فَتَاةُ البَادِيَّة وَ المَفْيُوزِي المُتَمَلِّكْ(بالدارجة المغربية )

الجزء72

لوباروس
وقفات على برا ديال الجامعة ف وقت لغدا كتقلب على جهاد لي غادي توصلها للدار ..عيات ما تقلب عليها و ما ليها أثر حتى من تيلي ديالها طافي من لبارح ف ليل منين كانت مع زيدان ..و لوطو ديالها لي كان گاليها غادي توصلها قبل من لحصة مجابوهاش ليها
واقفة على الجنب ديال الشانطي  والشمس ضاربة فيها لي كيدوز كيتبسل عليها حتى طلع ليها الزعف لراسها خصوصا انه حتى من بزطامها نساتو ف دار زيدان ...گلسات على الأرض و رجليها ضارينها حيت الصندالة كانت عالية قهراتها فرجليها ..طلعات عينيها على لوطو لي كانت رياضية فلون أحمر فرانات بقوة قدامها حتى كيبان ليها مروان ..ناضت طايرة بلفرحة
إيجا:مروااان ...جابك الله
مروان(كيضحك عليها):مالكي على هاد لحالة ..اش طاري
إيجا:اويلي غير سكت ..شلى بلانات هوماا
مروان:فين لوطو ديالك ما موالفاش ليك تحركي بلا بيها
إيجا:واحد لكسيدة خاايبة و لهلا يوريك معامن درتها
مروان(غمز ليها):طلعي طلعي نديرو فيك هاد لخير متبقايش واقفة هنا الدنيا خايبة
إيجا(حلات لوطو و ركبات حداه):عتقتيني قهراتني غير الشمس ...لا فلوس لا طوموبيل لا جهاد ...شي حد دعى فيا شي دعوة خايبة هاد النهار..
مروان(كيضحك عليها):اجي بعدا ..معامن هاد لكسيدة لخايبة
إيجا(تنهدات):مع سيهم زيدان لمالكي ..تگول زهري غير معاه
مروان(حل عينو فيها):واش كضحكي ؟
إيجا:كنبان ليك كنضحك!
مروان:شفتك كتهضري عليه فحال ايلا دايرة كسيدة مع اي واحد...(ضرب راسو ب يدو)اويلي حتى اناا مشيت بعيد ..نسيت راه هو باك كيعرفو بعضياتكم
إيجا(ضحكات ب استهزاء ):هادشي كان شحال هادي ..اما دابا لا
مروان(بغا يتلفها بالهضرة):حگا ..مبروك الخطوبة ..و غير عرضي علينا بعدا ونتي مكتعلميش
إيجا:اودي غير خلي هاد الجمل راگد ..هادا مشكل اخر
مروان(شاف فيها مطولا):لاا نتي حالك مبقاش عاجبني ..غادي نمشيو دابا لشي بلاصة فين نتغداو و غادي تعاودي ليا كلشي
إيجا(حتى هي خاصها غير علامن تخوي ):يالاه غير زيد انا نيت خاصني غير علامن نخوي هادشي لي عندي
جوزيف (گالس فوسط لمكتب ديالو حاني كيسني على شي وراق حتى تحل لباب ديال لمكتب ديالو بدون ما يهز راسو ):كريمة اجي ابنتي الله يرضي عليك جابك الله ..تأكدي ليا من لمكتب ديال إيجا واش كامل ولا مزال خاصو شي حاجة ..
زيدان(تحرك بلاما يگول حتى كلمة و گلس قدامو)
جوزيف(طلع عينيه حتى كيلقاه قدامو..ضحك ب سخرية ):جابك الله كنت نيت باغي نشوفك
زيدان(كيهضر ب هدوء عكس طبيعتو):فشنو كنتي باغيني
جوزيف(ناض من بلاصتو و گلس مقابل معاه):نعرفو بعدا علاش جيتي اولا ...(شاف فيه كيتسناه يهضر) شنو عندك !
زيدان(تنهد ونطق ببرود):انا ما جيتش باش نتشاور معاك..انا جاي نعلمك
جوزيف(كيشوف فيه باستفهام):هضر
زيدان:إيجا
جوزيف (ربع يديه):مال بنتي ا زيدان..شنو باقي باغي مزال منها
زيدان(تكا ضهرو على لكرسي):ما باغي منها والو..انا باغيها هي
جوزيف :مزال ما عييتيش ..
زيدان(كيشوف ليه ف عينيه مباشرة بدون ولا ذرة خوف ولا تردد):ومعمرني غادي نعيا
جوزيف:مكتشوفش بنتي تخطبات ؟واش مكنشوفهاش باغا تبدا حياة جديدة وتكمل طريقها؟هادشي مكيبانش ليك ؟
زيدان:هادشي مكيهمنيش ،حيت انا لأحق بيها (شير لراسو بيديه) وكتنتمي ليا انااا ..(زاد ضغط عليها)انااا بوحدددي ..ايلا بغات تكمل حياتها كيفما گلتي انا ما عنديش مشكل ..ولكن تكملها معايا انا
جوزيف:غير كتعذب راسك على والو،هادشي ديال بزز ماغادي ينفعك فوالو ولو منكونش انا لي واقف فطريقك نتا عارفها عمرها غادي تكون ليك .
