فَتَاةُ البَادِيَّة وَ المَفْيُوزِي المُتَمَلِّكْ(بالدارجة المغربية )

الجزء 67

صبح صباح جديد لي كان من بعد سيمانة مور العرس بالظبط ..فاقت كتعيگز وعينيها مغمضاهم بزز باش نايضة من المانطة لي دافية ولكن خاصها تمشي للجامعة  حيت عندها حصص هاد العشية..بركات على زر وبدا كيتفتح لباب ديال لبالكون...طلات بان ليها الجو شتوي واخا كاينة شوية د شميسة  ..دخلات للدوش غسلات حالتها وهبطات للتحت باش تفطر
إيجا(گلسات معاهم فالطبلة ):صباح لخير
جوزيف(هز ليها يديداتها باسهم ):صباح لخير ا اميرة باباها ..
إيجا(بتاسمات ليه):كيف بقيتي شوية ..لبارح كنتي كتبان عيان شوية ..
جوزيف:لا لا حمد لله .صبحت مزيان..
بلقيس(حطات ليها ل كيك لي كيعجبها  ف طبسيلها):كولي شي حاجة هاد الايام مكتاكلي والو ..عندك حصص هاد العشية
إيجا:اه عندي(تكات على الطبلة)ما في لي يمشي ..هاد الجو كيخنقني
بلقيس:كولي كولي و نوضي تقراي على راسك..ما بقى والو وغادي يوجد ليك لبيرو ديالك وتمشي للشركة ..
إيجا(خرجات لسانها):اصلا هادا هو السبب لوحيد لي مخليني نوض دابا
جوزيف(كيلعب ليها ف نيفها):هادي هي إيجا باروخ ...كلشي واجد ،كنتسناوك غير نتي
بلقيس:هارون ليوم گاعما شفتو جا يفطر معانا..
إيجا(هزات كتافها):معرفتش
بلقيس:واقع بيناتكم شي مشكل
جوزيف:بلقيس كملي فطورك
إيجا(تنهدات):مواقع والو ا ماما ..
بلقيس:ايوا سوليه..صوني ليه باش تعرفي علاش ما جاش ..مكتشوفيش راسك كيف كتعامليه ب طريقة باردة
إيجا:ماما ...كون بغا يجي كون جاا ..تقدري تخليني على خاطري نفطر
جوزيف(عارف بلقيس باغا تجبد لموضوع وحاس ب إيجا لي الأمور فوق طاقتها و صابرة):بلقيس..ماشي گلتي غادي تمشي ل لاصال ليوم
بلقيس(تأفأفات) :واخا هاهي نايضة
إيجا (كتاكل وما مسوقاش حيت هادشي لا شيء مقارنة بداكشي لي حاسة بيه جاي ليها ف الطريق ..وحتى من سكوت زيدان هاد المدة كاملة خالعها  وحتى هاجر ممأكداش انه بصح كان مسافر ..)
جوزيف(تنهد و عارف انه راسها دايخ ،بنتو و عارفها مزيان و يقدر من الشوفة يعرفها ما مرتاحاش.):ماشي غبي لدرجة منلاحظش راك قبلتي الزواج ب هارون غير باش ترضي غرورك قدامو ،القوة لي مصطانعاها يقدر يجي نهار وتدمرك ا بنتي ..حيت هاد القرار ايلا مكنتيش مرتاحة فيه غادي تكوني نتي الضحية الوحيدة ونتي لي غادي تكوني حكمتي على راسك باش تعيشي تعيسة مع واحد ما مأكداش منو..
