فَتَاةُ البَادِيَّة وَ المَفْيُوزِي المُتَمَلِّكْ(بالدارجة المغربية )

الجزء 61

جوزيف (گالس فل بيرو ديالو ومعاه لمدير القانوني لي مكلف بكل ما هو قانوني كيخص الشركة ..):قدرتي تعرف ليا شكون هو لي باعت ليه ختي حصتها من الأسهم
:مزال لحد الأن هويتو ما معروفاش..كنظن انه متعمد يتحفظ على سميتو ويخلي لأمور سرية...لو كان باغي وجهو يتعرف كنظن انه كان غادي يجي ربع سنين هادي ..
جوزيف:بصفتي حامل ستين فلمية من مجموع الأسهم كنظن من حقي نعرف شكون هو ..او على لأقل كان يشرفنا ب حضورو
:مكنظنش ا موسيو جوزيف...لو كانت عندو نية انه شي نهار يجي ..مااغاديش يفلت الفرصة ..
جوزيف(زير على يدو ):ختي دارت لي بغات ....ولكن هي طمعات و بغات تبيع اسهمها بأضعاف ثمنهم الأصلي ..وهاذا لي خداهم من عندها بهاذ الثمن ..من وراه شي حاجة ...(تنهد وشاف فيه) بغيتك تبدا الإجراءات القانونية ..باش نعطي لبنتي النص فالأسهم ديالي
:واخا ا موسيو ..غدا يكونو عندك لوراق واجدين
هارون(دخل عندو للبيرو ):جوزيف ..ميصحابليش راك هناا..
جوزيف:دخل ا هارون نيت خاصني نهضر معاك فشي حاجة
هارون(گلس قدامو من بعدما مشى لي كان مع جوزيف):هاني معاك ...واقعة شي حاجة
جوزيف:لي واقع هو الشخص لي باعت ليه ختي لأسهم ديالها مزال مامعروفاش هويتو لحد لأن
هارون:معرفتش الصراحة..لوالدة انا براسي صدماتني بهاد القرار..حيت راه حياتها كاملة وهي كتخدم باش تزيد ب إسم باروخ...معرفتش علاش دارت هاد الخطوة
جوزيف:ماماك خدات الأضعاف ديال تمن الأسهم الأصلي ..مكانش شي واحد يقدر يفلت فرصة بحال هادي ..ومكنتش انا نقدر نشريهم من عندها بداك الثمن خصوصا فداك لوقت
هارون:الصراحة مكنعرف ما نگوليك فاش كيتجبد هاد لموضوع
جوزيف:نتا معندكش دخل فهادشي..انا باغي نعرف حاجة وحدة شكون لي عرض عليها داك الثمن وشراهم من عندها ..
هارون(كيحك فلحيتو ):الصراحة اناا خاطري ما هانيش من هاد الناحية..كنحس بيه شي نهار غادي يخرج لينا من الجنب..
جوزيف:انا معنديش مشكل ..ولكن غير ميبقاش متخفي حيت هادشي غير كيزيد يشككني انه موراه شي حاجة
هارون:بصح عندك لحق..
جوزيف(شاف فيه مطولا):شفتك كترتي هاد الأيام،طول لوقت كنلقاك مع بنتي
هارون(حك راسو بتردد):نتا عارف بلا منحتاج نشرح ليك
جوزيف:ولكن كتبان لياا مزال متخوف
هارون(ضحك بخفة):ماشي مسألة تخوف ..ولكن كنحاول نعطيها وقت باش تفكر على خاطرها
جوزيف:انا معاك فهادي ..لكن كنظن نتا لي دابا مابقاش ليك وقت لي تخليه ليها..
هارون(بإستغراب ):شنو كتقصد ب مابقاش ليا لوقت
جوزيف(ناض كيتمشى جيهة لبالكون لي عندو فلبيرو..وفنفس لوقت داير يدو فجيابو وحال الصدايف ديال الشوميز من لفوق):فراسك زيدان دخل للمغرب
هارون(ناض من بلاصتو):كيفاش !! ياك كان گال عمرو غادي يرجع
جوزيف:نصحح ليك !گال مغاديش يرجع لحياتها
هارون(تمشى جيهة جوزيف):وشنو كيدير هناا ..علاش جا ثاني ..
