فَتَاةُ البَادِيَّة وَ المَفْيُوزِي المُتَمَلِّكْ(بالدارجة المغربية )

الجزء59

عند إيجا(لي يالاه وصلات للقصر ..داخلة بلوطو ديالها مكسيرية جايبة معاها هاجر ومخليين جهاد مشات مع يوسف ...):دخلي دغيا راه ماما من قبيلة وهي كتسنى فيك
هاجر(خارجة دايخة):الله يا ختي مالكي على هاد الصوگان.. عرفتي شحال من مرة شهدت
إيجا:هههه وا متزيديش فيه
هاجر:نتي لي ركب معاك غادي يمشي شهيد ..نقصي شوية ا صحبتي راه صوگانك خايب
إيجا:ههه واخا إنشاء الله ..
هاجر:نتي بعدا مالكي جايباني هنا..حتى حوايجي كاملين بقاو عند يوسف فلوطو..
إيجا(عنقاتها):غادي تبقاي معايا ليوم..حتى لغدا وسيري لا بغيتي
هاجر(دخلات كتجري):هي لوللللة بغيتيني حتى نسكن معاك معنديش ذرة مشكل..فين هي خالتي بعدااا
إيجا:هههه نيت باش سهيل يجي يهجم علياا هناا
هاجر:ممم حگااا ..شنو ديك حبيبة وداك لبوسان فليدين  نتي وهارون..عاود لياا سهيل كلشي فاش شافكم بزوج .. هادشي مفخباريش مگلتي ليا والو
بلقيس(جات من لور):حتى اناا بنت لهم ما گالت لياا والو...
إيجا(ضارت مخلوعة):بسم الله رحمان الرحيم...منين خرجتي نتييي
بلقيس:بلاتي مزال غادي نشدك نتي..(ضارت عند هاجر) بنتيي
هاجر(ترمات عليها معنقاهاا):خالتيي ..لباس عليك توحشتك
بلقيس(معنقاهاا وكتبوس فيه):ا حياني عليك الجنية حتى نتي كتر منها ما بقيتي گاع تسولي فياا من ديك لمرة .داك علينا الزواج ..غا دقتي لحلوة ما بقيتيش تفكرتيناا گاع
هاجر(تفرگعات بالضحك):الله ا خالتو اش هاد لباطل ..مزال راني على باب الله
إيجا:ههههه ناري هاهي بدات تاني ..
بلقيس(جبدات ليها حناكها وباستها):دخلي راه لعشا موجود من قبيلة وحنى كنتسناو فيك ..ماجاش معاك خوك
هاجر:لا راه غادي يمشي نيشان للدار..حتى لغدا ونوصل عليه
إيجا:مكاينش بابا ..ماشي من عوايدو ميمونش فهاد لوقيتة
بلقيس:لا مكاينش ..فاش رجعت من لاصال ما شفتوش ..غادي يكون غير مزير مع لخدمة ولا عندو شي حاجة شاغلاه..گلسو تعشاو بينما جا
إيجا(مشات لصقات على هاجر فلكرسي):گولي لي بعدا..فين غادي ديرو لعرس ..واش فلڤيلا عند يوسف!!
هاجر(بدات فلماكلة):داكشي لي كنت گلت ليهم حتى اناا ..ولكن  سهيل بغى يديرو عندو فلأوطيل لي جا على لبحر حيت غادي يعرض على الناس بزاف ..انا اصلا معرفتش شكون هوما.....لمهم يدير لي بغى انا عندي فحال فحال
بلقيس(حتى هي گالسة حداهم):ما كيهمش هادشي كيبقى غير رمزي .لمهم هو تكوني نتي مرتاحة معاه وباغاه ..لباقي غير تانويات ..واخا راه مسكين ربع سنين وهو صابر على هبال يوسف
هاجر:ههه يوسف خويا راه لدابا ومكرهنيش منتزوجش گاع
بلقيس:هههه يوسف انا لي فاهماه ..راه مساخيش بيك مسكين وولفك حداه  راه ماشي ساهل يشبع منك فربع سنين ونتوما خمستاش لعام مفارقين
هاجر:عهه عارفة  اخالتي حتى انا شادة ليه لخاطر
بلقيس:ايمتا بعدا غادي يكون لعرس
هاجر:نهار السبت فليل
بلقيس:قريب بزاف ..
هاجر:لا بلعكس ..انا اصلا واجدة و سهيل هبط قبل مني وجد كلشي .
بلقيس:ايوا الله يكمل عليكم بلخير ا بنتي
إيجا:مم و شهر لعسل فين غادي دوزوه..
