فَتَاةُ البَادِيَّة وَ المَفْيُوزِي المُتَمَلِّكْ(بالدارجة المغربية )

الجزء81

بعد اسبوع

تسريع احدات..بعدما دوز ايجا و زيدان مدة مع بعضياتهم فدارو حدا لبحر .رجعو للخدمة ولروتينهم من جديد هاد ،لوقت لي دوزو .كانت فرصة ليهم بزوج باش يعاودو ينفخو الروح ف علاقتهم من جديد ..و فرصة باش يعرفو بعضياتهم لأول مرة بعد مدة طويلة و القدر لي ما نصفهمش وكان قاسي عليهم بزوج ومخلاش ليهم لوقت فين تعرفو و يعرفها كتر ...
فهاد الايام زادت إيجا تعرفات على زيدان كتر وكل مرة كتعرف عليه حاجة جديدة كانت كتگول من المستحيلات يكونو گاع هاد الصفات فهاد الإنسان لي كان ديما كيبان ك وحش قدامها بدون ولا ذرة رحمة ولا شفقة ...متوقعاتش واحد بحالو يكون حتى هو كيعرف يضحك وحتى من حبو ليها لي كان كيزيد يبرهنو ليها نهار على نهار و دقيقة على دقيقة.....
فهاد الايام بكات معاه و ضحكات معاه حتى سالو دموعها ...معمرها كانت متخيلاه ايكون فقط ولد لخيرية لا هو لا ريناد...قصتو كيفاش بدا ووصل لهادشي لي وصل ليه خلاتو يكبر فعينيها بزااف و يشفع ليه على اي حاجة دارها ..شي حاجة لداخل كانت حارقاها هاد السنين كاملة حسات بيها و اخيرا طفات ..

زيدان كأنه ولا شخص اخر ..الضحكة مكتخطاش فمو...غير الطريقة لي كيشوف فيها بيها كفيلة انها تخليها تزيد تغرق ف حبها ليه..واخا من ديك الليلة لي سخن عليها راسها مبقاتش كتحاول تقرب ليه بزااف ..واخاا گاع احاسيسها و كيانها كيجذبها ليه بقوة ..كتحاول ما امكن تبعد ..واخا فداخلها مزال كتوعد ليه انها تنتاقم منو على قصوحية راسو و التسلط لي كيمارس عليها ..لي مامنعوش انه يمارسو عليها واخا كانت هاد الايام كاملة معاه .. خصوصا نهار لقاها هضرات مع هارون ..ماتقبلش انها تهضر معاه وخا عرف انها غير كانت كتوقف اي حاجة بينو وبينها باش ميزيدش يتسناها ..
ولكن زيدان و اجرك على الله ..هادشي ما هو غير البداية ..بعد هاد الايام لي دوز هو وياها الراس فالراس مغاديش تقدر مزال تهنى منو ..وغيرتو عاد تزادت اضعاف و اضعاف

