حرفيا انا مكنتش فاهمه مالي وبيحصل معايا كده ليه ؟ رجلي بتخبط ف بعض من التوتر وقلبي سامعة صوت ضرباته من كتر ماهي عاليه . عمو فتحي كان ف آخر السوبرماركت بيظبط حاجه ف الارفف بتاعته والكيرلي كان قاعد ع كرسي .. هما كام دقيقة ال رجع فيهم عمو فتحي بس حسيتهم سنين مش دقايق كنت متوترة جدا وحاسة ان الكيرلي باصص عليا هو انا اه مش باصة عليه مباشرة بس عارفين احساس لما متكونش باصص ع شخص قدامك بس عارف انه عينه عليك اهو بالظبط . واللي اكدلي كده منه همستلي ف ودني بتقولي يلهوي في ايه ماله الكيرلي باصصلك كده ليه . هو لاحظ اننا شوفناه واتوتر جدا واتكسف . وفضل يلعب ف شعره شوية كأنه بيسرحه بايده وشوية بيهرش ف جبهته .. وأخيرا عمو فتحي رجع وقعد ع الكرسي جنب الكيرلي . لكن ياريته ما رجع . بصلي كده وهو مبتسم وبدون أي مقدمات ولا اي حاجه شاور ع الكيرلي وقالي اهو الشيخ ياسين اللي قولتلك عليه . ف اللحظة دي انا بصيتله بتناحة كده ال هو يلهوي انت بتقول ايه ازاي تقولي كده قدامه . والكيرلي ركز معايا كده بنظره هادية ع اساس مستني رد فعل مني . بس انا اتكسفت بغباء اتمنيت الأرض تنشق وتبلعني من الكسفة . وطبعاً انتو حفظتوني خلاص لما بتكسف بتحول لدبش فوراً . فجأة لقيتني بقوله بزعيق . ايوا يعني وانا اعمل ايه هاتلي علبة مناديل . عموفتحي ابتسم ابتسامة صفرا بتاعة الكسفة دي . والكيرلي خبي وشه بايده وفضل يقول احم احم .. عرفت اني بوظت الدنيا بس وانا اعمل ايه يعني اهي جات كده وخلاص .. خدت علبة المناديل وحاسبته وجريت بسرعه ع برا . منه: ايه اللي هببتيه ده يشيخة في حد يعمل كده . أشرقت : معرفش انا نفسي اتفاجئت من ردي والكلام ال قولته . منه: ده كلام ده دبش حضرتك يعني الراجل بيحاول يعرفك ع الكيرلي وانتي بدبشك ده تقوليله وانا اعمل ايه يعني عاوزه مناديل انتي عبيطة ي حبيبتي . أشرقت :خلاص بقي ي منه مكنش قصدي والله انا اتكسفت جدا ولما بتكسف بتحول . أصلا عموفتحي غلطان جدا ف اللي عمله ع الأقل كان حاول يقولي هخليكي تشوفيه وتتكلمو مثلا ف وجودي او اي حاجه مش يفاجئني كده . وبعدين هو ايه ال اهو الشيخ ياسين اللي قولتله عليه . كده هو هيفهمني غلط وان انا مثلا ال بتكلم عنه زي باقي البنات واني مش كويسة .. منه : بصراحة عندك حق عموفتحي فاجئني كمان . كان لازم فعلا يقولك قبلها .. بس مش مشكلة مرة تاني نبقي نفهم منه . أشرقت : ان شاء الله يلا بينا بقي عشان نشوف شيرين فين ..
ركبنا مواصلات عشان نروح الكورنيش المكان الوحيد اللي اعرف ان شيرين بتروحه لما تضايق .. طول الطريق كنت سرحانه ف ال حصل ومازلت متوترة ومش ع بعضي وصورة ياسين مش مفارقه خيالي ولا ارادياً ببتسم وحدي .. وصلنا أخيراً ومشينا لغاية نص الكورنيش تقريبا ومفيش اي أثر ل شيرين .
منه: ي أشرقت هنمشي لفين تاني أكيد شيرين مش هنا . أشرقت : استني بس ممكن تكون ف آخر الكورنيش بعيد عن الدوشة انا حاسه انها هنا... فعلا بعد شوية لقينا شيرين وكانت قاعدة وحدها بتعيط وشكلها كأنه في مصيبة حصلت . أشرقت : شيرين أخيرا لقيناكي دوختينا معاكي . شيرين :انتو عرفتو مكاني ازاي ؟ أشرقت : مش مهم قومي بقي خلاص . منه: مالك ي شيرين بتعيطي ليه وكنتي فين من الساعة ٨ الصبح قلقتينا عليكي . مردتش شيرين وعيطت أكتر . أشرقت : خلاص بقي ي منه لما نرجع السكن نتكلم قومي ي شيرين يلا..
في السكن . أشرقت : اهدي ي شيرين خدي اشربي واهدي . شيرين : شكراً انكم نزلتو تدوروا عليا وآسفة تعبتكم معايا . منه: بس ي عبيطة متقوليش كده احنا اخوات . مالك بقي حصل ايه ؟
شيرين : أحمد خطب انهارده . أشرقت :أحمد مين؟ شيرين : واحد حيوان كنت بحبه وكنت فاكرة انه بيحبني زي ما بحبه بس طلع بيتسلي بيا مش أكتر . منه: اممم انتي عرفتيه ازاي أصلا ومن امتي مع بعض ؟ شيرين :من الكلية من تلات سنين عرفته لما كنت ف سنه أولي . كنا بنخرج مع بعض وكان بيعمل حاجات كتير تأكد انه بيحبني هو أصلا كذا مرة قالي انه بيحبني ولما كنت بقوله يجي يخطبني رسمي كان بيتهرب . لغاية امبارح لقيته باعتلي مسدج بيقولي انه استقر ف شغله خلاص من فترة وهيخطب بنت مديره ف الشغل وانه خلاص مبقاش يحبني او محبنيش اصلا كان بيقضي وقت معايا وخلاص .. أشرقت :كل ده ي شيرين ومكنتيش بتحكي . هو ده بقي ال كان مخليكي بعيدة عن ربنا وعن الصلاة ولبسك ال بتلبسيه ده . اكيد طبعاً مكنش بيحبك ال بيحب حد بيقربه من ربنا مش يبعده . العلاقة الحرام عمره ما ربنا هيبارك فيها مهما كان.. شيرين : عندك حق انا ربنا بيعاقبني عشان عصيته كتير اوي . بس خلاص فوقت والله وفهمت . انا مش ببكي ع أحمد خليه يغور . انا بس زعلانه ع نفسي وعلي الذنوب ال عملتها دي كلها . أشرقت : متزعليش ي حبيبتي ربنا هيعوضك . الحمد لله انك معترفه بالغلط وجواكي ندم . شيرين : ندم كبير اوي والله بتمني ربنا يغفرلي كل البلاوي ال عملتها . أشرقت : هيغفرلك ربنا كبير قومي اتوضي وصلي ركعتين توبة لله ..
