فَتَاةُ البَادِيَّة وَ المَفْيُوزِي المُتَمَلِّكْ(بالدارجة المغربية )

الجزء 51

⚜️فتاة البادية و المفيوزي المتملك⚜️
⚜️الجزء الواحد والخمسون⚜️

❤️‍🔥بدونك اشعر و كأنني اصبحت خريطة بدون إتجاه❤️‍🔥

فوق منحدر صخري كيطل على لبحر ف منطقة بعيدة على لمدينة ..كان واقف بلوطو ديالو وهو لداخل ناعس..كلو عرقان ،وجهو شاحب وعينيه كيبان فيهم لعيا .. حل عينيه ب صعوبة , ماعاقلش ايمتا داه النعاس ..
حل لباب و خرج مقادرش يشد التوازن ديالو ..
طلع عينيه ف السما كيبان ليه الضو و الشمس قريب تشرق ...وقف وهو كيشوف فالبحر و عقلو كيفكر فيها غير هي ...مقادرش يتخيل راسو انه يقدر يبعد عليها و لو لثانية مجرد التفكير كيخلي عقلو يخرج  ،ولكن فنفس لوقت ما قادرش يبقى لأنه أذاآها ب ما يكفي ...غمض عينيه وهو ما قادرش ينسى عينيها لي كان فيهم لخوف ،صوتها وهي كترجاه باقي ف وذنيه ...
رجع ب لور وحط ب جسمو على لوطو ..مغمض عينو لي كانو حمرين كيف الجمر ..كيشوف ف صورتها لي بين عينيه وهي كضحك و كتاكل لگلاص لي كيقاد ليها كل صباح ،نطق ب نبرة فيها ضعف ،حسرة ،ندم و كذالك نبرة عزم "مبروك عليك حياتك الجديدة ا عمري "
خرجو من وسط أفكارو تيلي وهو كيصوني ...تمشى ل جيهة لوطو و هزو..كان رقم ما مسجلش عندو ..حط تيلي على وذنيه بدون ما ينطق ب حتى حرف ..كيسمع صوت أنفاس صغيرة ..كيتخللهم صوت ألة كتقيس نبضات القلب
زيدان(عض شفايفو وهو كيسمع ف أنفاسها لي كانو غير منتاظمين ..كيحس ب كيانو مهزوز غير من صوت أنفاسها لي تغلغلو ف وذنيه)
إيجا(كانت گالسة فوق ناموسيتها و كتهضر ب تيلي ديال المستشفى..تنفسات ب عمق و نطقات ب صوت خافت باين عليه لعيا و نوعا ما طفولي ):علاش ما جيتيش عندي..أنا تسنيتك لبارح
زيدان(حط راسو على لفولون ونطق ب صعوبة ):بغيتيني نجي
إيجا(ميلات راسها ):مم ..أاه
زيدان(بتاسم من جوابها ):واخا
إيجا:غادي تجي ياك !
زيدان(بتاسم على طفولتيها ):سدي عينيك و حليها غادي تلقايني عندك
إيجا(بتاسمات ب حماس ب سرعة ختافات ابتسامتها وهي كتشوف ف لبيت لي هي فيه):ولكن ..انا معرفتش فين اناا
زيدان(غمض عينيه وعلى وجهو ضحيكة ..نطق بلا ما يفكر ):و لو تكوني ف أخر الدنيا نلقاك ا حبيبي ....(قبل ما يكمل هدرتو طفا ليه تيلي ..)ما لقيتي طفا غير دابا
# عند ايجا و بالظبط فالمستشفى ...كانت گالسة فوق فراشها و كتطل من الشرجم لي حداها ..كانت يالاه كتشرق الشمس و الريح ديال الصباح كيفتح النفس ...شافت ف تيلي لمدة طويلة وهي كتسناه يعاود يصوني ليها
إيجا (شافت ف هاجر لي گالسة قدامها  وهي يائسة   ):واقيلة ما غاديش يجي ...
هاجر(كتحاول دير ليها لخاطر،رغم انها ما متافقاش مع هادشي لي كادير ):غادي يجي ..اصلا غادي نستغرب كتر ايلا ماجاش ..
إيجا(كتحاول تهبط من فراشها):اووف ..أيي ،هاجر
هاجر(مشات كتجري لعندها):بقاي بلاصتك ا صحبتي راك مزال مريضة..ايلا بغيتي شي حاجة انا نجيبها ليك
إيجا(كتحرك راسها ب لا):بغيت غير نتمشى ..عييت هناا...
هاجر:راك مزال مريضة ..خلي حتى الجرح يبرى
إيجا(ب إستغراب ):إينا جرح...(رجعات ذاكرتها للور) شنو وقع لبارح ،ما عقلت على والو..علاش جبتوني ل هنا..(شدات ف كرشها) ما عرفتش علاش كضرني هناا
هاجر(تلفات و معارفاش شنو تگول ليها..):أ أ ممم ..حيت جاك تسمم ..داكشي علاش جيتي هناا...
إيجا(شافت فيها وهي حاسة بشي حاجة على غير العادة ..بسرعة تقطعو افكارها فور ما تحل لباب...طلعات عينيها لجهة لباب سرعان ما بان فيهم بريق كيلمع وهي كتشوفو قدامها ،حاسة ب قلبها باغي يخرج من صدرها ..إحساس غريب كأنه كان غايب عليها لمدة طويلة ..)