****
فاقت الصباح نايضة غير بزز ماحاملاش تمشي للجامعة ...لبسات عليها سروال جينز مفتوح ،مزير من لفوق و كيوساع من لتحت ..من لفوق شوميز بيضة حريرية وكتافات بساعة على يديداتها وسلسلة ألماسية سامپل ف عنقها ..وبزوج جابهم ليها زيدان ..لبسات طالون فلكحل (الصورة لتحت !)..خلات شعرها سامپل مطلوق وكيف العادة تعكيرة دايزها لكلام من نظيظرات د الشمس ..وهبطات كتجري خايفة تعطل على زيدان حيت علو الصباح كيصوني واقف كيتسناها لتحت..
إيجا(حلات لوطو و طلعات خايفة لا يبدا ينگر عليها):تعطلت عليك..مقدرتش نفيق ليوم
زيدان(حيد نظاظرو و شاف فيها كاملة وهو هايم فيها ..بتاسم ب لطافة وهز يدها باسهم ):انا نتسناك لعمر كامل ماشي غير دابا ..(تنهد ) فين بغيتي ندي حبيبي يفطر فين ما بغا
إيجا(ضحكات وهي حشمانة من هضرتو وحتى من الطريقة لي كيشوف فيها..عضات فشفايفها كتفكر ):ممم بلاتي نفكر ..
زيدان(بحركتها صافي سالات معاه ،جرها لعندو و خطف بوسة من شفايفها ):فكري على خاطرك
إيجا:بغيت نمشي لديك ريسطو لي مشيت ليها مع ريناد و هاجر ..داك النهار دقت لي كريپ ديالهم و عجبوني بزااف
زيدان(تنهد حيت ماقادش يبعد عينيه عليها ): الشوف ما كيبرد جوف ...احم هي لولة  ندي لكريپة ديالي تاكل لي كريپ
إيجا(ضحكات بخفة عليه حيت سمعاتو شنو گال فلأول):اتوصلني للجامعة ياك ! خديتي ليا لوطو مبقيتش كنعرف نصوگ بلا بيها لخرين مكيعجبونيش
زيدان(شابك يدو مع يديها):على داك الصوگان ديالك ما خصكش تبقا عندك حتى وحدة ...
إيجا:بلا ما تهضر نتااا ..نسيتي راسك
زيدان(غمزها):على الاقل فاش كتكوني معايا كنحاول ننقص..
إيجا:ايمتاا اترجعها لياا توحشتهااا
زيدان(كيشوف غير قدامو):لااا ..من ليوم انا انكون معاك فينماا بغيتي تمشي ندي حبيبي ..
إيجا(بدا كيعصبها):وااا الاااا بلا ماتبدى ا زيدانننن ..(بدات كتحلون عليه) واا عافاك ا زيدان رجعها ليااا..عزيزة عليااااا بزاااف
زيدان(شاف شوفاتها و رجع كمل سوگان):بلامااا تحاولييي
إيجا(عرفات ما خاصهاش تزيد معاه ولكن عارفة كيفاش اتقنعو ..ضحكات ضحكة شريرة ):اوكي ها حناا انشوفو...
زيدان:هههه (شافها دايرة السلسلة لي جابها ليها )جاتك زوينة بزااف كيفما تخيلتها فيك
إيجا:بصح ..حتى انا عجباتني  بزااف
زيدان(باس ليها يديها زوج بوسات متاليين):نتي لي جيتي معاها ماشي هي ...اش داك لعنق هكاك معري ..نشدو نعضو
إيجا(عارفة راسها بدات كاطيح ليه على لقالب ..ضحكات بانثوية  مع شوية ديال لحشمة حيت ولات عارفة طريقتو فالضحك واخا مزال مولفاتش عليها ولكن غادة وكتزعم عليه خصوصا انه هاد الجانب منوو دغيا رتاحت ليه ): احم
زيدان(هزها وجابها فوق رجلو  بكترة ما غادي تسطيه  ):شي نهار اتسطيني ..بلاتي حتى يجي جوزيف و انتفاهمو
ايجا:مممم و ايلا مابغاش
زيدان:انخطفك فخطرة..
ايجا:هههههه اتديني لماربيلا عوتاني ..
زيدان:لااااا هاد لمرة لبلاصة مغاديش طيح ليك على لبال
إيجا(كتلعب ليه فشعرو وهو مخليها):توحشت جوزيف و يماا ..هاد الايام مكيهضروش معايا بزااف تيلي ديالهم بزوج طافي
زيدان(صايگ مرتاح مرجع لكرسي للور ):ايكونو غير مشغولين وبغاو يرتاحو ..
إيجا:بصصح هوما بزوج كان خاصهم يرتاحو من بعد داكشي لي داز عليهم ..(هزات تيلي لقات هاجر مسيفطا ليها ميساج باش دوز عندها لعشية)
زيدان(خنزر فيها
إيجا: علاش فاش كتسمع سمية هاجر كتعصب ديما ههههه
زيدان(تأفأف ):حيت مكدخلش سوق راسها ..على شكون جبد لمشاكل مع جوزيف قدها .
إيجا(كتموت عليه بالضحك):واش لهاد الدرجة مكتحملهتش ..غير مكتعرفهاش بلعكس راها اطيب خلق الله .. شحال وقفات معايا من مرة معمري ننسى خيرها ..
زيدان(ضحك):واخا هكاك ما ننساش هي لي خلاتني نرجع للمغرب
(خشا راسو فعنقها) كان احسن قرار خديتو هي جيت ليك(هز تيلي ديالو كيصوني كيلقاه جوزيف ..حبس لوطو فجنب و هبط كيهضر و طلع )
إيجا(رجعات گالسة بلاصتها):شكون صونا ليك
زيدان:غير لخدمة!
ايجا:هاد الايام كنتي كتجاوب على لخدمة حدايا ..
زيدان(فضل يسكت باش متزيدش تسولو )