كنت قاعدة بعيط وأوضة ضلمة ومش شايفة حاجه قدامي .. مش حاسة بجسمي كأني متكتفة وكل جزء فيا بيوجعني كأني وقعت من فوق جبل .. وألم وكأن فيه إبر مغروزة فكل شبر في جسمي وأنا بنادي علي مريم عشان خايفة لوحدي وهي راحت فين .. أنا فاكرة آخر حاجه انها كانت هنا كنا قاعدين وبنضحك وكل حاجه كانت جميلة هو حصل اي ومريم فين !!؟ مريم .. يا مريم .. بنادي كتير وصوتي مش مسموع أصلاً من التعب .. معرفش أعمل اي أنا لازم أقوم أشوف مريم فين قلبي بيقولي انها محتاجة ليا دلوقتي . بس هقوم ازاي وأنا متكتفة كده وطاقتي راحت كأني كنت في حرب .. يارب ساعدني ياارب .. تلقائياً بدأت أدعي وأردد آية الكرسي لغاية ما لقيت نفسي اتفكيت وقادرة أقوم بس بصعوبة .. كانت الأوضة كبيرة جداً وضلمة جداً ومخيفة ومفيش غير أصوات أنفاس حواليا وبس .. بصعوبة قدرت ألاقي الباب أخيرا وخرجت منه ومشيت مسافة كبيرة وأنا بنادي علي مريم وبرضو مش بترد .. فجأة لقيت باب تاني ودخلت منه ومشيت ولقيت باب تاني وهكذا كأني في متاهة ومش عارفة أخرج منها .. قعدت ع الأرض بعيط في يأس ونفسي بيروح خلاص .. فجأة سمعت شخص بيضحك ضحكة شريرة وبيقولي هههههه مش هتعرفي تخرجي من هنا قولتلك كده كتير بس انتي اللي غبية وبتحاولي محاولات فاشلة .. انتي هنا معايا من زمااان اوي وهتفضلي هنا لغاية ما تموتي وانتي في العذاب ده .. زعقت فيه وقولته هعرف أخرج من هنا حتي لو هتحبسني عمري كله هخرج ولو كانت آخر لحظة في حياتي .. قولي مريم فين ؟ والله لو عملت حاجه فيها مش هرحمك .. الشخص : هههههههه لو عملت ؟ هو أنا لسه هعمل .. أنا عملت وخلصت .. وفجأة باب تاني اتفتح وخرجت منه مريم وهي ع نفس حالي بل وأسوأ .. حضنتها وأنا بعيط وبحاول أصحيها بس مش بتصحي .. مريم اصحي أنا هنا مريم أنا جيت أهو اتأخرت عشان ألاقيكي بس محدش هيقدر ياخدك مني .. الشخص : ههههههه خلاص بقي رااااحت .. دورك انتي الجاي بس لسه شوية عليكي ...
صحيت من الكابوس ده ومش عارفة آخد نفسي وبعيط وبنادي علي مريم . الكابوس ده بيتكرر كتير جداً بيبقي نفسي أول ما أصحي تكون مريم موجودة بجد وآخدها ف حضني .. بس هي خلاص مبقتش موجودة ... ياارب اربط علي قلبي ... الكابوس ده لوحده بيخليني مدة طويلة في حالة اكتئاب ..
بعد كام يوم روحت ل منه في بيتها ..
منه:وأخيراً يا ست أشرقت تواضعتي وجيتي تقعدي معايا شوية .. من وقت ما ياسين نزل ابتهال النفس تشكو وانتي شايفة نفسك علينا 😉 . أشرقت : يا سلااام!! منه: زمبئولك كده يا أختي .. أشرقت :يستي اسكتي بقي شكلك مودك عالي انهارده . منه: وانتي مالك بقي شكلك مش تماام وشك بيقول في حاجه .. أشرقت:لا مفيش حاجه منمتش كويس بس .. منه:امممم لا مش ده السبب احكيلي مالك ؟ أشرقت: مفيش يبنتي هتزعليني بالعافية !! منه: ولو اني متأكدة انك مش كويسة بس وقت ما تحبي تحكي أنا موجودة .. أشرقت: عارفه أنا مليش غيرك أصلاً .. المهم قوليلي مين بقي صوت الشيخ الحلو ال كنتي منزلاه ستوري ده . غريبة عمري ما سمعت الصوت ده في السكن عندنا .. منه: ها .. لا ده مش في السكن .. أشرقت: أومال .. منه: ده من المسجد ال ع أول شارعنا .. أشرقت: امممم منا بجيلك دايماً عمري ما سمعته بس صوته حلو .. منه: اها هو ليه سنة بس هنا تقريباً ومش بيصلي كتير كان مسافر القاهرة ورجع .. أشرقت : الله الله مركزة في التفاصيل انتي بقي 😉. منه: لا مش مركزة ولا حاجه عادي .. أشرقت: يا سلاام طب عيني في عينك كده .. منه: يبنتي اسكتي بقي .. أشرقت: تعالي في حضن أخوك يا فواز . احكيلي بقي مين ده واسمه اي وعرفتيه ازاي وفين ؟ منه:😂😂 ما بالراحة اي كل ده ! أشرقت: احكي بقي يلااااه ..
