فَتَاةُ البَادِيَّة وَ المَفْيُوزِي المُتَمَلِّكْ(بالدارجة المغربية )

الجزء 57

عند إيجا لي غارقة وسط بيتها لعشية كاملة وهي كتوجد راسها  وهادشي كامل غير على قبل عراضة للعشاء ولكن ضروري تكلف راسها كتر من اللازم و ميمكنش تخرج بلاما تكون مثالية من جميع النواحي لأنه أكتر حاجة كتكرهها هي شي نهار تخرج على گاع معاييرها لي حطاتهم لراسها هادي 4 سنين ومستحيل تسمح لراسها انها تكون ناقصة ...
إيجا باروخ هادي ..لي مبقات كتسمح لحتى حد يشوف النقص لي فيها ..فراغ كبير لداخل كتحاول تغطي عليه ب أنها تكون مثالية وكاملة مكمولة من برا،ستنفدات قوة كبيرة من داخلها كتظاهر بيها قدام الناس وقدام نفسها .. باش متعاودش طيح فلأخطاء ديال شحال هادي ..الطيف ديال إيجا لقديمة مسحاتو من حياتها شحال هادي لأنه مان جايب ليها غير الألم والضعف .. مبقاتش كتسمح لراسها لأنها تنزل دمعة وحدة من عينيها او انها تحس براسها ضعيفة قدام شي حد ...جوزيف عانى معاها بزاف باش وصلها لهاد الدرجة ..لاهو لا بلقيس عاناو فلعام لأول بعد ما ستاقرات حياتهم...وبصعوبة كبيرة باش جوزيف قدر يبدلها لإنسانة أخرى تليق بإسم باروخ.
ناضت من فوق الناموسية بعدما شافت فالساعة بانت ليها التسعة ونص ديال الليل ..حيدات لماسك لي على وجهها ودخلات غسلات وجهها ..وقفات قدام لمرايا لي عندها فلبيت كتمسح وجهها..فاللحظة لي بدات تقاد ل ميكاپ ديالها ..لمحات وجهها لي شحال ما شافتو على طبيعتو ،طبيعتها لي هي أصلا نساتها وكتحاول تناساها...محات دوك الأفكار لي كيجيو لراسها و رجعات كتكمل ..دارت ميكاپ خفيف كيبان طبيعي ودافئ ..مشات لجيهة الدريسينغ بانت ليها ديك لكسيوة لي ختارت معاها هاجر..كان عبارة على كسيوة حمرة سامپل ،هابطة من جيهة لكتاف وجايا لاصقة على طايتها حتى لجيهة ركيباتها ..دارت عقد ماسي لي كان كادو من جوزيف ليها ..خلى عنقها يتبرز  بطريقة مثيرة  خصوصا مع وشم صغير جيهة صدرها من لفوق لي كان على شكل طائر عنقاء صغيور ..و عاد طلقات شعرها على راحتو لي كانو خصلاتو كانو خصلاتو ف لون قهوي مفتووح كأنه قريب للذهبي ..لبسات صنيديلة عالية لي كانت فلأسود وسميطاتها شفافين خلاو رجيلاتها يتبرزو أكتر ..بعدما سالات وقفات قدام لمرايا...بانت ليها شي حاجة ناقصة...جبدات عكر من صاكها..كان حمرر ..ضربات تعكيرة ديال لقلب ..
إيجا(غمزات راسها فلمرايا):وا دابا مزيان كملات لباهية...(رشات لپارفان ديالها بطريقة خفيفة و هزات صاك صغير ف يديها و خرجات من لغرفة ديالها...هبطات لتحت كتلقى الدنيا خاوية ...حتى كتسمع لهضرة جيهة الصالون لي كيطل على الجردة ..طلات عليهم كتبان ليها بلقيس گالسة مع جوزيف لتحت فالصالون و مسرحة رجليها عليه كيتفرجو و كتاكل گاطو ديال الشوكولا
جوزيف:ماشي كتمشي ل لاصال هاد الأيام راه غير كضيعي داك الحهد كامل فهاد لگاطو لي كتاكلي..
بلقيس:سكت شكتفهم نتى..راني كنكافئ راسي بهادشي
جوزيف(شاف فيها ب إستغراب):شنو هاد لمنطق ا بلقيس
بلقيس:من لأحسن بلاما تفهم غادي غير يضرك راسك ..
إيجا(دخلات عليهم):ويلي ا ماما واش من نيتك
بلقيس:جيتي نتي ..فين كنتي لي عاد داخلة
إيجا(شافت فيها وهي كضحك):كنت فلبيت..لفوق
بلقيس:هي گولي عاد خارجة..ا لفين غادة ا بنتي بهاد التزويقة كاملة..
