فَتَاةُ البَادِيَّة وَ المَفْيُوزِي المُتَمَلِّكْ(بالدارجة المغربية )

الجزء 74

#عند إيجا
داخلة من باب الشركة كتمختر ..لابسة جيپ كحلة سامپل واصلة ليها لركبتها ومحلولة كلها من الجنب مخلية فخضها كلو باين..من لفوق لابسة تريكو قطني باج خفيف  بلكمام على شكل Vجاي مفتوح من جهة صدرها عاد طالون حتى هو فلباج ولكن بتدريجة مختالفة على لون ديال تريكو لي لابسة....زادت عليها ساعة ف يديها لي كانت ألماسية جات ليها مع اللبيسة .مع ميكاپ خفيف باش تبان سامپل و تتماشى مع بلاصة لخدمة...
جاية مقلوبة بالنعاس بزز باش ناضت ..
كيف لا و بلقيس وصات گاع لي كاينين فلقصر يوقفو عليها على الصباح حتى تنوض ...بعدات نظيظرات ديالها بعدما دخلات ..كتمشى وهي كتمختر كتشوف ف كمية الناس لي خدامين وهادشي مزال غير ما شافت والو ..وحتى هوما مصدومين حيت عمرها ما جات ..لأغلبية كيعرفوها غير من لمجلات و تصاورها لي كتحط ف إنسطا ديالها...لاحظات نظرات لكل ليها ،رغم انها توترات ولكن كملات طريقها و طلعات فلأسانسور حتى وصلات للطابق لي فيه لبيرو ديالها ..مع خرجات لقات ولد قدامها يكون عمرو ما بين 21-23 عام كيتسناها
إيجا(كتشوف ب تعجب ما فاهمة والو ):جاي سطاج نتا ؟
الشخص(مد ليها يدو ):مادموزيل إيجا...معاك زياد وصاني موسيو جوزيف باش اي حاجة حتاجيتيها صغيرة ولا كبيرة نعاونك فيها
إيجا:تعاونني گاع ...ماشي صغير بزاف ؟؟شحال فعمرك
زياد(كيقاد فلگرافاط ديالو):احم..22ا مادموزيل ..عندي دكتورة ف إدارة الأعمال ..
إيجا(حلات فمها فيه):ايه ومن ايمتا ونتا خدام هناا
زياد:هادي عام ا مادموزيل
إيجا(نسات حتى على اش جات ):عرفتي عيط لشي واحد يجيب لينا قهوة لبيرو  وأ جي عاود ليااا كي درتي ليها ..
زياد(غير تابعها مفاهم والو ):اا واخاا...
إيجا(دخلات لبيرو ديالها وعاجبها لحال ..خصوصا انه جوزيف عارفها شنو كتبغي ...گلسات فلكرسي ديالها حاطة رجل على رجل عايشة الدور  ديال مالكة خمسين فلمية من الأسهم ):ميصحابليش هادشي زوين فحال هكا كون جيت شحال هادي
زياد(حط قدامها جبل ديال الضواسا ):حتى دابا مزال ما فاتش لحال ..هادو لملفات ديال الصفقات ديالنا لعامين لي فاتو..ايلا حتاجيتي شي حاجة علميني
إيجا(خرجات عينيها فيه):اويليي ..على انا عاد مزال غادي نحتاج....ميصحابليش هادشي فيه هاد لخدمة كلها ...(شافت فيه وعلى وجهها ضحكة صفرة): زعما ضروري نقرا هادشي كامل
زياد:ضروري ا مادموزيل ايلا بغيتي ترأسي الشركة ...موسيو جوزيف عندو الثقة انه تقدري ترأسيها وتزيدي بيها لقدام ..
إيجا(نفخات صدرها):بيان سييغ ..إيجا باروخ و اجرك على الله..فين هي ديك لقهوة باش نبدا لخدمة...
