سمعت كلام منه وبقيت اتعمد أطلع السطح وقت الصلاة عشان اشوف كرلوله وهو جاي الصلاة واعرف اعمل ريكورد للصلاة براحتي بدون ما تكون شيرين موجودة .. الاول كنت مضايقة عشان الدور السادس وكده .. ومش عارفة اشوفه كويس زي ما كنت ف اوضتي بس اكتشفت ان كده احلي بكتير عشان محدش يلاحظ حاجه واكتشفت اني بحب مشيته جداً جداً .. بحب جداً اشوفه وهو طالع من شارع السكن بتاعه .. بحب اشوفه وهو ماشي المسافة دي لغاية ما يوصل للجامع . هو صحيح شارع واحد بس حبيت مشيته جدا جدا اول مرة اركز ف مشية حد كده 😍 وأحلي حاجه كمان ان السطح مفهوش حد تقريباً وصوت الريكورد بيبقي واضح كويس بدون صوت اي حد حواليا .. مازلت لسه ف فترة الامتحانات ومخلصتش بس بجد مش عايزه اخلص انا اول مرة فحياتي احب الامتحانات كده واول مرة اذاكر بتركيز كده .. كنت بحب جداً وقت البريك عشان بسمع فيه ريكورد قرآن بصوت كَرْلُولَه .. ووقت ما بنام كمان كنت بنام ع صوته . طبعاً بكون حاطه الهاند فري ومش سامعه صوت غيره لحد ما انام واول ما اصحي برضه اول حاجه بسمعها صوته .. كنت بحاول منزلش ف الفترة دي خالص . معرفش ليه ! يمكن عشان لازم اذاكر كويس واركز ف مستقبلي . خاصةً انا مبحبش الغش ابداً وعمري ما اعتمدت عليه . ومش عايزة بعدين الوم نفسي اني اتعلقت بكرلوله اكتر من دراستي . عاوزاه يبقي هو السبب ف تفوقي اكتر .. ونجحت ف كده .. بس شيرين طبعاً فهمت عكس كده . كانت فاكرة اني خايفة من انها تنزل معايا زي ما قالت وتكتشف ان كرلوله مش معجب بيا ولا حاجه من دي . بس انا من جوايا متأكده انه حاسس بحاجه ناحيتي زي ما انا حاسة كده بالظبط . مش معقول شعوري ده يبقي مش متبادل. أصل ازاي ف الأول مكنتش بحبه خالص ولا حتي بحب اسمع صوته وكنت شايفه صوته مش حلو. دلوقتي سبحان الله صوته ده معرفش انام غير وانا بسمعه . اكتر حاجه في حياتي بتطمني لما بسمع قرآن بصوته 💙 ازاي فجأة ده حصل ! ازاي بكون مخططة اني لاء مش هنزل مهما حصل ولكن اول ما اشوفه بحس اني لازم انزل . مش مشكلة بقي معايا فلوس او مش معايا . حتي لو آخر خمسة جنيه في جيبي هصرفها برضه عشان اشوفه. طب ليه قلبي بيدق بسرعه اوي اول ما اشوفه وحرفياً رجلي بتخبط ف بعض و بدوخ واتوتر .. اعراض كده غريبة شبه اعراض لما بنخاف من حاجه مش لما بنحب خالص . المشاعر عندي بايظة ولا ايه!! 😂
كمان هو ازاي بيعمل كده اول ما يشوفني .. اقصد عمره ما كان بيقعد المدة دي مع عموفتحي ولاء كمان كل يوم !! طب ليه بيتوتر كده اما بيشوفني . لا يقل توتر عني .. والحاجه الغريبة اكتر ليه لما بدخل السوبر ماركت لو كان بيتكلم بيسكت خالص ومش بيتكلم طول منا موجودة . لكن لو اي بنت تاني بيتكلم عادي!!؟
حاجات كتير غريبة بتحصل . أغربهم شعور قلبي القوي ناحيته اللي انا مدخلتش فيه وكأن ربنا سبحانه وتعالي فجأة زرع حبه ف قلبي كده بدون اي جهد مني ! معرفش بس انا متأكده ان هو كمان اكيد حاسس بحاجه ناحيتي . مش بيقولوا في علم النفس . احساس القلب دايماً صح . واللي حاسس انك بتحبه هو كمان بيحبك ! انا مصدقة ده جداً ..
جات شيرين ف يوم وأصرت انها تنزل معايا هي ومنه . انا معترضتش بصراحه كان نفسي انزل اشوف كرلوله ليا كتير مشوفتوش غير من السطح بس .. ده غير هو كان طول المدة اللي مش بنزل فيها يقف ف الشارع لوحده فترة كده ممكن نص ساعه او أكتر .. ودي حاجه كمان أثبتتلي انه بيكون مستنيني انا انزل. في البداية كنت بفتكره مستني حد من اصحابه وكده . بس كان بيمشي لوحده .. وبصراحه مش هاين عليا اسيبه كده .. اول مرة احس ان وجودي او غيابي فارق لحد . فققرت هنزل وانا كنت فرحانة اوي ..
شيرين: يلا بقي ي أشرقت عشان ياسين من بدري عند عموفتحي ليمشي .. منه: لاء متقلقيش مش هيمشي ..
كنت بحب ردود منه اوي وكأنها واثقة من مشاعر ياسين أكتر مني ..
روحنا السوبر ماركت وكالعادة كنت متوترة جدا وانا داخله بس المرة دي كنت هموت واضحك ع كرلوله بس كتمت ضحكتي عشان مكسفهوش حرام 🤭
هو كان قاعد كعادته ع الكرسي ف مواجهة الباب وعموفتحي قاعد قصاده وكرلوله كان بياكل فشار .. واول ما شافني وانا داخلة معرفش هو اتوتر ولا اي بس كيس الفشار وقع منه 😂😂 كان شكله بيضحك . وكأنه طفل صغير لسه مبيعرفش ياكل 😂 .. منه مسكت ايدي عشان مضحكش اصل هي عارفاني تافهه ازاي والمواقف دي بضحكني ... شيرين طول الوقت كانت مركزة ع كرلوله عشان تتأكد زي ما هي عايزة .. كان نفسي ابص عليه بس مقدرتش زي كل مرة ..
بعد ما خرجنا اول حاجه عملتها ضحكت جداً وكأن المشهد اتعاد تاني قدامي .. منه: اضحكي اضحكي عارفاكي كتماها من بدري 😂😂 بس بصراحه شكله كان بيضحك.. يعيني حرام عليكي اللي بتعمليه ف الراجل ده هي وصلت اعصابه تسيب للدرجه دي . شوفتيه ي شيرين اول ما شاف أشرقت اتوتر ازاي ووقع منه الفشار ! . شيرين: ايوه كنت مركزة جدا معاه وفعلا ي أشرقت كان بيبصلك انتي بس . انا متأكده انه بيحبك والله . ربنا يجمعكم قريباً يارب ي قلبي ..
