فَتَاةُ البَادِيَّة وَ المَفْيُوزِي المُتَمَلِّكْ(بالدارجة المغربية )

الجزء 1

فتاة البادية والمفيوزي المتملك
الجزء الأول

مكنتش عارفة حياتي تقدر تقلب عليا بهاد السرعة على قبل قرار خداه با ف حقي ،ضطريت نحارب اي حاجة جات قدامي بهدف انني نحقق احلام بعادين كل البعد على بنت عايشة غير فلبادية..مكنتش متوقعة ان سعيي وراء تحقيق احلام لي كنت كنشوفهم غير من مور صندوق صغير كيصدر صوت كيگولو ليه تلفازة غادي يخليني نعاني ونتلاقا بناس قلوبهم قصح من لحجر ...أو بالأحرى إنسان قلبو قصح من لحجر...
هاد لحلم بذات هو لي خلاني نفكر نبدل مجرى حياتي كاملة ونهرب نهار عرسي ..اه نهار عرسي...
انااا إيجا ...بنت بسيطة كتسكن فقرية موحال حتى واش معروف مكانها فلخريطة .....20عام وهادا لعام يالله خديت لباك ديالي واخا مكانش بالساهل علياا انني نوصل ليه لولا ما جدة خيرت باا بين السخط و الرضاا....

كانت گالسة متكية على لحجر لي جا فجنب لواد ...كتلعب برجيلاتها فلماا وشعرهااا لي خصلاتو قهويين كيبرو مع الشمس ..زين فتاان كيسحر لي شافو... ساهية فالسمااا ولونها منعاكس على عينيها ...شي لي خلا بريق خاص يصدر من عينيها كأنهم جواهر متلألئة...ناضت فور ما تفكراات شنو تابعها...جمعات لمجلة لي كانت كتقراا فيها و لبسات صباطها و مشات كتجري فوسط الشجر فلغابة ...
وصلات للدار و وقفات فلباب لوراني كدق بشوية وكدعي فنفسها باها ميكونش وصل قبلها للدار...
إيجا :وا مي ...حليي ....يمااا حلي هادي انااا إيجا.....
بلقيس (فتحات لباب):فين كنتي يا هاد البنت فين كنتي ...واش راك عارفة باك ايلا جا و ملقاكش فلخيمة يحلف عليك متعاودي تخرجي...
إيجا:واا مي صافي ...غير نسيت راسي فلوااد....
بلقيس(قوسات عينيها):دخلي دغيا جاب الله لقيتي باك جا وخرج...زيدي قبل ما تشوفك شي وحدة فيهم توصلها ليه..
إيجا(بتاسمات إبتسامة عريضة ):هيهيهي ...اناا عارفاك متقدريش تفرطي فيااا
بلقيس(دارت ضحكة جانبية وهي ساهية فبنتها):علاه شكون عندي من غيرك ....(ناضت من سهوتها)يلااه جري دغيا سيري غسلي حالتك...

دخلات بجرية كتسلت حتى وقفات بلاصتها مجمدة كتسرط فريقها:سلام ختي فاطمة....
فاطمة:فين كنتي كنت نقلب عليك ...
إيجا :هااا لا والو اختي فاطمة..كنت غير هنااا
فاطمة(قربات ليها و عاقدة حجبانها): شنو هادشي فيديك ..
إيجا (خباتهم من مورا ضهرها):لا والو ...
فاطمة:اري لهنااا نشوف ....
رقية(الجدة):طلقي من لبنت بلاما ندير فيك شرع يدي يا هاد البوالة....
فاطمة:وااا مي لالة راني قريب نتزوج ما تبقايش تعيطي ليا بهاد السمية
رقية(ضرباتها بعكازها): وا هي ايلا قلتي عليك لبنت...سيري شوفي ما تقضي خلي عليك ختك ..
فاطمة(بفقصة): منين جاتها ختي ..مكتشبه  ليا فوالو ...بغيت غير نعرف منين جاوها عينين زورق فحال دوك لي كيبانو فالتلفازة...
رقية: يااا اعوذ برب الفلق...سيري الله يلگيها ليك...
إيجا(بقات حاضياها حتى مشات)
رقية(قرصتها من حنكها):وا بقاي تردي بالك ...راك عارفة بنات مينة باغيين غير يا يجبدو ليك الصداع
إيجا(مشات كتجري لبيتها ):واخا ا جدة....كوني هانية ....