زياد(بتاسم إبتسامة نصر حيت عرف كيفاش يخليها تبدا لخدمة..):هي لولة
(دخلات بنت مع لباب هازة ف يديها قهوة )
زياد:هادي شيماء من ليوم غادي تكون هي سكريتير ديالك ..اي حاجة حتاجيتيها علميها
إيجا(شافت فيها مطولا وهي كتحط لقهوة قدامها وهي ما مرتاحاش ليها ..):احمم شكرا
شيماء:لعفو ..ايلا حتاجيتي شي حاجة انا على برا قدام لبيرو
إيجا(بادلاتها بإبتسامة ...دورات عينيها لجهة تيلي لي كان كيصوني لقاتها خولة ):وي خولة ..اه راني بديت ليوم..بغيتي تجي لعندي ؟ جي ا ختي شكون حبسك ..يالله صافي فاش تخرجي من لحصة دوزي عندي ،انا غادي نتسناك ..
زياد:مادموزيل ..نخليك ايلا حتاجيتي اي حاجة انا تحت الخدمة ..
إيجا(كتشرب من قهوتها ):كون هاني ا توتوز
##زيدان (داخل لعند سهيل للبيرو ):سهيل ..خلي لخدمة لي فيديك راني مزروب
سهيل(گالس فلبيرو خدام ):تعطلتي بزاف
زيدان(گلس قدامو دغيا دخل ف لموضوع):ما علينا..جوزيف وصل ..لعملية غادي تكون عندو هاد لعشية ...
سهيل(حاط يدو على فمو )
زيدان:هارون ما تحركش من هنا ..وحتى سفيان ..مزال. لدابا كيقلبو فين مشا ..كلهم عارفين راه مشا غير ل سفر ..ايلا عرفوه مشى يداوا ..غادي يديرو لي فجهدهم باش يحبسوه ،هارون مغاديش يحتاج بزاف ديال لوقت باش يعرف
سهيل(مزال حاط يدو على فمو ):اا
زيدان:مالك ا ت**ي
هاجر(خرجات من لمكتبية لي كاينة فلبيرو):كيفاااش ...شنو هادشي تاني ...مال جوزيف شنو درتي ليه تاني
سهيل(حط يدو على راسو):هااا علاش
زيدان(كمل فلموضوع):ما علينا...انا عارف شنو غادي ندير ايلا خرجات شي حاجة(شاف ف هاجر و هضر ب حدة)نتمنى هاد لمرة ديري عقلك
هاجر:سهيل..شوف صاحبك شنو كيگول
سهيل:هاجر...هاد لمرة راه لأمور ماشي كيفما كيصحابليك...هاد لهضرة مخصهاش تخرج من هنا
هاجر:اه صافي واخا
زيدان:مور العملية غادي يديوه رجالي للأوطيل ديالك فالسويد غادي يكون كلشي مأمن تما
سهيل:انا ديجا خويتو كامل لجوزيف ...حتى رجالي كيتسناوه غير إجي.. غادي يبقاو رجالك لي قريب خصك تسيفطهم للأوطيل
زيدان(ناض من بلاصتو و باقي عينيه على هاجر):رجالي ما بقا ليهم والو يوصلو
هاجر:وشنو علاقة هارون ب سفيان ؟!
زيدان(خنزر ف هاجر حتى سكتات):انا نخليك..حتى لعشية
هاجر(خلاتو حتى خرج):هادا مالو كيخنزر فيا هكا
سهيل(جرها لعندو):هاجر ..هادشي مافيهش الضحك هاد لمرة ..راه بصح جوزيف وصانا باش منگولو ل إيجا والو ..حيت ايلا مشا حتى عرف هارون إيجا عارفة غادي غير نعرضوها للخطر ...لأمور صعب من داكشي لي كتخيلي ..
هاجر :واهاانتا ليك على هارون مصدقش ساهل هادشي كامل خرج منو ..
سهيل:وكتر گاع ..منين وصل لأنه يعطي لجوزيف دوا لي يزيد يخلي لي لمرض يزيد يتدهور ،معرفتش فين كيفكر ..نسى گاع داكشي لي دار معاه جوزيف (شاف مطولا ف هاجر)
هاجر:صاافي صافي بلاما تشوف فيا هكاا ..راه اصلا منقدرش نگولها ليها...
سهيل :كنتمنى ...نوضي خليني نكمل خدمتي قبل ما نوض ليك...