جوزيف:جاي على قبل خدمتو وخصوصا لمؤتمر لي كيتقام فلمغرب  كل عام كيبان ليا انه لمافيا الدولية هاد الأيام مرونة ،داكشي لاش مضطر يحضر هاد لعام ،(شاف فهارون كأنه كيحذرو)ولكن طول ما هو هنا يقدر فيوم من الأيام يتصادف معاها..وديك الساعة منضمنش ليك ا هارون انه لقرار لي خدا هادي ربع سنين غادي يبقى ساري مفعولو حتى لدابا
هارون(زير على يدو ):دابا شنو مطلوب مني
جوزيف(كيلبس لڤيست ديالو):خاصك ما تفلتش اي فرصة جات بين يديك وايلا تقدر تندم بزاف ..حيت كنعرف بنتي مزيان ،ايلا جات شي حاجة لي تشوش ليها راسها مكتبقاش تعرف تاخد حتى قرار..يعني هادشي كامل لي خدمتي عليه هاد لمدة كاملة غادي يمشي ليك ف الزيرو
هارون(شاف فيه وهو غارق فوسط افكارو..ضحك بنصف ابتسامة):حسابي فراسي
بلقيس(دخلات لعندهم لبيرو بعدما دقات ):جوزيف
جوزيف(شاف لجيهة لباب ..كتبان ليه بلقيس داخلة عندو بكسيوة فلأسود كلاس و سامپل جايا لاصقة عليها حتى لتحت ركابيها ومن لفوق فيها كمام حتى هوما سامپل ومن جيهة الصدر جاية مفتوحة ..كانت فكامل أناقتها واخا كانت مكلفة راسها بلقليل لكن جمالها تبرز ،خصوصا مع طولتها كتخلي اي حاجة تبان زوينة فيها(الصورة لفوق👆🏻👆🏻 ...):هارون ..تقدر تمشي حتى لمن بعد ونكملو هدرتناا
هارون(بدون ما يهضر خرج )
بلقيس:مال هارون
جوزيف:مامالو والو غير حذرتو مجرد تحذير بسيط
بلقيس(شافت شوفاتو ماشي هوما هادوك):مالك حتى نتا
جوزيف(جرها من خصرها):شنو هاد لجمال كامل ممم منضمنش
ليك شنو غادي يوقع ايلا شاف فيك شي حد
بلقيس:هههه ياك بعداا..مابغيتش نكلف راسي بزاف ..باش نبقى رسمية
جوزيف(قربها لعندو وباس على راسها):ولكن باقا واحد لحاجة ناقصة
بلقيس:شنو هي !
جوزيف(دخل يديه فلڤيست ديالو وجبد بواط كحلة صغيرة..كانت فيها سلسلة رقيقة و فيها ألماسة صغيرة على شكل نجمة ...قادها ليها ف عنقها ):دابا مزيان
بلقيس(مشات لجيهة لمرايا كتشوف فراسها ):مكنتيش تكلف راسك
جوزيف(قرب لعندها معنقها من لور):حتى حاجة متغلى عليك
بلقيس(ضارت لعندو و مدورة يديها على عنقو):شنو دابا غادي تبقى غير تشوف فيا هكاا...مغاديش نمشيو
جوزيف(بتاسم ليها):الصراحة فكرة زوينة هادي ..مكرهتش نبقى نشوف غير فهاد الزين لي عطاني الله ..اش داني انا لشي حفل عمل
بلقيس(دارت ليه ضحكة صفرة):نووو..غادي نمشيو حيت خاصني نرجع الصرف لديك الصفريطة راني عارفاها غادي تكون تماا
جوزيف(شد كرشو وهو كيضحك على هضرتها):نتي والله حتى حمقة..واش غادي ديري راسك فهاديك..
بلقيس:هيهي انا مدايراش راسي فيها..غير غادي نعلمها فاش نكون مع راجلي متجيش تلصق فيك حتى هي ..(رفعات صبعها) راك مزوج بيا اناا ..اناا بوحدي
جوزيف(جرها عندو معنقها وهو كيضحك ):هههه بلقيس..اش هاد لغيرة عندك
بلقيس:وا شنوو ..لا مغرتش عليك انا شكون يغير..(هزات صاكها و جراتو) يالاه نمشيو راه غادي نتعطلو
### عند إيجا
ضربات ل11 ديال ليل  وهي عاد واصلة ل ديسكو لي مولفة كتجي ليه...فرانات فلپاركينگ  .كيف ديما لوطو ديالها شادة بلاصة ديال تلاتة..خرجات من لوطو وهي محاملاهاش حيت عالية بزاف ..وقفات قدام لمرايا كتقاد فراسها ..كامت لابسة غوب صواري سيكسي فلحمر علاين طرطق ليها على لحمها وبزز باش واصلة ليها لفخادها..ومن فوق فيها سميطات رقاق وصدرها كلو باين ..عاد لابسة صنيديلة فلكحل سميطات  ..وشعرها هازاه كوپ شوڤال
جهاد(جات هاجمة عليها من لور):مالكي على هاد التعطيلة
إيجا:غير سكتي راه بزز باش وصلت الطريق كانت عامرة بزاف
جهاد:راه هاجر و يوسف وصلو قبيلة ..راهم لداخل
إيجا:ههه وايلي دغيا جاو..
