بعد ما سمعت الريكوردات ال بعتتهم شيرين بصوت كرلوله وسمعت كلامه .. بكيت . بكيت كتير مش من كلامه لاء عشان مكنتش عاوزه ده يحصل ولا إن حد يحسسه اني بفكر فيه . انا متأكدة ربنا هيعملي الأنسب ليا سواء بقربه او بعده .. واتعصبت اكتر لما قال مش هينفع اتعرف عليها ونتكلم وكده عشان ده حرام وانا متربي ع كده وديني بيأمرني ده .. طب منا كمان عارفه انه حرام وعمري ما اعمل كده .. كذا مرة شيرين تضغط عليا وتقولي كلميه وانا ال برفض عشان حرام .. مش كرلوله بس طول فترة دراستي من زمان بلاقي اولاد من المدرسة يبعتولي مع بنات اني اكلمهم ونتعرف وكده وانا ال دايما برفض اي علاقة من النوع ده عشان حرام يعني انا طول حياتي محافظة ع نفسي وف الآخر يجي حد يقولي ده حرام.. واللي استفزني اكتر كمان انه مش صريح وغامض . مرة يقول مشوفتهاش ولا بصتلها ومعرفهاش ومرة يقول اه بصتلها وشوفتها وعارفها . في ايه طيب !!؟
منه: اهدي بس ي أشرقت مش كده خلاص كفاية عياط اكيد فيه حاجه غلط ف كلامه . أشرقت:انا مش بعيط عليه هو مش فارق معايا انا بس الموقف نفسه ضايقني ليه عملت كده شيرين ليه؟؟ وبعدين مين قاله حضرته اني معرفش الحرام والحلال هو مين عشان يقول عني كده .. منه: يبنتي اهدي ومتقوليش مش فارق معاكي عشان متكدبيش ع نفسك .. أشرقت:لاء مش فارق .. انتي مش سامعه قال اي قال مش فاكر الموقف ومعرفش هي مين ؟ هيكدب بقي من أولها !! وكل المرات دي ال كان بيروح ف السوبر ماركت كانت ايه يعني ؟ منه: والله متأكده ف حاجه مش مفهومه فالحوار . لو ركزتي شوية هتلاقيه ف البداية قال مش فاكر الموقف وانا مش ببص عليها ولا شوفتها . وبعدين رجع قال اه فاكر الموقف وفعلاً شوفتها وقتها وبصتلها وكده .. اهو يعني هو بنفسه معترف انه كان بيبص عليكي هو متردد اكيد جات فجأة حد يقوله انت بتبص ع البنت دي وخليت عموفتحي يكلمها عنك . الموضوع مش سهل ع فكره تلاقي فجأة حد كلمك ف حاجه زي دي وجاب صفحتك كمان هو محدش يعرفه أصلاً ف المنطقة كلها . ف أكيد متفاجئ ..ولو لاحظتي كمان انه بيقول مش جاهز ل ارتباط دلوقتي او خطوبه لسالي سنتين ف الكلية ولسه معايا مشروع تخرج وظروفي ماتسمحش بحاجه زي دي دلوقتي .. وعمال بيقول ف أسباب ومحدش طلب ده منه ولا حد سأله عن حاجه زي دي .. وبيقول مش هيتكلم تاني غير لما يبقي فعلاً جاهز.. كل ده يثبت انه يعرفك واكيد هو كمان ال كلم عموفتحي عنك ده كفاية خلاكي تشوفيه وقالك اهو الشيخ ياسين ال كلمتك عنه .. أشرقت:مش مهم كل ده ولا عاوزه اعرف حاجه منه ده انسان متناقض .. مش مهم أي حاجه ولا فارق معايا حد . لو كنا من نصيب بعض ربنا هيجمع بينا ولو مش لبعض خلاص هيبعده عني . انا اللي مضايقني اكتر حاجه احساس قلبي انا اول مره احس ان في حد مهم كده عندي . احساس قلبي عمره ما كان كذب .. مضايقني انه لاول مرة قلبي يخوني ويحس بالشخص الغلط .. منه: مش شخص غلط ولا حاجه والله احساس القلب هو دايماً الصح سيبها ع ربنا هيعدلها .. أشرقت : ونعم بالله ..
كلام منه كان اكتر حاجه طمنتني ولما فكرت ف كلامها لقيت عندها حق .. واحساس قلبي كان بيقولي دي لسه البداية لحاجه كويسة هتحصل معرفش هي ايه .. بس كان في صوت بيتردد ف دماغي اني لازم ادافع عن نفسي ومينفعش اني اسكت ع ال عملته شيرين وده هيخليه يفتكر انه انا ال طلبت كده منها واني مش كويسة بس انا مش كده .. انا اكتر حاجه بضايقني ان حد يفهمني غلط .. جوايا صوت بيقولي لازم تكلمية وتفهميه انك برا الحوار أصلاً .. معرفش اذا ده صح ولا غلط بس انا هصلي استخارة واشوف. .
عدي حوالي اسبوع وانا مكنتش بنزل خالص وقت الصلاة بس كرلولة كان مازال بيروح عند عموفتحي وبيستني .. كنت بتعمد منزلش خالص مهما حصل.. صليت استخارة عشان اشوف اذا صح لو كلمته اوضحله الحوار كله ولا لاء ولقيتني لسه الفكرة موجوده ف دماغي ومنه قالتلي عادي يعني انتي كده كده هتفهميه ال حصل بس .. اطمنت طول منا صليت استخارة وحصل فعلاً كنت قاعدة بالليل فجأة مسكت الفون وفتحت الفيسبوك ودخلت كلمته وكتبتله ..
السلام عليكم ورحمة الله وبركاته انا أشرقت ال كلمتك عني صاحبتي شيرين من كام يوم انا بس حابة اوضح اني مش انا اللي طلبت منها تكلمك ولا تسألك عني ولا أي حاجه .. معرفش هي عملت كده ليه .. وهي غلطت لما قالت اني بفكر فيك وخدت كلام عموفتحي جد .. انا لا فكرت ولا خدت كلامه بجد لانه كان واضح كلامه مش منطقي . هو كلمني عنك كذا مرة قبل ما يخليني اشوفك ل اول مره ف السوبر ماركت .. بس انا ال كنت برفض عشان دراستي .. لكن هو مكنش بيبطل كلام عنك سواء بطريقة مباشرة او بتلميح منه .. وتاني يوم بعد الموقف ده قولتله ازاي تقولي كده قدامه يمكن يفهمني غلط .. ف قالي لاء متخافيش هو مش من النوع ده وطيب .. وع فكره مقلتش خالص اني عاوزه اتعرف عليك . انا عارفه ان ده حرام ومش من حقك تقول ده حرام ولا حلال انا عارفه كويس اي الحرام وايه الحلال ومش محتاجه توضحلي ده .. وبعدين مين قال ع خطوبة أصلاً !! معرفش يعني كمان شيرين وصلتلك ايه تاني عني .. آسفة اني طولت وبتمني تكون فهمت كلامي كويس ..
بعدها بحوالي ساعتين لقيته رد عليا وقال :
وعليكم السلام ورحمة الله وبركاته انا فاهم حضرتك كويس ومفيش أي حاجه غلط عنك جات ف دماغي انا آسف ع الموقف ال حصل الغلط من عندنا احنا ف انا آسف مرة تاني وإن شاء الله هكلم عموفتحي عن الموضوع ده عشان ميحصلش ان حد يتأذي أو يضايق ..
فقولتله : تماام شكراً لحضرتك . فرد : الشكر لله . وبس كده محدش فينا بعت تاني ..
