فَتَاةُ البَادِيَّة وَ المَفْيُوزِي المُتَمَلِّكْ(بالدارجة المغربية )

الجزء 71

لوباروس
إيجا(هابطة كتقلب عليه بعدما دخلات للدوش بعد منو ...باغا غير ايمتا تخرج من هاد الدار لي كتبان ليها كأنه قبرها فلحياة..قلبات عليه گاع لقنات مالقاتوش...خرجات لجيهة الجردة عاد بان ليها واقف مع لي گارد ..تمشات لجيهتو حتى كتشوفو بعد لي گارد و تم جاي لعندهاا
زيدان(جرها من دراعها و باينة طالع ليه الدم):واش ديلمك كتقلبي عليا
إيجا: صبحنا على الله ،مالك نتا تاني جاعر...طلق منييي راه كتقصحني
زيدان(زاد مزير عليها):شنو جايا ديري عندي بهاد لحالة .. لحمك رخيص عليك ولا شنو
إيجا:اويلي واش نتا تسطيتي ..علاه شكون مقطع ليا حوايجي  وعطاني هادشي
زيدان(مدخلها لداخل وكيحاول يخلي أعصابو باردين ):دخلي ،راني مزال ما نسيت ليك لڤيديو ديال لبارح
إيجا:اينا ڤيديو تاني
زيدان(جبد تيلي وراها):شنو هادا...على شوية تعراي
إيجا:سوقك..حتى هادي باغي دخل لياا فيها ..وا بزااف هادشي
زيدان(رماها فوق لكاناپي ):شفتك كتحاسبي ا بنت باروخ
إيجا(عاودات ناضت تقابلات معاه رغم انه فايتها ب طولتو):نتا لي كتحاسب معايا بلا موجب بلا شرع...نخرج عريانة گاع ،ونتا مالك (حمرات فيه عينيها وهي عارفة عنادها غادي يخرج عليها..ولكن مستحيل تبين ليه انها خاضعة ليه)
زيدان(زير على شعرها من جيهة عنقها و قربها لعندو ):زعمتي بزاف لا !
إيجا: تبارك الله على المؤمن لي يسمعك كتهضر على السترة ميگولش نتا لي مترأس المافيا وكتقتل الناس بلا رحمة ولا شفقة.
زيدان(شاف فيها و عينيها مناويينش خير ...بدون اكترات لهضرتها نطق بنبرة حادة ):دابا غادي تسدي عليا فمك و تحركي فطري باش نوصلك
(يالاه بغات تهضر وهو يحبسها ..هز صبعو موجهو ليها) تزيدي كلمة أخرى نعطب مك،هضرتك خليها عندك..طلعي لفوق غادي تلقاي شنو تلبسي
إيجا(زيرات على يديها وهي كتعاير فيه من داخلها ..حتى فمها مابقاتش قادة تفتحو مزال قدامو ...خبطات رجليها مع الأرض و طلعات كتجري لبيت لفوق تلبس حوايجها ..وقفات وسط لبيت كتقلب على شنو تقدر تلبس ..حتى كيبان ليها كسوة فالأسود قطنية خفيفة وطويلة حتى لتحت الركبة وفيها كمام طوال و عنقها محلول وحداها صنيديلةً عالية سامپل حتى هي فلأسود ..خدات كلشي ودخلاتهم معاها ف الدوش ،طرفات حالتها دغيا و خرجات ،هزات صاكها بعدما قادات وجهها حيت غادي تمشي للجامعة نيشان....خرجات من لبيت هابطة باش دغيا تخرج من داك السجن لي حابسها فيه ..هبطات كتجري حتى وقفات عليه ف طبلة د لفطور ..
طلع عينيه فيها وسرعان ما جمع غوباشتو وهو كيشوف منحنيات جسمها لي عاد زادو تبرزو كتر ب لكسوة لي خدا ليها...دوز يدو على شعرو بعصبية ،حيت رغم انه خدا اكبر قياس ممكن ،داكشي لي خاف منو طاح فيه...
إيجا(واقفة وحاطة يديها على الطبلة):نمشيو !
زيدان(كارز على سنانو ):گلسي فطري بعدا ، ما مزروبينش..ولا صافي سخيتي دغيا
إيجا(بضحكة إستهزاء ):وا باينة متحتاجش تفكير ا سي زيدان،مكاينش لي كيگلس مرتاح وهو داخل للحبس
زيدان(كيشرب من قهوتو و كيحاول يبقى مهدن ..شاف فيها ب هدوء نوعا ما خلعها):هاد لحبس غادي يجي نهار ويولي هو حياتك..