إيجا:لا والو ا ماما غير خارجة نتعشى
بلقيس:خارجة تعشاااي..حتى نكون مكنعرفكش..هاد التقاديد كامل ماشي غير على لخاوي
إيجا(غمزاتها):بيان سييغ..
جوزيف(كيشوف فيها ب إعجاب وكياكل من لگاطو ديال بلقيس):وشكون هاد سعيد الحظ لي خارجة معاه بنتي ..سعداتو بعداا خاص يكون ليه الشرف انه إيجا باروخ خارجة معاه..
بلقيس(ضرباتو ليدو):حطوو ياك گلتي ما ممزيانش ..شفتك عجبك دابا
إيجا(كتعوج وعاجبها راسها قدامهم):بيان السيغ عندو الشرف...هاد الزين كامل ميلقاهش واخا يقلب عليه ب تيليسكوپ
بلقيس(كضحك عليها):لا لا تبارك الله راني والدة الزين (كتمعني على راسها) ولاطاي ولعقل ..لا والله ايلا ولدت وعرفت اش ولدت
جوزيف:ومالكي ياكما يصحابليك غير بحدك ..راه حتى انا كاين فهادشي ا لالة
بلقيس(ضحكات ب استخفاف):هييه عطيتيها عينيك صافي ،وجبدتي لينا بيهم غير الصداع ..
جوزيف:وا لمهم عطيت..
بلقيس(كتشوف ف إيجا ب إعجاب):ضوري ضوري نشوف كيف جات من لور
إيجا:بلاتي انا نتمشى قدامك
بلقيس(كتشوف فيها كتمشى):تبارك الله تبارك الله ..و خيرات هادي، خاصك دابا تبداي تملكي و تحفظي ..(غمزات جوزيف) اولا!!
جوزيف(مع اخر كلمة نطقات بيها بلقيس..تفرگع بالضحك)
إيجا(كضحك وجهها وحمرر):مامااا
بلقيس:هاي هاي على لبنت كتحشم..ولاباس لاباس باقا تحشمي شوية..
إيجا:وا باابا هضر معااها
جوزيف:بلقيس وا نقصي على لبنت شوية..
بلقيس:وا غير كنشوف شنو فيها ياء ..
إيجا:لمهم انا غادا..
بلقيس:اجي بعدا نتي لهناا ..
إيجا:ا شنووو
بلقيس:معامن خارجة مگلتيش ليا
إيجا:موملفالكش كتسوليني فين خارجة
بلقيس:لالا دابا خاصني نعرف حيت ضرني راسي لمن هاد التزويقة كاملة..
إيجا(كتقاد فشعرها):احم..لا خارجة غير مع هارون .غير ديك لمرة كنت عرضت عليه للعشا و دابا كيردها لياا
بلقيس:ممم كترضي ليه لعراضة...واخا ا لالة مزيان ردي الدين لي عليك..راه مامزيانش يبقى عليك
جوزيف:ههه غير سيري راه هادي مغاديش تسالي لا تبعتيها...ايلا حتاجيتي شي گارد ديه معاك ..
إيجا:لالا صافي ماشي مشكل راه اصلا غادي يجيبني هارون..
جوزيف(هز ليها يديها باسها من لداخل):يالاه سيري قبل ما تعطلي ..وبشوية عليك فالطريق راني عارف داك الصوگان ديالك.
إيجا(غمزاتو ):كوووون هااااانيي
بلقيس:ممم تيقنااك (بقات حاضية إيجا حتى مشات ..شافت جوزيف خدا ليها لگاطو)گوتليك حط ليا حلوتي
جوزيف:ممم اينا حلوة فيهم...لحلوة لخرى شفتك مكتگوليش ليا حطها
بلقيس:اوا هاديك...اما هادي لا
##نمشيو لجيهة إيحا لي خارجة من لقصر ..هزات لوطو بعدما عطاها ليها لگارد حيت كانو كيغسلوها..خرجات طايرة فالطريق وفارعة لوطو بديك الموسيقى ..وكتمايل معاها كأنها دايرة زدحة عندها لداخل ...وصلات حتى لريسطو و فرانات فلپاركينغ ،ماشي حتى كيف ناس ..حاطة لوطو ديالها بلعرض ..خرجات من لوطو كتمايل بخصرها..وعاجبها راسها كل مرة كتقاد فشعرها...حتى سمعات شي حد كيهضر من لور وغادي بلوطو ديالو
:لأخت..راه لپاركينغ ماشي غير ديالك بحدك
إيجا(كملات طريقها ومموسوقاش ..ماشافتش حتى لجيهتو):موجود لبلايص تقدر تقلب على شي بلاصة أخرى..لپاركينغ يجريو فيه لخيل..