هاجر(گلسات فوق رجليه):غير خليني معاك ...كنطلع للبيت كنبقى قنطانة ..(كتلعب ليه ف ذقنو) عافاك ا كبيدة ديالي ...
سهيل(كيلعب ليها ف عنقها ب فمو):مأكدة باغا تبقاي معايا ممم ..ماشي كنتي باغا تشوفي صحاباتك
هاجر:واش نتا مكتعيااش ...
سهيل(باقي كيلعب ليها ف عنقها و كيدوز يديها على فخاضها):واش لي عندو هاد لحلاوة كلها غادي يعياا
هاجر(عرفاتو ناوي على خزيت):صافي صافي انا غادا مافيا لي يدخل يدوش تاني ...غادي نمشي عند إيجا ليوم غادي تبدا لخدمة فالشركة
سهيل(صرفقها ل ط*متها ):يالاه هي لا خرجتي عليا خليني نكمل لخدمة ...راه مجموعة عليا من نهار رجعنا ما طليت على لخدمة
هاجر(خرجات ليه لسانها و هربات...خلاتو كيضحك عليها وهي طالعة معصبة حيت ولا دغيا كيعيق بيها ...طلعات لبيتها فلأوطيل لبسات عليها لبيسة رسمية سامپل و هزات صاكها وخرجات مع لباب ...وقفات كتشوف ف ريناد قدامها واقفة ):ريناد ...شكديري هنا...(كملات طريقها )ايلا بغيتي سهيل راه كاين ف لبيرو ديالو لتحت
ريناد:احم ..انا بغيتك نتي ..
هاجر(طلعات حاجبها):بغيتيني انا ؟؟ وفاش بالسلامة
ريناد:الصراحة من لبارح و انا باغا نهضر معاك..ولكن ملقيتش الفرصة ..كنت باغا نهضر حتى مع إيجا...
هاجر(تقريبا فهمتها شنو بغات تگول ..شافتها مزال لابسة غير پيجامتها ):اوك...انا نتسناك لتحت ف الجردة لبسي وهبطي
ريناد(مشات كتجري للجناح ديالها تبدل عليها حوايجها باش تهبط عندها ..دغيا بلخف لبسات كسيوة فلباج بلكمام مع طالون كحل خلات شعرها مطلوق عادي و هزات صاكها هبطات لعندها وهي حاسة براسها متوترة ...تنفسات بعمق حيت باغا دير گاع لي ف جهدها باش ترجع حياتها لي كانت قبل مع صحابها وعائلتها ،وهادشي ميمكنش يتحقق غير ايلا محاولات تصلح لأغلاط لي دارت و تصالح مع لماضي ديالها...كملات طريقها لعند هاجر گلسات فلكرسي لي مقابل معاها ..
هاجر(شافت فيها كيف كتحك صباعها مع بعضياتهم ):خودي فطري ،باينة يالاه فقتي
ريناد(ب إبتسامة):ااه بصح ..(عيطات على واحد فيهم كان دايز ..خدا الطلب ديالها )
هاجر:خير ..شنو هاد لحاجة لي بغيتيني فيها
ريناد(رجع ليها التوتر):معرفتش منين غادي نبدا ..الصراحة ا هاجر انا عارفة راسي غلطت بزاف ..مكانش خاصني نگول لإيجا ديك الهضرة ...ولكن غير من خوفي ..كنت خايفة على زيدان خويا بزاف من جوزيف ،خويا مستحيل يواجه جوزيف ولا يحاربو ..يقدر يخليه يقتلو بلا ميدير حتى ردة فعل...واخا هاد لعداوة لي كتشوفي ما بين خويا و زيدان ،ولكن خويا عمرو فكر يخون جوزيف ولا يآذييه ب أي طريقة ...واخا هكاك انا قبل منعرفها بنت جوزيف گلت هضرة خايبة عليها بزاف ..ولكن غير من لخوف ديالي على خويا حيت هو لي بقا عندي ...ولكن عرفت من بعد انه إيجا معندها حتى علاقة ..خويا ستعملها باش ينتاقم لياا...ولكن هي لي كانت الطرف البريئ فهادشي كامل ..معارفاش شنو وقع بينها و بين خويا هادي ربعة سنين و مبغيتش نعرف حيت كنعرف خويا شحال يقدر يولي فحال الوحش ...