إيجا(گلسات قدامو ف الطبلة كتقاد قهوتها):ما عمري غادي نوصل نخلي راسي نعيش ف حبس بحال هادا ..خصوصا إيلا كان ديالك (غمزاتو) غير كون هاني من هاد الناحية.
زيدان(كيتمشى جيهتها حتى قرب ليها و نزل لمستواها وهو حاط يديه على لكرسي لي جالسة فيه هي ..قرب لوذنيها و همس):هادشي ايلا بقا بان ليك حبس مازال ...حيت غادي يولي يبان ليك جنة (شاف فيها وعينيه ف عينيها وعلى وجهو ضحكة كتعبر على تقتو ب نفسو و بالهضرة لي كيگول )ديك الساعة غادي تكون هضرة أخرى (كمل هضرتو ب غمزة )
إيجا(شافت فيه بكل برود):و كيفاش بالسلامة غادي دير لهادشي
زيدان:ماشي ضروري تعرفي ...لوقت غادي يخليك تشوفي
إيجا(ضحكات ب خفة وهي متخوفة من هضرتو  ):ايييه واخا
زيدان(بعد عليها وهو كيشوف فالجردة على برا و كيضحك حيت عارف انه هضرتو غادي يطبقها بلحرف ،عكس هي لي ما واخداهاش ب جدية)
إيجا(ناضت من بلاصتها وهزات صاكها):نقدر نمشي دابا؟
زيدان(ضار لعندها ،طلعها وهبطها ومفضل يخليها على خاطرها رغم انه كيغلي من داخلو ،ولكن عارف ليلة لي فاتت مكانتش ساهلة عليها واخا كتصنع لقوة):احم...يالاه
إيجا:فين لوطو ديالي ؟
زيدان:غادي نديك انا
إيجا:و لوطو ديالي ؟
زيدان(بقلة صبر ):حتى تقاد وغادي يجيبوها حتى لعندك
إيجا(تأفأفات وزادت قدامو):يالاه دغيا راه تعطلت ،خاصني ضروري نحضر لهاد الحصة
زيدان(تابعها من لور وحاضيها كيف كتحرك،وكارز على أعصابو غير بزز ..ركب فلوطو وكسيرا بالجهد  مكيشوفش لجيهتها)
إيجا(مخلوعة من صوت ديال لوطو):ا بشوية عليك
زيدان(ما مسوقش ليها):لي عارف هو راك مولفة صوگان فحال هكاا
إيجا(دارت ليه ضحكة صفرة):ماشي فحال فحال
زيدان(باقي مكسيري وعارفها خايفة ،خصوصا انه صوت لوطو كان قوي بزاف )
إيجا(شافت راسها قربات للجامعة):حبس باراك غير هنا
زيدان:مالنا شكاين تاني
إيجا:حبس باراك،ايلا دخلتي كلشي غادي يشوفنا...
زيدان:ومن بعد
إيجا:كيفاش هاد من بعد تاني ،راه غادي تجبد ليا غير لمشاكيل ،اولا نسيتي راني مخطوبة ،هارون غادي توصلو لهضرة ايلا شافونا انا وياك
زيدان(جرها لعندو ب عنف من ذقنها  وهو مقادرش يصبر على هضرتها لي كتخليه يغلي ):نعاود نسمع هاد مخطوبة من فمك ،نقتل مك كتفهمي..وداك ز** ديال هارون حسابي معاه مزال جاي فالطريق ،غادي يخلص الجديد و القديم
إيجا(كتحاول تحيد ليه يديه):واش تسطيتي نتا ولا مالك ش كتگول راه عييت صابرة ليك...واش مكتفهمش راسك ا بنادم
زيدان(شحطها لفخضها حتى غوتات وهضر بنبرة تهديد):مازال ما باغا ديري عقلك ! هاا (فرانا لوطو فوسط الجامعة و رجع شاف فيها مزير على فخضها بيديه،لدرجة مقادراش تحرك رجليها ب قوة الألم )ذنوبك على راسك نتي ايلا وصلاتني لهضرة  بيلا تلاقيتي معاه...