(بنبرة إستهزاء):واخاا..(رجع وفراناا حتى هو وحط لوطو قدام ديالها باش تسد عليها الطريق فاش تبغي تحركها)حتى حنى كنعرفو الضد ماشي غير نتي
إيجا(جات عندو و طالعة ليها لقردة):ايه نتاا راه كنهضر معاك..واش حمق ولا مالك..
(خرج لعندها معصب):نتي راك كتقلبي علليااا
إيجا(بصدمة):سهيييل!!!
سهيل(حتى هو كيشوف مصدوم):إيجا..هادي نتييي ،معرفتكش
إيجا:حتى انا معرفتكش..شنو كدير هنااا
سهيل(مزال الصدمة سارية عليه):نتي لي شنو كديري هناا
إيجا:اناا كيفما خليتيني..ما مشيت فين راك عارف.. نتا لي من نهار مشيتي لإيطاليا معاودتي سولتي كانت گالت ليا هاجر راك دخلتي ولكن كنت كنتسنى حتى لنهار لعرس ونشوفك ..(غمزاتو)مبروك بعدا جاك لفرج وغادي تهنى من يوسف
سهيل(كيضحك ):هههه وياه هانتي تشوفي على سلامتي
هارون:إيجا ..وصلتي
إيجا(ضارت عندو):اه قبيلة..شوف شكون تلاقيت ا هارون
هارون(هز حاجبو):سهيل..عاش من شافك..غبرتو..احم غبرتي
سهيل(ضحك بإستهزاء ):واييه غبرناا..مكاين غير لي كيغبر ..
هارون:ندخلو ا حبيبة
إيجا:اوكي..(شافت ف سهيل) نتلاقاو فلعرس..ولا قبل گاع فاش تجي هاجر
سهيل(كيشوف ف هارون كيف حاط يديه على خصر إيجا..شاف فيها ب إبتسامة):ضروري نرجعو نتجمعو ..إنشاء الله ..يالاه نخليكم بصحتكم عندي عشاء عمل وراني معطل
إيجا(ضحكات معاه):واخا ا سيدي بالصحة..غير هو لوطو كيف غادي ندير ليها
سهيل:هههه حتى نخرج ونحيدها
هارون(بقى حاضيه حتى مشى):ايمتا رجع هادا
إيجا:غير سيمانة تقريبا ..مزال هاجر غادي ترجع يا غدا يا بعدو
هارون(بنصف ابتسامة):بان ليا كلشي راجع للمغرب
إيجا:ههه واييه هادشي لي حتى انا بان ليا..ويالاه ندخلو راه قتلتي غير جوع ..
هارون(شاف فيها ورجع كيضحك):هاد لكرش عندك مكتصبررش
إيجا:وا من الصباح واناا كنتقاد حتى لماكلة ما كليتها..مكتقدروش الفن خسارة
هارون:الله يا ودي ..هادشي كامل لي واقف قدامي و منقدروش ..غادي نكون حمار
إيجا(ضرباتو لصدرو):هههههه وا هانتاا كان يصحاب ليا مكتعرفش تعنب
هارون:ااح راني كنعررف غير صابر..
إيجا :وا هارون يالاه ندخلو جاني الجوع بزاف
هارون(جرها من يديها داخل بيها ):واخا هي الأولى
إيجا:ممم صحاب ليك معقتش بيك قبيلة
هارون(كيطنز عليها):علاش
إيجا:ديك حبيبة لي قلتي قدام سهيل ..بانت لياا فششيي شكل درتيها بلعاني ياك
هارون(هز كتافو):لاا ..انا بانت ليا عادي ..
إيجا(بدات كتلون غير بحدها):احم..ههه حيت مكتگالش لبنت خالك هاد حبيبة ..هادشي لي قصدت
هارون(عرفها لاش كتلمح):ايوا هاهي من ليوم غادي تولي عادي (غمزها)صافي ا حبيبة
إيجا(حلات عينيها على جهدهم):مكتحشمششش
هارون(هز ليها يديها وباسهم ):زيدي راه جوع بدا كيأثر ليك على لمخ
#دخلو للريسطو وهو مزال شاد ليها ف يديها وهي من موراه...كانو كيشكلو منظر زوين خلى كلشي يشوف فجيهتهم ..خصوصا انه معروفة نوع علاقتهم العائلية ..لكن مكانتش ليهم على لبال ...إيجا بقوة ما شحال هادي نا شد ليها شي واحد ف يديها ،بدات كتعرق وتنشف غير بحدها..إحساس غريب نتابها وهي شادة فيدو ..كأنه إحساس فايت دايز عليها من قبل لكن كتحاول تناساه ..وصلو لبلاصة معزولة فالريسطو وبالظبط حدا سهيل لي كان باين انه ف إجتماع عمل ،جر ليها لكرسي باش تگلس عاد مشى گلس هو من الجيهة لأخرى..
