فَتَاةُ البَادِيَّة وَ المَفْيُوزِي المُتَمَلِّكْ(بالدارجة المغربية )

الجزء 55

##⚜️بعد 4 سنوات

كانت ناعسة فبيتها لي كان كامل مظلم رغم انه على برا كان صباح صبح  والشميسة طالعة ،فيقها تيلي ديالها لي كيصوني من الصباح ،قطعات وتقلبات لجهة أخرى كتكمل نعاسها بكل راحة تامة...حتى عاود صونا وناضت معصبة من هذا لي ما مخليهاش تكمل حتى نعاسها فخاطرها ،هزات تيلي وهي ناوية على خزيت
إيجا(جاوبات على تيلي بنبرة عصبة):شكوون
هاجر(كتشوف ف تيلي مخلوعة و عاودات رجعات  تيلي لودنيها):إيجا.. امالكي ياك لباس شنو معصبك تاني
إيجا(رجعات تكات بلاصتها):واش ا هاجر ماشي حشومة عليك ..ياك كنگول ل ق** مك متبقايش تصوني لياااا فالصباح .راه لوقت هنا ولهيه ماشي فحال فحال ...واش نتي ناعسة مزيان و اناا تخصري ل ديلمي نعاس مفيقاني قبل لوقت
هاجر:اييه عليك ا شيطانة..كون كنتي تنعسي بكري گاع ميتخسر ليك النعاس ..هادو راه غير دوك لحفلات لي كضلي فيهم مع ديك الجماعة دياللك ف ليل صحابليك معارفاش ..بلاتي حتى نجي
إيجا:وا هاجر ..قطعي خليني نكمل نعاسي..
هاجر:اجيي ماشي ليوم عندك امتحان ..شفتك مزال ناعسة
إيجا(ناضت مخلوعة ):اويليييي نسييييت..وعاد مفكرااني
هاجر(كضحك عليها):وا نوضي ا حنينتي يالاه تلبسي حوايجك،عنداك تنساي فاش تخرجي فلعشية عاودي صوني ليااا ،خاصني ضروري نهضر معاك.
شافت فالساعة بان ليها باقي ليها ساعة و نص على لوقت قطعات عليها تيلي و مشات كتجري لجيهة لحمام  خدات دوش بسرعة و خرجات دغيا قادات شعرها وميكاپ خفيف ..عاد دخلات لدريسينغ وهي باقا لابسة پينوارها ..كتمشى وكتقلب شنو تلبس ..أخرتها معرفات ما تاخد ..خدات ميني فونط فلكحل ،ومن لفوق جاي غير سميطات ..و من لتحت لبسات ميني چيپ حتى هي فنفس اللون جايا لاصقة على طايتها و فنفس لوقت اللون الأسود كيناسبها وكيجي لييها مع لبيوضة ديالها ..خدات صنيديلة عاليية فكحل ماط باش ناسباتها مع صباغة حمرة لي دايرة فرجليها عاد كملات لباهية بلي  أكسيسوار كتقلب و تعاود حتى لقات لي بغات...و أخيرا هزات صاكها ونضيظرات ديالها ووقفات قدام لمرايا ..
إيجا(كتقاد قدام لمرايا وكل مرة كدير پوزيسو فشكل عاجبها راسها  ):موووح علياااا (شافت فالساعة الساعة ورجعات كملت طريقها)ناريي على تعطيلة..
هبطات كتجري فالدروج وتالفة غير مع حوايجها لي مامخلينهاش تحرك فخاطرها...دازت من حدا جوزيف وبلقيس لي كيفطرو مشافتهمش بقوة التلفك...
جوزيف(تنحنح)
إيجا(وقفات مكوانسية وضارت عندهم ب ضحيكة خفيفة):صبااح لخير ..
بلقيس:عاد شفتينا
إيجا(تأفأفات):وا راني معطلة وعندي امتحان دابااا
بلقيس:وعاد غادا ليه گلسي غير تفطري بعدا ..
