في سكن أشرقت ومنه..
أشرقت: بقولك اي انا عايزة اروح مشوار كده وانتي هتيجي معايا هننزل بعد ما نصلي العشاء ان شاء الله ..
منه: وه!! ده أمر بقا حتي مش بتسأليني لو فاضية او لاء؟ أشرقت: عشان عارفاكي حتي لو مش فاضية هتفضي نفسك عشاني يسطا .. منه:حصل .. أشرقت: اشطا اتفقنا بعد ما نصلي هننزل ع طول . منه: اشطا. بس هنروح فين .! اممممم حاجه خاصة بياسين؟ أشرقت: لاء طبعاً اي العبط ده ! هروح لواحده كده انا مترددة جداً بس حساها محتاجه ليا معرفش ليه؟ منه: مين دي؟ أشرقت: هقولك لما ننزل قومي بقي البسي عشان نصلي وننزل منتأخرش .. منه:ماشي ..
لبست دريس اسود ف اسود وخمار اسود وكل حاجه اسود مش كآبه .. بس انا بحب اللون الاسود جداً.. بعد ما خلصت لبس طلعت ع السطح ومعايا سجادة الصلاة والفون عشان اسجل صوت كرلوله ف صلاة العشا.. وكالعادة واقفة ف البلكونة مستنية كرلوله ع بال ما يجي .. يمكن اكتر مشهد ف حياتي كلها بشوفه بيسعدني شكله وهو جاي ع اول الشارع وداخل المسجد .. تفاصيل كتير ف الكام ثانيه دول بتسعدني .. اول ما بشوفه ببتسم لا إرادياً وبنسي حرفيا كل حاجه مضايقاني .. ممكن كنت قبل ما اشوفه مخنوقة واليوم كله عياط بس اول مابشوفه مودي بيتغير 180° ابتسامته لوحدها قادرة تنسيني كل همومي وكأن فيه سحر ف ابتسامته!! بالصدفة كمان كرلوله كان لابس بنطلون اسود وتي شيرت اسود وكله اسود ف اسود .. برغم ان دي اول مره انا وهو نلبس كله اسود كده .. فرحت معرفش ليه 😅 ..
وأخيراً بدأت الصلاة وياسين كل يوم صوته بيبقي أجمل وأجمل .. أول ركعه كانت من سورة البقرة والركعة التانية كانت من سورة آل عمران والسورتين دول من أقرب السور لقلبي .. ده غير اني قرأتهم ف ورد امبارح . وانا بقرة سورة آل عمران عند الآيات ..
(رَبَّنَآ إِنَّكَ مَن تُدۡخِلِ ٱلنَّارَ فَقَدۡ أَخۡزَيۡتَهُۥۖ وَمَا لِلظَّٰلِمِينَ مِنۡ أَنصَارٖ . رَّبَّنَآ إِنَّنَا سَمِعۡنَا مُنَادِيٗا يُنَادِي لِلۡإِيمَٰنِ أَنۡ ءَامِنُواْ بِرَبِّكُمۡ فَـَٔامَنَّاۚ رَبَّنَا فَٱغۡفِرۡ لَنَا ذُنُوبَنَا وَكَفِّرۡ عَنَّا سَيِّـَٔاتِنَا وَتَوَفَّنَا مَعَ ٱلۡأَبۡرَارِ . رَبَّنَا وَءَاتِنَا مَا وَعَدتَّنَا عَلَىٰ رُسُلِكَ وَلَا تُخۡزِنَا يَوۡمَ ٱلۡقِيَٰمَةِۖ إِنَّكَ لَا تُخۡلِفُ ٱلۡمِيعَادَ
فَٱسۡتَجَابَ لَهُمۡ رَبُّهُمۡ أَنِّي لَآ أُضِيعُ عَمَلَ عَٰمِلٖ مِّنكُم مِّن ذَكَرٍ أَوۡ أُنثَىٰۖ بَعۡضُكُم مِّنۢ بَعۡضٖۖ)
بحب تكرار كلمة ربنا هنا جداً جداً وبعدها فاستجاب لهم ربهم 💙💙 وانا بقرأها امبارح اتمنيت لو كرلوله يقرأ نفس الآيات دي وحاولت أقلد صوته وانا بقرأها مع نفسي .. سبحان الله ربنا استجاب لدعوة عابرة كده وفعلاً ياسين صلي العشا بنفس الآيات دي برغم انها اول مرة يصلي بيهم من سنة ونص من أول ما عرفته .. حسيت اني طايرة من الفرحة وصوته كان جميل وكأنه صوت من الجنة والله .. وفنفس الوقت حسيتها اشارة من ربنا انه هيستجيب ويجمعنا مع بعض اذا كان استحاب لدعوة وأمنية بسيطة جداً زي دي ف ازاي مش هيستجيب لدعوة قلبي ال بلح بيها ليل نهار !! حاشاه سبحانه ..