هاجر(تفكرات ربع سنين قبل نهار جات ريناد عند إيجا للمستشفى
##قبل ربع سنين
إيجا(شادة ف كرشها كتحاول تنوض):هااجر عاونيني ..شوفي زيدان في مشا
هاجر:بلاما تحاولي..راه هبط هو وجوزيف لتحت
إيجا:فين مشاو..انا نهبط عندهم ،خصني ضروري نهضر مع زيدان
هاجر(شافت حتى عيات و عاوناتها توقف باش تهبطها ):واخاا غير بشوية راك مزال مريضة
ريناد(دخلات عليهم وسدات لباب موراها):معندك فين تمشي
إيجا:ريناد !
ريناد:هي هادي ...(تمشات ببطئ وهي مربعة يديها حتى وقفات قدام إيجا )واش مبغيتيش تعياي
هاجر(بغات تنوض ليها حتى وقفاتها إيجا)
إيجا:شنو كتقصدي بهضرتك
ريناد:بعدي على زيدان...نتوما ماشي ديال بعضياتكم...معارفاش راسك انك كتآذييه بهادشي لي كديري ..معرفتش شنو طاري بيناتكم،ولكن صافي هاد الحمل مشى وداكشي لي بيناتكم صافي مات ،نسايه ونساي حتى خويا معاه ..
هاجر(بعدات إيجا ووقفات قدام ريناد كتحاول تحبسها):واش عارفة راسك شنو كتخرجي على فمك...خرجي فحالك باراك ...خرجي باراااك
ريناد(دفعات هاجر):مغاديش نخرج ...حتى تبعد على زيدان
هاجر(جراتها من يديها):واش مزال ما بغيتو تبعدو منا لا نتي لا خوك...قيلونا ها لعار...اش جابنااا ليكم ،نتومااا لي تابعينااا ماشي حنا...
إيجا(گلسات فيها الدوخة ):ها..هاجر...
هاجر(مشات كتجري عندها):إيجااا....مالكي ..نعيط على الطبيببب
إيجا(شداتها قبل ما تخرج تقلب على الطبيب):ل..لاا إينا حمل ..واش انااا كنت ...كنت حاملة
هاجر:ما تديش عليهاا هادي را معارفة والو
ريناد(ندافعات بقوة العصبية لي فيها):ااه كنتي حاملة ومن خوياا زعمااا مكنتيش عارفة ...مزيان لي مات وهو ف كرشك ..ايلا غلطتي ليلة مكيعنيش خويا خاصو يتحملها حياتو كلها...(شافت فيها بتقزز)شكون عرف ولد من اصلا ..(ضحكات ب استهزاء)يقدر يكون ولد سفيان متلا
هاجر(مشات جاعرة عليها):خرجيييييي...خرجييييييي ق*دي فحالك قبل ما ندير فيك شي مصيبة ...خرجييييي (دفعاتها حتى طاحت فلأرض و سدات لباب من وراها )
إيجا(كلها كترعد ):شنو كتگول ...واش انا كنت حاملة علاش مگلتوهاش ليااا
هاجر(گلسات حداها حاطة راسها بين رجليها ):دابا غير تهدني انا غادي نعاود ليك...ما كانو بغاو يگولو ليك والو حيت خافو عليك..
###رجوع للحاضر
.تمعنات مزيان ف هضرتها ):انا فاهمة هادشي لي كتگولي وتفهمت علاش گلتي ديك لهضرة ..ديك لوقت كنتي مزال كتبغي سفيان..مقدرتيش على حقيقة انه كان باغي إيجا ،متنكريش انه محسيتيش بالراحة منين عرفتيها دازت من نفس داكشي لي دزتي منو...(قربات لعندها) ولكن تيقي بيا ..داكشي لي داز ما بين خوك و إيجا..انا بحدي لي عارفاه وحتى واحد من غيري حتى من سهيل لي كيصحابليك عارف ..معارف والو ...معمرك تفكري تقارني داكشي لي داز على إيجا بداكشي لي داز عليك ..
