فَتَاةُ البَادِيَّة وَ المَفْيُوزِي المُتَمَلِّكْ(بالدارجة المغربية )

الجزء 7

فتاة البادية المفيوزي المتملك
الجزء السابع

بعدمااا فكاات نورة لمشكيل لي أصلا مكاينش و كلشي غير سوء تفاهم ....هزات نورة معاها إيجا و بلقيس ف لوطو و داتهم معاها للدار ...و جميلة كل مرة كتشوف ف بلقيس و حشمانة من داكشي لي دارت...وبلقيس گالسة حدا نورة ف لوطو و كيهضرو موحشين ف بعضياتهم...حيت من شحال ما تشاوفو ....اما إيجا گالسة لور ف لوطو حدا الشرجم كيضرب فيها لهواا و كتفرج فالناس عاجبها للحال

إيجا(كانت ساهية كتشوف حتى ضارت نورة من جيهة الشانطي و هي تحل فمها مصدومة وعينيها كيبريو بالفرحة): ييييمااا .....شوفي شوفي لبحر....
نورة(فرانات ب لوطو مخلوعة):شنو ...مالكي ...
إيجا(خرجات راسها من شرجم فرحانة):ياااه يمااا....اول مرة نشوفو ...
بلقيس(طمأناات نورة ب عينيها )
نورة(شافت ف إيجا و بتاسمات ):تبغي نهبطو ليه...
إيجا(حركات راسها ب لهفة):اااه بغيت بغيت...
نورة(ضربات الضورة و بلاصات لوطو ديالها قدام لبحر ....يالاه غادي تهضر حتى كتشوف إيجا هبطات كتجري لجيهت لبحر ):ههههه ..يالله نهبطو حتى حنااا ....
بلقيس(حاضية معا إيجا ):يالاه .... لا تمشي تلف ....
نورة(هبطات هي و بلقيس وقفو حدا لوطو و حاضيين إيجا لي واقفة كطل فوق كرسي ديال لحجر جا ف جنب لبحر و عاجبها لحال و جميلة واقفة حداها)
نورة(ضارت عند بلقيس وكضحك):كي دار حتى خلاك لعربي تجي ...ياكماا مات
بلقيس(شافت ف إيجا لي كتجري ):هربناا ليه...
نورة(ضارت عند بلقيس و ممتيقاش ):ههه لاواه....
بلقيس(شافت فيها بملامح جدية)
نورة(حلات عينيها على جهدهم ):اويلي واش كتهضري بصح....
بلقيس(ربعات يديها):بغا يزوجها لواحد شارف عندو ربعة لعيالات...طلق وحدة غا باش يعاود يتزوج وحدة صغيرة ...و اناا عييت من ديك لعيشة...كان علياا النهار لول نمشي معاك فاش گلتيها ليااا....غير انااا كنت خوافة ...
نورة:اويلي على بغا يزوجهااا لواحد كبر منها....
بلقيس:عييت فيه باش ما يديرش دكشي لي فراسو و لا بغا يسمع...

نورة:لعربي هو لعربي ....باقي راسو قاصح معمرو غادي يتبدل ...
بلقيس:دكشي لي بغا هو لي عمرو عادي يكون ليه....
نورة(كتشوف ف إيجا): بلقيس....لعروبية ماشي هي لمدينة...بنتك عاطية للعين لي دازت من حداه كيتبعها ب عينو  و بنادم هناا داير كيف الحيوان...مخفتيش عليها
بلقيس:عارفة لي كاين....دكشي لاش بغيتها تحك مزيان...باش ميديرها بيها حد
نورة:كتشبه لجوزييف بزااف...نفس لون عينيه
بلقيس(خفق قلبها بالجهد ويديها فشلو عليهاا ):ن....نورة
نورة(حطات يديها على فمها):واش مزال مگلتي للبنت على باها...
بلقيس(شافت إيجا جايا و خنزرات ف نورة باش تسكت )
نورة(خربقات لإيجا شعرها):صافي نمشيو ..
إيجا:ااه صافي....

