عدي حوالي نص شهر 2 ف اضطريت انزل البيت عشان كنت محتاجه شوية حاجات من بيتنا .. المهم لقيت شيرين بعتالي ع الواتساب بتقولي ..
شيرين : أشرقت عامله اي . أشرقت:الحمد لله وانتي ومنه عندك عاملين اي . شيرين: كويسين الحمد لله . عارفه كرلوله انهارده كان واقف كتير مستنيكي . أشرقت : ياربي بزعل والله لما بيقف كده ومبكنش موجودة يلا تتعوض ان شاء الله . شيرين: ان شاء الله بقولك ايه طب ما تحاولي كده تلفتي نظره شوية عن كده أكيد يعني مش هيفهم انك لو نزلتي السوبر ماركت هيبقي عشانه . انتي مبتنزليش كتير أصلاً وده هيخليه يتأكد انك بتنزلي عادي وانه مش فارقلك ! أشرقت: معرفش بقي يفهم اللي يفهمه اعمله اي يعني ؟ شيرين: مش انتي معاكي صفحة الفيس بتاعته ؟ أشرقت:اه معايا طبعا شيرين: طب ما تحاولي كده تعملي لايك مثلاً وكأنه بالغلط او ادحلي كلميه اسأليه هو ليه عموفتحي قالي اهو الشيخ ياسين اللي بقولك عليه وافهمي منه كل حاجه .. أشرقت: لاء طبعاً انا معملش كده هو ايه اللي لايك بالغلط دي حركات كلبوبات اصلاً وبعدين اكلمه ليه بتاع اي يعني .. حرام اننا نكلم ومفيش أي حاجه رسمية بينا ده شرع ربنا .. ربنا مقالش نعمل كده .. هو المفروض اللي يحاول عشاني مش انا . لو ربنا مقدرنا لبعض هنكون لبعض مهما طال الوقت لكن لو مش مكتوبين لبعض خلاص كده لو عملت ايه مش هنكون لبعض .. شيرين: ايه يبنتي قناة المجد للقرآن الكريم اللي فتحتيها فوشي دي انا مقولتش حاجه يعني منتي كمان لازم تكلميه وتفهمي منه .. أشرقت: مين قال لازم !! لاء مش هيحصل طبعاً . شيرين: براحتك انا كنت حابه اساعدك بس بدل الحيرة ال انتي فيها دي . أشرقت: عايزة تساعديني ادعيلي وبس كده . شيرين: ربنا يسعدك ان شاء الله..
يومين بالظبط ورجعت السكن تاني .. وكنا قاعدين انا ومنه وشيرين بنتكلم .
منه: سمعتوا عن الخبر المفزع ده . أشرقت: خير في ايه ؟ منه: بيقولوا في فيروس منتشر ف الصين ومعدي جداً وعدد كبير اتصاب بيه . شيرين: فيروس ايه ده عرفتي الخبر من فين انتي؟ منه: فيروس كورونا لقيت بيدجات كتير ع الفيس بتتكلم عنه .. وانه احتمال العالم كلو يتعدي منه لان في مصابين كتير من الفيورس من الصين سافروا بلاد تاني وبكده العدوي هتنتشر اكتر ف العالم كله . وهو مش مجرد فيروس ده خطير جدا ونسبة الوفيات بيه عاليه اوي وكتير من الدول العظمي منعت الطيران والدنيا واقفه بسببه . أشرقت: يلهوي كل ده ربنا ينجينا ويشفي كل مريض . شيرين: يلهوي ده ع كده ممكن الدراسة تتأجل بسبب الفيروس ده . منه: احتمال كبير بس لسه مفيش تسجيلات اصابه بيه ف مصر ربنا يستر .. أشرقت: يارب لاء ياارب ميحصلش كده شيرين: شوفتي اهو الدراسة هتتأجل والدنيا هتقفل وكل واحد منكم هيرجع بلده عشان تعرفي بس ان عندي حق لكا قولتلك كلميه وافهمي منه . أشرقت: لاء مش هيحصل حاجه ان شاء الله. منه: تكلمي مين هو في ايه!! شيرين: قلت ل أشرقت تكلم كرلوله ع الفيس تفهم منه حوارات عموفتحي دي وتتعرف عليه وكده .. منه: وانتي عملتي كده فعلاً ي أشرقت .. أشرقت : لاء طبعاً مستحيل اعمل كده مقدرش اكلمه ومفيش حاجه رسمية بينا بلا اتعرف عليه بلا نيلة ده حرام أصلاً .. منه: ايوا جدعه الحمد لله ..
عدت الأيام وانا جوايا خوف كبير ان فعلاً الفيروس ده محدش يعرف يسيطر عليه والدراسة تتأجل ومعرفش اشوف ياسين تاني .. يعني ياربي لما قلبي حب بجد العالم كله تحصل فيه مصيبه .. يااارب هونها عليا .
كنا قاعدين انا ومنه وشيرين بنتكلم . منه: للأسف زي ما قلتلكم الاصابات بتزيد وحتي ف مصر منتشر جدا ف كل المحافظات ومش بعيد خالص تلاقي حد ف الشارع او الجامعه مصاب واحنا منعرفش فلازم نلبس الكمامات طول م احنا ف الشارع . واحتمال كبير اوي الدراسة تتأجل .. شيرين: نفس اللي توقعته بالظبط . انا قرأت ان الفيروس بدأ من الصين بسبب اكلهم الخافيش . أشرقت: لاء معتقدش ده السبب ما طول عمرهم الصينيين بياكلو كل الحيوانات ومحصلش حاجه . الموضوع اكبر من كده بكتير . منه:ازاي يعني ؟ أشرقت: معرفش ميهمنيش مين سبب الفيروس يهنني دلوقتي ان الدراسة متتأجلش انا مبحبش قعدة البيت ومعني كده مش هعرف اشوف كرلوله زي كل يوم . يعني طول حياتي ولا حبيت ولا اتنيلت ع عيني واول ما احس في حد مهم عندي الدنيا كلها تتقلب ونبعد عن بعض ده ايه الغلب ده ياربي.. شيرين: يبنتي قلتلك طول منتي عارفه الاكونت بتاعه تقدري تكلميه ف اي وقت عادي وتفضلو تتكلمو ما كل الناس بتحب وبتتعرف ع بعض وبيتكلمو عادي . أشرقت: وانا مش من الناس دي قلتلك خلاص بقي متتكلميش ف الحوار ده تاني . انا هقوم عشان ترتاحو .. منه: استني بس رايحة فين . أشرقت: رايحة اقعد ع السطح يعني هروح فين بالليل دلوقتي . منه : استنيني طيب هجيب طرحة وجاية . أشرقت: لاء متجيش عايزة اقعد وحدي ..
طلعت وحدي ع السطح وفضلت ابكي كتير مش عارفه اوقف دموعي مش متخيله ايه اللي هيحصل بعدين قلبي مش مطمن خالص ومعرفش انا ليه زعلانه للدرجه دي حتي لو مش هقدر اشوف كرلوله تاني طيب ليه كل الحزن ده اللي ف قلبي !! مفيش ربع ساعه ولقيت منه جات .
منه:مش قولتلك استنيني .. ايه ده انتي بتعيطي ليه دلوقتي ؟ أشرقت:معرفش .. تفتكري خلاص كده كل حاجه خلصت ؟ تفتكري هو مش ليا وربنا بيبعدنا عن بعض ! تفتكري انه مكنش معجب بيا ولا حاجه وكان بيروح عادي عند عمو فتحي وكان بيقف ف الشارع لوحده كده عادي مش عشاني !؟؟