زيدان:مكيهمني لا هارون لا غيرو ،لي عارف هو يا هي تكون ليا يا لحتى لحد...ونتا عارف مزيان حاجتي مكنبغي حتى حد يقيصها ليا ..انا مغاديش ناخدها بزز ..(تنهد ) انا كنطلب يديها منك هاد لمرة (سكت لمدة و كمل هضرتو) غادي نعوضها على گاع لي فات
جوزيف (متفاجأ من طلبو ومن الطريقة لي مهدن بيها):واش عارف راسك شنو كادير ..(حط رجل على رجل ) كايبان ليا راك ما واعيش بشنو كتگول
زيدان:متسناش مني نستسلم و نرجع فحالي كيف قبل ..نتا كتعرفني مزيان كتر من أي واحد ..ايلا بغيتي تفادا لمشاكل نتا عارف شنو خاصك دير
جوزيف (شاد فراسو لي بدا كيعطيه لحريق ):تسطيتي نتاا...
زيدان:مزال ما شفتي والو
جوزيف (فقد السيطرة على راسو حتى طاح فلأرض من قوة الألم وعينيه مفيكسيين على لعصير لي كان محطوط حداه )
زيدان(ما فاهم والو ..هبط لعندو ):جوزيف ...شواقع
جوزيف (مزير بقوة على شوميز ديال زيدان و حاس بألم قوي بزاف معمرو جرب فحالو ..طلع عينيه لي كانو حمرين كيف الجمر ف زيدان ..كيحاول يهضر لكن داك الالم مخلاش ليه لقدرة لا يتحرك لا يهضر
زيدان(عرف انه شي حاجة ماشي هي هاديك ..شاف جوزيف كيشير ليه على لكاس لي فوق الطبلة تما فهم انه شي مؤامرة مديورة من وراه...بسرعة و بدون ما يفكر هزو فوق ضهرو و طلع كيجري للسطح حيت عرف انه القضية فيها حياة او موت ،علم لگارد ديالو باش يهبطو ل هيليكوبطر فوق الشركة ديال جوزيف ...سرعان ما حط رجليه فالسطح حتى لقاها واقفة ..طلع وحطو ليه راسو فوق رجليه كيحاول يخليه فايق و ميغيبش
جوزيف(زير على يدين زيدان و بصعوبة كيهضر):د..ديني عند ..الطبيب ديالي
زيدان(كيحاول يهدنو ):غير تهدن انا غادي نديك عندو
جوزيف(كيطلع النفس غير بزز ):ب...بلقيس ..عيط لبلقيس
زيدان(كيغوت باش ل پيلوط يزيد فالسرعة حتى عروق عنقه خرجو ...رجع شاف فيه وهو مزال حاط ليه راسو فوق رجليه ):واخااا واااخاا ..غادي نعيط ليها...
جوزيف (كيغوت ربي لي خلقو):زيدااان...ما كنشوووف واالووو ...ما كنشووف واللللو...الظلااام ا زيدااان
زيدان(مصدوم من حالة جوزيف قدامو ...خصوصا انه حس بيه بدا يفقد وعيو...غوت حتى لي سايگ ل هيليكوبطير تخلع ...):تحرك دغيااااا ...(كيضرب ليه فوجهو باش ميفقدش وعيو )جوززيف...جوزييف ...فيق ا جوزييف ...
...
مروان(كيشوف فيها وكيتنهد ):اش غادي نگول ليك ...والله معرفت شنو غادي نگوليك..هادشي فشكااال عندك
إيجا:اودي ..هادشي ما عندو حل
مروان:انا لي عارف دابا هو انك درتي خطأ واحد مكانش خاصك ديريه..مكانش عليك تقبلي الزواج بواحد مكتبغيهش..
إيجا(رجعات شعرها لور و عاضة على شفايفها):عارفة ..عارفة راسي غلطت و جريت معايا حتى هارون فهادشي ..
مروان:انا لحاجة لي مفهمتهاش هو علاش زيدان لمالكي تابعك هكاا...شنو نوع العلاقة لي كانت بيناتكم فديك لوقيتة
إيجا(بتردد ):معرفتش بالظبط .ولكن لي عارفة هو من نهار دخل لحياتي قلبها سفاها على علاها و خرج منها فحال ايلا عمرو كان ..هادشي كلو باش يرضي داك حب التملك لي فيه
مروان(كياكل وكيهضر):هادا مبانش ليا حب تملك..هادي شي حاجة كبر بزاف من هادشي لي كتگولي ...
إيجا(عرفاتو شنو باغي يگول ):بلاا ما يمشي بالك بعيد..هاداك مستحيل يكون ك أي انسان عادي كيحس ...مستحيل ،حيت داكشي لي دوز علياا ماشي بالساهل ..(للحظة سهات )وكون غير ما ختافاش ربع سنين كاملة ،مكانش هادشي كامل يوقع.
مروان(حل فمو):شفتك كتحسري عليه ولا غا جاب ليا الله ..
إيجا(سرطات ريقها ):هاا..لاا اش كتخربق حتى نتاا
مروان(كيمسح يديه):لمهم ما علينااا..خاصك ضروري تاخذي شي قرار لي تخرجي منو بأقل الأضرار..ولكن على حساب ما عاودتي ليا ،زيدان لمالكي مستحيل يخليك فراحتك..لكلية كلها كتهضر عليك هاد الصباح ..ميصحابليش راه لهضرة عليه
إيجا(حتى هي كتمسح فمها):صافي باراك علياا تگهمت بهاد الموضوع...وصلني معاك لدارناا بغيت غا نعس ..ما نفكر لا فيه لا ف غيرو
مروان(كيضحك عليها):زيدي نيت راه عندي حصص هاد العشية..