بدأت السنة الدراسية الجديدة وخلاص بقيت تالتة جامعة وكبرت بقي وعقلت المفروض يعني .. رجعت السكن اول ما دخلت الشارع بدأت كل الذكريات تيجي ف بالي وافتكرت الكيرلي وصوته ال كان بيخلي للمكان معني .. عيوني دمعت معرفش ليه . بس حاولت أسيطر ع نفسي اهو هو مشي خلاص وانا كلها سنتين واخلص جامعة ولازم اركز ف دراستي ومستقبلي . الحمد لله اني متعلقتش بيه ومكنش فيه وقت اتعلق بيه معظم الوقت مكنتش بحبه ولا بحب صوته معرفش ليه آخر الأيام اللي حبيته وكأن ربنا هو اللي حط الحب ده ف قلبي بدون اي جهد مني . بس الحمد لله الحاجه دي مش مأثرة ع حياتي ... في السكن.
منه: أشرقت وحشتيني اوي هاتي حضن كبير بقي . أشرقت : وانتي وحشتيني جدا جدا ي منه وحشتني كل حاجه كنا بنعملها سوا . حضنت منه لمدة طويلة كانت وحشاني اوي طول فترة الاجازة مكنتش عارفة اشوفها. بحب الحضن جدا بحس انه اكتر حاجه بتعبر عن صدق مشاعرك تجاه الآخر . منه: مالك ي أشرقت شكلك مرهق كده ليه . أشرقت :مفيش يا حبيبتي انتي عارفة الاجازة وملل وكده بس خلاص رجعنا انا هنا هبقي كويسة متقلقيش . منه: ان شاء الله ي قلبي هقوم بقي انضف الأوضة عشان نقعد نرغي للصبح وتحكيلي الاجازة معاكي كانت ازاي . اشرقت: اشطا هقوم انضف معاكي . منه:لا لا انتي شكلك تعبانه هنضف انا الاوضه نضيفة أصلاً مش مستاهلة. أشرقت: ماشي .. تاني يوم بالليل لقينا واحدة بتخبط علينا باب الأوضة وبتقول انها هتسكن معانا ف الأوضه اسمها شيرين . معرفش ليه اول ما شوفتها محستش براحة ناحيتها ولو اني معرفهاش واول مرة أشوفها . بس مع الوقت حبيتها وكانت كويسة معايا انا ومنه وكانت بتصلي وبتقرأ قرآن كل يوم وكنا بنساعد بعض ع الطاعة وبقينا قريبين اوي من بعض وبنحكي لبعض ع كل حاجه . بعد شهر من بدأ الدراسة ..
منه: أشرقت مالك ساكته ليه انهارده اليوم كله .
أشرقت : معرفش ليه قلبي مقبوض كده حاسة فيه حاجه هتحصل انهارده . منه: متقلقيش خير ان شاء الله . أشرقت :ان شاء الله . بس حاسة في حاجه حلوة هتحصل انهارده بس معرفش هي اي . منه: ان شاء الله هتحصل حاجه حلوة زي ما انتي حاسة قومي يلا عشان نصلي العشا بيأذن . شيرين : استنوني هتوضي بسرعة . أشرقت : ماشي يسطا يلا قومي .. واحنا مستنين شيرين عشان تتوضي حصلت آخر حاجه كنت اتوقعها تحصل .. هو اه والله هو ده صوته طب ازاي !!
أقاموا الصلاة ف المسجد وصوت الكيرلي وهو بيقول الله اكبر رن ف وداني ايوه ده صوته انا متأكدة بس ازاي ! أشرقت: منه انتي سامعة ال انا سامعاه! منه: ايه ده ده صوت الكيرلي بس ازاي مش قالوا السنة ال فاتت آخر سنة ليه ! أشرقت : معرفش .. منه:ايوه بقي وتقوليلي قلبي بيدق بسرعه وقلبي مقبوض اتاريه عشان الكيرلي جاه انهارده . أشرقت : بس بقي ي رخمه انتي بتقولي ايه.. فجأة دخلت علينا شيرين : مين الكيرلي ده اللي بتقولوا عنه ... الله ايه صوت الشيخ ده صوته جميل اوي كان فين من زمان بدل اللي بيصلي من وقت ما جينا ده . منه: اهو ده بقي ي ستي هو الكيرلي منعرفش اسم الشيخ ده ف أشرقت سمته الكيرلي . شيرين :ههههههه ايه الاسم الغريب ده اشمعنا يعني . أشرقت : معرفش بقي هي جات كده لقيت شعره كيرلي ف سميته الكيرلي وبعدين بس رغي منك ليها عايزة أسمع الصلاة . منه: اممممم حقك يسطااا .
روحت وقفت ع الشباك عشان الصوت يبقي واضح كان قلبي هيطير من الفرحة ومش مصدق اني دلوقتي بسمع صوته تاني بعد غياب . احساس قلبي ال دايماً كان بيقولي انه راجع اهو حصل فعلاً ورجع تاني معرفش ازاي وهو المفروض خلص جامعة. بس مش مهم .. المهم اني فرحانه اوي انه رجع تاني . صوته بياخدني لعالم تاني وكأنه بيقرأ قرآن بصوت من الجنة .