جهاد:ويالاه سربي راه كلشي كاين لداخل ..عرفتي شحال من واحد سولني عليك
إيجا:هههه بيان سيغ راه انا لي كنزهي ليكم هاد ديسكو..(تمات داخلة وهي كتمايل وفكل مكتقرب صوت ديسكو كيزيد يعلى ..حتى دخلو للداخل وزاد تجهد الصوت ..كانت الدنيا عامرة و ضواو كيعميو لعينين ايلا مكنتيش مولف بيها صعيب تشوف وسطهم ...مع دخلات كلشي ضار لجيهتها ،حتى من ديجي علن راها دخلات ..تمشات وسط منهم ولي كدوز من حداه كيوقفها يسولها فين غبرات..
إيجا(كتهضر بصوت مجهد مع جهاد):ميصحابليش توحشتوني لهاد الدرجة ..
جهاد:هههه ما شفتي والو ..ديسكو خوا ليهم من نهار ما جيتيش..انا لي علمتهم راك جايا..
إيجا:ههههه خطيرة نتي وليتي كديري لي كولابوغاسيو على ضهري
جهاد:هههه وا شنو..
إيجا(گلسات ف طابل جات مقنتة كانو گالسبن فيها يوسف و هاجر ..ومعاهم حتى عثمان ):عثمان  ا فين هاد الغبرة ..
عثمان(ناض لعندها ):نتي لي غابرة..ولكن مغبرتيش على والو..غير رجعتي شفتك زدتي زيانيتي
إيجا:وا إيجا باروخ و اجرك على الله..
عثمان:ولكن مگلتيش لياا عندك هاد صحبتك ..فين كنتي مخبايها علينا
إيجا(شافت ف هاجر وهي كضحك):ههههه ماشي اناا..راه ناس اخرين ايلا سمعوك دابا غادي تمشي فيها
هاجر:هههه زعما شفتيني غير انا مسوقة..(رمات يديها على عثمان معنقاه من كتفو):دابا انا بغيت نشطح ..كيف غادي ندير وسط هادشي كامل ..
يوسف:واقيلة نتي حماقيتي ..
هاجر:اه فحال داكشي ..
عثمان(جرها من يديها):هي لي متعاودش
هاجر(كا دير باي باي لإيجا وغادة كتشطح هي وعثمان):تشااااااو
جهاد:هههه ناري حماقت هادي ما فيهاش
إيجا(گلسات حدا يوسف):فين سهيل..
يوسف:مزال ما جا ..عاد غادي يوصل عليناا
إيجا(عيطات على سيرفور وحتى هو دغيا فهمها شنو باغا وجاب ليها)
جهاد(مشات گلسات حدا يوسف):يوسف ..شفتك ما خديتي حتى حاجة تشربها
يوسف:انا معارف والو هناا..نتي خودي لينا شي حاجة 
جهاد:ههه هي ولولة...(عيطات لسيرفور وضارت عندو) لمقابلة ديال لبارح  كانت زوينة
يوسف:شفتيها !
جهاد:ههه بيان سيغ شفتها..اصلا راك عارف خويا الصغير مبلي بلي كومبا ..مكيفلتش حتى مقابلة كيفما كانت
يوسف:خاصني شي نهار نشوفو..فحال والو نعطي لعادل فاش يتلاهى عليا شوية
إيجا(بغات تخليهم بزوج هزات لكوكتيل لي كانت كتشرب منو ومشات  لجيهة فين كاين لبار تشوف شي حاجة تاكلها ..حيت ما واكلة والو هاد لعشية..وخاصها تعمر لكريشة باش تلقى السوفل لهاد ليلة ..طلات على جهاد لقاتها گالسة هي ويوسف كيضحكو ناشطين ..عاد بانت ليها هاجر حتى هي ناشطة مع عثمان كيشطحو مناقصهم حتى خير ..وشافت فراسها لقات ما معاها حد من غير داكشي لي كتاكل ..حطات يديها على حناكها وندمات حيت معيطاتش لهارون يجي ..حتى جات ليها هاجر جراتها من لور وغادة بيها للوسط فين كيشطحو ..وحتى هي مگالتش لا ..دغيا ديمارات محساتش براسها ..فلحظة عثمان هزها وطلعها فوق لمنصة لي كيكون فيها الديجي ..وعاد الصوت زاد ولى قوي ..وهي فقدات السيطرة على راسها ..
هاجر(كتهضر ف وذنين عثمان):شنو واقع هناااا
عثمان:ههههههه لا مواقع والو ..غير إيجا كاينة ليوم...
هاجر(كتشوف ف إيجا ومصدومة راه هادي هي صحبتها لي عرفاتها شحال هادي ):هههه لا ميمكنش...