زيدان(كيقرب منها وهو مشتاق لكل جزء منها.. عينيها ، ريحتها، ضحكتها ، تنفسها لي كيولي غير منتظم وقتما كيقرب ليها ...وقف قدامها وهو غارق ف عينيها ...مد يدو كيتحسس ملمس وجهها ،حط  جبهتو على جبهتها لي كانت صغيرة بزاف مقارنة معاه وهو كيشوف ب عمق ف عينيها لي كان من تحتهم زرق ،باين فيهم تعب كبيير ،الضوء لي كان فيهم طفى ..بتاسم ف داخلو وهو غير كيزيد يتأكد انه بعادو عليها هو احسن قرار خداه..
إيجا(حطات يديها على يديه لي كيتحسسو وجهها وهي كتشوف ف ملامحو لي مبدلين ،من لقوة للضعف ..كأنه شخص اخر واقف قدامها ،ماشي زيدان لي عرفاتو فلأول ):كان كيصحابلي ماغاديش تجي..
زيدان(قربها منو و طبع بوسة خفيفة على راسها):منقدرش ما نجيش..
إيجا(مدات يديها وهي كتقيس ف صدرو و بالظبط فوق لجرح ):تضربتي هنا ..
زيدان(رجع ليها شعرها من مور وذنيها و على محياه إبتسامة ):ما تخافيش ..ما كنحسش بيها
إيجا(عوجات فمها  ونطقات ب عفوية بدون ما تحس ):حاجة عادية..اصلا نتاا مولف بهادشي...
زيدان(ضحك حتى تغمضو عينيه):شنو لي مولف
إيجا:مم زعماا مولف هادشي احم ...هادشي لي گالت ليا خولة
زيدان(طلع حاجبو ):شكون هاد خولة..
إيجا: بنت خالتي ...(حطات يديها على كرشها وهي حاسة ب لحريق  )
زيدان(حط يديه على خصرها وهو كاره داك الألم لي كتحس بيه ):كيضرك هناا
إيجا(حركات راسها ب أه ..):أي كيضرني بزااف
زيدان(هزها بين يديه و داها لفوق لفوتاي بالظبط فين گالسة هاجر ،لي غير كتشوف فيهم ما فاهمة والو ..قاد ليها بلاصتها ):ما تحركيش بزاف ،مزال لجرح جديد
إيجا:غير تسمم وصافي ماشي جرح
هاجر( فضلات تخليهم بحدهم ،خرجات ب هدوء من حداهم بدون ما يلاحظوها )
زيدان(زاد تأكد انها ما عارفة والو على لحمل ديالها..هز مخيدات صغار قادهم ليها مور ضهرها باش تجلس ف خاطرها...شاف فيها مطولا كأنه كيزيد يرسخ ملامحها ف ذاكرتو كتر ماهوهااا محفورين ف راسو)
إيجا(كتحرك ف عينيها ،كتفادى تشوف فيه و فنفس الوقت كتلعب ب صباعها و كل مرة كتعض ف شفايفها)
زيدان(بتاسم ف داخلو وهو ملاحظ ارتباكها ،نطق بدون ما يحس و هو غارق ف بحر عينيها):فين غادي نزيد نغرق و انا وصلت للقاع
إيجا(ف لوقت لي هي كتحاول تفهم هدرتو تحل لباب ..طلعات عينيها كتلقى بلقيس و موراها جوزيف ):ي ..يما
بلقيس (شافت ف زيدان ):شنو واقع شنو كدير هنااا
جوزيف(شاف ف زيدان لي عينيه ما حيدوش على إيجا ..):اش جابك على الصباح ..
زيدان( دوز يديه على ذقنو و على وجهو ضحكة ساخرة):نتا عارف مزيان شنو لي جابني هنااا...
بلقيس(تمشات لجيهة إيجا وعلى وجهها ملامح حادين لي ختافاو فور ما وقفات حداها):كليتي شي حاجة ولا باقي..
إيجا(حركات راسها ب لا  وهي متوترة من الموقف لي تحطات فيه)
جوزيف(حاط يدو ف جيابو و واقف وقفة رجولية وعينيه مباشرة على زيدان ...نطق وهو مزال  كيشوف فيه):بلقيس...هبطي إيجا للتحت
إيجا(شافت ف بلقيس و رافضة انها تمشي معاها  )
زيدان (وقف وتمشى لجيهة لباب وجه كلامو لجوزيف و كمل طريقو  ):انا كنتسناك لتحت ..(ضار لجيهتها وهو كيشوف أخر شوفة فيها قبل ما يتسد لباب ويلقى غير الفراغ قدامو)
إيجا(غمضات عينيها فور ما تسد لباب وف داخلها شي حاجة كتمنى انه يشدها من يديها ويبقى معاهاا ...وخا حاسة براسها كأنها اخر مرة تشوفو )
جوزيف(قرب منها ويديه كيقادو ليها ف شعرها ..وهو قادر يقرا لي بين عينيها ب سهولة...طبع قبلة خفيفة على راسها وعلى وجهو شبه ابتسامة ):الأميرة ديالي ..هادشي كولو قريب تنسايه ،ماغادي يبقى منو والو
بلقيس(طمناتو ب عينيها ):اجي ا بنتي  كولي شي حاجة باش تاخدي الدوا ديالك ..