهه
إني أحسسه إنه مقبول و accepted وإن وجوده مهم في حياتنا
أفتكر كلمة جميلة لأمي ربنا يرضى عنها عمري ما هنساها
وكانت في فترة مكنتش فيها كويس ولا سهل معاها
جت قالتلي إن أد ايه حياتهم بقت أحسن لما أنا جيت وإن الحياه قبلي كانت وحشة وحسستني إن وجودي في البيت ليه معنى كبير عندها
يمكن دة من أكتر الحاجات اللي ربطتني بالبيت وبأمى اللي مشفتش في ذكاءها وحكمتها
لازم يكون فيه توجيه وتنويع بين العقوبة والثواب
لكن لازم ابني يحس إنه في بيئة آمنة
مكان بيؤمن بيه وحاسس بقيمة وجوده
حتى لو هو مش كويس أوي وفيه عيوب لو صبرت عليه واديتله الاحساس دة ومع الدعاء والتضرع لربنا أكيد هيتغير للأحسن إن شاء الله
وأكيد يا شباب أهلكوا بيحبوكوا بس هم من كتر حرصهم عليكوا ممكن تحسوا إنهم كارهينكوا بس الموضوع مش كدة خالص لما تكبر هتفهم أد ايه هم كانوا بيحبوك
٢١/٦/٢٠٢٠
أنت تقرأ
رقائق
Non-fictieمقولات، حكم، خواطر، نصائح، عادات، عبادات، علوم .. الخ كل شيئ اعجبني لم تكتبه يدي بل رأيته أضعه هنا فالشكر لقائلها/لقائلتها 💜
