فَتَاةُ البَادِيَّة وَ المَفْيُوزِي المُتَمَلِّكْ(بالدارجة المغربية )

الجزء 50

⚜️فتاة البادية و المفيوزي المتملك⚜️
⚜️الجزء الخمسون⚜️

عند جوزيف ،و بالظبط فالمستشفى كان قدام لباب ديال لغرفة لي فيها إيجاا كيمشي و كيجي ...منين دخلوها  ل بلوك وحتى واحد ما كيجاوبهم على شنو واقع لداخل ...صبرو غادي و كينفذ ..ماشي خوفا على لجنين ،بل عليها هي بوحدها ...رغم أنه شي حاجة فداخلو مخلياه مرتاح نسبيًا لأنه كاينة فرصة باش يبعد بنتو على زيدان و على أي حاجة كتخصو،حيت ما مستاعدش بتاتا انه بنتو تعيش وهي حداها طفل يبقى حياتها كاملة وهو كيفكرها فشنو طرا ليها..
بلقيس(كانت گالسة و حاضية جوزيف ..تمشات ببطء وقفات قدامو...حاطة عينيها لي نوعا ما باكيين ف عين جوزيف لي باين فيهم لخوف):نتاا لي درتي هادشي وصيتك ا جوزيف
جوزيف:بلقيس...ماشي وقت هادشي دابا
بلقيس:وقتوو...نتاا لي كنتي باغي تقتل داك لجنين ...شنوو درتي..واش لهاد الدرجة ما فيك حتى شوية دلإنسانية...عداوتك مع داك زيدان لهاد الدرجة تخليك دير هادشي
جوزيف(زير عليها فيديها):متنسايش سباب عداوتي معاه هو دكشي لي دار ف بنتي.....ولكن ماشي فقلبي لحجر لهاد الدرجة باش نأآذي بنتي هكااا ،بقاي تعرفي شنو كتخرجي من فمك ..انا كنت باغي نهدر معاها قبيلة و نتشاور معاها ..حيت كون هي نطقات ب فمها بيلا ماباغاش هاد لجنين مكنتش نتردد
بلقيس(بعدات يديها عليه بعدما لمسات الصدق فهدرتو ورجعات لبلاصتها )
هاجر(گالسة حدا بلقيس غير كتشوف مع العلم أنها فاهمة كلشي ....دورات عينيها لجيهة بلاصة دالإستقبال لقات سهيل واقف كيسول ...سلتات من حداهم قبل ما يشوفو جوزيف):شنوو كدير نتاا هناا..
سهيل:نتي لي عيطتي ليااا اولاا
هاجر(جراتو من يديه مخرجاه من لمستشفى):ايلا شافك جوزيف مغاديش يعجبو لحال...
سهيل:غير كوني هانية ..جوزيف عندو مشكل مع زيدان ماشي معايا انا
هاجر(هزات كتافها):باش غادي نعرف اناا...
سهيل:شنو واقع بعداا راه ما فهمت والو..
هاجر:اجي نتا بعدا كيف عرفتيني انا كاينة هناا
سهيل:دابا واش وقت هادشي ...گوليلي شنو واقع ل إيجا ..
هاجر:إيجا حاملة..
سهيل:ومن بعد !!
هاجر(صغرات عينيهت فيه):كنتي عارف باينة
سهيل:زيدان لي گالها لياا..
هاجر :ايمتاا غادي نتهناو من هاد بنادم يا ربييي...
سهيل:كملي هدرتك شنو واقع...
هاجر:إيجا مدخلينها للبلوك ...طاح ليها ل بيبي
سهيل:كيفاشش...بلاتي ..واش مأكدة من هادشي لي كتگولي...حيت ايلا كان بصح..زيدان غادي ينوض لقيامة فوق راسناا...
هاجر(ضحكات ب سخرية):هذا أقل عقاب ممكن يوقع ليه على دكشي لي دار
سهيل:نتي معارفة والو...زيدان كان باغي(قبل ما يكمل هدرتو فرانات لوطو ديال زيدان قدامو ..خرج منها وهو كيجري للداخل )
هاجر:شكيدير هادا هناا !
سهيل(شاف فيها و حتى هو ما فاهم والو )

زيدان(داخل وهو جاعر وباقا هدرة د جوزيف كتعاود ليه فوذنيه...بان ليه لگارد ديالو جاي لجيهتو...وقف وهو النار شاعلة فيه لداخل ):شنو واقع هنااا..علاش جوزيف جاب إيجا هناا
لگارد(ختاصر لهدرة حيت عارف زيدان واقف على أعصابو ): جاها نزيف داكشي لاش ضطروا يجيبوها للمستشفى
زيدان(كأنه كيانو تهز ف ديك اللحظة ...سرى معاه خوف غريب لأنه مزال ما قادرش يستوعب أنه تقدر توقع ليها شي حاجة):فين كاينة هي
لگارد:مدخلينها للبلوك،مزال ما خرجات..ولكن
زيدان(دوز بيدو على شعرو ب عصبية وهو كلو كيتعرق و لجرح لي ف صدرو تفتح وكيضرب فيه الريح..شي لي مخلي الألم مضاعف):شنو ولكن
لگارد :قبل ما توصل للمستشفى..مات ليها لجنين...