ريناد:معمري ما بغيت نقارن...مكرهتكش كون قدرت نصلح كلشي ...نتي ا هاجر معارفة والو ...هاد ربع سنين لي فاتت خلصت فيهم أي حاجة گلتها ولا درتها ...خسرت بزاف دالناس بالطيش ديالي ..مكنتش عارفة شنو كندير ،حتى لقيت راسي بوحدي ..
هاجر:كتقصدي يوسف
ريناد(فكرات بزاف عاد نطقات):اه ..يوسف
هاجر(تنهدات):شنو مطلوب مني انا دابا ...
ريناد:انا مغاديش نطلب منك شي حاجة كتخص يوسف ..حيت هاداك غلط بوحدو ..خاصو لوقت بزاف باش يتصلح...انا بغيت نصلح علاقتي معاك ،ومع إيجا مكرهتش نبداو كلشي من لأول ..مكرهتش نعطي فرصة لراسي نزيد نعرفكم كتر ونحيد هاد الذنب لي كنحس بيه ..حيت انا عارفة انني ظلمت إيجا بزاف ...تيقي بياا ماشي غير نتي بحدك لي كتحاولي تحميها ..حتى خويا زيدان...واخا مكيبينش و صعيب بزااف و قاصح حتى واحد مكيقدر عليه..شفتو مرتاح غير معاها هيا عمرني شفتو كيضحك حتى للبارح ..عندو مشكل واحد هو مزال ما باغيش يعتارف لراسو ..مزال كيصحابليه غير حب تملك وصافي
هاجر:ريناد خاصك تعرفي داكشي لي دار زيدان مكيتغفرش ..ولكن انا قررت مغاديش نبقى ندخل ف أي حاجة كتخص لإيجا ..وحتى نتي نتمنى ما تدخلي ف حتى حاجة ..ايلا مكتابة شي حاجة راها مكتابة
ريناد(تنهدات):عندك لحق ..
هاجر(للحظة سهات تفكرات لحاجة لكبيرة و الدرب وأيام لافاك ،هزات قهوتها كملتها ):انا غادا عند إيجا ليوم غادي بدات لخدمة فالشركة..تمشي معايا !
ريناد(هزات راسها فيها  وهي متفاجئة ):ها...اه وااخاا نمشي معاك
هاجر:ويالاه راها كتسناني ...
ريناد(هزات صاكها وغادة معاها مصدومة من ردة فعل هاجر لي جاتها على غير عادتها...
### عند إيجا گالسة فلبيرو ديالها شادة فراسها ...فين هي الأناقة ديال الصباح مشات في خبر كان ..شعرها جامعاه و حتى من طالون لي كانت لابسة رماتو و بقات حفيانة ...
خولة(دخلات عليها ):زين ...كملتي ولا مزال
إيجا: وااا أوووف عييت هادشي مكيتقاداش ..
خولة:وا رتاحي شوية ...راه يالاه نهارك لول متضغطيش على راسك بزاف
إيجا(تكات على لكرسي و رمات رجليها فوق لبيرو ):ولد لحرام داك زياد ..حط ليا جبل ديال ضواسا...
خولة :شكون هاد زياد ..
زياد(لقا لباب محلول ):هو هادا..
خولة (خرجات فيه عينيها ):نتا هو زياد ..
زياد(مد ليها يدو ):متشرفين ..
خولة(ب إبتسامة):ليااا الشرف
إيجا(مصدومة فيها):لا نيييت هادشي لي بقا
زياد :ههه مادموزيل ..هادي هي وقيتة ديال ل پوز ايلا بغيتي تمشي تغداي
إيجا(ناضت فرحانة...هزات صاكها و صباطها ف يديها):زيدي يالاه عيطي على هاجر گوليها توصل علينا
خولة(كضحك على حالتها):هه واخاا
إيجا(هابطة كتجري لوطو ديالها ):انا غادي نمشي مغاديش نرجع ..
خولة:اويلي ولخدمة
إيجا:داك لبرهوش قاد ب شغلو
خولة:شكون زياد !