إيجا:لالا والله مقاداا حتى نخرج ونفطر..
جوزيف(كيضحك عليهم):صافي خليها على خاطرها ..
بلقيس:بقا تفشش فيها نتاا
إيجا(عنقاتو من لور):و راه باباتي هذا ايلا ما فششنيش انا شكون يفشش
جوزيف(كيلعب ليها فشعرها):كايييينة
إيجا:شفتي ...وا تعلمي منوو
بلقيس(هزات صندالتها):شفتك ما بقيتيش تحشمي
جوزيف(حبسها بيديه):هداي على بنتي..
بلقيس(شيرات حتى جابتها فيه):نتاا غير بقا تجي منها...
جوزيف(كيمتل عليها راه مقصح ف يديه)
بلقيس:اويلي مالك تقصحتي
جوزيف(مزال شاد ف يدو):كضرني ا بلقيس
بلقيس(بقى فيها لحال ):ارا نشوف
جوزيف(مد ليها يدو باش تبوسها ليه):هاكي بوسيها باش تبراا
بلقيس(يالاه كانت غادي تحني عليها وهي تعيق ..و عضاتها):هاا لبوسة لي خاصك نتاا..(ضارت كتشوف حداها لقات لأخرى هربات)هاهي مشات تاني
جوزيف(كيضحك ):خليها على خاطرهاا
## عند إيجا لي هربات من بلقيس .هزات لوطو ديالها لي كانت من نوع ميرسيديس رياضية فأسود ماط ..ديمارات لوطو وشافت فالساعة لقات بقات ليها عشر دقايق بلحساب ...كسيرات بالجهد ..وخرجات من لقصر .صايگة فحال ايلا غير بحدها لي كاينة فالطريق ..مامسوقاش للبشار لي موراها بتاتا ..وزايداها ب نگير لي كيعكلها فالطريق كتشبع فيه بلمعيور ...ما هنا ليها الراس حتى وصلات ...و واخا وصلات دخلات ب عجاجتها لي كدوز من حداه بديك السرعة كيخوي ليها الطريق ..وصلات لجيهة لپاركينغ بزربة سطاسيونات لوطو فبلاصتها لي كتحطها فيها ديما و يا ويلو شي حد من غيرها يحط لوطو ديالو تمااا نهارو يدوز كحل ....خرجات من لوطو بعدما هزات صاكها...دارت نظيظرات الشمس ديالها لي كانو كحلين ...قادات شعرهاا لي نقصات شوية من طولتو لكن مزال كيبان طويل ...سدات لوطو و تمات غاداا كتمشى .وكالعادة لي كدوز من حداه كيتبعها ب عينيه...كانت فحال شي حورية كتمشى من وسطهم ..منحنيات جسدها وطولتها لي كانو ف قمة المثالية ..وكذالك وجهها لي كيجمع بين البراءة والإثارة فنفس الوقت ..
إيجا(حيدات نظيظراتها و بانو عويناتها لي كانت مقاداهم وراسماهم مزيان...لدرجة داك اللون الأزرق لي فيهم كيبان واضح وملفت ..شافت گاع لعينين عليها و ضحكات حتى بانو سنيناتها مستفين وهي كتلعنهم من تحتها ):لعماا إنشاءالله مالكم على هاد الشوفات واخا عارفة راسي زوينة..هي غير زوينة و وسكت ..اححح علياا امتى نلقى شي زين فحالي (دلات شنايفها ب إسى) أمپوسيبل ..ديما كنطيح غير فلخايبين زهري غير فيهم ..والو وتگول شي حد كيحمر لوجه فهاد لجامعة ديال والو ..(عاودات شافت فالساعة لقات لوقت هو هاداك...كملات طريقها وهي كتمايل ب مفاتنها وعاجبها لحال..دخلات للقاعة فين كاين ل إمتحان..تمشات حتى گلسات بلاصتها..وتحطات قدامها لورقة...
