ع الجانب الآخر ..
ياسين يهاتف صديقه أدهم ..
ياسين : ازيك يلاه يا أدهم طمني عنك . أدهم: الحمد لله يصاحبي بخير والله انت أخبارك اي انت وأسرتك . ياسين : في نِعَم كتير يا حبيبي مش ناقصني غير اني أشوفك والله واحشني ياض ووحشتني غلاستك طول النهار .. أدهم : طبعاً طبعاً لازم أوحشك أصل انا ال زيي يتحب بصراحه يستاهل الناس تفتقده في غيابه أكيد يعني .. ياسين : 😂😂😂تصدق عندك حق والله .. أدهم: والله انت ال واحشني اوي يصاحبي وبجد بجد نفسي أشوفك . مش عارف أقنعك ازاي تيجي تشتغل معايا هنا ف السعوديه .. ياسين : انا محدش يقنعني بسهوله يمعلم .. أدهم: يبني انت بجد غريب .. شغلنا هنا ما شاء الله شغال حلو انسي بلدنا دي ال زينا ملوش أكل عيش فيها تعالي بس شوف المكانه والاحترام ال الناس بتعامل بيه المهندسيين المعماريين ال زينا .. في مباني كتير هنا والشغل شغال زي الفل ومرتب شهر بمرتب سنه في بلدنا .. ياسين : عارف والله يا أدهم بس قلتلك قبل كده أمي واخواتي مقدرش أسيبهم كده وحدهم .. ملهمش غيري أنا عارف عمرهم ما هيعرفوا يتصرفوا فأقل حاجه وأنا بعيد كده .. أدهم : ربنا ييسر أمورك يسطا .. أنا الحمد لله كلها سنه تاني وهنزل أشوفك .. ياسين : ياااه سنه كتير اوي يسطا .. أدهم: هتعدي هوا والله .. يعم عايز أعمل قرشين عشان أنزل أتجوز بقي وأنبسط وأبل الشربااات .. ياسين : 😂😂ربنا يصبرها عليك والله ..
* عصراً في منزل ياسين *
أم ياسين : مريم افتحي الباب بيخبط . مريم حاضر يا ماما رايحه أهو .. مريم : ياسين حماتك بتحبك يلا خد شاور سريع عشان نتغدي .. من بدري ماما محرمه علينا اللقمه وسيبانا بالجوع عشانك يسيدي ..
ياسين : اي ده حد يستقبل حد كده .. مريم : خش يسطا منتاش غريب يعني .. ياسين 😂😂دخلت يسطا . اي ده أميره موجوده عندنا كمان وأنا أقول البيت منور ليه أول ما دخلت .. أميره : حبيبي حياتنا كلها منوره بيك .. مريم : الله الله !! وأنا ؟! . أم ياسين : يبت اسكتي بقي سيبي أخوكي يرتاح من شغله الأول بطلي رخامه .. ياسين : سيبيها يا ماما تتدلع براحتها هي يعني لو مش هتتدلع عندنا هتتدلع فين .. مريم محتضنه ياسين : أخويا وربي.
ياسين: 😂😂حاسك واحد صاحبي والله حبيبي يسطا .
ياسين : اومال جوزك فين يا أميره مجاش يتغدي معانا انهارده ؟ ..أميره : وصلني وراح شغله قالي عشان ناخد راحتنا في البيت بقالي زمان مش بزوركم ف حب يسيبنا براحتنا .. ياسين: ابقي سلمي عليه .. هقوم أستحمي وأجيلكم نتغدي .. مريم : أستحمي !! اسمها آخد شاور يا بشمهندس .. ياسين : يبااااي اسكتي بقي ....
*بعد مرور أسبوع *
كانت الحياه في منزل أشرقت ليست علي ما يرام .. وكأن الحياه انقلبت رأساً علي عقب .. كان الجميع يعاني بشكل مختلف .. ندي تعاني من صرخات وآلام طوال النهار وكوابيس طوال الليل وصرخات فزع الليل بأكمله والجميع مستيقظ خوفاً أن يحدث مكروه لها .. أشرقت تعاني من آلام تفتك بجسدها .. وكوابيس لا تنقطع لكنها صامده كالجبال كتومه لأبعد الحدود لا يشعر بها أحد .. ازداد أرقها بسبب مكبر الصوت الخارجي الذي يضعه والدها بصوت عالي ف الدور الأرضي من المنزل .. عاملاً بما قاله الشيخ أحمد .. طوال الليل تستمع لتلك الرقيه المخصصه لتحصين المنزل .. ومعها يزداد الأمر سوءاً من آلام وأرق .. كانت تجد راحتها في مناجاة ربها ليلاً ..
أشرقت : ياااارب وحدك عالِم الشهر ده من أول ما جه الشيخ أحمد مر عليا ازااي . يارب أنا مش عارفه أقول ايه . أنا والله راضيه بالابتلاء ده بس ياربي ابتلاء صعب
. صعب جدا.. يمكن لسه الوقت بدري اوي اني اقول كده .. بس يارب مش قادره أكمل .. حاسه حياتي كلها ادمرت .. كوابيس بتزيد وألم فكل شبر فجسمي وأرق زياده عن الطبيعي .. يارب انا ليا ٣٠ ساعه صاحيه ومش عارفه أنام .. نفسي أنام وأريح دماغي من كل حاجه الفتره دي .. ياربي أنا من أولي اعدادي والأرق ده عندي لغاية ما اتخرجت أهو ولسه زي ما هو بل اسوأ .. طب يارب هعمل اي وبكره المفروض معايا حلقة قرءان الصبح الساعه ١٠ . طيب هعمل اي وهنام امتي واحنا بقينا بعد الفجر أهو .. تعبت من كل مره بفضل فيها صاحيه بالساعات كده وأحفظ قرءان طول الليل وأنا تعبانه جسدياً وعقلياً ونفسياً وفي الآخر قبل معاد الحلقه بنص ساعه أنام وأصحي بعد معاد الحلقه ما يخلص بالظبط ؟ كأن ف حاجه بتمنعني أروح .. يارب أنا بحبك وبحاول أتقرب لك بكل عمل يرضيك لكن مش عايزه الاحساس ده جوايا يكبر ويسيطر عليا .. مش عايزه احساس انك مش عايزني ومش بتحبي ولا بتقربني ليك ولا بروح مجلس يذكر فيه اسمك .. مش عايزه أسيب دماغي للشيطان .. يارب ساعدني يارب .. أنا عارفه إنك بتحبني وبتساعدني في كل حاجه بطلبها منك .. مليش غيرك ياربي أتذلل له وأدعوه وأنت سبحانك قلت أدعوني أستجب لكم .. يارب دعوتك كما أمرتني فأجب دعائي كما وعدتني .. يارب أنام ولو ساعتين ع بعض وأقدر أروح حلقة القرءان أنا ليا حلقتين مش بروح .. يارب ساعدني ...
