فَتَاةُ البَادِيَّة وَ المَفْيُوزِي المُتَمَلِّكْ(بالدارجة المغربية )

الجزء 62

و ها أنا أنظر اليك مرة أخرى....
لا زال قلبي يدق بسرعة...
ولا زلت استنفد انفاسي فور رؤيتك....
لا زالت صورتك تهزني... ولا زال صوتك يزلزل سكينتي....
و ها أنا مرة أخرى أدرك انني لا زلت أعتني بك في قلبي رغم محاولاتي المتكررة لنسيانك .....
ظننت ان ضوئي انطفئ ولم تعد به حياة....
لكن هاهي عيني تضيء مرة أخرى بسببك....
وهاهو قلبي اللعين يتجه نحوك مجددا....
لازلت كاللعنة تخترق جسدي و تغرق قلبي ....

رجعات بلور لدرجة إختل توازنها حتى من لكاس لي كان فيديها مبقاتش قادرة تشدو بين يديها ..عينيها مقدراتش تبعدهم على عينيه،كانو شوفاتو كيشبهو لأول مرة جات عينيها فعينيه .كأنه رجع نفس داك الشخص لقديم لي عرفاتو اول مرة ،قاصح ومكيرحم حد ..واقفة غير بزز كأنه رجليها ما هازينهاش..نفسها ما بقاتش قادرة طلعها و كتمنى شي حد يجي ويهزها من ديك لبلاصة .لأنه رجليها لي غادي يهزوها مابقاتش حاسة بيهم ولا عارفة تحكم فيهم...قطعها من أفكارها غير لكاس لي طاح من يديها وفيقها من دوامة أفكارها
إيجا(رجعات عينيها كتشوف فيهم كاملين عينيهم عليها كأنهم كيتسناو ردة فعلها ...ضحكات بإستهزاء وهي شادة راسها غير بزز ومزال عينيها ف عينيه ..):جهاد يالاه نمشيو
جهاد(تالفة معارفة ما دير):ااه واخاا
سهيل:مزال لحال يالاه جينا .شحال ما تجمعناا هكاا
يوسف:سكتنا ا صحبي ..هاجر نوضي نتحركو حتى حناا
هاجر:اا اه واخاا
إيجا(تمات غادة ورجعات باغا تاخد صاكها لي كان بالظبط حدا زيدان):واخا ناخذ صاكي
زيدان(هزو من حداه ومدو ليها ):هذا !
إيجا(خداتو ليه من يديه )
عثمان (جا من لور معنقها ):فين مشيتي من الصباح وانا كنقلب عليك..وايلي صافي غادا !
إيجا:اه غادي نمشي عييت شوية
عثمان:لالا منخليكش تمشي ..مزال يالاه بدات الليلة ا زين ..(شاف فجهاد)شبان ليكم نكملو السهرة فبلاصة أخرى كيف ديماا
إيجا(رجعات مكملة طريقها ،وكل ما كيهمها فديك اللحظة هو تبعد على لبلاصة لي كاين فيها هو،وتبعد على عينيه لي حاسة بيهم كأنهم كيختارقوها ..مشات بالزربة كادوز من وسط الناس طلعات فلأسانسور  وهبطات للطابق لأرضي فين كاينة لوطو ...)
هاجر(جايا كتجري من موراها):ايجاا بلاتي ..
إيجا(ضارت عندها وهي كتنفس بزز):كنتي عارفة  ياك..كنتي عارفاه جا
هاجر:بلاتي غير نشرح ليك راه حتى اناا ..
إيجا(رفعات صوتها):كنتيي عارفاه رجعع ومخبية علياااا ..شايفاني كنتعذب ومگلتي لياااا واللوو..
جهاد(جايا كتجري تابعاهم):مالكم نتوما كتغاوتو ..واش تسطيتو
هاجر:إيجا..غير سمعيني  راه من نهار جينا من إيطاليا هو مشا فحالو ميصحابليش غادي يقدر يبان قدامك حتى انا فحالي فحالك..مكنتش كنظن غادي يجي هناا داكشي لاش مگلت ليك والو
إيجا(معصبة):براافو..يعني هاد لمدة كاملة  كان معاكم ف إيطاليا ومعمرك گلتي ليا شي حاجة ..هاد لمدة كاملة ونتي كتكذبي عليا ا هاجرر
جهاد:إيجا صافي تهدني
يوسف(حتى هو جاي ياخد لوطو ديالو):هاجر..مشيناا
هاجر:بلاتي ا يوسف خليني غير نهضر معاها
إيجا:معندنا فاش نهضرو..حيت حتى حاجة مكتبرر لكذوب ديالك..
خدات صاكها ويديها كيترعدو كتقلب على سوارت لوطو ...كملات طريقها لجيهة لوطو ديالها حتى كتبان ليها لوطو ديالها لأخرى...
