فَتَاةُ البَادِيَّة وَ المَفْيُوزِي المُتَمَلِّكْ(بالدارجة المغربية )

الجزء 54

##ف بلاصة جات خارجة على لمدينة شوية و بالظبط ف ريسطو كيتواجد قدام لبحر..كان يوسف گالس و قدامو هاجر لي منين دخلات وهي كتاكل ...ويوسف غير كيشوف مفاهم والو
هاجر(شافتو غير كيشوف فيها ):مالك كتشوف فيا..مغاديش تاكل ماكلتك
يوسف:لا لا غير كولي على راحتك ..غير جاتني عجب الطريق كامل ونتي باغا تعرفي فارعة ليا راسي باغا تعرفي شنو كان طرا هادي 15 عام،شفتك فاش جيتي بانت غير لماكلة ونسيتي على شنو جينا..
هاجر:وا بلاتي حتى ناكل ..هادي يوماين ما كليت والو ،واش دابا ما بقيتش فيك
يوسف(تنهد ):كولي كولي  وسكتي
هاجر(حبسات لماكلة وشافت فيه و عينيها مغرغرين وفمها باقي عامر): دابا نتا حاشا واش نگول عليك خويا ..حتى لماكلة عزيتيها فياا.
يوسف(جاتو ف نقطة الضعف ..ناض لعندها كيمسح ليها فعينيها):دابا واش انا گلت هكاا ..(كيقرب ليها الطباسل ) هانتي كولي حتى تشبعي و انا غادي نساينك حتى تسالي على خاطر خاطرك  ..
هاجر(حابسة الضحكة و عاجبها لحال حيت و أخيرا لقات علامن تفشش )
يوسف(كيقاد ليها ف شعرها لي طايح على وجهها ،وشاد ليها لخاطر كيحاول يعوضها على اي حاجة فاتت ..شد ليها حنيكاتها ):منبقاش نشوفك كتبكي مزال...صافي مفاهمين
هاجر(بضحكة عريييييضة):هيهيهي كون هاني انا اصلا مكنبكيش بزاف
يوسف:عارفك شيطانة ميقدر عليك غير لي خلقك...(تم راجع لبلاصتو و بانو ليها سيور ديال سبرديلتها محلولين..حنى فلأرض و قادهم ليهاا و عاود قاد حتى الأخرى)بنت قدك فهاد لعمر و مكتعرفش تعقد حتى سيورها ..وكون طحتي دابا و جيتي على فمك
هاجر:ما حنا على فالك ...(شافتو گلس فبلاصتو) اجي بغيت نسولك ولكن جاوبني ب صراحة
يوسف :اييه سولي ا لالة
هاجر:شنو بينك و بين ديك ريناد
يوسف(كيطنز عليها):شكون ريناد !!
هاجر(شافت فيه ب شوفة ديال راني عايقة بيك):خت داك لي ميتسماش
يوسف(كياكل من طبسيلو وكيهضر بكل برودة ):والو
هاجر(هزات حاجبها):مأكد ! انا كيبان ليا لعكس
يوسف:كانت شي حاجة شحال هادي ..دابا كيبان ليا كنت غبي و مكنفكرش مزيان..
هاجر(تنهدات):اصلا انا منبغيش خويا تكون عندو شي علاقة بشي واحد قريب لداك زيدان..خصوصا ايلا كانت ختى..(قربات ليه و حطات يديها على كتفو )شفتي هاهي ختك دابا معاك...غادي نجيب ليك احسن وحدة ..صراحة مكرهتش ليك ايجا صاحبتي
يوسف(ضحك عليها وعلى هبالها):كتهضري هكا غير حيت مكتعرفيش زيدان مزيان...
هاجر:الله يسترني حتى نعرفو..الله يبعد بلايا عليه ..
يوسف(شد كرشو بالضحك عليها  ): عرفتي و يسمعك كتهضري هكا عليا انا وإيجا فحال والو يقتلنا بزوج هنا...
هاجر:مجرم هادا والله..
يوسف:هههه ما شفتي والللو..
هاجر:گالت ليا إيجا راه مشا ..واش بصح !
يوسف:اه مشاا..غادي يرجع ل إيطالياا ..
هاجر(تنفسات ب راحة):و أخيراا..
يوسف:ولكن مابقا ليك والو و تشوفيه(شاف فيها كتشوف فيه مفاهمة والو من داكشي لي كيگول )..حيت حتى اناا غادي نرجع ل إيطاليا ..فلأصل حنا كاملين كبرنا تما و عشنا تما ..