إيجا(حلات لباب باغا تهرب منو )
زيدان(جرها لعندو بكل قوتو حتى طاحت بين يديه كلها و صدرها فوق صدرو ..للحظة طلع عينيه فعينيها لي كانو عامرين دموع ،ديك اللحظة بالظبط رجعاتو للور وخلاتو يتفكر شكون هي إيجا،رغم أنها تبدلات على إيجا لي عرفها ،شاف ف عينيها مطولا وهو كاره يشوف الدموع فعينيها  لي من ديما كيكره يشوفهم ..هبط عينيها لشفايفها لي كيترعدو مع جسدها كامل..كيشوف فيهم و طاقة قوية كتجذبو ليهم  حتى نسى علاش جرها لعندو و شنو باغي يگول )
إيجا(شافت ف الناس كلشي كيشوف ):زيدان الله يخليك..باراك كلشي كيشوف
زيدان(بدون إكترات  قربها لعندو و هضر حدا وذنيها ):هبطي ..ولكن ديري فراسك ،أي حاجة كاديريها كتوصلني، لوطو ديالك غادي توصلك قبل ما تخرجي من لحصة.
إيجا(حاسة براسها عاجزة):واخا
زيدان:فاش نصوني عليك جاوبي
إيجا(هبطات من لوطو  بلا ماتجاوبو )
زيدان(كلاكسونا عليها ):هضرتي مفهومة !
إيجا(بقلة صبر):صافي مفهومة غير سير
جهاد (جايا كتجري عندها مخلوعة ):اويلي شكاديري مع هادا
إيجا(حاضية لوطو وهي غادة ):زيدي نتحركو من هنا كلشي كيشوف
جهاد(غادة تابعاها):وا هضري ...شنو كاديري مع المالكي
إيجاا(كتهضر وهي حاسة ب طاقتها كأنها سالات ):عافاك ا جهاد معنديش الجهد باش نهضر ...
جهاد(بغات تخليها على خاطرها):صافي واخا.. حقا راه لحصة تأجلات نمشيو ناكلو شي حاجة..فطرتي ولا مزال ؟
إيجا(تنهدات ،شافت حتى عيات و مشات معاها فلخط حيت عارفة لماكلة بوحدها هي فين كتقدر تنفس على راسها ):واخا ما عندو منين يدوز ليا ،ولكن غادي نمشي معاك..ينعل النهار لي لاقاني بيه
##ريناد (تعصبات بعدما مشات إيلين وخلات لباب محلول من وراها ،مشات معصبة و ملابساش حوايجها  ):قليلة تراابي ...الله ياخد فيك
يوسف (واقف كيشوف فيها كتعاير و كتسب حيت تقريبا حظر لگاع داكشي لي وقع بيناتهم هي و إيلين )
ريناد:يوسف !!! شنو كادير هناا
يوسف(بدون إستأذان دخل للجناح لي گالسة فيه ):نتي لي شنو كاديري هناا
ريناد(مشات بالزربة لبسات عليها شوميز طويلة ):سيفطك زيدان ؟
يوسف(گلس كيشوف الجناح لي ولى داير فحال شي دار .حوايجها ولماطيريال ديالها كلو كاين تمااا ..حتى من وراق لخدمة كلشي تماا):مكنتسناش من زيدان يسيفطني...
ريناد(گلسات قدامو فلكاناپي و كتفكر لحالة لي كانت فيها قدامو لبارح ..نطقات ب هدنة):علاش جيتي ..
يوسف:متجاوبيش على سؤال ب سؤال...سولتك جاوبيني شنو كاديري هناا ولمدة عامين .علاش مابقيتيش ف دارك
ريناد(مزال كتهضر مهدنة و كتجاوبو حشمانة من لي وقع لبارح خصوصا انها حطات يديها عليه ،رغم انه أكتر شخص كتحتارمو):مبقيتش كنقدر نگلس فيها
يوسف(كيهضر ب حدة):علاش  ..زيدي شرحي بغيت نفهم
ريناد(كتفرك ف صباعها ):من نهار رجعتي ل إيطاليا و عرفتك مغاديش ترجع وقطعتي علياا اي طريقة نتواصل بيها معاك ،مقدرتش نزيد نگلس فيها مزال ..بقيت من اوطيل ل إوطيل حتى جابني سهيل هنا
يوسف(كيرجع يتفكر شنو وقع داك النهار ومبرد أعصابو كأنه لا شيء):وشنو علاقة هادشي بداكشي لي وقع
ريناد(شافت فيه مطولا):حيت ديك الدارنتا لي خديتيها ليا ..(شافت فيه ساكت مكيگول والو )انا عرفتك نتا لي شريتيها ليا ،وخليتي سهيل هو لي يبان ف لواجهة
يوسف:سولتك..شنو لي خلاك تخرجي منها
ريناد(مشات قربات حداه و كتهضر وهي كتنخصص):انا مقدرتش نزيد فيها نهار واحد مزال فاش فقت و عرفت شنو درت ..مقدرتش نتيق انه يقدر يجي نهار نجرحك ولا نأذييك ...مبقيتش كنقدر نرجع ليها ..كلما كندخل ليها كنتفكر داكشي لي طرا
يوسف(كيسمع ليها ب تمعن ):كنتي تقدري تاخدي دار أخرى ..ماشي تجي ل أوطيل ..