جهاد(من موراها ):انا غير موراك متنساينيش دوزي ليا راني ماعارفة حتى شنو هادشي
إيجا(ضارت عندها):وانتي لي كضلي مبندخة فداك إنسطا نهار ومطال بدوك السطوريات ..فين كانت لقراية ديم الساعة
جهاد(خرجات لسانها):زعما نتي طفرتيه..بغيت غير نعرف كيف كديري للقراية ونتي النهار كامل لاصقة حداايا
إيجا(غمزاتها):سر لمهنة هاداا ...بلاتي حتى نسالي ونعطيك..
ضارت لعند ورقتها و كتشوف فلأسئلة...كان دايز من حداها لپروف خدات ليه ستيلو من الشوميز ..و هبطات على ورقتها وهو مزال كيشوف مفاهم والو ...ما هزات راسها كملات كلشي ..هزات الصاك ديالها صورات داكشي لجهاد و سيفطاتو ليها فواتساپ.
إيجا(غمزتها):انا نتسناك فلكافي ..متعطليش
جهاد(رمات ليها بوسة فلهوا):اوكي
# خرجات من لقاعة وهي غادة كتمختر..حتى وصلات للكافي لي عندهم فوسط الجامعة.. كانت عامرة بالناس .وموسيقى خفيفة مطلوقة..
إيجا(تنفسات بعمق وكتشم ريحة لكرواصون):الله على كريشتي مسكينة جاها جوع...
مشات بخطى مسرعة و خدات بلاصة مقنتة جات كتطل على لجامعة من فوق ..خدات كافي ديالها و كرواسون و شادة تيلي ديالها كتفرج وكتاكل ...حتى كتشوف هاجر كتصوني ليها أپيل ڤيديو ..
إيجا(فتحات لأپيل ): ا شنوو
هاجر:قادي قادي لكاميرا مزيان نشوف شنو لابسة
إيجا(قادات تيلي وحطاتو قدامها مكالياه بقرعة ):دابا مزيان..
هاجر:اوو زاز يا ختي ..ماهذا الجمال
إيجا:اودي فاش غادي ينفعناا هاد الجمال و اناا مقادة نلقى حتي شي حد يحمر لوجه
هاجر:وا هي صراحة كاين ..
إيجا(كتشوف فجنابها ):فين اختي مبانليش انا بعداا..واقيلة خاصني ندير تيليسكوپ باش نشوف
هاجر(كتموت عليها بالضحك):وا داكشي لي باغا هاهو عندي هنااا
إيجا:عارفة عارفة..كيتعطى لفول غير لي معندو ضراس ..خاصني نطلع شي صيف لإيطاليا نضبر على راسي تماا
هاجر:كتمعني علياا ياك
إيجا:وا نتي عندك سهيل ..مابقاو ليك ضراس ..
هاجر:يااااك ا ختيي
إيجا(كتاكل وكضحك عليها ):إيمتا بعدا غادي تجي
هاجر:..سهيل راه هبط و بقيت غير انا ويوسف ..حتى دوز لكومبا و نجي معاه..يمكن غدا فليل ولا بعدو فالصباح
إيجا:ااه اوكي ...و ماتعطلوش
هاجر:لالا منتعطلوش راه اصلا التاريخ ديال لعرس مايمكنش نبدلو ليه لوقت ..اجي بعدا لقيتي شنو غادي تلبسي فلعرس
إيجا(حركات راسها بلا):مزال مالقيت لوقت حتى نشوف من بعد
جهاد(جات گلسات حتى هي جابت ماكلتها ):اوففف ما ساليت حتى سخفت
إيجا(كضحك عليها):لي يشوفك كتهضري هكا يگول من الصباح ونتي تعصري فدماغك
جهاد(كضحك ):وا عصرت صباعي گالاك
إيجا(تفرگات بالضحك حتى سالو دموعها بالزربة حيداتهم باش ميهبطوش):وباز ياختي وجهك قاصح
هاجر:جهاااد..وا تي فين من نهار دفنوه مازاروه
جهاد(طلات عليها ف تيلي ):كوني هانية داكشي لي بيناتنا مزال ما دفناه..ايمتا بعدا غادي يرجع خوك
هاجر:احيااني عليك ..كتسنايه غير هو
جهاد:بيان سيييييييغ راه لحب هاداااك ..ايمتاا تجيو بعدااا
هاجر(كضحك عليها ):فاذي نجيو فهاد ليوماين..