طلعو للوطو مرة أخرى و توجهات بيهم نورة للڤيلا عندها لقاو عمر العساس وصل قبل منهم ...يالله گلسو ومشات جميلة تقاد ليهم مباكلو حتى هبطات بنت يكون تقريبا ف عمرها 15 عام ...كتدي شوية من الشبه لإيجا ..شعرها قصير حكل و خصلاتو مصبغاهم بلون وردي ...
خولة:ماماااا ....علاش تعطلتي...
نورة(باستها من حنكها):لا والو ا مامي مشيت غير نجيب خالتو ...
خولة(بإستفهام):خالتو....
نورة(جراتها من يديها گلسات حداها):خالتو بلقيس ...معقلتيش عليها....
خولة(حلات فمها):واش خالتو بلقيس لي ديما كتعاودي ليا عليها ...هي هادي...
نورة:هههه هيا هادي....
خولة(مشات عند بلقيس عنقاتها ):ياااه حتى انااا غادي تولي عندي خالتو....(گلساات فوق رجل بلقيس) ياك غادي تگلسي معانااا مغاديش تمشي ....
نورة (مشات گلسات حداهم):مغاديش نخليوهم يمشيو خههههه
خولة(عاد نتابهات ل إيجا):و شكون هي هادي ا خاليتو....
بلقيس(كضحك):هادي بنتي إيجا....
خولة(مشات لعندها):وااو سميتها زوينة ....و حتى هي زوينة...(جراتها من يديها ) تخرجي معايا نتساراو...
نورة(قرصتها من فخاضها ):قيلي عليك لبنت خليها ترتاح...
خولة:اااح حشومة عليك ا ماما...(غفلتهم و جراتها) اجي نگلسو ف بيتي ...
إيجا(غا مجرورة مفاهمة والو)
نورة:هههه نوضي طلعي حتى نتي تبدلي حوايجك...
بلقيس(شافت فالدار):مجابتهاش الصواب ...راجلك يجي يلقانا هنااا مغاديش يرتاح....
نورة(عنقتها و جراها غادا بيها للبيت):هاد الدار كاينة فيها غا اناا و خولة....و لمرحوم كون كان معاناا دابا مغاديش يخليك تمشي ....
بلقيس(عاد ستوعبات شنو واقع ....بغات تنسي لموضوع):زيدي زيدي نعاود ليك شنو درت لمينة قبل منمشي ....
نورة(تفرگعات بالضحك):هههههه ناري باينة خليتيهم كيحماااقو تماااا....زيدي لبسي عليك و عاودي لياااااا....

مينة(گالسة فوق فلأرض و شادة فراسها)
فاطمة:واا مي تا لين غادي تبقاي تباكاي عليناااا....ايلا جا باا و ملقا ميتنكل راه غادي ينوض عليناا القيامة....
مينة:ا ويليييي على بنت لحرام دات ليااا ذهبي كامل من بيت لخزين...
رقية:ونتي شداك تخبيه ف بيت لخزين ....ياك دايراه فالصندوق ...
مينة(بدات كتلعتم فلهدرة):ههاااا...هاداك را غير....
رقية(صغرات عينيها):اييه ....حتى منكونش كنعرفك ...غا لعرس لي مشيتي ليه تخوني ليهم الذهب من لهدية....
مينة(حنات راسها و ضربات الطم)
فاطمة(حلات فمها مصدومة):دكشي لاش مشيتي تقلبي على الذهب لي حابو ف هدية إيجا.....
رقية:ههه هاكاواااا ساعة بلقيس خلات ليها غا لبحتة.....
مينة:متجبديش لياااا ديك بلقيس....غا بلاتي عليهااا حتى يلقاها سي لعربي لا مدوزتها عليها.....
رقية:لاااا لقاهااا....