زيدان(كأنه لأرض خسفات بيه...زير على لبواط لي كانت فيدو فيها لخاتم ونفسو كأنهت تقطعات،و أي حاجة كان كيخطط ليها تضربات ف زيرو ...كان باغي يبدا حياتو من أول و جديد حتى كيلقى راسو رجع لنقطة الصفر ..گلس ف كرسي كان قريب ليه وهو حاط راسو بين يديه ،حاس بالدنيا ضدو من كل جهة ..وقف و كمل طريقو للداخل قاصد جوزيف)
جوزيف (كان واقف كيهضر مع الطبيب لي كان مع إيجا لداخل ..حتى كيقشعو جاي..غير شافو بدون ما يحس مشى قاصدو واخا بلقيس عيات ما تحبس فيه ...ف جزء من الثانية حتى كيردخ زيدان مع لحيط و مزير عليه بذراعو و وبالظبط جيهة لجرح ):شكديير نتا هناا هاا ..شنو مزال باغيييي
زيدان(واقف بدون ما يدافع على راسو ولكن عينيه فحال الجمر كيبينو كمية الغضب لي فداخلو): كنقسم ليك ا جوزيف ايلا كنتي مور هادشي ،ف راك مزال معرفتيني ...هاد لمرة تيق بيا عمرك غادي تلقاها مزال..
جوزيف(هز يدو ونزل عليه حتى ختل توازنو وطاح للأرض ..هبط على رجليه وجرو من الشوميز ديالو ):نتا أخر واحد يحاسبني
بلقيس(جات كتجري ل جيهتو ):جوزييف طلق منوو
جوزيف :بلقيس ما دخليش
بلقيس:واش تسطيتي ا جوزيف ..راه مستشفى هذااا ،واش وقت هادشي (شافت ف زيدان) ونتاا بارااك ..واش ما كفاكش أنك  رجعتي حياتها جحيم ..علاش حتى من ولدك هو لخر مخليها كتعذب بين لحياة و لموت ...شنو مزاال باغيي مناااا ... (قربات ليه و عينيها كلهم تحدي ليه ) ايلا كنتي كتبغيها ولو غير شوية بعد عليها وعلى حياتناا ..حيت عمرك تحلم انها شي نهار تقدر تنسى شنو درتي فيها واخا ما عرف شنو يوقع بيناتكم..ايلا كنتي كظن انه هاد لولد لي بيناتكم كان يقدر ف يوم من الأيام يخليك تبدا صفحة جديدة نتا وياها..كنگول ليك راك خاطئ بزاف ..حيت هادا ماشي اي جنين عادي ..هادا راه نتج على خطأ ...مكنضنش واش خطأ فحال هادا يقدر يتنسى
جوزيف (شافو ساكت مكيگول والو من بعد لهدرة ديال بلقيس من غير صدرو لي كيطلع و ينزل و تنفسو غير منتظم..طلق منو و رجع لور وهو داير يدو ف جيابو و كيهضر ب نبرة ):كنظن ستوعبتي لهدرة مزيان
زيدان(تكاا على لحيط و هدرة د بلقيس كتعاود فوذنيه ..بداو گاع الأحداث لي فاتو كيتراكمو فوق راسو ..إبتداءاً من صورتها لي مابقاتش كتقدر تحيد من راسو من نهار عرفها،إبتسامتها لي  سحراتو من أول مرة ،لمساتها على وجهو ...لطافتها لي لمسها رغم كرهها ليه ،ببساطة لأنها كائن مكيكرهش و مكيحقدش ...بسرعة رجعات بيه ذاكرتو لعينيها لي كان كيبان فيهم لخوف وهو قدامها..وصوتها الباكي وهي كترجاه باش يرحمها..و إنكسارها فاللحظة لي خرجات من بيتو ورجليها مطبوع عليهم قطرات الدم ...غمض عينو وهو كي حاول يطرد گاع دوك الصور لخايبين لي بداو كيدوزو قدام عينيه بدون توقف .....بدون ما يشوف ف جوزيف كمل طريقو وهو حاني راسو ‏،مكيشوفش قدامو غايب على لوعي ،ما مستوعبش كيفاش گاع لبيبان تسدو ف وجهو ،حتى من ولدو لي هو طرف منو ختار يوقف ضدو ...
