عدت الأيام بكل سعادة كنت كل يوم بسمع صوت كرلوله ف الصلاة هو اه مكنش كل يوم يجي المغرب كان يجي العشاء والفجر أكتر ولو مكنش العشاء يبقي الفجر بس . المهم انه لازم بشوفه كل يوم وكل يوم اقف ع السطح عشان اشوفه وهو جاي ولغاية ما يمشي .. كنت بنزل اشتري من عموفتحي بس مش كل يوم أكيد يعني يومين ولا تلاته ف الاسبوع بس وساعات مبنزلش أصلاً . مكنتش بنزل البيت اجازة غير كل اسبوعين تلاته ع حسب يعني . وكرلوله برضو كان بيفضل كتير شهر ولا اكتر طبعا هو عشان بلده بعيده وسفر وكده لازم هيفضل كتير .. جات شيرين بعد اسبوعين وسألتني ع كرلوله وايه الاخبار ومفيش جديد وكده . فقولتلها لاء مفيش عادي . سألتني اذا اعرف عنه اي معلومه تاني اصل مينفعش كده ابقي معرفش حاجه عنه ف قولتلها اني عرفت الاقي صفحة الفيس بتاعته . ف طلبت مني تشوفها وانا ورتهالها عادي يعني أصل هي رجعت زي الأول بتحبني ودايماً بتصبرني وبتدعيلي وبتقولي كرلوله أكيد طول ما لسه بيستناكي وكده يبقي معجب بيكي وانتي عشان عموفتحي كلمك ف الموضوع ده كذا مرة وانتي رفضتي ف صعب عموفتحي يكلمك فيه تاني وأكيد هتتحل وكلام من ده يعني .. ع الجانب الآخر بقي منه كانت دايما معايا وبتقولي ميأسش أبدا ومبطلش دعاء وان اكيد رينا هيجمعنا انا وكرلوله عاجلاً او آجلاً أصل كل ال حصل ده وال بيحصل أكيد ليه سبب . كانت بتزعقلي لما كرلوله يقف يستناني ف الشارع بعد الصلاة وبيكون واقف وحده وقت طويل نص ساعه مثلاً ومعروف الشارع بتاعنا فيه مكتبات وصيدليات وسوبر ماركتس . ويعني كله طلبه وناس رايحة وجاية ف بتقولي حرام عليكي هو واقف كده لوحده ومنظره قدام الناس والدنيا برد .. هو بصراحه مكنش بيهون عليا أبدا اسيبه واقف وحده ف البرد منا كمان بكون واقفة زيه ع السطح ف البرد ومتلجة بس هعمل ايه انا عمري ما حد شدني قبل كده ولا كان ليا علاقات سابقة ولا اعجاب ولا أي حاجه .. طول عمري بخاف اقرب من حد ويسيبني ويمشي . او انه يموت زي ماما وابقي وحدي.. علاقتي بأحلام وال بشوفه منها كرهني ف الجواز وبخاف يكون الشخص ال هختاره مش كويس واعيش معاه مأساه اكبر من ال عشتها مع أحلام . كل يوم بعيط ع فراق ماما كانت أحن حد عليا اتوفت بدري اوي وسابتني وحدي فضلت لمدة تلات سنين بعد وفاتها وانا فاقدة النطق ومش عارفه اتكلم وفاقده الشغف ف الحياه عموماً وكل اللي بتمناه اني اروحلها .. عدي ع وفاتها حوالي تسع سنين ولسه مش ناسياها وبدعيلها كل يوم ولا عمري اقدر انساها .. خايفة يبقي معايا جوزي ويعاملني كويس ويحسسني اني أهم حد فحياته وفجأة الموت ياخده مني زي ما خد ماما مني .. للأسف دي حقيقة ولازم اتقبلها وهي الموت كلنا هنموت محدش هيعيش حتي ملك الموت نفسه هيموت . مش عايزة اعيش التجربه تاني ويبقي عندي شخص اغلي من روحي ويموت ويسيبني وحدي . مش هتحمل كده تاني ..
ومن ناحية تانيه مش عايزة اتبع هوي قلبي ولا اسيب الشيطان يتحكم فيا وتبقي علاقة محرمة وربنا يبعده عني انا والله بحاول ع قد ما اقدر منزلش عشانه وبحاول مش كل يوم اقف ف البلكونه اشوفه .. بحاول وربنا يعيني ع هوي نفسي .. تعبت ومش عارفة اقرب أو ابعد ف صليت استخارة هي الحل الوحيد اللي ممكن يساعدني .. ودعيت بعد الصلاة كتير يارب لو كان فيه خير قربه ليا وقربني ليه وخليني احس ان قلبي اختاره هو وبس وخليني احب اسمع صوته زي كل يوم وافضل دايماً انام ع صوته ف الريكوردات ال بسجلها ولو كان فيه شر ليا ابعده عني وعن قلبي وخليني ارجع زي الاول مابحبش اسمع صوته ولا اشوفه .. واستغفرت كتير ونمت .. عدي يوم واتنين وكان كل يوم حب كرلوله ف قلبي بيزيد وحب سماع صوته بيزيد اكتر واكتر بس ال اتغير اني مبقتش انزل غير كل فين وفين .. كان كل يوم احساس اننا هنكون لبعض بيزيد اكتر واكتر . عرفت ان دي من علامات الاستخارة وهي الشعور بالقبول والراحه ودي اكتر حاجه حساها.. عدي اربع ايام وحلمت حلم جميل أكدلي أكتر اننا خير لبعض . رغم ان الحلم مش شرط خالص ف الاستخارة الأهم هو راحه القلب والحمد لله كنت مرتاحة جدا جدا .. حلمت ايه بقي .. حلمت عموفتحي وكرلوله جم عندنا البيت وكانو قاعدين ف الدور الأرضي الدور الأرضي ده فيه شقه كامله بس احنا ساكنيين ف الدور التاني. ماما الله يرحمها كانت طلبت من بابا يعملنا الشقة اللي ف الدور الأرضي دي عشان أي ضيوف وكده يلاقو مكان مريح .. المهم كان عموفتحي وكرلوله موجودين ف أوضة الجلوس ال ف الأرضي وانا دخلت عليهم وكنت ماسكه مصحف وقعدت ع الكنبة ال جنب الكنبة اللي قاعدة عليها كرلوله وهو كمان كان ماسك مصحف وعموفتحي كمان كان ماسك مصحف وبيقرأ فيه مكنش واضح اوي الصوت ف الحلم اذا بيقرأ قرآن ولا ايه بالظبط .. بس المهم فتحت المصحف ع نفس السورة اللي فاتحها عموفتحي وكرلوله .. وانا وكرلوله قاعدين مش بنتكلم بنسمع عموفتحي بس .. وكرلوله بصلي كده ف كام ثانيه وابتسملي وانا ابتسمت وخلاص كده صحيت .. صحيت ع صوت آذان الفجر . صحيت فرحانه اوي وحاسة براحه مش طبيعيه . ف حسيت دي إشارة من ربنا بيطمني بيها واطمنت أكتر وسلمت أمر قلبي لربنا يفعل به ما يشاء وأكيد أقدار الله كلها خير ..