استنيت ياسين يخرج من المسجد ونزلت.. ال ما فتحت باب السكن بص ع الباب وشافني وابتسم ابتسامة فهمت منها عشان انا وهو لابسين اسود فضحك 😅 كانت اول مرة يشوفني ويبتسملي كده بطريقة واضحة.. مقدرتش ابص عليه وعملت نفسي مخدتش بالي .. كان واقف مع واحد شكله كان بيسأله عن حاجه.... كان كرلوله وشه للسكن بتاعي والولد ضهره ليا وأدهم مش معاه الحمد لله ... كل ما بيكون أدهم معاه مش بعرف ابص عليه خااالص عشان أدهم بيركز معايا وكل حركه بعملها معرفش ليه منه لله 😒..
وقفت انا ومنه شوية مش بنعمل حاجه بس كنت عايزة اقف عشان اشوف كرلوله وبس.. كان بيكلم الولد وهو مبتسم جداً بس صوته مش مسموع هموت واسمع صوته وهو بيتكلم عادي كده مش بيقرأ قرءان.. برغم ان المسافة بينا قريبة جداً بس معرفتش اسمع صوته... يدوب وقفت دقيقتين بس ومشيت.. محدش غيرنا كان ف الشارع ف عشان محدش يفهمنا غلط ..
منه: ها بقي هنروح فين؟ اشرقت : اممم عايزة اروح لندي أختي السكن بتاعها.. منه: ندي بنت أحلام مرات باباكي .. مش هي وبنتها بيكرهوكي وبيعاملوكي وحش؟ أشرقت:ايوه حصل . بس انا مبعرفش اكرهم .. ندي لسه صغيرة ودي اول سنة ليها ف السكن وخايفة عليها حد يستغلها او تصاحب بنات مش كويسين لقدر الله او يحصلها حاجه وحشة.. انا كنت عايزاها معانا فنفس السكن بس أحلام مرضتش واقنعت بابا تخليها بعيد عني.. بس انا حاسة انها محتاجه ليا دلوقتي حاسة فيها حاجه معرفش هي اي !! منه: انتي طيبة اوي يا أشرقت بجد مشوفتش حد ف نقاء قلبك ده بعد كل ال بيعملوه فيكي لسه مش عارفه تكرهيهم .. أشرقت: مهما حصل هي ندي كويسة والله بس مامتها مأثرة عليها شوية ..
روحنا سكن ندي هو مكنش بعيد عن السكن بتاعي بكتير .. اول ما روحت وشوفت ال بيحصل ف ندي اتصدمت وقلبي وجعني عليها وعرفت ان احساس قلبي مبيكدبش هي فعلاً كانت محتاجه ليا ..
رنينا الجرس وواحدة من بنات الشقة فتحت . أشرقت: لو سمحتي دي شقة ندي محمود؟ البنت :اه هي بس هي مش موجودة دلوقتي نزلت تشتري حاجه .. أشرقت: اممم هتتأخر طيب ؟ البنت:لاء مش هتتأخر . أشرقت : طيب بعد اذنك ممكن ندخل نستناها جوه! البنت بصلتنا بقرف كده من فوق لتحت وقالت.. اتفضلو يختي منك ليها.. اسلوبها ونظراتها عصبتني جداً بس حاولت اهدي عشان مش معقول هتخانق معها عشان نظرة ! بعد ما دخلنا حسيت البيجامة ال لابساها البنت دي بتاعت ندي ايوه هي انا عارفاها كويس .. بس قلت بلاس سوء الظن ممكن تكون معاها زيها عادي ! بس بعد شويةة فهمت انه مش عادي خاالص .. واحدة تاني كانت جاية من برا ولابسة طقم ندي برضو !!؟ وشنطتها وتقريباً كل حاجه لابساها بتاعت ندي! استغربت وسألتهم .. أشرقت: هو انتو ليه لابسين هدوم ندي!! البنت : ومنلبسش ليه يعني احنا حرين! أشرقت:حرين ازاي يعني.. منه عرفت اني اتعصبت فحاولت تهدي الوضع .. منه: عادي ي أشرقت يمكن اصحاب وبيلبسو من بعض عادي يعني .. البنت: بضحكة مستفزة هههههه اصحاب اه !! قلبي مارتحش ليهم البنتين دول ابداً وحسيت فيه حاجه مش طبيعية بتحصل بس انا مش عارفه افهمها !!؟