بلقيس:هههه سوقك..حتى تزوجي وشوفي فين غادي دوزيه
إيجا:ناري ا ماما بلا متبداي تاني
بلقيس:دابا واش انا گلت شي حاجة عيب
هاجر:ههه لا بلعكس ا خالتي ما گلتي عيب (غمزاتها) اصلا خاصها غير هي تجمع راسها راه كلشي قدامها
بلقيس:حتى هو ههه بان ليا مزال متردد
إيجا(هدرات بدون ما تحس ):اه متردد حيت عارف عليا كلشي ..وواخا تكون شي حاجة عمرو غادي ينسى راني كنت قحبة ديال زيدان لمالكي ودار فيا ما بغى ورماني فحال ايلا عمري كنت ..مكاينش شي راجل غادي يرضاها لراسو
بلقيس(خبطات ب يديها فالطبلة معصبة من هدرتها):اخر مرة نسمعك كتگولي هكاا..وايلا غادي تشوفي وجه مني عمرك شفتيه
إيجا(ببرود):علاش مالي كذبت..
بلقيس(ناضت لعندها معصبة):شنو طاري ..لاش تفكرتيه ليوم ،ياكماا شفتيه!!ما عمري سمعتك ذكرتي سميتو حتى لليوم ..شنو واقع تكلمي
إيجا(كتحاول تهرب وتطلع لبيتها):لا ما شفتوش ..وما باغاش نشوفو
هاجر(بانت ليها بلقيس جاعرة بلمعقول):خالتي تهدني شوية
بلقيس:شغادي نتهدن مكتسمعيهاش شنو كتگول..
إيجا(بدون احساس رفعات صوتها):مالييي كذبت...شكون غادي يقبل على وحدة مغتاصبة
بلقيس(بدون ما تحس ..نزلات عليها بصقلة بكل جهدها ..وكتهضر وهي كتغوت):لاش كتگولي هكاا..لااش..علاش ماباغاش تنساي ..ربع سنين ا إيجاا ربع سنين ما يجمعها غير لفم...واش باغاا تعاودي كلشي من الزيرو.واش حماقيتي ولا مالكييي ..اش فكرك فيييه ،هو ناسيك وعايش حياتو معارفك حتى واش نتي حية ولا ميتة ..علاش متعيشيشي حياتك ونسايه فحال ايلا عمرو كان  (حابساها هاجر باش تهدن وهي مزال باغا تمشي ليها) اش فكرك فييه شنو طراااا ...اش طاري..شفتييه يااك..فين!!
إيجا(طاحت للأرض ،كتنفس بالجهد وعينيها مجمعين فيهم الدموع):اناا شفتهاا ا يماا ليوم..شفتهاا
بلقيس(منين سمعات "يماا"عرفات شي حاجة ماشي حتى لهيه...هبطات على ركابيها وكتحاول تفهم):شنو شفتي ..هضري شكون هي
إيجا:رينااد ا يماا .ريناد..(بدون شعور بداو دموعها كينزلو وكتعاود بطريقة كأنها كتخنق)يمااا اناا فاش شفتها..معرفتش شنو طرا لياا..مقديتش نتنفس ..اناا ايماا منقدرش نشوف شي واحد يفكرني فيه..(كتمسح دموعها وكتهضر) عرفتي ا يماا فاش شفتها ..ضارت بياا الدنياا ..(طلعات فيها عينيها وكلهم دموع) انا خايفة نشوفو ا يماا ،خايفة يرججعع ونولي نشوفو كل نهار ،منقدرش
بلقيس(رجليها ما بقاوش هازينهاا ...گلسات فوق لكرسي كتحاول تدخل النفس لداخلها ):اه..ونتي غادي تخليه بهاد السهولة يأثر عليك! وهاهو حتى ايلا رجع..كلشي فات دابا ،نتي عندك حياتك جديدة..ومابقى والو وغادي ترأسي مجموعة شركات باروخ..واش كتشوفي راسك نتي هي ديك لبنت لي كانت عندها واحد وعشرين عام.متنسايش راك قتلتي إيجا ديال شحال هادي ومستحيل تعاود تحيا..متجيش لحظة ضعف تنسيك فگاع لي بنيتيه
هاجر(شدات ليها فيديها):اه بصح..خالتي عندها الصح فهادشي لي كتگول..خاصك تكوني قوية كيفماا عرفناك..متخليش شي حاجة تزعزع ليك قوتك،ولا تهدم گاع لي خدمتي عليه..
جوزيف(داخل ومفاهم والو):هاجر ..على سلامتك ا بنتي ايمتا وصلتي (شاف فيهم كيبان كأنه شي حاجة واقعة)شنو واقع !