عثمان:سييييييييي
إيجا(غمزات ديجي  دغيا قلعها...خدات من عندو شامپانيا كبيرة و حركاتها ...خدات لميكرو من عندو):دابا عاد بدات السهرة...(مع هضرات كلشي بدا كيصفر وزادت لونبيونص...خدات ديك الشامبانيا فتحاتها وحطات صبعها فراس ديالها..وبدات كترش عليههم...كضحك فحال ايلا عايشة فعالم أخر واكتر من هادشي انه كلشي عاجبو لحال حيت كتنشط ليهم الليلة  ومكتخليهاش مملة فحال اي ليلة عادية...شافت ف هاجر لي حالة فمها فيها...جراتها طلعاتها حداها..ما هي غير جزء من الثانية حتى ندامجات معاهااا ...إيجا طلقات شعرها وكتمايل مع داك الزديح وعاجبها لحال كتفرغ گاع داكشي لي عاشتو هاد ليوماين وهي مواعياش بلعينين لي حاضينها من بعيد ..
هاجر:انااا صافي  سخفت
إيجا:هههههه صافي هادا جهدك..
هاجر:اويليي راه الشطيح لي مشطحتوش حياتي كاملة شطحتو ليوم...
إيجا:هههه نمشيو نگلسو معاهم
هاجر:هههه ناري يا ختي على سوفل عندك..انا غادي نمشي نرتاح
إيجا:هههه واخاا انااا نمشي نقاد حالتي ونوصل عليكم
هاجر:اوكي
تمشات لجيهة لبلاصة فين كانو گالسين حتى جراتها شي يد ..ضارت مخلوعة )مالنا ياك لباس
سهيل(زير عليها من يديها):هادشي لاش جاية لهناا
هاجر:ياك گلتي مغاديش تجي شفتك ساليتي مع ريناد قبل من لوقت
سهيل:تحركي قدامي ..ش مزال كاديري هنا ونتي غدا عرسك
هاجر:طلق مني ماشي سوقك ..جيت مع صحبتي
سهيل(جرها من خصرها وهو ناوي على خزيت):هاجر متعصبيش ديلمي...ديري عقلك وزيدي تحركي
هاجر(بعدات يديها عليه):واش سووقك..جيت مع خويا
سهيل:خوك مشغول مامساليش ليك...وحاجة أخرى راك سوقي ..متنسايش راك مرتي ..ولا ياكما يصحاب ليك حيت مزال ما تقبتك راكي مزال مامزوجاش
هاجر:من نيتك ا سهيل
سهيل(زير عليها ف يديها):و دابا تحركي قدامي گلسي تبتي ولا غادي نهرسك هناا ..وحسابنا مزال ما تسالا ..مزال غادي نتفاهمو كيفاش مخلياا ز** يتلمس فيك ونتي فرحانة كتشطحي
هاجر(عرفات راسها قفراتها ،زادت قدامو بلا ما تهضر....حتى رجعات بلور ووقفات مصدومة ):اوييليي شنو كيدير هادا هناا
سهيل:هاجر ..گلسي تبتي ومادخليش فشي حاجة مكتعنيكش
هاجر:واش تسطيتي ولا مالك نتا..راه غادي تجي وتشووفو ،واش ب نيتك
سهيل(جرها من ذراعها بقوة):لحد الأن زيدان ايلا مكانش حيدك من طريقو راه غير على قبلي وقبل يوسف..مدخليش فشي حاجة مكتعنيكش ا هاجر حسن ليك..خليه بينو وبينها ،نتي ما عندكش دخل بيناتهم.مشاكلهم يحلوها بيناتهم شنو ما كان طرا بيناتهم من قبل ..
هاجر(شافت فيه):بعد يديك علياا
سهيل:ومتنسايش غدا مور لعرس راه مغاديش نكونو هنا،كيف كناا مخططين..وانا مغاديش نبدل خططي على قبل شي واحد كيفما كان..و دابا گلسي خلينا ندوزو هاد الليلة على خير
هاجر(مشات معصبة لجيهة الطبلة وعارفة ما فيديها ما دير  ..گلسات حدا يوسف و جهاد )
جهاد(قربات لوذنيها):ناري ..شكون هاد الزين كامل لي جا گلس معاناا،انا راه صافي دخت
هاجر(جاوباتها وهي كتشوف فيه محاملاهش):زيدان...هادا هو زيدان لمالكي
جهاد(حلات عينيها على جهدهم):اويلييي
هاجر(طاحت عليها فكرة):جهاد...سيري وصلي على إيجا ل لي تواليت و ديها گولي ليها راه مشاو وانا غادي نهضر معاها من بعد
جهاد:اه صافي واخا(وقفات مزروبة ..حتى كتلمحها واقفة قدامهم )إيجا