يوسف (خشى راسو معاها فلأپبل):الو الو لهدرة علياا واقيلة
هاجر:كحز لهيه حتى واحد ما هضر عليك ...
يوسف:جهاد ..كبرتي ا جنية
جهاد(كتقاد فراسها):عارفة
يوسف:وباز ا ختي مكتحشميش
جهاد:ختك راهي حداك..سمحلي انا خويا معنديش
يوسف(كيضحك على هبالها):سبحان الله ديما جوابك على طرف لسانك
هاجر(طلعات ليها لأپيل ديال سهيل):بسلامة .سهيل كيتاصل بياا..لعشية و نعاود نصوني ليك
إيجا(قطعات لأپيل وضارت لعند جهاد لقاتها نايضة كتجمع حوايجها):فين غادة
جهاد:خاصني نمشي للمول نشري شي حوايج  
إيجا:اه اوكي ..انا غادي نرجع نكمل نعاسي
جهاد:ههه صافي ..يالاه نخليك ..باي

## عند بلقيس لي كانت گالسة هي ونورة  كيستارحو فوسط لاصال فين كيديرو بزوج السپور..
نورة:اخر مرة نجي معاك هنا..اناري اشداني انا لشي سپور ليوم جهد معانا بزاف داك الكوتش
بلقيس:انوضي مالكي وليتي معگازة..تحركي شوية باش تبقى لاطاي ديالك مقادة
نورة:واختي نتي لي مزوجة  تهلاي فراسك..انا مانصيبش  راجل لي كنت نكسابو مات شحال هادا..نتي لي الراجل عندك عاطي للعين ..نصيييحة تهلاااي فراسك اختيي
بلقيس(كتعوج قدام لمرايا):ومالو غادي يلقى ما حسن مني ..فين يلقى هاد الزين ...دابا ا نورة ماشي كنبان فحال ايلا عندي تلاتين عام ..بلا ما تكدبي
نورة(طلقات ضحكة حتى كلشي ضار عندها):لالاا كاين المضمون..
بلقيس(كتشوف فشعرها):واقيلة غادي نصبغ شعري ..شبان ليك
نورة:ناري هاهي بدات تاني
إيجا(داخلة هاجمة عليهم حتى هي ولابسة حوايج السپور):مالكم شفتكم حابسين..
نورة:راه هاد لكوتش سخفناا
إيجا(كضحك عليهم):راه گلت ليكم شرفتو ومكتيقونيش
بلقيس:اناا مادخلونيش معاكم فلحساب..باقا صغيرة اناا
إيجا(شافت فيها وهي كضحك):هايداك ا ماما تهلاي فراسك وتهلاي ليا فباباتي مزيان
بلقيس:شوف لبرهوشة مابقاتش كتحشم
نورة(غمزات إيجا وكضحك على بلقيس):جهد عندك عاد زاد جهاد..لعربي مكانش قايم بلواجب ..رجعتي لأيام الشباااب
إيجا(شادة كرشها وكضحك حيت فهمات نورة شنو قصدات ):هههههه داكشي لي بان ليا حتى اناا
نورة:وا دابا واش لعربي هو جوزيف ...سمحي ليا ولكن مستويات مختلفة
بلقيس:لاالا غير زيديي ..خمسة وخميس غادي تقوسي ليا على الراجل ..
إيجا:كنشم ريحة لغيرة 
بلقيس:نوضو نوضو هاهو لكوتش رجع 
نورة:غا سيرو انااا مفياش
بلقيس(جراتها)والله حتى تجيي  متخلينيش بحدي