إيجا(ناضت من لأرض وتمات طالعة وحادرة راسها):اناا غادي نطلع نرتاح.
جوزيف(شاف فبلقيس):مالها ..شهاد لحالة هي فيها
بلقيس:هاجر بنتي عافاك طلعي معاها
هاجر(بالزربة ناضت تابعاها)
جوزيف:شواقع ...هضريي ؟
بلقيس(خاطة يديها على رجليها ومزيرة):بنتك
جوزيف:مالهاا هضري
بلقيس:تلاقات ب ريناد ليوم
جوزيف :ومن بعد !
بلقيس:گولها ليها ..راه منين شافتها رجعات ليها حالتهاا
جوزيف:انا غدا غادي نتكلم معاها .بلا متبرزطي راسك معاها
بلقيس(شافت فيه مطولا):غادي يرجع ياك ..عنداك ا جوزيف تعرف شي حاجة على موضوع لحمل
جوزيف:ايلا رجع مغاديش نحن  فيه خصوصا ايلا قرب ليها ..وحتى هي خاصها تنسى عليها لي فات ..ماشي بنت جوزيف لي تخاف من شي حد كيفما كان ،خاصها تولف ومتبقاش تخاف
بلقيس(كتهضر بصوت باكي):معرفتش مالها ا جوزيف...حالتها ليوم معجباتنيش
جوزيف(كيحاول يبقى صارم كيف عادتو):عادي غادي يدوز لوقت وتنسى..وحتى نتي متبرزطيش راسك معاها ،غدا فالصباح غادي نهضر معاها
بلقيس:انشاء الله
##لفوق وبالظبط فلبيت عند إيجا فلبيت ..هاجر واقفة قدام باب ديال لحمام كتسنى فيها تخرج..مدة طويلة وهي لداخل وحتى هاجر مابرزطاتهاش وخلاتها حتى تولي بخير وتخرج على خاطرها
إيجا(حلات لباب لقات هاجر مزال واقفة حدا لباب):راك مزال هنا..صحابلي مشيتي
هاجر:ما بغيتش نمشي حتى نشوفك
إيجا(حيدات سبرديلتها و ترمات فوق الناموسية ):انا عييت
هاجر(جبدات لغطا وغطاتها بيه):كتحسي براسك مزيان!
إيجا(حركات راسها بمعنى اه)
هاجر(تكات حتى هي حداها ):شنو وقع ليك ليوم ،مامولفاش ليك
إيجا(غمضات عينيها وكتهضر وهي مواعياش بذاتها):انا تسنيتو ا هاجر..عييت وانا كنتسنى فيه ،فلأخر مجاش..كنحس براسي كنت حمقة وغبية وكارهة راسي  حيت  تسنيتو شي نهار يجي  ،كارهة راني بغيت واحد فحالو شي نهار.كنكره اي حاجة كتخصو ،واي حاجة كتفكرني بيه كنكرهها .وكارهة نشوفو قدامي مرة أخرى .وخايفة
هاجر:مناش خايفة
إيجا(كتهضر بتقالة):خايفة من كلشي ..
هاجر(بانت ليها هضرتها فشكل ..مشات دخلات للحمام لجيهة لپلاكار لي فيه دوا..لقاتها واخدة دوا ديال النعاس لي كان عاطيها الطبيب ديالها):عوتاني خداتو..(مشات رجعات لعندها لقاتها غرقات فالنعاس مواعياش بذاتها..رجعات غطاتها مزيان وسدات عليها لبالكون..هزات صاكها وسوارت لوطو ديال إيجا و خرجات من لبيت...هبطات للتحت لقات الضواو كلهم مطفيين ومكاين حتى واحد ...خدات لوطو وخرجات مكسيرية وفنفس لوقت كتصوني على يوسف لي بزز باش جاوبها..مع عرفاتو فالدار زادت كسيرات ومشات نيشان ..فرانات وحبسات لوطو فالجردة  حداهم مع خرجات لقات يوسف گالس فااجردة حدا لپيسين ومعاه سهيل .. دخلات كتجري لعندو عاد بان ليها زيدان گالس وعاطيها بالظهر
يوسف:مالكي شواقع
هاجر:يوسف بغيت نهضر معاك ..ضروري
سهيل(مشى لعندها عنقها من لور):هادي هي توحشتك ا حبيبة..شفتك ما شفتينيش..
يوسف:ا جمع يدك ا صحبي راني حداك واقيلة حشم على ك*
سهيل:دابا مالك نتا ا صحبي مرتي هادي شدخلك
يوسف:اجي بعدا نتي ديالمن هاد لوطو ياك كنتي بايتة مع صحبتك
سهيل(كيشوف فلوطو):هاد لوطو ديال إيجا لاا!!