منه: اسمه خالد هو أكبر مني ب 3 سنين . ال عرفته انه أهله من هنا أصلاً وكان ساكن في شارعنا زمان . بس من وهو عنده خمس سنين أهله سابو البلد بسبب مشاكل في عيلتهم وبعدين رجعو هنا تاني من سنة .. وصوته جميل في القرءان وبيصلي أحياناً هنا في المسجد . وبس .. أشرقت: شافك ازاي بقي ؟ منه: مش فاكرة بالظبط بس أول مرة كنت رايحة السكن ووقتها كان ع بداية السنة وكان الصبح بدري ومعايا شنطة هدومي وحاجات كتير وانتي عارفه مش معايا اخوات ولا حد يوصلني عند موقف المواصلات وبابا طبعاً في الشغل فروحت وحدي .. وبس هو كان ع أول الشارع ولما شافني لقيته بص عليا بتركيز كده الصراحة اتعصبت ف الأول بس طلعت نيته سليمة وقالي هاتي الشنطة يا آنسة أوصلهالك لآخر الشارع .. أشرقت: طبعاً دبش زي صاحبتك وقولتيله لا ! منه: لا😁 الشنطة كانت تقيلة الصراحه وأنا كنت صاحية بدري ومش قادرة أمشي بطولي فلقيتها فرصة 😅 أشرقت: 😂😂ده أنا فكرتك هتعملي أي رد فعل كده . منه: منا اتصدمت والله ومعرفتش أرد . مش متعودة حد يشيل حاجه مني كنت دايماً أبقي ماشية بحاجات تقيلة وبتمني حد يقولي عنك يا آنسة .. أشرقت: وأهو حصل .. ها بقي شوفتيه تاني فين .. منه: يبنتي احنا طول السنة ف السكن أصلاً ف.. بشوفه صدفة يعني وبس ..لكن معرفش بقي شعوره اي وكده ؟ أشرقت: يعني مش بتلاحظي انه مركز معاكي وكده؟! منه: لا بلاحظ بس يمكن صدفة يعني . أشرقت: هلااا والله مين ال بقي يقول صدفة أهو .. يا أشرقت لو قلتي صدفة تاني هعملك بلوك ومفيش حاجه صدفة ونينينينيني . منه: 😂😂 خلاص يستي مش صدفة .. أشرقت: أيوة طبعاً مش صدفة اسألي قلبك يا منه . شعور القلب عمره ما هيخدعك .. قلبك هتلاقي بيقولك علي ال بيحبك بجد وال بيمثل انه بيحبك . غالباً كل ال بتحبيهم بيحبوكي وكل ال مش مستلطفاهم هما كمان كده .. منه:عندك حق .. منك لله يا أشرقت خليتينا نرغي كل ده ونسيت أجبلك حاجه تشربيها .. أشرقت: حاجه أشربها هو أنا ضيفة يبت ولا اي ! دنا أقوم أعمل لنفسي كمان 😌🦦 اقعدي بس عايزة أقعد معاكي انتي وحشاني جداً ..
روحت البيت وعملت شغل البيت وندي ساعدتني فيه وقعدت ف أوضتي بسمع قرءان بصوت القطامي وبحاول أبقي كويسة بس مش عارفه أنسي ال حصل .. فجأة لقيت ندي بتخبط ع باب أوضتي ..
أشرقت: تعالي يا ندي .. ندي: عملتلنا فشار أهو ال بتحبيه وتعالي نقعد نتفرج ع كارتون زي ما بتحبي .. أشرقت:لا مليش نفس أنا هنام . ندي:تنامي اي بس أنا عملت عشانك .. أشرقت: مش قادرة والله يا ندي معلش .. ندي: والله لو مقومتيش معايا وسيبتي أوضتك والكآبة دي مش هكلمك تاني يا أشرقت .. أشرقت: حاضر أهو ..
اتفرجنا ع فيلم الجميلة والوحش وأكلنا فشار وحاولت أخبي حزني قدام ندي وضحكنا واتبسطنا .. إلي أن أحلام صحيت من النوم ..
أحلاام : الله الله دلوقتي بقيتو سمن علي عسل ؟؟ وبتضحكو مع بعض . إيه اللي بتعمليه ده يا ست ندي . ندي: ماما .. مفيش حاجه قاعدين بنتفرج ع التليفزيون .. أحلام: تليفزيون اي ال الساعه 1 ده قوموا شوفو البيت محتاج اي . وانتي يا ست أشرقت قومي اغسلي المواعين تلاقيكم بهدلتو المطبخ بالعك ال عاميلنه ده .. ندي:مفيش مواعين يا ماما اتغسلو من بدري . أحلام : ومين بقي ال غسلتهم .. ندي: الله ..مش مهم المهم اتغسلو وخلاص .. محمود:اي الدوشة دي كلها بتزعقي ليه في الوقت ده يا أحلام: أحلام : هاا لا مفيش بس عشان البنات سهرانين لوقت متأخر وهما بيصحو بدري عشان يلحقو ينامو ..
محمود: اها طيب الكلام يبقي بهداوة مش تصحو الجيران كمان .. قومو نامو يا بنات كفاية سهر كده .. أشرقت:حاضر يا بابا .. ندي :حاضر يا بابا هنصلي قيام جماعه أنا وأشرقت وهنام ع طول .. أحلام : بقيتو مشايخ دلوقتي . محمود: يا ستي سيبيهم ده بدل ما تغيري منهم .. اي رأيكم نصلي كلنا ونقعد نقرأ قرءان لغاية صلاة الفجر .. ندي: الله يا بابا فكرة جميلة أوي طبعاً ..