هاجر(عاد تفكرات انه غادي يرجع ل إيطاليا):واش دابا غادي ترجع حتى نتا فخطرة تماا
يوسف:انا اصلا عمرني بعدت من تماا...جابتها الظروف وصافي ،لكن كنت غالط فاش فكرت نستاقر هنا غير على قبل شي حد ..(شد ليها ف يديها):ولكن دابا مغاديش نرجع و يدي خاويين ..غادي نديك معايا حتى نتي ..(باس ليها يديها بزوج ) ومغادي نخلي حتى حاجة مزال تخصك وتنقصك..غير خاصك تجي معايا..كنواعدك غادي نعوضك على گاع لي فات ..ودوك الأيام لخايبة كاملة غادي تنسايها ..
هاجر(كتشوف فيه و مترددة واش تفرح واا يبقى فيها لحال من هضرتو ..حيت حايرة واش تبدا حياة جديدة معاه لي هو خوها ولا تبقى هنا بين حبابها و صحابها ...):معرفتش الصراحة
يوسف(بتاسم بحنية ومشى گلس حداها ):هانتي عندك هاد السيمانة فكري فيها مزيان و ردي عليا و مغاديش نتقلق منك كيفما كان قرارك ..
هاجر(بادلاتو الإبتسامة و رجعات كملات هضرتها):دابا عاود لياا..شنو وقع هادي 15عام...حيت راني معاقلة على والو من غير ذكريات قلال كيجيو لبالي مرة مرة..
يوسف( قرب راسها على كتفو  وكيلعب ليها فشعرها):كتظني راك مستعدة تسمعي
هاجر(حركات راسها ب موافقة)
يوسف(بدون عائق بدا كيعاود من الأول):فلوقت لي كانت عندك 5 سنين ..كان عندي فديك الوقيتة 15 عام..كنت مراهق طايش بزااف ،حتى من لواليد كان ديما معذب معايا.من غير لواليدة لي ديما كانت كتخبي علياا ..
هاجر:واش كنا حنا غير بزوج..
يوسف(حرك راسو ب أه):اه كنا غير حنا لي عندهم ..ولكن نتي كنتي مفششة كثر مني ...كان لواليد لي حطيتي عليها فمك كيحضرها ليك(بتاسم ب عفوية)وخصوصا لكيك ديال لفريز كنتي كتاكليه يوميا وكتقنعيش منو
هاجر(رجعات ذاكرة ديالها للور وتفكرات نهار كانت مع سهيل و كانو شادين لفيلم ومعاهم يوسف..كان كيقرب ليها لكيك ديال لفريز ):كنتيي عارف
يوسف:هههه عاارف....وعارف حتى شوكولا عزيزة عليك
هاجر(بتاسمات و خالاتو يكمل هضرتو)
يوسف:كنا عايشين غير حنى ب ربعة و انا من ديما كان عزيز عليا المصارعة واي حاجة كتخصها..كان عادل نفسو صاحب لواليد هو لي كان كيدربني من داك الوقت...حتى جا داك النهارلي تبدل كلشي ..كنا داخلين لدراناا و انا كنت تابعك كتلعبي فالجردة...و ب خطأ منهم شعلو الضو وهوما محاسينش راه كاينة ريحة لگاز..
هاجر(غمضات عينيها بحرقة )
يوسف(كيدوز يدو على كتفها كيحاول يخفف عليها ):كان عمي كيخدم من لواليد ..كان هو ذراعو ليمنة فكلشي وهو خوه لوحيد ...بعد عام ،لخدامة لي عاوناتو هي لي جات عتارفات ب لي هي لي عاوناتو باش يقتلهم...وقبل ما يشتد فاش شاف بيلا لخطة ديالو ما مشاتش كيفما بغا ...حطك نتي فلخيرية حيت باقا صغيرة ومعاقلة على والو ،حتى من سميتك بدلها ،واناا كنت مشيت مع عادل ..فاش عيينا ما نقلبو عليك ..قتارح عليا نطلعو لإيطاليا و كنت ديما فاش كنلقى فرصة كنهبط نقلب عليك..
هاجر(تخشات فيه وهي معنقاه كتبكي ودموعها مقادراش تحبسهم...وگاع دوك الدكريات لي كانو مشوشين ف دماغها بدات كترجع حاجة ب حاجة)...

##بعد يومين
إيجا(كانت مع هاجر وهي واقفة قدامها كتشوف فيها كتجمع ف حوايجها ):معرفتش واش نفرح ليك ولا يبقى فيا لحال حيت غادي تمشي وتخليني بحدي فهاد لحالة..هادشي جا مزروب بزاف..