إيجا(رجعات عندها):عطيني لي كلي ديال لوطو ديالي
زيدان(شاد لي كلي ب يديه):كتقلبي على هادو
إيجا(شافت ف هاجر ومزال الصدمة على وجهها)
زيدان(قرب منها و عينيه مكيبشروش بلخير):هضرت ..واش كتقلبي على هادو
إيجا(جمعات شتات قوتها و تكلمات):شنو كيديرو عندك
زيدان:ماشي مهم كيفاش خديتهم لمهم هو كيفاش نتي غادي تاخديهم
إيجا(غمضات عينيها وكتحاول تكالماا ):غادي تعطيني ل كلي ديال لوطو ديالي داباا ولا مغادي يعجبك حال ..
زيدان(بتاسم وهو معجب بقوتها ):ماشي بهاد السهولة..مزال عندنا حسابات ما صفيناهمش..
إيجا(قربات ليه وعينيها ف عينيه):حساباتنا ا سي زيدان لمالكي صفيناهم شحال هادي ،لا نسيتي نفكرك..و دابا غادي تعطيني لوطو ديالي .ومن الأحسن ماتبانش قدامي  طول ما نتا هناا ..
زيدان(عينيه مفيكسيين ف فمها كيف كيتحرك  وماعلى بالوش شنو كتگول):فاش تبغي لوطو ديالك نتي عارفة فين غادي تلقايني ..
إيجا(بدات كتعصب ):واش حمق نتا ولا مالك
زيدان(جبد سيگار ديالو كيشعل فيه):ما عنديش مشكل ايلا بغيتيها دابا نعطيها ليك ..ولكن بشروط
إيجا(ضحكات وهي مفقوصة):شروط ..باش ناخد لوطو ديالي نتاا غادي تشرط علياا..واحد فحالك نتاا غادي يشرط علياا انااا
زيدان(ساط فيها الدخان على وجهها و جرها لعندو مزير على ذراعها وهو معصب من هضرتها  .قرب لوذنيها كيهضر بنبرة قاصحة  و مامسموعاش لكن مستفزة):متنسايش هادا لي كتهضري عليه فحال هكاا..كنتي ناعسة بين يديه فيوم من الأيام ،يعني من لخر ،متنسايش شكون دوزتي معاه ديك الليلة
إيجا(شافت فيه كأنها مشمئزة منو):ومتنساش نتا انك شيطان ونتا لي هددتيني ،ونزيدك ديك الليلة لي كتهضر عليها مكتعني ليا والو
زيدان(شاف فيها وهو غالب عليه طابع لهوس ):كيبان ليا ما نسيتي والو
إيجا:ومستحيل ننسى...ودابا عطيني لوطو ديالي ،وكنتمنى انك ترجع منين جيتي
زيدان(ضحك ب سخرية  وقرب لعندها ..دوز يديه على شعرها):ماشي بهاد السهولة لي كضني..غدا غادي نسيفط ليك لعنوان فين تجي عندي 
إيجا(بعدات عليه):فأحلامك
زيدان(بتاسم على جرأتها لي زايدة على اللزوم ):ايلا ما جيتيش حاجة أخرى هاديك..يعني غادي تعلني لحرب على راسك..كنصحك متحاوليش
إيجا(تمشات لجيهة لوطو كتحلها):راك مابقيتيش كتخلعني ديرها فبالك
زيدان:على خاطرك غادي نخليك تشوفي كلشي ب عينيك
إيجا:ل أعلى ما فخيلك ركبو (طلعات ف لوطو رمات صاكها و كسيرات بالجهد خارجة من لپاركينغ
زيدان(حتى هو طلع فلوطو و كسيرا موراها خارج  حتى كان غادي يدوز فيهم  ...مخلي كلشي واقف مصدوم رغم انه غادي ناشط وعاجبو لحال خصوصا من جرأتها لي متعودش عليها كأنها إنسانة أخرى غير هاديك لي عرف .ولكن تعيا ما تخبي نفسها لقديمة ..لكن كتبقى مكشوفة قدامو وقادر يقراها كاملة رغم گاع محاولاتها باش تخبي راسها وتبان قوية قدامو)
##عند إيجا لي خارجة مكسيرية كتصوگ ب جهالة ..مزيرة على لڤولون ورافضة انها تنزل ولو دمعة وحدة لدرجة الطريق مبقاتش كتبان ليها..حلات الشرجم ديال لوطو كتحاول دخل نفس لصدرها لأنها بصعوبة  كانت كاتمة أنفاسها وهي واقفة قدامو باش متبينش توترها وخوفها .فرانات ف جنب الطريق كتحاول تهدن راسها من ديك نوبة الهلع لي جاتها..جسمها كلو كان كيترعد و قلبها كينبض بسرعة...حطات راسها على لڤولون وهي حاسة براسها عيانة وفشلانة لدرجة ملقاتش لقوة باش تحرك يديها وتصوگ براسها حتى للدار، محساتش براسها حتى داها النعاس وهي متكية على لڤولون كأنها باغة تهرب من أي حاجة كتحيط بيها عن طريق النعاس باش متبقى حاسة بوالو ومتفكر فوالو ،وكتمنى كون كانت تقدر تهرب وتبعد من كلشي ،لكن عارفة لا مفر..جوزيف معتامد عليها وهي عارفة مزيان شحال هو باغي يرتاح  ويحط لحمل ..وكذالك حياتها كلها هناا متقدرش ب سهولة تمشي وتخلي كلشي..يعني ب معنى أصح ،يا تحارب اي حاجة جات وقفات فطريقها..يا تهرب من كلشي وبطبيعة لحال هاد لحل بالظبط هو لي ماتقدرش عليه ..