نورة(طلقات ضحكة  بالجهد حتى تسمع ضحكهاااا عند الجيران):هههههههههه ناري مينة غادي يخرج ليهااا لعقل .....
بلقيس(كملات لبيس حوايجها و كضحك على دكشي لي دارت لمينة): ههههه صحابليها معقتش بيها فين مخبية الذهب لي خاوناه....
نورة:هههه وريني داك الذهب نشوف شحال يجيب....
بلقيس:راهو فالصاك....
نورة(مشات كتجري تقلب فالصاك ): مسخوطة هادشي كامل كانت مخبياه....
بلقيس:هاداك را فيه حتى ديالي ....
نورة:ههههه ولاهيلا مسخوطة عبرتي عليها على دكشي لي دوزات عليك ....حتى تفكريني نمشيو نبيعوه ما حد الذهب دابا ساوي التمن....
بلقيس(گلسات كتخمم):اناا دابا بغيت غير إيجا دير مستقبلها....
نورة:ولاا عليك ...انااا نتكلف بيها ...باش دخل معاهم تقرااا من لبدية....

فالطابق لفوقاني كانت عطاتها خولة تلبس پيجامة باردة ....و گلسو بجوج فلبالكون وخولة كتقاد لإيجا فشعرهاا و فنقس لوقت  حاطة تيلي و كتقرا فيها شي حاجة.. حتى نقزو مخلوعين
إيجا:شنو هادشي .....
خولة:ههه هادي غير مامااا فاش كضحك...
إيجا:حتى يمااا ضحكتها فحال هكاااا ....
خولة:يااه شعرك حتى نتي فيه ريحة لخزامة....
إيجا(بتاسمات):اااه يماااا ديماا كتغسلو ليا بلخزامة.....
خولة:هههه حتى مامااا ديمااا كتگول ليا نغسلو بلخزامة....واقيلة جدة لي علماتها ليهم....
إيجا:اااه ....گالتها لياا يمااا...(شافتها ملهية كتشوف شي حاجة سيفطاتها ليها شي صحبتها ف تيلي ....) شكون هاداك....
خولة:هههه هاداا لي فالتصويرة...
إيجا:ااه..واش شي ممتل...
خولة(جبدات تيلي كتوريها فالتصاور):عرفتي هادا شكون هو ....زيدان المالكي ...
إيجا(بإستفهام)...
خولة:هاداا رجل أعمااال معروف ...نااري شوفي شحال بوگوص كيحمق ...
إيجا:بوگوص ...شنو هادي
خولة:ههه زعمااا زوين.....ناري والله مكرهت شي واحد فحااالو وااااو....
إيجا:هههههه اويلي راه كبير عليك....
خولة:لا فالحب العمر گاعمااا كيهم...دابا أغلبية كيتزوجو بواحد كبر منهم...
إيجا:دكشي لاش بغا با يزوجني للقايد....
خولة(كتمشط ليها فشعرها ):عرفتي هاد زيدان...كلشي كيگول راه هو لي مترأس المافيااا....ولكن مقدروش يشدوه لبوليس ....
إيجا:ناري...واش لمافيااا فحال لي كاينة فلقصص....كيقتلو الناس....
خولة:اااه فحالهم...دكشي لاش مبقاش كيعجبني بزااف ..لا يمشي يقتلني شي نهار ...
إيجا(كضحك عليها)...
خولة:صافي كملت ليك...جاتك زوينة....(دقات جميلة عليهم باش يهبطو يتعشاو ) اجي نهبطو نتعشاو دغياا ...باش نطلعو نتفرجو فشي فيلم....
إيجا(شافت راسها فلمرااياااا  و عاجبها شعرهااا ...حتى جراتها خولة باش يهبطو يتعشاو

و متنساوش ...خليو معاكم vote 🌟 وشي كومونطير زوين فحالكم. باش تشجعوني ♥️♥️👇🏻👇🏻

نتلاقاو غدااا فنفس لوقت 😘😘😘♥️