إيجا:شنو لي تبدل ..ياك عاجبكم هارون
جوزيف:انا مگلتش لعكس ..ولكن هادشي مكيعنيش انك تقبلي تكملي حياتك معاه..نتي عارفاني باغي غير مصلحتك و مكتهمني حتى حاجة أخرى ما حدك غادي تكوني فرحانة معاه،فكري مزيان ف راحتك هي لأولى
إيجا(دوزات يديها على شعرها و حاسة فحال شي كومبا فلداخل ديالها):واخا ا بابا ..انا غادي نفكر
جوزيف(ناض و قرب لعندها ..هبط باس ليها راسها و يدو على كتافها):متبقايش سادة على راسك هكا..نوضي تمشاي شوية على براا بدلي لجو
إيجا(طلعات عينيها فيه ب إبتسامة بريئة ..هزات يدو لي ف كتفها وباستها ):الله يخليك ليا
جوزيف : آميين ...يالاه نوضي مابغيتش نشوفك هكاا..سيمانة ونتي گالسة غير فالدار قنطتيني
إيجا:هههه هاهي نايضة  دابا
هزات كاسها د لقهوة ولبسات عليها جاكيط سخونة شوية  و خرجات كتمشى على برا  ،رغم انه لجو كان بارد نوعا ما لكن كانت شميسة زوينة..تنفسات نسبيا مستمتعة بديك اللحظة وداك الهدوء لي كان فالصباح ،وخا حاسة انه هاد الصمت كامل موراه شي عاصفة  و ماشي اي عاصفة..هادي قوية بزاف و خاصها تجمع قوتها كاملة باش توقف قدامها وماتحرك فيها والو ..تحركات للجهة فين كاينين الأحصنة  ديال جوزيف مخرجينهم على برا..وقفات حاضياهم و بالها فجهة أخرى ..
غمضات عينيها وهي كتفكر ف هضرة ديال جوزيف ،عارفها راسها دارت غلط انها قبلات العرض ديال هارون غير باش تشفي غليلها وغرورها قدامو وكذالك تنتاقم منوو حيت ميمكنش يبقى بلا عقاب ..هزات تيلي كتشوف أخر ميساج كان سيفط ليها شي لي مخليها فحالة رعب شنو يقدر يدير ..شافت ف النمرة بطريقة غريبة كأنها فايتة شايفاها ..رجعات ب السجل ديال المكالمات و بالظبط النهار قبل  لي تلاقات بيه اول مرة من بعد ربع سنين ..قوسات حاجبها حيت كانت نفس النمرة وهي كانت كظن راه غادي غير شي واحد من الجامعة كيف ديما...جاها الأمر غريب حيت على حساب معرفتها بزيدان هو مغاديش يصوني ليها بلاما تكون عندو شي هضرة يگولها ،ولكن علاش بقى ساكت ومخليها كتهضر كيف بغات ..للحظة طاحت ليها فبالها يقدر يكون بغا يسمع صوتها لكن دغيا حيدات ديك الفكرة من راسها..تأفأفات و حطات يديها على حناكها حايرة باغت تعرف علاش بالظبط كيدير معاها هكا..ولا شنو مزال باغي منها لي كيعاملها فحال هكاا..واش غرضو هو يقضي ليلة فحال اول مرة..ولا هداك غير حب تملك  ..
بقى عقلها كيفكر حتى حسات براسها عيات ..هزات راسها ودخلات فحالها لداخل كتلعن فيه و كتلعن النهار لي عرفاتو لا هو لا سفيان لي حطها فوسط هاد الحفرة ..دخلات لبيتها كانت قريبة لحصة ديالها...طلقات موسيقى خفيفة (two feet -love is a bitch)  بعدما حيدات حوايجها و كتمشى فالدريسينغ كتقلب شنو تلبس و فنفس الوقت كتصور لراسها فيديو كتمايل على نفس الموسيقى ..كملات تصوير و رمات السطوري ف إنسطا، رجعات حطات تيلي و كتلبس حوايجها ..خدات تريكو صوفي رقيق فلأبيض هابط ليها على كتفها .و من لتحت جيپ كحلة  قصيرة فيها عقيدات ذهبيين من لوسط جايين على طولة ديال جيپ...و فرجليها بوط عالي كحل ديال الدان..جاي لاصق على رجليها حتى لجيهة فخاضها .. خلاها تبان  سيكسي لأبعد درجة ..دارت لي أكسيسوار ديالها مع مكياج خفيف ..هزات صاكها  بعدما دارت اخر خطوة لي عزيزة عليها بزاف، تعكيرة   دايزها الكلام ب روج .. هزات سوارت لوطو ديالها و هبطات ..