ريناد(مسحات دموعها):انا مرتاحة هناا..
يوسف(مربع يديه وكيشوف فيها ):غدا غادي نجي نلقاك جامعة حوايجك..مغاديش نخليك تزيدي نهار اخر هناا...
ريناد(وقفات ):اناا غادي نبقى هناا ،ما بغيتش نرجع  تماا
يوسف(ناض وقف مقابل معاها ):وعلاش ب السلامة..
ريناد:دارك هاديك ماشي داري
يوسف(بدا كيتعصب من هضرتها):ماغاديش نعاود هضرتي ..
ريناد(شافت فيه مطولا و سكتات):و نتاا...نتاا سمحتي ليا !(قطعهم ولد كان فلعشرينات من عمرو ..جار طبلة ديال لفطور )رينااااد ،صباح لخير ...هاهو فطورك واجد كيفما طلبتي ..واخا مفهمت والو من داك لميساح لي سيفطتي ليا ف واتساپ لبارح..عمرك طلبتي لحريرة ف الصباح
ريناد(مشات جبدات كاش من بزطامها ومداتو ليه مع إبتسامة وهي كتشوف ف الطبلة):رضوان...صباح لخير، هههه غير تشهيتها وصافي
رضوان(وقف حتى كيبان ليه  يوسف  واقف و ريناد كتغمز ليه باش يخرج):احم مادموزيل ريناد ،شهية طيبة ..(بدون ما يحس) موسيو يوسف تبغي نجيب ليك قهوتك
ريناد(كتغمز ليه باش يخرج دغيا ):احم..لا صافي غير خليه
يوسف(قرب ليه ):قهوتي !
رضوان :اه ا موسيو قهوتك..معطرة ،راني تعلمت نصايبها ...
يوسف(شاف ف ريناد):اااه ...منين تعلمتيها
رضوان(كيهضر وهو فرحان حيت ملاقي ب يوسف عطاف شخصيا ..ما علابالوش ب ريناد لي كتعرق وتنشف):ريناد...مادموزيل ريناد. هي لي علماتها ليا ..حيت كنصايبها ليها ديما
يوسف(كيهضر وهو غالبة عليه الضحكة):اممم ...صافي ا رضوان جيبها لياا ،(شاف ف ريناد لي مضورة وجهها للجهة لأخرى )نيت توحشت نشربها
ريناد(بقات واقفة مصدومة حتى خرج رضوان ):ااا..انا خاصني نفطر ..عندي اجتماع ضروري ليوم  خاصني نحضر ليه
يوسف:اه واخا ..بالصحة..
ريناد(كتاكل و كتشوف فيه كيمشي ويجي فوسط لجناح ):احم...فطرتي !
يوسف:لا مزال ..نتي اكتر وحدة عارفة مكنقدر ناكل والو حتى نشرب قهوتي (دار ب يدو بين قوسين )كنقصد لمعطرة
ريناد(طلعات معاها لحمورية):ااه ههه بصح
يوسف:هاد رضوان بان ليا كيعرفني كتر من لقياس ..ياك هو شاف فلكوزينة لي ف الريسطو ..اش جابو هناا ،معمري شفت شي شاف كيطلع لماكلة بنفسو للكليان..
ريناد:هه كتعرفو..
يوسف:كنعرفو ..هو لي تكلف بالعرس ديال ختي هاجر..سهيل لي وصاني عليه و گال خدمتو زوينة
ريناد(معرفات ما تگول ليه ..حتى لكذبة لي تقدر تگول ما عندهاش..من غير ايلا كالت ليه لحقيقة كيفما هي ..ولكن راه مساهلاش تگول ليه ..رضوان عارف عليهم كلشي ..حيت وقتما كان كيجيها لحنين من نهار سكنات فلأوطيل عند سهيل كتعيط عليه تبكي عليه حتى تشبع فلأخر كيوجد ليها لماكلة كتاكل حتى كتنعس):ااه..بالصح كا يطيب بنين بزاف
يوسف:بنتو ليا صحاب كتر من لقياس
ريناد:ااه شوية وصافي ...
