فَتَاةُ البَادِيَّة وَ المَفْيُوزِي المُتَمَلِّكْ(بالدارجة المغربية )

الجزء 6

فتاة البادية و المفيوزي المتملك
الجزء السادس

خرجو من عند للحاجة لكبيرة ومعاهم لعنوان ديال نورة و حتى رقمها لي منفعهم فوالو حيت معندهمش تيليفون...كيتمشاو وسط الدروبة لي مضيقين و لحال بدا كيسخن كتر من قبل .... فلحظة لأولى تلفو على طريق لباب لكبير باش يخرجو من لمدينة لقديمة ويشدو طاكسي ....
بلقيس (شافت ف إيجا بدااا وجهها كيحمااار بقوة الصهد ):الله على بنيتي الله قتلك الصهد ...غير زيدي ما بقاا والو و نوصلو ...هاااااا ها لي گلت ليك هاهو لباب لي دخلنااا منو قبيلة...
إيجا(بانت ليها لفرحة فوجهها ):اااه ولاهيلا ا يمااا هو هادااا....
بلقيس(تمشات قدامها):زيدي نشدو طاكسي ...
إيجا(يالله غادي تبعها حتى وقفو جوج قدامها )
الدري 1: اوااااه ا صحبي واش هاد الزين كامل كاين و انا مسايق للدنياا خبااار...
الدري 2: الزين ياكمااا تالفة ..نوريك الطريق ...
إيجا(كتشوف فبلقيس كتبعد عليها):ي..يييماااا
الدري 1: لا ميمكنش هاد المنتوج ديال لعروبية ...كون كان فخباري كون مشيت شحال هادي..
الدري2(شد ليها ف كتفهااا):
إيجا(غوتاااات بجهد ): بعد مني متقيصش فيااا.......يماااااااا
بلقيس(غير سمعات الغوتة ضارت مخلوعة حيت عارفاها ديال إيجا ...مشات كتجري لجيهتهااا هزات الصاك و عطاتو ليهم للراس ):سييير الله يلگيهاا ليكك ا ولد لحرااام ...كتبسلو على بنات الناس معندكمش خواتات ....الله يلگيها ليكم فهاد النهار...

الدراري غير شافو لقضية حماضت و شي رجال تمو جايين لجيهتهم دغيااا هربو كيجريو ...بلقيس طلع ليها الدم من ديك الوقاحة كاملة لي شافت بعينيها ....شافت ف إيجا باين ف عينيها لخوف حيت معمرها موقع ليها هكااا من قبل ...جبدات فولارا من صاكها و دوراتها على راس إيجا ،حيت منين دخلو لهاد المدينة ولي كيدوزو من حداه لا كبير لا صغير كيتبعهم بعينيه ....
إيجا(كتمسح وجهها من لعرق):غير خليه ا مي راه كاين الصهد ...
بلقيس:غير خليه ا بنيتي الله يرضي عليك بيما وصلنااا ....
رجعو كيتمشاو تاني وهاد المرة شادة ليها فيديها حتى وصلو للشارع وشدو طاكسي لي ملقاوه غير ب مشقة الأنفس ...بعد مدة وهوما فالطريق وصلو للبلاصة لي عطاتهم لحاجة لكبيرة فالورقة....هبطو من الطاكسي بعدماا خلصو ووقفو قدام الدار ...بلقيس شافت فلورقة و كتشوف فالرقم لي مكتوب ف باب الدار باش تأكد راهم قدام الدار الصحيحة ....
إيجا:يمااا....هاد الدار زوينة بزاااف ...
بلقيس (بركاات على الصونيط ):واقيلة مكاين حد فهاد الدار....(زادت كتصوني حتى سمعات شي صوت جاي )
الخادمة:شكووون ....هاني جااية..(شافت فيهم بإستغراب ) نعام اللالة ياكما بغيتي شي حاجة....
بلقيس:واش هادي هي دار نورة....
الخادمة:ااه هادي هي دار لالة نورة....شنو بغيتيها....
بلقيس:كاينة هي ؟؟؟
الخادمة:مكايناش ...شكون نتي لي كتسولي ....
بلقيس:اانااا ختهااا بلقيس...و هادي بنتي إيجااا...
الخادمة(طلعات و هبطات فيها):نتيي خت لالة نورة مولات هاد لڤيلا وهادي بنتك گاعمااا كتبان عليك مهاااا ....نتوماااا بان لياااا شي شفااارة...
بلقيس:لاا والله ما شفارة....غير گولي ليهاااا راه جات عندك بلقيس راه غادي تعرفني ....
لخدامة:سيري ا لالة شوفي لمن تگولي هاد الكذوب ديالك ....حيدي من لباب قبل ما نعيط ليكم للعساس يديكم فين ترباااو (سدات لباب و دخلات فحالها)
إيجا: اويلي ...مال هادي دايرااا هكااا...
بلقيس :هادي را مسوطي ليها شي عرق ف مخها...
إيجا:شنو غادي نديرو دابا...
بلقيس :نگلسو هنااا نتسناوها حتى تجي ....
إيجا:فين !!
بلقيس(حطات الصاك و گلسات ف جنب طروطوار ): گلسي گلسي  تبرديي ...(كتسوط على راسها) ها ناري ميمتي على صهد هاد النهار ...