طلعات فلوطو و كسيرات على الجهد ..خرجات من الدار مكسيرة محبساتش حتى وصلات للجامعة..
مع الدخلة كولشي ضار لجيهتها كيشوف ولي كادوز من حداه كيخوي ليها الطريق ...وصلات للباركينغ و بالظبط لبلاصة لي مخصصة ليها غير هي بوحدها ..فرانات بالجهد حتى روايض تطراساو مع الأرض
إيجا(خارجة بعصبية وكتمشى بخطوات تابتة  كأنها عارضة أزياء  ل لوطو لي قدامها ..وقفات و حاطة يد يديها ليسرى على خصرها  و كدق على مول لوطو لي بلاصا ف بلاصتها  ):هيييه
جهاد(جاية كتجري لعندها):إيجاااااا..على السلامة منين جيتي
إيجا (عاودات دقات عليه ):بلاتي نشوفو هاد خونا و ندوز ليك..
الشخص(خرج لعندها):نعام ا مادموزيل كاين شي مشكيل ..
إيجا:هاد البلاصة ديالي ...مگالوهاليكش
الشخص:بنتي ليا نتي مجعرك شي واحد و باغة غير فين تفشي خلقك..لپاركينغ خاوي تقدري تبلاصي ف أي بلاصة بغيتي ..
إيجا(حيدات نظيظرات الشمس من عينيها و فيكسات عينيها على عينيه):كنظن انا وياك مغاديش نتفاهمو..واقيلة مافهمتينيش شنو گلت  ايلا مفهمتيش غ..
الشخص (مركز ف عينيها وضحك):اه واخاا...انا غادي نحيد لوطو ديالي
إيجا(ضحكات بسخرية حيت فحال دوك الأنواع من الدقة الاولى كتعرف شنو ف نيتهم ..):اوكي ..
الشخص(حبسها ):إيجا؟
إيجا(بإستغراب وعاد بدات كتركز فملامحو):شكون..كنعرفك!
الشخص:وايلي معقلتيش عليا...مروان
إيجا(رجعات بيها الذاكرة لأيام لكلية فين قرات هي و هاجر...حلات فمها و مصدومة):أواه  نتا هو داك مروان ..ممتيقاش ..واش نتا هو لي فضحتي ديك ختنا لي دارت ليا داك البلان وخليتي لكلية ديال كازا كاملة كضحك عليها
مروان:هووو هدااا ..ياك نتاقمت ليك بعدا
إيجا(تقلبات ليها گاع ديك العصبية ل هستيرية ديال الضحك ..كيفاش حتى ما جاش فبالها حتى نهار  فگاع هاد السنين كاملة ..):هههههه ناري ميمكنش ..والله ماعمري طاحت ليا فبالي غادي نتلاقاك شي نهار..(قربات لعندو  و عنقاتو عناق ودي )
مروان (مبادلها لعناق  وحتى هو كيضحك):شنو كاديري بعدا هناا..واش عرفتي شحال قلبت عليك و سولت ديك صاحبتك..
إيجا:غير خليها على الله داكشي قصتو بوحدو ..ونتى شنو كادير هناا ..بلاتي (عطات سوارت لجهاد) جهاد الله يحفظك قادي ليا معاك لوطو
جهاد(غمزتها):هي لولة ا زين ...تي منين كضبري على هاد التوت الذي لا يموت
إيجا:اويلي سكتينا ..وتبعيني نتغداو
إيجا (رجعات لعندو كتمشى معاه جيهة الريسطو ):كمل ليا ا مروان..شنو كادير هنا..
مروان:وا الصراحة..من بعد داكشي لي وقع مع هدى ،تلغات خطبتي انا وياها ..ولواليد بقوة ما كان معصب من داكشي لي درت مع هدى..سيفطني نكمل قرايتي ف كندا ..بديت من لأول تماا..و طلع ليا كلشي فراسي بقا ليا غير لعام لأخر و دخلت نكملو هناا..