يوسف(من تحت سنانو):بزااف ماشي شوية
ريناد(سكتات و فضلات انها متجاوبش لا تصدق فارشة راسها..كملات ماكلتها ف صمت ومخلياه كيهضر ف تيلي ..ناضت من حداه للبيت ..لبسات عليها و خرجات لقاتو گالس كيشرب ف قهوتو ..وقفات معارفة ما دير ..):انا خاصني نمشي دابا
يوسف(وقفها بهضرتو):هاد لمدة كاملة عمرني فكرت نقرا داكشي لي كنتي كتبتي بعدما مشيت لإيطاليا ...حتى للبارح
ريناد(بتردد):انا كانت ف نيتي غير نشرح ليك شنو لي كان واقع ..ما بغيتش نظلم راسي و نظلمك معايا ..واخا اناا غلطت بزااف ..ما كناش غادي نخسرو بعضياتنا لهاد الدرجة..
يوسف(هز تيلي لقا هاجر كتعيط ):هادشي فات دابا معندنا علاش نهضرو عليه مرة أخرى ...لمهم انا غادي نمشي دابا ..خاصني ندوز عند هاجر حيت رجعات هي و سهيل
ريناد(نوعا ما ماعجباتهاش هضرتو):صافي رجعو !دغيا
يوسف:نيت باراك عليهم
ريناد:اه صافي..انا غادي نمشي دابا ..مابغيتش نتعطل
يوسف(قطع على هاجر ):لوطو ديالك مزال ما مصايباش انا غادي للخدمة نتي ف طريقي ..نوصلك معايا
ريناد:لا بلاش راه عيطت ل طاكسي يديني
يوسف(بلا ما يزيد لهضرة معاها):غادي نوصلك انا ،هبطي انا لتحت
ريناد(لاعبة عليه راها ما مسوقاش و هي عاجبها لحال من لداخل و غادي تموت بالفرحة):اه صافي (هزات صاكها بالزربة و تبعاتو كتجري )
يوسف(يالاه خارج من باب لأوطيل كتبان ليه هاجر جايا هي و سهيل و معاهم الموظفين هازين ليهم حوايجهم):دغيا وصلتوو
هاجر(كتخنزر و معاجبها حال):لهلا يخطي علينا سي زيدان لمالكي ديالكم،تكرم و سيفط لينا طيارة تجيبنا حتى للهنا ..
سهيل:ياك غير دابا جايا فيها و فرحانة
هاجر:ايه حيت حتى خرجت منها عاد بانت ليا سميتو مجبدة فيها ..معرف فين كانو عيني فاش يالاه كنت داخلة ليها ،كون مانركبش فيها ولا نحط فيها رجلي
يوسف(حاط يدو على خصرو):هاجر ،بلاما تبداي تاني ا ختي  ،ما راشقاش ليا على هاد الهضرة على الصباح
هاجر:هاهي ساكتة
يوسف(نساتو هاجر حتى على لهضرة و مايجي منها):اجي نتي ،شنو كاديرو هنااا ،علاش مامشيتوش نيشان للدار
سهيل:حيت گالك ا سيدي بغات تبدل الدار..ومبقاتش عاجباها مفهمتش شنو مابقاش عاجبها فيها
هاجر(بضحكة خبيثة وهي كتبحلس عليه):وا سهيل صافي دير ليا خاطري ..انا عندي بلاصة زوينة فبالي ،تماا انشاء الله فين غادي نسكنو
سهيل(واخاا كان معصب دغيا دوخاتو):صافي لي بان ليك...انا غادي نطلع نرتاح حتى تسالي و طلعي
هاجر(فرحانة بالإنتصار):صافي كون هاني ،انا شوية و ن...(قبل ماتكمل هضرتها كحلات بلعما منين شافت ريناد خرجات من الأسانسور )شكدير هادي هناا
يوسف:شكون
هاجر:هاهي مكتشوفهاش ..شكدير هنا وعلى الصباح فلأوطيل ..اه و حتى نتا شنو هنااا ...ياكمااااا ؟؟؟
يوسف(بانت ليه فرصة مزيانة باش يجبد لسهيل الصداع حيت كان مخبي عليه راها ساكنة تماا ):ساكنة هنااا..مگالهاش ليك سهيل
هاجر:هااا...من ايمتاا عمرني شفتها
يوسف(دار رقم زوج ب صبعانو):عامين وهي گالسة هناا
هاجر:اويلي على عامين ،غير بلاتي بيا ولا بيه ،(وقفات حداهم ريناد وهي تخنزر فيها ) سكنتي فهاد لأوطيل كتر من مالين لمكان ،يوسف حتى لعشية ونجي عندك دابا ما مسالياش
ريناد(بقات غير واقفة كتشوف فيها):مال هاجر
يوسف:ما مالها والو .غير معصبة مع سهيل
ريناد:ااه ...
يوسف:يالاه نوصلك راني تعطلت عندي كومبا فلعشية خاصني نوجد ليها