إيجا:ايه هاداك...(كتشمشم ف لوطو ) تفو باقا ريحتو هنااا من لبارح
خولة(حتى هي كتشم):ناري على ريحة شحال زوينة...شكون ركب معاك هنا
إيجا:حتى واحد ..فين نمشيو
خولة:لبلاصة ديال ديما ...انا نگولها لهاجر توصل علينا
إيجا:يالاه دغيا ..انا مغادييش نتسناكم حتى واحد
خولة:ا ناري اختشي ...بشوية خلعتيني واش باغا تقتلينا فهاد الطريق ...ناري اش داني نركب معاك..دوخني داك ولد لحرام..نسيت صوگان ديال خزيت ديالك
إيجا(فرانات لوطو جابتها لاصقة فلپاركينغ):يالاه نوضي على سلامتك
هاجر(كانت يالاه وصلات حتى شافتها داخلة مزروبة):لعشيرة ..شفتك مزروبة...
إيجا:فيا الجووع ما تهدريش معايا حتى ناكل ..الصباح كلو و أنا خدامة
هاجر(شافت ف خولة ):هادي مالها ..
خولة:دغيا طلعات ليها لخدمة فراسها واقيلة...ولا يمكن الهرمونات شكون عرف حيت حالتها جاتني فشي شكل
هاجر (جبدات صباعها كتحسب):اييه ولاهيلا هادي هي وقيتتها ...
خولة:اواه نتي حتى هادي حاسباها
هاجر:سكتي نتي شكتعرفي ..راها كتجينا فوقت واحد
خولة(شافت فلبنت لي وقفات حدا هاجر ):واش ...واش هادي ريناد لمالكي ...
هاجر:اييه هي هادي ..
خولة(مشات لصقات فيها):نارييي شحال كتعجبني ...ديما كنتبع لجديد ديال لماركة ديالك
هاجر(خلاتهم و دخلات عند إيجا گلسات حداها ):مالكي نتي ..
إيجا:والو علاش
هاجر:ماشي حالت لهرمونات هادي ...طرات شي حاجة انا معارفاهاش ...
إيجا(سكتات كتفكر أحدات ديال لبارح):عرفتي لبارح شكون وصلني
هاجر:زيدان !! حيت شفتو تابعك
إيجا:اه هو...
هاجر:وشنو وقع دار ليك شي حاجة
إيجا:مادار والو ..ولكن
هاجر:ولكن شنو ...
ريناد :إيجا...
إيجا:ريناد ...شنو كديري هناا
هاجر:جات معايا من لأوطيل
إيجا(بادلاتها الإبتسامة و ناضت سلمات عليها ):گلسي ....وا خولة باراك على السيدة ..واش نتي مكتقادايش
خولة:هي و مگالت والو ..نتي مالكي ...ممم شنو زعما حيت غادي تولي لوستك
إيجا(بقات حالة فيها فمها )
هاجر:ايوا الله يمسخك...كولي لا كنتي غادي تاكلي
إيجا(حيدات طالونها باغا تشير عليها):عارفة شنو كيتسناك ايلا زدتي حليتي داك الفم
ريناد(كتشوف فيهم و كضحك):واش كتجيكم ا هاجر هاد لبنت من لعائلة
هاجر:الله يسترني ...هاهي بنت خالتها(كتشير لإيجا)
خولة:ياااك ا هاجر...نكرتي شحال عطيتك بلاصتي تنعسي فيها ..وكنمشي نعس فالصالون
هاجر(جبدات ليها حناكها ):وايلي نتي راكي الزين كامل غير لهضرة أختي ...والو مكتسكتيش ..
خولة:وا هكاك
إيجا:جيبي ليها زياد هو لي غادي يسكتها بان لي
ريناد وهاجر:شكوون زياد
إيجا(غمزاتهم ):خدام معانا فالشركة ..الله يخليك هو رئيس القسم المالي لمجموعة باروخ...عرفتي شحال فعمرو
هاجر(شافت ف خولة):على أخر يامك باغا ديه شارف
إيجا:عندو 23 عام ...باقي غير برهوش...ولكن كيطير مع الطيور
هاجر:ايوا هاااانتي ليك على خولة
ريناد:واش كتهضرو على زياد السماعيلي..