هاجر(قربات و حطات يديه ف يدين إيجا):نتي ماشي بحدك انا ديما معاك صافي ..فأي فرصة لقيت غادي نهبط حتى لعندك.. راه اصلا نتي لي عندي من بعد خويا..
إيجا(دلات شفايفها):واخا ماشي مشكل...
هاجر(سدات لڤاليز ديالها و حطاتها فلأرض بعدما سالات الجميع ):ايمتا غادي ترجعي للجامعة..
إيجا:مغاديش نرجع..
هاجر:اويلي و علاش ..
إيجا:جوزيف گالي بيلا غادي يدخلني لجامعة أخرى...هاديك لي جات فلخرجة ديال لمدينة
هاجر(حلات فمها):اواه متگوليش ليا هاديك ...عرفتي شكون كيقرى تماا غير ولاد النخبة ديال النخبة..(هزات كتفها) اصلا راكي دابا وليتي فحالك فحالهم..او يمكن حسن منهم..خصك غير ترجعي تهلاي فحالتك فين تبان شي بنت لق** قدامك
إيجا(كضحك على هبالها ):الله يستر..
هاجر:ومالي كذبت ...(مشات عندها و عنقاتها بالجهد) إيجا..نتي عارفة راسك شحال عزيزة عليا وكتر من ختي ..ياك عارفة هادشي
إيجا(بصوت فيه نبرة حزن):اه عارفة..وحتى نتي راك فحال ختي لي معنديش..
هاجر:واعديني بواحد لحاجة..واعديني تنساي گاع دكشي لي فات وتبداي صفحة جديدة..ونساي ديك إيجا لي كانت شحال هادي .وديري بلاصتها وحدة قاصحة مكيهزهاش ريح...حيت هاد الدنيا خايبة بزاف ومكتستاهلش وحدة فحالك تكون فيها..(شدات ليها فوجهها) حيت ايلا بقيتي هكا غادي تزيدي تقصحي بزااف ...وعد !
إيجا(بزز باش شدات دموعها):اه وعد ..
هاجر(سمعات يوسف كيعيط ليها):ناري تعطلت عليها
إيجا:ههه سيري يالاه توصلي..فاش توصلي تمااا صوني لياا صافي !
هاجر:صافي كوني هانية غير نوصل ندير بيك ضورة فلبلاد كاملة..
إيجا:حمقةة هههه
هاجر(مهبطة لڤاليز فالدروج و يوسف كيتفرج فيها):وا زيد عاوني ..اييه بقات فلعضلات
يوسف(خداها من عندها):زيدي براك من قوة لهضرة
هاجر(عنقات إيجا):عنداك نجي نلقاك دايرة شي صاحبة أخرى من غيري
إيجا(حركات ليها راسها ب أه)
هاجر(ركبات ف لوطو وحلات الشرجم):عنداك تنساي لوعد لي واعدتيني
إيجا(شدات ليها فيديها ):واخا مغاديش نساه..
يوسف(ديمارا لوطو و خرج من لڤيلا):مستعدة ياك..
هاجر(مزال كتشوف جيهة إيجا و دموعها ف عينيها ):اه ..صافي غير زيد متبقاش واقف
يوسف:عهه ولاش كتبكي دابا
هاجر:هئ هئ غير حيتاش خفت نخليها بحدها..معندها حد من غيري
يوسف:ههههه حمقة هادي ..نتي راك معارفاش دابا شنو عندها..راه عندها جوزيف دابا..راه ميقد عليه حد غير لي خلقو
هاجر(ضحكات وسط بكاها):وصافي كنل الطريق راه غادي نتعطلو
يوسف(ديمارا لوطو):هي الاولة
سهيل(واقف و كيشوف فلوطو ومعارفش شنو يدير ...
إيجا(شافت فيه):مالك هكاا..
سهيل(تنهد ):والو والو...
إيجا:مغاديش تمشي معاهم حتى نتا
سهيل:لا مزال غير ايام قليلة و نمشي عندي شي خدمة تما
إيجا(حدرات راسها):اه مزيان..
سهيل(رجع نظرو ليها):ونتي مزيان..كيف بقيتي
إيجا:حمد لله راني مزيان
لگارد (وقف عليها):مادموزيل..سي جوزيف كيسول عليك..لوطو راه واجدة
سهيل(كيشوف فگاع دوك لي گارد لي موزعين فحال شي اصنام فديك لڤيلا كلهم لابسين لكحل ..):جوزيف داير معاك لعينين مزيان..
إيجا(ضحكات ب خفة):وياه ..
لگارد (حل ليها لباب):مادموزيل..
إيجا(دخلات فلوطو):يالاه بسلامة
سهيل (بادلها الابتسامة):بسلامة