فَتَاةُ البَادِيَّة وَ المَفْيُوزِي المُتَمَلِّكْ(بالدارجة المغربية )

الجزء 2

فتاة البادية والمفيوزي المتملك
الجزء الثاني

بلقيس (وقفات جنب لحيط كتسمع فصوت بكاا إيجا... وقلبها كيتقطع على بنتها لي غادي تواجه نفس لحاجة لي دوزات مها)
إيجا(مسحات دموعها):مي...
بلقيس (مشات گلسات حداها وهي حادرة راسها):نوضي غسلي وجهك وكولي شي حاجة قبل ما يفيق باك...
شافت ف مهاا وعينيها حمرين حتى مبقاش لونهم كيبان كيف لا وهي ليل كامل كتبكي ...حاسة كأنه حياتها تسلبت منها بكلمة وحدة من باها...واش لهاد الدرجة مكيحسبوهاش إنسان لمجرد انها تولدات بنت ...و بسهولة قدرو يعطيوها لواحد كبر من باها فلعمر بدون تفكير ....
إيجا:مي ....شنو غادي ندير دابا....(طلعات عينيها ف بلقيس و دمعة حارة نزلات منهم ) حياتي سالات دابا ..ياك امي !!
بلقيس (دوزات يديها على شعر إيجا بطريقة حنينة و على وجهها إبتسامة ):ما سلات والو ا بنتي ...ديري تقتك فالله ...محد قلبك نقاا وصفاا من الذهب ...ما عمر سيدي ربي غادي يخيبك...
إيجا:ولكن ا مي انا مبغيتش نتزوج ...با موحال يبغي يسمع كلمتي ...
بلقيس:يكون خير....نوضي غسلي حالتك ا بنتي الله يرضي عليك ...

ناضت من فوق الحجرة لي كانت گالسة عليها فوسط الجردة لي جات وسط الدار...غادة كتمايل  وحاسة بالدنيا ضايرة بيها من كل الجوايه...طلعات عينيها فالسمااا كتشوف فالنهار لي ياله بدات كتسرب خيوطو للدنياا ...غمضت عينيها لي مشافوش النعاس ليل كامل ..وحاسة بيهم كيحرقوها بقوة ما نزلات الدموع منهم ...
إيجا:كنت غير كنكذب على راسي نهار ضنيت حياتي غادي تبدل شي نهار...(دورات عينيها على الدار ) هادا هو قدري وكان خصني نرضى بيه...
خديجة(وقفات وعلى وجهها نص ضحكة):ايوا على سلامتك منين عرفتيها ...
إيجا(قربات ليها وعينيها حمرين ):حيدي من قدامي ...
خديجة(ضربات فيها وزادت):صبحنااا عالله....
حمد(جرها ):مالنااا نتي على الصباح..
خديجة(طلعات فيه ونزلات ):شوف ديك بنت بلقيس راه كتقلب عليااا...شي نهار نعمي ليها دوك العينين لي سايرة تفوح علينا بيهم....
حمد(دفعها حتى كانت غادي تجي على فمها):سيري شوف ليك ما ديري فهاد الصباح..غير لي يجي يدوز معاكم شي صيف فهاد الدار...
إيجا(بتاسمات إبتسامة خفيفة):غير خليها تگول ما بغات ..مبقيتش كا ندي عليها...
حمد(شاف فعينيها عرفها غادي تكون باتت ليل كامل كتبكي...زير على يدو وضحك معاها):ليوم غادي نمشي للسوق انا وعبد الله مع مينة وبناتها حيت قرب لفرح ديال فاطمة...بغيتي نجيب ليك شي حاجة ...
إيجا(يالله كانت غادي تنطق باش يجيب ليها المجلات ورجعات اللور):اا...لا بلاش مبغيت والو...
حمد(حط يدو على راسها كيدوزو ب حنية):نهضر ليك مع بااا...
إيجا(شافت فيه بخوف ):لالا باا مغاديش يسمع لياااا....
حمد(نزل لعندها بجسمو):ولكن....
إيجا(ضحكات ب حنق وشافت فيه):كنحسدك حيت با خلاك تكمل قرايتك فلمدينة ..وخلااك دير دكشي لي بغيتي حتى مشيتي لفرنسااا خدمتي وتزوجتي....
حمد(عض شفايفو):إيجا....راه مزال قدامك لوقت ...راه تقدري ت....
إيجا(حبساتو):انا غادي نمشي نعاون يمااا ...