هارون(كيشوف فلمينيو):شنو بغيتي تاكلي
إيجا:معرفتش..مي كنضن فحال ديما
هارون:هههه مطلعش ليك فراسك هاد ستيك ديال لحم
إيجا:ههه وا هوما كيديروه بنين
هارون:ههه واخاا ،حتى انا ناخد فحالك..
إيجا:لالة متاخدش فحالي..خود حاجة أخرى باش دوقني
هارون(عيا ميصبر و طلق ضحكتو فلأخر):هاد شوية لعقل لي عندي ..شي نهار غادي يمشي ب سبابك..
إيجا:هي دابا اناا حمقة ياك
هارون(هز ليها يديه باسها):لاا حاشاا انا لي حمق ..گاليا جوزيف غادي تجي ديري سطاج عندو..ايمتا ناوية
إيجا:معرفتش الصراحة .مزال ما مستاعداش الصراحة
هارون:علاش ما مستعداش ..بلعكس كان غادي يجي النهار لي ضروري غادي ترأسي الشركة..ومكاينش حسن من هاد لوقت ..كنظن انك مستعدة  خاصك غير تجي للشركة وتولفيها شوية ويكون خير
إيجا:ههه فراسك..مكنتش نعرف شنو ندير بلا بيك..من ديما كترجع اي حاجة كيفما كانت كبيرة كتخليها صغيرة..وداك لخوف ديالي كامل كيمشي فحال ايلا عمرو كان ..وحتى دابا خليتي گاع لخوف لي فياا يتسرب ومنبقاش حاسة بيه..عنداك غير شي نهار تمشي وتخليني هنا بحدي
هارون:ما حدك كاينة هناا .مغادي نمشي فين..وراك وراك والزمن طويل
##ف إيطاليا و بالظبط عند يوسف فلڤيلا ديالو..دخل ب لوطو ديالو جاي عيان من التدريب ولكن فنفس لوقت فرحان حيت فأقرب وقت غادي يرجع للمغرب و يستاقر هو وختو  واخا هي غادي تزوج..دخل لقى زيدان گالس فالصالون وشاد قدامو پيسي ديالو وغارق فلخدمك
يوسف:صحابلي مشيتي
زيدان:لا مزال..
يوسف(كيشوف فيه مفاهم والو)
زيدان(كيخدم و كيهضر):مالنا شكاين تاني ..
يوسف:فين كنتي ..عامين اصحبي ما هزيتي حتى تيلي  تسول ..گاع لميساجات ديالي كنتي كتقراهم و مكتجاوبش
زيدان(بصوت غليض  وقاصح):كنت محتاج نرتاح
يوسف:انا عارف الراحة ديالك كيف دايرة..كتقتل لي جا قدامك باش تبرد داكشي لي فداخلك
زيدان:ومنين عارف لاش كتسولني
يوسف:حيت داكشي مغاديش يبرد وعمرو غادي يبرد شحال ما حاولتي ..
زيدان:يوسف ..سكتنا ا صحبي راه ما باغيش نغلط فيك
يوسف:واخا ا سيدي هاهو ساكت(مع سكت مع صونا ليه سهيل) شكتگول ا صاحبي ..مفهمتش شنو غادي نشوف...شنو صيفطتي فواتساب!! واخا انا داخل نشوف
زيدان:مالو هادا تاني
يوسف(كيقلب ف تيلي يشوف شنو سيفط ليه):مال هادا تاني..(مع حل لكونڤ ديالو هو وسهيل حتى كتبان ليه تصويرة مكتوب فيها "شوف شكون هنا" ..بالزربة حط تيلي ف جيبو باش ميشوفوش زيدان
زيدان(مد ليه يديه ):ارى داك تيلي
يوسف:علاش !
زيدان(زير على فكو وكيهضر بنبرة خلعات حتى يوسف):هدرت ا يوسف ..ارى داك تيلي ولا مغادي يعجبك حال
يوسف(بدون تردد عطاه تيلي ):اناا ماشي مسؤول على داكشي لي غادي تشوف
زيدان(جبد لفوطو و بقى مدة وهو كيحقق فيها)
يوسف(ملاحظ كيف ملامحو تبدلو ،كأنه النار لي شاعلة فيه من لداخل واضحة قدامو رغم انه كيحاول يبان بارد خصوصا انه الصورة فيها إيجا و هارون فوضعية كيبانو فيها قراب وهي فرحانة وكتضحك)
زيدان(مد ليه تيلي)
يوسف(خداه من عندو):زيدان
زيدان(شاف فيه ):ايمتا غادي ترجعو
يوسف:زيدان ..ايلا كنتي باغي غير ترجع على قبلها بلاش ا صحبي ..راه ربع سنين فاتت دابا
زيدان(زير على يدو):شكون گاليك انا راجع على قبلها..انا راجع للمغرب عندي خدمة حابسة تماا..
يوسف(تنفس نوعا ما):واخاا