دخلات دغيا لبيت بدلات عليها ومشات لساقية غسلات حالتها و دخلات للبيت كتقرااا فدوك المجلات لي كتشريهم ليها بلقيس نهار السوق...
حتى سمعات صوت لباب و شلا اصوات كتسمعهوم من بيتها ناضت بلخف و خرجات عندهم حيت عارفة خوتها و باها كيجيو فهاد الوقت ...
إيجا (قربات لبااها و باست ليه يدو):على سلامتك ا با...
شاف فيها مطولا و مشا گلس وبداو كيحطو ليه لغداا هو و لولاد خوتها....اماا النسا كيمشيو ياكلو فبلاصة وحدة أخرى بحدهم....حيت بقات تقليد عندهم انه النسا مكياكلوش مع الرجال فطبلة وحدة.....

عبد الله :باا كيخصنااا نمشيو نتقداو من السوق قبل ليلة لعرس ...
مصطفى:علاش ..ياك فاطمة لعرس غادي يكون حتى يجي راجلها من السفر...
عبد الله: لا عرس إيجا...
حمد(وحلات ليه):كح كح علاش مالها إيجا ...
عبد الله:طلبها لقايد ...
حمد:ياك لقايد مزوج بربعة...و إيجا هي الصغيرة فلبنات...نسبقو خواتاتها بعدا
مصطفى: وا هليييه طلق مرتو لولة وگالك بغا مولات لعينين الزرقين هي لي باغا ليه خاطرو...و باا مقدرش يگول ليه لا
حمد(حبس لماكلة و شاف ف إيجا من بعيد وهي داخلة كتسلت لبيت و عارفها غير غادا باش تقرا دوك المجلات لي كتجيب ليها بلقيس بتخبية):ياك ابا إيجا مزال صغيرة على زواج ....
لعربي(الأب):قدها مشاو لديورهم و ولدو لولاد....مصاب لقايد قبل عليها وبغاها ليه .. وديك لقراية لي قريتيها فديك لبلاد خليهاا عندك...
حمد(حبس الغصة فحلقو وسكت)

فاطمة(كطل من جيهت لكوزينة)
خديجة:اش كديري ...
فاطمة:معرف فوكاش لحسن غادي يجي من السفر....
خديجة(دارت يديها على فمها):شوف ليك مع البنت...ياكما توحشتيه...
فاطمة(ضحكات من تحتها):مصاب غا يجي باش نخرج دغيا من هاد الدار دلويل ...
مينة(مدات لفاطمة لمقراج ):هاكي دي لباك يغسل يدو...
فاطمة:خليني عليك ا مي ...عطي ل إيجا راها مكدير والو....
مينة(قرصتها ففخدهااا):هااا ويلي حاي  على لبنت ..سيري لعند باك وطلبيه باش نمشيو للسوق
فاطمة:علاش غادي نمشيو للسوق ...
مينة(شدات فراسها ):وا ميمتي علا بنت عطاني الله...وا تي سيري طلبي باك نمشيو نشريو ليك متلبسي فدار راجلك...
فاطمة(خدااات لمقراش من عند مهاا ..ومشات كتجري للطبلة لي گالسين فيها الرجال )
لعربي (كيغسل يدو ):عيطي ل إيجااا ...
فاطمة:هااا
لعربي(بتغوبيشتو المعتادة): گولي ليها تجي ...عندي ليها شي هضرة....
فاطمة:واخا ابااا...

فاطمة(دخلات كيف الرعدة للبيت):نوضي نتي تكلمي لبااا بغا يهضر معاك....
إيجاا(وجهها تخطف منو لون):لاش بغاني....
فاطمة:باش غادي نعرف انااا...وا نوضي تكلمي ليه ..
إيجا(جمعات شعرها دغياا):صافي واخا هاني جايا....(شافت لأرض دغيا جمعات دوك المجلات تحت لحسيرة و خرجات كتعتر فجلايلها لعند فين گالس باها و خوتها)
إيجا:نعام ا باا بغيتيني فشي حاجة....
لعربي (كيشرب فأتاي و كيهضر بلا ميشوف فيها):راني عطيتك للقايد ...راهم ناس خياار و ميخصك معاهم حتى خير ....ض
إيجا(عضات على شفايفها بقوة وحاسة بالدنيا ضايرة بيها...قلبها كيضرب بقوة حتى كتحس بيه باغي يخرج من صدرها ...شافت ف بلقيس واقفة كتسمع من عينيها باين انها كتواسيها ....)
لعربي (طلع فيها عينو):شفتك مگلتي والو....
إيجا(غمضات عينها بحنق وزيرات على يديها حتى تعصر فيها الدم):كلمتك ابااا هي لي تكون...

خليو معاكم vote ⭐️ ورأيكم فلقصة ...♥️👇🏻♥️👇🏻