السلام عليكم ورحمة الله وبركاته. أنا اسمي أشرقت بنت مصرية صعيدية من محافظة قنا - مركز نجع حمادي . حابة اني أحكيلكم قصة حياتي ومعاناتي الكتيرة فيها . الحقيقة اترددت كتير عشان اكتبها ولكن لعل حد يستفيد منها . أو اني أحيي فيكم الأمل من تاني تجاه شئ ما بتدعي بيه ربنا وخايف انه ميحصلش . عن تجربتي وقصتي هتعرف انه ورب الكعبة هيستجيب وهيرضيك وهيفرحك مهما كانت تبدو مستحيلة افتكر دايما قوله تعالي. (يأتِ بها الله إن الله لطيفٌ خبير ).
أنا عانيت كتير في حياتي وتعبت فيها جدا . معاناتي بدأت من بعد وفاة أمي الله يرحمها . أقرب حد لقلبي اتوفت لما كنت في ثانوية عامة . وفاتها أثرت عليا جدا . فقدت حتة مني بمعني الكلمة هي كانت كل حياتي حرفيا . ومبقتش راغبة ف الحياة خالص ومبقتش اهتم بدراستي ودخلت الامتحانات وانا ضايعة جدا وبعدين دخلت كلية الآداب قسم اللغة الإنجليزية جامعة جنوب الوادي بعد ما كان حلمي كلية صيدلية . بس قدر الله وما شاء فعل وأكيد ربنا كاتبلي الخير يوماً ما....
بعدين بقي بدأت معاناتي من ناحية مرات بابا هي كانت وحشة اوي معايا وقت ما بابا ميكونش في البيت . لكن وهو موجود بتعاملني حلو طبعا عشان خايفة منه . بابا بيحبني جدا وحنين اوي معايا . بس اتصدمت فيه بعد وفاة ماما لما دخل علينا بمراته الجديدة او مش جديدة هو كان متجوزها من زمان واحنا منعرفش .. وكانت معاها بنت و ولد وعرفت ان بابا اتجوزها عشان تجيبله ولد عشان ماما مخلفتش أولاد .. بنت بابا من مراته اسمها ندي وأنا أكبر منها ب تلات سنين وابنه لسه صغير عنده ١٠ سنين واسمه محمد . ف البداية مكنتش حاباهم خالص عشان ماماتهم كانت بتكرهني وبتعاملني وحش وبتخليني اعملها شغل البيت ليها ولعيالها .. بس بعدين حبيتهم ف النهاية دول اخواتي وسندي ومليش غيرهم من بعد بابا ولا انا ولا هما لينا ذنب ف اللي حصل.. صحيح عشت أيام ظلم كتير من مرات بابا طول الفترة ال عايشاها ف البيت بس كنت بصبر وبحتسب الأجر ده عند ربنا. كانت كل ما تضيق بيا اروح اصلي واشكي لربنا انه يخفف عني ويساعدني . ربنا رحيم جدا وكان كل مرة بيراضيني وبيديني قوة معرفش بتيجي من فين عشان اتحمل مرات بابا .. مكنتش حابة أشكي ل بابا منها عشان متحصلش مشاكل بينهم وعشان أولادها يتربوا وسط أسرة طبيعة من أم وأب . كنت بصبر عشان أكيد ربنا هيعوضني خير . كنت دايما بحاول أبص للجانب الإيجابي . كنت بقول لنفسي الحمد لله ان كل ده حصل وخلاني أعرف اد ايه احساس الظلم والتفرقة بين الاخوات وحش جدا . عشان بعدين لو ربنا كرمني وخلفت اعدل بين أولادي . أكيد لانهم حتة مني مش هظلم حد فيهم ولكن بيبقي في حاجات صغيرة كدا ممكن مناخدش بالنا منها . بتخلي الاولاد بينهم وبين بعضهم يقولوا هي ماما بتعمل كده ليه!!؟ اشمعنا أخويا أو أختي .. بس أنا عارفة الاحساس ده كويس جدا واكيد مش هخلي حد من أولادي يقول الكلمة دي أبداً. والحمد لله ربنا استجاب لدعواتي ليل نهار وجات أول سنة ليا ف الكلية ودي فحد ذاتها حاجه حلوة ولو اني كنت خايفة انها مرحلة جديدة وهتبقي صعبة عليا أكيد ولكن الحلو فيها اني وأخيرا مش هشوف وش مرات بابا اللي اسمها أحلام دي تاني زي الأول عشان هروح سكن جامعي عشان الجامعة بعيدة عني بمسافة ساعتين . الجامعة ف محافظة قنا نفسها وعشان انا من مركز ف طبعا بعيدة عليا وصعبة اروح واجي كل يوم .. وانا اصلا بفرهد بسرعة وبابا عارف كده كويس ومعترضش ابدا ع حوار السكن . هي بس مرات بابا ال حاولت تلعب ف دماغه شوية وقالتله عشان مصاريف عليك وكده بس هو قالها دي مهما كان بنتي ولازم اقف جنبها عشان تبقي حاجه كبيرة افتخر بيها. طبعا أحلام بتعمل كده عشان انا اللي بعملها كل شغل البيت وهي مرتاحة فهتتعب ف غيابي. ولكن أحسن خليها تدوق شوية من اللي بشوفه منها ..