هاجر(واقفة كتمشى فالصالون وهازة تيلي ف يديها):مكتجااوبش ...واقيلة نصوني على خالتي بلقيس نسولها واش وصلات ولالا..لااا مجاتش غادي غير نخلعها...فين غادي تكون مشات ..انا عارفاها موحال تمشي للدار نيشان..عنداك توقع ليها شي حاجة
يوسف:دابا مالكي مصدعة راسك معاها..خليها حتى تبرد وغادي تعاود تصوني ليك
هاجر:سكت نتااا..مكاينش لي طيحني فهادشي قدكم ..
يوسف:دابا خليها حتى تبرد وراه عادي تهضر معاك ..ونتي سيري نعسي راه فات لحال وغدا تابعك بزاف ..
هاجر:اجي بعدا..شكون گال ليه راه حنا تما..ما تكون غير نتاا ولا سهيل
يوسف(هز يديه):ماشي اناا..
هاجر(كتقرب ليه):مأكد !
يوسف(كيبعد عليها):راه گلت ليك شنو كاين اختي..بعد لمرات كتخلعيني مكنعرف واش انا لي كبر ولا نتي
هاجر:ها وذني منك ا يوسف لا تكون نتاا
يوسف(حتى بعدات عاد رتاح ):راه گلت ليك شنو كاين
هاجر:لمهم انا طالعة ننعس ..فيقني غدا بكري راه تيلي ديالي قريب يطفى
###
زيدان(گالس فالجردة حاط رجلو على الطبلة شاد سيگار فيد و مشروب ديالو ف يد ...شير للگارد باش يجي لعندو):فين هي
لگارد :مزال ف نفس لبلاصة لي بقات فيها من قبيلة..محركاتش لوطو ديالها من جنب الطريق
زيدان:حضيوها مزيان..وديك الطريق مانبغي حتى واحد يدوز منها..غير تحرك هي من تما علمني
ريناد(جات گلسات حداه):شكون هي ..
زيدان:شكديري نتي هنا فهاد لوقت..
ريناد:جيت نشوفك..ما يصحابليش راك دخلتي للمغرب حتى گالها ليا سهيل..
زيدان:مم مزيان.
ريناد(بتردد):واش ا خويا رجعتي مع ...ا إيجا
زيدان(ضحك ب خفة):ممم تقدري تگولي هكاك..
ريناد(بغات تشوف شنو من تحت راسو):ولكن انا على ما سمعت راها مخطوبة،لهارون وكلشي كيهضر عليهم
زيدان(حيد رجليه من الطبلة):ما حدي انا كاين ..مكاينش شي حاجة سميتها هارون..
ريناد:نسمي هادا حب تملك
زيدان(شاف فيها ومخنزر):دخلي سوق راسك ا ريناد ..
ريناد(تأفأفات ):وا غير كنسولك...فراسك شفتها هادي شي يومين تقريبا وسلمت عليها..مشافتش حتى ف وجهي
زيدان(كينفث من سيگار ديالو ما مسوقش ليها)
ريناد(كتهضر بحدها كيف شي حمقة):الصراحة زادت زيانت على قبل ..وكبرات على أخر مرة شفتها..ياك!
زيدان(رجع راسو لور ،وكتبان ليه بين عينيه غير هي..نطق بصوت غير مسموع):واخا خرجات للطريق شوية .ولكن غادي نقادها
ريناد(شافت فيه وهي متعجبة):نتا والله ميقد عليك غير لي خلقك..ولكن انا عارفاك شنو باغي ..
زيدان(شاف فيها حيت هو براسو ما عارفش شنو باغي ):شنو !
ريناد(طلعات حاجبها ):بغيتي تبعد عليها ..ولكن فنس لوقت تبقى ليك،هادشي لي باغي ياك...حيت انا كنعرفك مكيعجبكش لي يقيص ليك حاجتك..اولا
زيدان:يمكن !
ريناد:ماشي يمكن..انا مأكدة من هادشي ..واصلا ماشي بعيد حتى هي تكون مزال كتفكر فيك..