إيجا(خدات طبلة ف الريسطو و گلسو):اواه هادشي كلو واقع ليك ب سبابي وانا مفراسيش..انا راه فاش گالت ليا هاجر شنو وقع متيقتش راك تقدر دير هكاك ..
مروان :وا شتي لحب شحال كيعمي
إيجا:وا نتى كنتي مخطوب شنو غادي ندير ليك ..
مروان:ونتي شنو كاديري هناا...انا راني مفاهم والو راه تبدلتي ..
جهاد(جاية سخفانة):اختي ديك لوطو صعيبة عليا مافهمت فيها والو ،بزز باش قاديتها ..معرفتينيش بعدا على لموسيو
إيجا:گلسي بعدا وغادي تعرفي
###
بلقيس(داخلة للمستشفى بزز منها):والله ا نورة كون غير خليتيني عليك ..ما عندي الجهد لي يبقى هاد الوقت كامل فهاد الريحة ديال المستشفى
نورة(جاراها):زيدي ا زمر..راه گلت ليك مغادي نتهنا حتى ندير ليك فحص شامل من ساسك حتى لراسك
بلقيس:و انا راه مزيانة..كون ديريه لجوزيف لي بصح بان ليا مريض .ماشي انا لي ب صحتي
نورة:ا والو و تگولي ..غادي ديري فحص ليوم حتى نتأكد راه كلشي عندك مزيان..وداك جوزيف حتى هو حسابو معايا ..مزال غادي نجيبو ..
بلقيس:مابقاش كيتفهم ليا..كنحس بيه مخبي شي حاجة
نورة(بشك):ياكمااا
بلقيس:لا لا ماشي داكشي ..شي حاجة مخبيها واقعة ليه ومخبيها عليا غير باش ما يبرزطنيش ..
نورة(دخلات بيها للغرفة لأولى فين غادي يحيدو ليها الدم ):شحال ما طال لوقت حتى نتي راه غادي يجي يواجهك..شحال قدو يبقى مخبي
بلقيس:انا دخت مع هاد المشاكيل كاملين جوزيف من جنب و إيجا من جنب اخر
نورة(كتقاد ليها باش تجبد ليها الدم):شكون خطاوه المشاكل ..إيجا حلها ساهل ..خاصها غا تعرف شنو باغا ..
بلقيس: مصلحتها مع هارون..خاصها غير تفهمها
نورة:بعد لمرات فحال هاد القرارات مكيساليوش ب نهاية مزيانة...فكرتيني ف مي فاش بززو عليك لعربي  ،واخا هكاك عمرك فرحتي حتى نهار معاه..كتعاودي نفس الغلط  لبنتك وهادشي غير حيت خفتيها ترجع تحن ليه
بلقيس:هارون ولد الناس ..وكون تشوفي كيف كيدير ليها وكيف كيعاملها ..غير هي عينيها فين كاينين مفهمتش
نورة(هبطات ليها تريكوها):هاهو الدم خديناه..دابا غادي نطلعو لفوق فين كاينين راديوات ..
بلقيس:ا الله يهديك ا نورة ختي واش بنت ليك مهرسة من شي قنت
نورة:زيدي باراك من الهدرة..
بلقيس(طلعات معاها فلأسانسور ):كون غير درتي بالناقص ..و خليتيني ناعسة هاد الصباح.
نورة:زيدي خرجي ..ياربي السلامة مكتسكتيش ..
بلقيس(وقفات و جرات نورة حتى هي مخبية):شوفي ..جوزيف هاداك..
نورة(كتقاد ف نظاظرها ):ولاهيلا هو ..شكيدير هناا
بلقيس:والله معرفت مگال ليا والو انا قبل ما يجي ..سحابلي غادي يكون خدام
نورة:لعجب ..(زادت استغربات)شكيدير مع دكتور خالد
بلقيس:شكون هاد خالد
نورة:هو الدكتور المتخصص فالأورام السرطانية
بلقيس(كأنه وجهها تمص منو الدم ..شافت ف نورة وهي خايفة)
نورة(كتحاول طمنها):ميمشيش بالك بعيد يقدر يكون غير معرفة ديالو..
