رمضان 2021 تقريبا ده أجمل رمضان عدي عليا ف كل حياتي . اتحققت فيه دعوات كتير كنت بطلبها من ربنا .. من وأنا ف ابتدائي بحب أسمع مشاري العفاسي جداً . كنت متعلقة بصوته خاصة ف الصلاة كنت بشغل التليفزيون وأقعد أسمعه . بحب خشوعه جداً ف الصلاة وخاصة لو كان يبكي من الخشوع . لغاية اعدادي كده مكنتش بحب أسمع لغيره وكان عندي حلم إنه يبقي عندي شخص ف حياتي صوته حلو وحافظ قرءان ويصلي إمام وأنا أقوله ع سور يصلي بيها و أقف أسمعه وأنا مستمتعة كده . الحمد لله حلم الطفولة اتحقق أخيرا بلطف الله . كنت كل يوم تقريبا بنزل بوست ع الفيسبوك سورة معينة وفنفس اليوم كنت بلاقي ياسين صلي بيها ف التراويح . طبعا أقربهم لقلبي . سورة مريم وطه صلي بيهم التراويح كاملة 🥺🤍 وسورة الكهف يوم الجمعة صلي بيها كاملة برضو . تقريبا آيات كتير كنت بنزلها وبيصلي بيها فنفس اليوم . أو اليوم ال بعده الحركة دي كانت بتسعدني جداً جداً .. الحاجه التانية ال اتحققت هو إنه بقي مسموح صلاة التراويح أصلا بعد ما كانت ممنوعه . +ال مخلي التراويح جميلة كده هو ياسين طبعا. كل يوم بحس قلبي فرحان جداً بس كل ما أفتكر إنه الفرحة دي مؤقتة بحس بحزن كبير .. كلها كام يوم ويخلص رمضان وبعد رمضان امتحان الفاينال وبعدين خلاص كده السنة خلصت ! كنت بحاول أستمتع بكل لحظة عشان الله أعلم هتتعاد تاني أو لا!
كنت بدعي كتييير جداً جداً إنه ربنا يقرب المسافات بينا وياسين يتكلم عني أو حتي عمو فتحي يلمحلي بأي حاجه إنه هيتقدم حتي لو مش دلوقتي أهو أي حاجه تصبرني وخلاص إحنا مش هنشوف بعض تاني والوقت بيعدي .. كنت بلاقي أثر الدعوة دي بس بشكل غير مباشر. يعني مثلاً الآيات ال بنزلها اشمعني هي دي ال بيصلي بيها! لو مرة ولا اتنين ممكن صدفة بس دي كتير جداً . كمان ياسين كان كل يوم بعد صلاة الفجر بيقعد شوية عند سلم الصيدلية ال ع أول الشارع وال فنفس الوقت ف وش بلكونة السكن ال بقف عندها .. كان بيقعد هو وأدهم لغاية شروق الشمس كده وبعدين يمشي .. رمضان كله طول الليل من بعد صلاة التراويح كنت بحب أقعد ع السطح .. أقرأ قرءان أو أصلي قيام .. وكل كام ساعه كده أبص من البلكونه بلاقيه ف الشارع بيتمشي هو وأدهم . كنت بشوفه بالليل كتير . إن شاء الله رمضان الجاي نكون مع بعض يارب ويصلي بيا القيام كده ونتنافس ف ختم القرءان . يا الله هيبقي أحلي رمضان ف حياتي لو ربنا استجاب واتجمعنا ف بيت واحد. وأروح معاه لصلاة التراويح وأكون منتقبة بإذن الله ونمشي مع بعض لغاية المسجد وأدخل مُصلي النساء وأصلي وراه وهو الإمام وأبقي فخورة بيه كزوجي وأتفق معاه ع سُور بيصلي بيها .. يا الله حلم جميل بتمناه كل يوم يارب اكتبلي تحقيقه يارب ..
*بعد صلاة التراويح *
منه : أشرقت تعالي معايا السوبر ماركت عايزة أجيب حاجات للسحور . أشرقت: لا مش قادرة أنزل . منه: هو اي ال مش قادرة ده . مش هنزل وحدي قومي بقي متبقيش رخمه .. أشرقت: ياربي زِنانه أنا عارفة الزن بتاعك مش هخلص منك هقوم ألبس أهو ..
نزلنا السوبر ماركت وأنا مكنتش عايزة أنزل عشان مش عايزة أشوف ياسين .. بحاول أتعود ع غيابه .. وفعلاً مكنش موجود أصلاً ف الشارع لأنه كان عدي أكتر من نص ساعة ع صلاة التراويح .. ولكن اتفاجأت لما لقيته ف السوبرماركت .. السوبرماركت مش بتاع عمو فتحي لا كنت بروح لواحد غيره .. دي كانت أول مرة من وقت ما عرفت ياسين أدخل فيها السوبرماركت وهو بيشتري حاجه مش مجرد قاعد مع عموفتحي وكان طبعا بيسكت تماماً أول ما بدخل. بس المرة دي كل حاجه مختلفة .. كنت فرحانة جداً إن الصدفة جمعتنا برغم إني بحاول أبعد .. كنت أنا ومنه وياسين وبنت تاني كده رخمة من السكن بتاعنا اسمها أمل بشوفها كتير بتبصلي بنظرات غريبة كده بس أنا بطنش عادي .. كنت مبسوطة إن أخيراً هقدر أقف جنب ياسين كنت بتمني اللحظة دي من زمان .. لكن أمل منها لله بوظت اللحظة دي . أول ما شافتني وقفت هي جنب ياسين ومفيش مكان . لزقت فيه الملزقة منها لله .. اضايقت جداً ف وقفت ورا ياسين بالظبط ع بال ما هي تحاسب ع حاجتها وهو كمان يحاسب ويمشي .. المكان صغير ومش هينفع كلنا نقف .. لقيت منه بتبصلي وبتضحك ع الموقف . ف أنا ميلت عليها وقولتلها بصوت واطي وبعصبية .. والله ل أربيها الملزقة دي ..وبعدت وقفت ناحية المكان ال فيه القهوة والنسكافيه .. فجأة وبسرعة لقيت ياسين جه وقف جنبي وساب مكانه وهو بيحاول يكتم ضحكته .. هو سمعني ازاي!! وكأنه فهم احساسي إني كان نفسي أقف جنبه وأمل خدت مكاني .. ولما أمل شافت الموقف بصتلي بنفس نظراتها المستفزة دي برضو .. بس بصتلها بنظرة انتصار 😎..
هو أنا كنت عايزة اي ياربي نسكافية ولا قهوة ولا هوت شوكليت !! يوووه بقي والله مش فاكرة خدت أي حاجه وخلاص ومعرفش خدت اي .. روحت عشان أحاسب ووقفت ف مكان بعيد شوية ف ياسين جه وقف جنبي برضو 🤭 وجاب عيش وجبنه رومي وشيبسي بالجبنة المتبلة .. وكان نفس الحاجات ال احنا جبناها برضو 😅 المضحك بقي ياسين مسك الشيبسي وسابه أكتر من مرة وبعدين قال ل الكاشير وهو بيضحك خلاص يعم حاسب عليه معاهم وكان متلغبط خالص ومش عارف هو بيعمل اي .. نفس ال كنت فيه بالظبط .. الحمد لله خلصنا ومشينا في سلاام ..