إيجا:هااااداااك ...كتعرفيه
ريناد:هههه كنعرفو ..كنعقل عليه منين كان صغير كان كيكون مع جوزيف بزاف ...حتى فاش دخلنا للمغرب من إيطاليا عيط عليه جوزيف يخدم معاه فاش كمل قرايتو(نغزات خولة)منخافش عليك ضبرتي على راسك
هاجر:موووحاااال تعرف ليه هادي بان ليااا
خولة:نتي غير سكتي الله يرحم بيها لواليدين...
إيجا(شافت فيهم بزوج حتى كلهم بداو كيضحكو وخولة غير كتخنزر فيهم
(وقف عليهم شخص ومعاه زوج دراري واحد ينسيك ف لاخر ):متگوليش ليا هاجر هادي
هاجر(ضارت مفاهمة والو):شكون !....(حطات يديها على فمها)منصف
منصف(كيضحك عليها):هوااااا هاداا
هاجر(ناضت سلمات عليه):وا غبورات هادي ...صافااا شكتعاود
منصف:صافاااا ونتي ...گالو لياا صافي تزوجتي
هاجر(كتبين ليه لخاتم):صافي عفا عليا الله ههههه عقبة لييك
منصف:اودي لقيناها بعدا ...
إيجا:غادي تبقاو واقفين گلسو ...گلس ا منصف
منصف(گلس هو والدراري لي معاه): هاد لغدا كلو خديتوه
إيجا:ههه الجوع و مايدير ..راني بديت ليوم لخدمة 
منصف:ههه زعماا بغيتي توصلي لينا راكي كنتي خدامة من نيتك
هاجر(كتراشق هي و منصف ):هانتا تشوف...بلاتي بعدا معرفتيناش على الناس لي معاك
منصف:مكتبدلييش...هادا مراد و عمر من العائلة ..غير بلاما تحاولي مكيعرفوش لعربية ..
هاجر:متحتاجش ..باينة هاد السلعة ماشي ديال هنااا...
منصف(غمز ليها على ريناد)
هاجر:ااه هادي خولة بنت خالت إيجا و هادي ريناد..ريناد المالكي..
منصف(بانو على وجهو ملامح الصدمة):واش لمالكي ...زيدان
هاجر:هههه هاداك لي ميتسماش..
إيجا(نغزاتها ):حشومة كاينة ريناد
ريناد(كضحك على هضرة هاجر ):غير گولي لي بغيتي ...كيعجبني نسمع داكشي لي مكنقدرش نگولو ليه
إيجا( خنزرات فيهم باش يحبسو لهضرة عليه):مكاينش شي موضوع حسن من هادا ..
خولة:ناري انا شفت خوك ا ريناد غير زوج مرات صافي دخت...كيعطي ربي لفول غير لي معندو ضراس
منصف(كيضحك معاهم و فنفس لوقت كيشوف ف إيجا):ايوا عاودي ليا ا هاجر...شنو قصة يوسف عطاف...دابا نتي وليتي هاجر عطاف ..
هاجر(جاها ف أحسن قصة كيعجبها تعاودها ):اجي نعاود ليك من الأول باش تفهم..
سهيل(وقف عليها ):تا نتي هنااا..
هاجر(تخلعات):خلعتيني ..شكدير هنااا حتى نتاا
سهيل:نسولك ا مدام نتي ...اما انا جاي مع صحابي هنا خدام
هاجر(وقفات ومشات جراتو):زعما جيتي غير للبلاصة لي انا فيها...باش عرفتيني هناا
سهيل:ماشي انا راه زيدان لي غادي يتلاقا معايا انا ويوسف هناا...(عاد عاق )ولايني هاد زيدان ميسواش ..جايبنا غير باش يشوفها ....اجي نتي شفتك كا ديري معايا تحقيق ...صحابليك مشفتكش شادا لهضرة كضحكي فحال ايلا مناقصك خير ...كيفاش هاد القضية ديال ريناد تاني شكدير هناا
هاجر:ماشي سوقك...بيناتنا اويلي
يوسف:هاجر...شفت وجهك بزاف هاد الأيام ،واش مزال ما ناوية تقادي داك لبيرو وتبداي لخدمة خلاص
هاجر:بقى حاضيني نتا...متنساش راني انا مولات لفكرة ديال لماركة ديالك...بيا ولا بلاش لخدمة غادا مزيان(بتاسمات ليه ب براءة)
سهيل:الصراحة تقنعت
يوسف(شدها من عنقها):حسن عوانك ا سهيل والله ..(شاف جيهة الطبلة فين كلهم گالسين) كيفاش تاني هادي...شكون هادو لي معاكم
ريناد(شافت زيدان داخل):انا غادا بسلامة ..