بلقيس:كنت شاكة شي حاجة ماشي هي هاديك..خاطري ما مهنينيش  ا نورة
نورة:غير تهناي ..انا غادي نشوف شنو واقع  ونرد عليك ..نتي كملي لفحص و انا غادي نجيب ليك لخبار..
بلقيس(دخلات للغرفة فين غادي دير راديو على جسمها كامل ..):الله يحفظ وصافي ..
نورة(وصات الطبيبة لي تما تعاونها و خرجات تشوف شنو قضية جوزيف مع الدكتور خالد ..
# فجهة أخرى من العالم  و بالظبط ف جزر البَهَامَا  ..كاينين واحد الزوج معلابالهومش گاع بالمشاكيل ولا بالناس ..بعادين كل البعد على أي حاجة تقدر توترهم...مدوزين شهر العسل الراس فالراس ..كان سهيل هابط كيعوم و راجع باش يفيق هاجر يفطر هو وياها بعدما قاد الفطور ب يديه
سهيل(لابس غير شورط ديال لعومان فالأسود ولفوق عاري ..دخل للبيت لي كان مظلم ..حلو كامل و تمشى لجيهتها هي لي باقا كتحلم ...):هاجر...فيقي باراك عليك من النعاس (خشى راسو لي فازگ وسط عنقها)ا ديك النعاسة ..باراك عليك
هاجر(فاقت مخلوعة من لماا لي فوجهها):فين كنتي ..كنتي كتعوم..
سهيل(خطف بوسة من شفايفها ب خفة):نوضي باراك عليك ..
هاجر(تكسالات فبلاصتها):اووف كون غير نبقاو هنااا...مكرهتش نبقى هنا حياتي كاملة
سهيل(حتى هو ماشي من لعاگزين):بصح!
هاجر: ا لاا هههه غير كنضحك ..واخا نگول هكاا انا راه منقدرش ما نشوفش يوسف ولا إيجا غا نهار ولا يومين ..
سهيل(كيقاد ليها شعرها):انا ما عليا غير فين ما رتاحيتي نبقى معاك..اما خوك يالاه تهنيت منو
هاجر(ناضت وهي كضحك عليه ..وقفات حدا الدوش و ضارت لعندو  ونطقات ب صوت أنثوي ):مغاديش دخل تاخد ليك شي دوش !
سهيل(دوز يدو على لحيتو و عاض على شفايفو ..): احح...اهاه نجي
هاجر(داخلة جاراه من يدو وهي كتمشى ب لور و مدخلاه للدوش ..)
سهيل(جرها لعندو ):زعمتي بزاف لاا
هاجر(دورات يديها على عنقو ):ايلا بغيتي تقدر تخرج حتى نكمل الدوش ديالي عاد دخل نتاا
سهيل:اجي ل مك لهناا...
هاجر:شنو دابا..بدلتي رأيك
سهيل(خشا راسو ف عنقها): كتجري عليا دابا
هاجر(رماتو فوق لجاكوزي لي كان كبير و عامربلما ):ممم شنو بان ليك نتا
سهيل(حط راسو على الجنب و تكا كيشوف فيها ):مم شنو كتحاولي ديري على الصباح
هاجر(كتحيد پينوار حريري كان فلون أبيض...حلات ليها ل
العقدة وبدون مجهود هبط كامل حتى وصل لرجليها .. وهبطات عندو للجاكوزي ):هانتا غادي تشوف شنو غادي ندير وتعرف راسك
سهيل(عض قنانفو و كيتفحصها كل جزء منها ب نظراتو ):عارفة راسك مزال مقصحة..واش عارفة شنو تابعك من بعد هادشي لي درتي دابا
هاجر(هبطات لعندو و گلسات فوقو و مقربة وجهها لوجهو ..نطقات بهمس ):عارفة
سهيل(بسهولة قلبها تحتو ):ها حنا غادي نشوفو هاد لعناد فيك