يوسف(خرج فيه عينيه):سكتناا ا صحبي ...(رجع شاف فيها)مالكي شنو وقع شهاد لحالة جاية فيها
هاجر:دابا واش مغاديش تسكت..راه بغيت نهضر معاك ..اجي
يوسف:واخا..دخلي سبقيني انا جاي
هاجر:واخا
سهيل(خدا سوارت ديال لوطو من عندها ومشى كيبقشش  ):وا حديدة نيت هادي ..و اصدار محدود من لفوق ..
زيدان(كيتمشى وسط الجردة وهاز فيدو مشروب ديالو والسيگار كينفت منو مرة مرة ..مشى لجيهة سهيل كيشوفو شنو كيدير):ديالمن هادي
سهيل(كيديماري فيها..مع ديمارات تسمع صوت قوي):اححح على صويت ..(طل عليه) طلع طلع تشوف على گليسة فيها
زيدان(طلع وگلس حداه..):ديالمن بعدا مجاوبتينيش(بعد سيگار وكيحاول يشم الريحة لي فلوطو)ديال بنت هادي لا
سهيل(كيضحك عليه):اه هههه ديال إيجا....اواه متگولش لياا شميتي ريحة لحب لقديم (كيقلب فلوطو )ا باقا نقية لوطو ..واخاا داك الصوگان لخاسر ديالها (شاف فيه لقاه كينفت من السيگار ديالو بعصبية) مالك اواه متگولش لياا جاك لحنين ا صحبي
زيدان(شاف فيه وهو عاقد حجبانو):هبط !
سهيل:بلاتي حتى ندريفتي بيها شوية
زيدان:سهيل.گلت ليك هبط
سهيل:هاهو هابط (شافو حتى هو هبط وجا لجيهتو خدا من عندو ل كلي ديال لوطو وركب هو بلاصتو ..) شكدير ا صحبي
زيدان:كملو السهرة نتوما..انا غادي نمشي
سهيل:شكدير ا صحبي لوطو ماشي ديالك..
زيدان(رمى سيگار فلأرض ):فاش نبغي نرجعها غادي نرجعها ..ودابا تهلى  (ديمارا لوطو وكسيراا حتى سهيل قفز من داك الصوت ..
هاجر(خرجات كتجري):فين غادة لوطو ديال إيجا
سهيل:زيدان..زيدان لي داهاا
هاجر:اوليييييي ..واش حماق هادا ولا مالو شغادي نگول ليها دابا
يوسف:متخافي ما والو..انا غادي نهضر معاه يرجعها فالصباح
هاجر:اوفففف ...من الأخسن يرجعها فالصباح..منقدرش نگوليها راه رجع..يكفي داك لكذوب كامل لي راني كاذبة عليها..
سهيل:ناري والله حتى مزال كيبغيها ..مطاحتش ليا على لبال گاع
هاجر(قربات ليه وهي مزال معصبة):ياكمااا غادي يجي للعرس
سهيل(هز كتافو ):معرفتش..ولكن زيدان لي كنعرف مستحيل يجي لعرس ..مكيعجبوهش هاد النوع ديال احفلات لي كيكونو فيهم الناس بزاف
هاجر:من لأحسن ليه ميجيش حيت راه غادي تنوض حرب فداك لعرس..انا غادي نمشي نعس تصبحو على خير
يوسف(خلاها حتى دخلات و شد سهيل):مأكد مغاديش يجي..
سهيل:معرفتش الصراحة ما مأكدش
يوسف:موصيييييبة هادي ..
سهيل:هاء ا صحبي مكفاكش هاد لملل لي راه حنا عايشين فيه هادي ربع سنين..خاص شوية لحماس والإثارة نبدلو لجو
يوسف:وا الله يعطيك شي عقل ..بغيت نعرف غير كيفاش ختي قابلة عليك
سهيل:داكشي صعيب عليك تفهمو..لالا كنتي كتفهمو شحال هادي ،دابا بان ليا لقلب عندك مات
يوسف(هز كاس و شير عليه..جاب اله مجاش فيه):هادا ماجاش فيك ..لمرة تانية غادي نهرس ليك راسك..
سهيل:وا صوني ليه ا صحبي گول ليه يرجع لوطو لمولاتها راه كيسمع ليك غير نتا
يوسف:اودي شعندي ما ندير ..انا نصوني ليه
سهيل(مشا گلس كيشرب من لمشروب ديالو)
يوسف:ش مزال كدير هنا
سهيل:هانتا كتشوف على عينيك
يوسف:تهز علياا سير لدارك ..غدا نلقاك عندي مع الصباح باش نشوفو شنو مزال ناقص