إيجا:غادا...دابا ؟
ريناد:ختي ...ماقادا على صداع ..
إيجا:اينا صداع راه غير سهيل و يوسف
ريناد(قرصتها):واش مكتشوفيش...راني كنعرفهم ،فحال والو هاد الريسطو يسدوها كلها...
إيجا(شافت انعكاس ديال زيدان غير من لمراية ...خرجات عينيها ف ريناد): موصييييييبة
ريناد(هزات صاكها وهربات بين لكراسا حتى خرجات )
منصف:بان ليا الجو ماشي هو هاداك...غادي نمشي قبل ما يطرا شي مشكل
إيجا:اااه ااه سير ..حتى نتلاقاو من بعد
زيدان(واقف عليهم حتى مشا منصف و لي معاه):تغديتيي
إيجا(وحلات ليها ):كح كحح ...ااه
زيدان(شاف ف ساعتو):تهزي وقت لخدمة هادا...
إيجا(ناضت من بلاصتها قدات الطالون ديالها...تمشات لجيهتو و عينيها ف عينيه ،هزات يديها كتقاد ليه لكول ديال شوميز ):واش هادا أمر ولا غير مسمعتش مزيان...
زيدان(وقف مجمد بلاصتو وهو غارق ف عينيها مينكوش انه حركتها خلات جسمو يرتعش لدرجة ما قدر  يگول ولا كلمة  )
إيجا(ضحكات بطريقة مثيرة حتى بانو سنيناتها مستفين،مبعداتش عينيها على عينيه ..قربات ليه و نطقات بصوت سمعاتو غير هي وياه):لمرة جايا ،متبقاش توجه لأوامر ليا...كنكره شي واحد يأمرني..مفاهمين
زيدان(بتاسم إبتسامة جذابة ..وهو عاجبو لحال كيفاش دغيا قلبات ليه عصبيتو للضحك...قرب يديه و غطا ليها  لفرقة ديال صدرها لي باينة كلها ..):مكيعجبنيش شي واحد يشوف ليا حاجتي
إيجا(عرفاتو رجع ليها الصرف ...ضحكات ب سخرية وهي معصبة هزات يديها كتقاد شعرها كتبين خاتمها:ماشي ديما اي حاجة غادي تكون ليك ..نسيتي
زيدان(قرب لوذنيها وهو كيضحك ):نتي لي كتنساي بزاف ...مذاقهم لدابا باقي ف لساني
إيجا(بعدات عليه و هي كلها حمرة و كترعد ...):خولة يالاه فحالنا...
خولة(كتشوف ف زيدان مفاهمة والو غير غادا كتجري مور إيجا)
هاجر(تابعاهااا حتى هي مخلية سهيل ويوسف واقفين)
سهيل:غادي نرجعها لإيطاليا و نتهنى
يوسف(خنزر فيه):عاود شگلتي ..فين
سهيل(ضرب ليه ف كتفو):مالي تسطيت ..حتى نتا خاصك ضربها بشي تزويجة ..لعل و عسى تشدك شي وحدة متبقاش تابعني لعفووو
زيدان(وجه هضرتو ليهم):باراك من الهضرة مزال تابعانا لخدمة
يوسف:غير دابا شفتك فرحان كضحك ،مكانتش كتبان ليك لخدمة
زيدان(راشقة ليه كيضحك ):حتى هاديك خدمة ..مبانتش ليك
سهيل و يوسف (شافو ف بعضياتهم ):اووووو ....
زيدان:ما عليناا...ف ليل غادي نسافر..غادي نحتاجكم هنااا قبل ما نمشي