بلا ما ينتابه ضرب ف سهيل وكمل طريقو كيشوف فالفراغ ما علاباالوش ب سهيل لي كيعيط ليه ...بدون ما يحس داوه رجليه نيشان للوطو ديالو ..
هاجر:هادا مالو تاني
سهيل(هز كتافو):ما عرف ...ولكن ما عمرني شفت زيدان فهاد الحالة
هاجر:يستاهل ما كتر
سهيل(خنزر فيها)
هاجر:مالي گلت شي حاجة عيب ،كون كانت عندك ختك تبغي لي يدير ليها غير شوية من داكشي لي دار عاد بنادم
سهيل(دفعها من ضهرها):كملي طريقك باراك من لهضرة
هاجر(ضحكات ب سخرية):مكيعجبكش لحال فاش كنگول الصح ..
سهيل(كيعبها ):سيري شوفيها و باراك من لهضرة..ايلا طرات شي حاجة صوني ليااا ..
هاجر(راجعة للداخل ):اوكييي....
جوزيف (شاف بلقيس گلسات بلاصتها و حاطة راسها بين يديها و لعيا باين عليها...دازت هاجر من حداه ووقفها):هاجر بنتي جيبي شي حاجة لبلقيس تاكلها
هاجر(بانت ليها حالتها حالة):واخاا ...خرجات إيجا ولا مزال
جوزيف(حط يدو على كتفها و بتاسم ب خفة ليها ):اه شوية و يديوها لبيتها ترتاح
هاجر(رتاحت نوعا ما عليها ،ورجعات هبطات لتحت )
جوزيف(تمشى لجيهة بلقيس ، هبط على ركابيه و شد فيديها بزوج ):بلقيس
بلقيس(كتشوف ف جيهة أخرى):إيمتا غادي يديوها للغرفة ديالها
جوزيف:دابا شوية ويديوها ،غير رتاحي
بلقيس(شافت فيه و هي متحسرة ):شنو غادي نگولو للبنت أ جوزيف...كي غادي نقدر نگوليها كنتي هازة بنادم ف كرشك ونتي مزال حتى ما عندك 22 عام كاملة ...
جوزيف:غادي نلقاو الحل لهادشي كامل ،متفكريش بزاف
بلقيس:كي ندير ما نفكرش بزاف  ا جوزيف ....انا فهادشي كامل كتبقى فيا غير هي (شافت ف راسها ف جوزيف و عينيها عامرين دموع)عرفتي ا جوزيف شحال كانت فرحانة ب حياتها الجديدة رغم أنه قبل مكانتش عندها شي حاجة كتسمى حياة ،كان لعربي فاش كيذكر كلمة "بنت "كيگول حاشاك قبلها ..نهار جبتها مكانتش عارفة كيف غادة الدنياا حيت عمرها خرجات على الدوار ،كنت كنتبعها كل النهار وهي غادة للكلية باش حتى ذيب ما يتهجم عليها....ولكن فلأخر (قبل ما تكمل هدرتها غلبوها دموعها ..) تسلط عليها شيطان ..
جوزيف(گلس حداها كيحاول يهدنها ..حط ليها راسها على كتفو):تيقي بياا حتى حاجة من هادشي ما غادي تبقى ...غادي نسيوها ف أي حاجة وقعات..ماشي بنت جوزيف باروخ لي تهزمها حاجة فحال هادي ..غير ديري يديك ف يدي..تيقي بياا انا مستاعد من غدا نبني إيجا وحدة أخرى..عرفتي علاش (دوز يديه على وجهها) حيت حنا عندنا كنز ..وهاد الكنز هو ملاك عطاه لينا الله ..داكشي علاش خاصنا نخبيوه باش حتى واحد ما يأذييه ولا يتجرأ انه يأذيه
بلقيس (شدات ليه ف يديه و بتاسمات وسط دموعها):مكنتش نقدر ندير والو من غيرك..
جوزيف(بادلها الإبتسامة ):كوني هانية ،من هاد النهار أنا هنا،حتى نطلع ليك فراسك
بلقيس(شداتها الضحكة ):ما كتفلت حتى فرصة
جوزيف:هههه و شنو..لواحد هو لي يعرف يستغلهم
هاجر(عاد جاية سخفانة من الدروج و هازة ساشي صغير فيه ماكلة)
بلقيس:مالكي سخفانة..فين كنتي
هاجر(كتهضر بلا ما تفكر ):ولاد لحرام گاع لي سانسور عمروهم (سدات فمها عاد عرفات شنو گالت،سدات فمها و مدات ليها لمالكة )احم ،غير جبت ليك شي حاجة تاكليها.ماكليتي والو من الصباح
بلقيس:لا لا بلاش ،ما قادرة ناكل والو
جوزيف(خنزر فيها )
بلقيس(شافت ف جوزيف عقدهم و خداتهم من عندها    ):اه صافي شكراا  ابنتي